MIN HMANGAIH VE EM?

June 16th, 2013 10:15 pm by Leo dtea

Hmakhawsang ata tawh, i thlahtu te atang tawh in keimah nena inzawmna nei tur hian eng thil nge maw thleng le! Hlauhlawp in ka hnen ah i rawn tlu lut a, kei in ka lo pawm che a. I tam loh nan ka laka ei tur lo chhuak te ka hlui fo thin che a. Silhfen ngaihtuah nachang i hriat hma ata tawh ka thuam thin che asin. Tichuan hlim taka i awm ve na tur in engtik lai mah in ka dal ngai lo che ania. I tel lo chuan ka kim loh avang hian, i lak ah hmangaihna ka phut asin..
Min hmangngaih ve em??

Hlauhlawp a rawn tlu lut i nih avang in huaisen ka zirtir che a, huaisen bakah thil hrang hrang i lo thiam tak hnu hian, i zahmawh thleng a thup sak ngai i nih zia i inhrechhuak a, a tha e. Heng te avang hian i lakah thildang engmah ka phut lo, hmangaihna chauh lo chu.
Min hmangaih ve em??

Ngaiteh aw mizo…
Tunah chuan i lo fing in, hmanlai ai chuan rem i lo hre tawh zawk a, i dai zau in i changkang ta hle mai.
Mahse khawnge i hmangaihna chu le??

Aw mizo, i thatna te i ram lakah hian i dahtha a, ngilneihna ai chuan tharum hmachhuan in i unau te lakah ro i rel ta si. I sakhuana dah tha in hlemhletna bawih ah i intulut a, i kohamna hian chin tak a nei si lo. Tlawmngaihna chang chawi in i aia thil ti thei zawk te i ti lawm a, i tawngkam tha chuan sial chu a man ngei e! Ka tana i thahnemngaihna erawh, hmeithai leh rethei naufa te tana tawrhhlehawm tawk chauh a ni si. I sakhuana hmatheh in puithu tak in i awm a, i rorel erawh ramsa rorel ang chauh a ni thung. Ka ram ka hmangaih ti in, ka hming hmer meuh in ‘MIZORAM’ ti thin mahla, ka taksa peng te sat thla in ka hlim i ring si..

Mi chhawn thei an awm ang em le??

Aw mizo harh la, tho ta che. Ding la hma lam pan in kal teh le. Ka ko che a, ka ko mawlh mawlh reng che a nia, min chhang rawh le..
MIN HMANGAIH VE EM???

(NB: A vawikhat nan YMA Day ah paws ve ka tum a, mahse ka ti thei ta lem lo. Fb group pakhat ah chuan ka paws tawh a, tlem ti danglam in ka rawn thehchhuak ve thruai e)