June 2013, Mizo(ram) Diary

July 1st, 2013 5:59 pm by chhana

1st. Saturday: India ram pumah petrol leh diesel man tihsan a ni a, Mizoramah pawh hman ve nghal a ni. Aizawlah chuan petrol pangngai littre khat Rs. 62.83/- niin, extra premium chu Rs. 71.30/- a ni thung. Diesel pawh litre khat Rs. 49.57/- a ni.

2nd. Sunday: Salvation Army chuan zu leh zûk leh hmuam do ni an hmang. He ni pual hian corps hrang hrangah zu leh zûk leh hmuam chungchang leh a ṭhat lohzia an inzirtir.

3rd. Monday: Khatla Bethel-a Dr. Lalsawma Hrahsel te verandah-a dah bullet bike leh karizma leh, scooty pahnihte chu a kâng a, siamṭhat ngaihna awm tawh lo khawpin a kâng chhe hlawm. Lirtheite hi hâl luih a nih ngei rin a ni.

4th. Tuesday: Taxation department chuan contractor-te’n awlsam zawka Value Added Tax (VAT) an pek theihna turin Mizoram Value Added Tax Act, 2005 hnuaiah ‘Composition Scheme for Works Contract’ a duang chhuak a, chumi chungchang chu I&PR auditorium-ah contractor-te an zirtir. He scheme ang hian contractor-te’n an contract pumpui (total value of contract) aṭangin 2% chhiah an pe dawn a ni.

5th. Wednesday: World Environment Day a ni a; he ni hi Aizawlah chuan Assembly Annexe-ah leh hi Mizoram University-ah te hman ve a ni.

6th. Thursday: Aizawl South-II MNF block conference neih mekah he hun hmanpuitu MNF president leh chief minister hlui ni bawk Zoramthanga chuan, MNF sorkar laia Aizawl khawpui lirthei tâwt lutuk leh traffic jam tiziaawm tura an hmathlir, ‘kawng chhâwng’ siam chu MNF-in sorkarna a chan leh veleha an hmalakna lian tham leh bul ṭanna hmasa tur a nih thu a sawi.

7th. Friday: Aizawl Theological College (ATC) chu Pathian thu zirnaa doctorate degree thlenga zir theihna turin hawn a ni a; he huna khuallian, chief minister Lal Thanhawla chuan, “Kan awmna apiangah Pathian tana rawngbawltu kan ni thei a. Sakhaw lian ber ber pathum karcheh karah Chanchin Ṭha puang turin Pathianin min ko a, kan chhâng ṭha hle a ni,” a ti. Doctoral Centre atana ATC hawnna inkhawm hi Synod moderator, Rev. Lalramliana Pachuau-in a kaihruai a ni Kum 2011-a Synod Inkhawmpui chuan ATC-a doctor of theology (D.Th.) zirna a awm theih nana hmalak a rel a, chumi ang chuan, kum 2013 aṭanga D.Th. zirna hawng turin Senate of Serampore-ah dilna an thehlut a ni. Senate of Serampore-a Committee on Acedemic Administration pawhin kum 2012 khan ATC chu a hmunah an enfiah a; Committee-in subject pathum – New Testament, Chriatian Theology leh Missionlogy-ahte D.Th. zirna hawng tura rawtna a thlen hnuah, Serampore College (University) Senate meeting, February, 2013-a Acedemy of Integrated Christian Studies-a neih chuan ATC-a D.Th. zirna hawn chu a pawmpui ta a ni. Aizawl Theological College hi kum 1907-a din a ni a, hun rei tak chhung B.Th. chauh zir theihna a nih hnuah, kum 1994-ah B.D zirna hawn a ni. Kum 2002-ah Christian Theology subject-ah M.Th zirna hawn leh a nih hnuah, New Testament, Missiology, History of Christianity, Religion leh Old Testament-ahte M.Th zirna hawn belh leh a ni bawk .

8th. Saturday: Malsawmtluangi (13) d/o Lalduhawmi leh Lallawmawmi (13) d/o Hmunsiama, Lengte khua ve vete chu Dialdâwk luiah an tla hlum. Malsawmtluangi leh Lallawmawmi te hi chengkawl khawrhin Dialdawk luiah an kal a, Malsawmtluangi nau Vanrosanga tuia tla chhanchhuah an tumna lamah an chesual ta a ni.

9th. Sunday: Zemabawka, Aizawl-Lunglei road-ah city bus MZ 01C-6952 inher rem tur chuan a bula alto car ding lai chu kawngthlangah a nek liam a; car hian a thlang lama chenna in a deng chhe nual a ni. Mihring thi leh hliam erawh an awmlo hlauh.

10th. Monday: Keifang joint YMA chuan Aizawl Civil Hospital-ah thisen unit 109 an pe a, a petute hi mipa 97 leh hmeichhia 12 an ni .

11th. Tuesday: British high commissioner to India, James Bevan chu Mizorama zan hnih riak turin Aizawl a lo thleng .

12th. Wednesday: Mizoram Pig Producers’ Co-operative Federation (PIGFED) Ltd. chuan Synod Conference Centre-ah general conference an hmang a; NLUP Implementing Board vice chairman, PL Thanga’n a hmanpui. PL Thanga chuan, kum 2007 aṭanga 2012 inkara PIGFED-in vawk note a thar chhuah zat enin, kum nga chhunga a thar chhuah punna chu ram chhung mamawh thlirin a tâwk lo hle tih a sawi a, “Vawk tipung turin nasa taka ṭan lak a ngai a ni,” a ti. NLUP hnuaiah vawk vulh thlang mi ṭhahnem tak an awm chungin, tun thlenga vawk note leh a sa ei tur indaih loa kan la awm chu thil zahthlak a nih thu a sawi bawk. AH&Vety director, Dr LB Sailo chuan, Aizawl khawpuiah thla tin vawk 3,117 vel leh Mizoram pumah kum 2012-13 chhungin vawk 79,574 talh a nih thu a sawi bawk. PIGFED hi June 1989-ah din a ni a, tunah hian society 164 an tel mek a ni.

13th. Thursday: Kar tin chhuak chanchinbu, Lelte Weekly chuan Aizawl Press Club-ah an kum 30 tlin an lawm a, Education Minister Lalsawta’n hmanpuiin, Mizo ṭhalaite tana Lelte chanchinbu thil tih tawhte chu ropui a tih thu a sawi. Lelte kum 30 tlin lawmna inkhawm hi Chief Information Commissioner, Lal Dingliana, I&PR director Jim K Chozah, PIB dy. director Mangjangam Tauthang leh MJA president C Lalrambuatsaiha ten an hmanpui a; zaithiam pathum C.Luri, Vanlalsailova leh VLAM group-te an zai bawk. Lelte Weekly hi June 10, 1983-ah chhuah ṭan a ni.

14th. Friday: Damlo-te tana thisen pek ni, World Blood Donor Day a ni a; he hun hi Vanapa Hall-ah hman ve a ni a, thisen petute pawh chawimawi an ni. He ni puala inkhawm hi Health Secretary, Pi Esther Lalruatkimi’n a kaihruai a, khuallian, Parliamentary Secretary, Lt.Col. ZS Zuala chuan, thisen chu mihringte siam theih loh, mahse a thlawna hmuh a ni a, mi nun chhan nana thisen pek chu a ropui a, thisen petute chu an zahawm avangin an puala ni siam pawh thil tih awm tak niin a sawi. He inkhawmah hian Mizorama mipa zinga thisen pe tam ber dawttu, C. Lalremruata, Electric Veng leh hmeichhia-a pe tam ber, Pi Rebecca Saimawii, Khatla-in thisen pek pawimawh zia leh tangkaizia sawiin, thisen pek uar deuh deuh turin kal khawmte an sawm. April 2012 – March 2013 inkarah thisen unit 22,358 pek a ni a, chung zinga unit 1,326 pek bik nei leh rulhna (replacement) a ni. A thlawna pek zat chu 94.07% niin, tuna NACO-in target a siam, 95% chu 0.63%-in a tling lo. Kum 2012-13 chhungin blood donation camp ṭum 456 neih niin, chutah chuan thisen unit 18,065 pek a ni a, camp vawi khatah unit 39.62 zel pek ang a ni. Pawl anga thisen pek zingah, kohhran ṭhalai hminga pek a tam ber a, kohhran pawl hrang hrang ṭhalaite hian unit 8,309 (39.50%) an pe a ni. YMA hminga pek unit 2,798 (13.30%), zirna-in hminga pek unit 4,285 (20.30%), pawl dang hminga pek unit 1,960 (9.30%) a awm a; mimalin a thlawna an pek zat chu unit 3,680 (17.40%) a ni bawk. Kum 2012-13 chhunga thisen pek zat hi 2011-12 chhunga pek zat aiin unit 454-in a tlem zawk a; kum hmasa (April 2011 leh March 2013) inkarah thisen unit 22,812 pek a ni a, chung zinga unit 20,765 (91.03%) chu voluntary donation niin, unit 2,047 chu replacement a ni. Kum hmasaa voluntary donation atana NACO target siam chu 90% a ni a, khûm a ni.

15th. Saturday: Mizorama tlawmngai pawl lian ber YMA Day a ni. He hun hi Branch tam berin faina beihpui thlakna hun atan an hmang a, Branch engemawzatin midang tan a thlawna thisen pe in, mi harsa In sak sak te, vengchhunga mi chhumchhia leh chanhaite tanpui nan te, intihsiakna chi hrang hrang atan an hmang hlawm a. Branch thenkhat chuan an Branch dinchampha lawmna hun atan an hmang bawk. Central YMA President T Sangkunga chuan YMA Day pual hian thuchah a tichhuak a, a thuchah ah chuan ‘kan rama chhhiatthutna leh vanduaina chi hrang hrang lo thlenga kan hmalakna te hian Mizo tlawmngaihna san zia a lang a ni,’ a ti. Central YMA hruaitute chuan YMA Day hi hmun hrang hrangah an hmanpui a, Central YMA President, T Sangkunga chuan Khawbung leh Khuangthingah hmanpui a ni. Young Mizo Association hi a tirah chuan Young Lushai Association tih hming pu in June ni 15,1935 khan din a ni a, October ni 7,1947 khan YMA tia thlak a ni. YMA (YLA) hruaitu hmasa ber te chu President Rev. L.Evans (Pu Niara), Vice President Mrs. K.Hugh (Pi Zaii), Secretary Pu Ch Pasena, Assistant Secretary Pu Vankhama leh Treasurer Rev. Edwards (Zorema Pa) te an ni. YMA hi All India Organisation niin Mizoram pawn Manipur, Assam, Nagaland, Meghalaya leh Tripura-ah te Branch din a ni tawh a. Societies Registration Act (Act XXI of 1860) hnuaiah Rgdn. No. SR4 of 1977 a ziah luh a ni.Tun dinhmunah YMA Branch 792, Group 46, Sub-Hqrs. 5 awmin, member 3,88,146 (nikum khawmpui inchhiarna report angin) an awm a, heng zinga 2,31,615 chu mipa an niin hmeichhia 1,56,531 an awm bawk.

16th. Sunday: Salvation Army Youth Sunday a ni a, he ni pual hian corp hrang hranga SAY-te’n hun hlimawm tak an hmang.

17th. Monday: Mizoram Human Development Society chuan Chaltlang Lily Vengah Local Council hriatpuiin Silpouline thahnem tak an sem. Hemi chungchanga an thuchhuahah Mizoram Human Development Society chuan, an Silpouline sem chu in thawm that nan leh mamawh danga hman atan niin an sawi a, an Society Chairman, Pu Adam K.Lalduhawma chuan ruihhlo bawiha tangte chhanchhuah leh retheih vanga hmeichhe buan chak lote tanpui a, kawng dika hruai chu an pawl thil ngaih pawimawh niin a sawi a ni.

18th. Tuesday: Mizoram Co-operative Fish Farming Marketing and Processing Federation Ltd. (ZOFISFED) chuan Agriculture conference hall-ah Annual General Assembly-cum-Awareness Campaign for Integrated Fish Farming Programme an hmang a, Cooperation minister, JH Roṭhuama’n a hmanpui. JH Roṭhuama chuan, Mizote zingah sangha kháwitu an pung zel a, phai lam aṭanga lak luh ni lo, mahni ram chhunga mi ngei sangha tharlám tak mipuite’n ei tur kan nei ṭan tawh tih a sawi. ZOFISFED hi October 29, 1998-a din a ni a, a hnuaiah hian primary fisheries cooperative society 22 an awm mek. ZOFISFED hian kum 2008 aṭangin demonstration-cum-fish seed parm pariat an enkawl a, chung zinga pathum chu hman mek niin, panga chu ṭhuam that tum mek a ni. ZOFISFED hian an hruaitu thar tur an thlang nghal a, chairman-ah F.Lalnienga leh vice chairman-ah CT Sanga an thlang a ni.

19th. Wednesday: Excise & Narcotics Enforcement Staff-ten Zokhawthar atanga Aizawl pan Maxi-cab pakhat chu Zemabawk Forest Check Gate-ah lo endikin, heroin gram 2 an man a, a neitu hi Lalhunvela kum 32 mi, tun hnaia Central Jail atanga tlan chhuak a ni a, ND&PS Act, 1985 hmangin thubuai khirh tak siamsak a ni. Excise & Narcotics Department hotute hnena a insawi dan chuan Lalhunvela hi Zairema fapa, Champhai Venglaia awm a ni a, Champhai Venglai YMA hruaitute erawh chuan hetiang mi hi an vengah an awm lo niin an sawi thung a ni.

20th. Thursday: MLA hlui, Zoduha (73) s/o Zawia [L] chu Zamuang khuaa an inah a thi a, a nupui Lalbiakveli leh an fate pahnih leh an tûte a kalsan. Zoduha hian kum 1975-ah politics-ah lutin Congress party a zawm a, kum 1984-a inthlanah hnam tlem zawkte aiawhin nominated member-ah dah a ni a; kum 1987-a Mizoram state a pian thlengin MLA a ni. Kum 2005 aṭangin thisen sáng leh zunthlum a nei a, June 15, 2013 aṭangin khum betin a ná a, tun hi a lo thleng ta a ni.

21st. Friday: Zirtiri Residential Science College chuan Electric Veng indoor stadium-ah Cultural Day an hmang a; an hun hmanpuitu, parliamentary secretary Lal Thanzara chuan zirlaite chu an nitin incheinaah Mizo inchei dan seng lût tam turin a fuih. Cultural Day hi chhawng hnih a hman a ni a, zirlaiten Mizo hnam lâm hrang hrangte an entir bakah, zaite ngaihthlak a ni.

22nd. Saturday: YMA Central Executive Committee, ṭhukhawm chuan, MLA nih tum leh Central YMA hruaitu nih beisei mi ṭhenkhatin YMA programme remchanga hmanga khualliana insàwmtir an ching nia sawiin, an ngaimawh thu an sawi.

23rd. Sunday: June 21, Zirtawpni aṭanga Tuikual Presbyterian Kohhran biak-ina Mizoram Synod-in Revival Meet a buatsaih chu a ṭiak ta. He inkhawmpuiah hian thupui chu ‘Harhna dik’ tih a ni.

24th. Monday: Jamu & Kashmir, Srinagar khawpui daia Bemina bulah Hizbul Mujahideen firfiak ten 35 Rashtriya Rifles an lambun a, sipai pariat thiin, 18 an hliam. Mi firfiakte hian sipai rifle leh grenade hmangin an bei a, sipaite pawhin an kâp lêt a, sipaite’n na zawka an beih lêt hmain an tlanchhia a ni. He inbeihnaa thi zingah hian Mizo sipai pahnih zingah Hav. Lalrohlua (36) s/o C Biakmawia, Kelkang, Champhai district leh L/Nk. J Lalrinngheta (34) s/o J Lalṭhuama Tuidam, Mamit district-te an tel a; hliam zingah hian Mizo sipai 2 Naik David Lalduhawma, LT Muana fapa, ITI Veng, Aizawl leh Naik C.Lalrimawia tun hma lama Bethlehem Venga awm thin, Armed Veng South-a insawn tawh, Mualkawi khua-a C.Rallianvela fapa te an tel bawk.

25th. Tuesday: Mamit DC, V Lalremthanga hoin DC conference hall-ah Mamit district ramri chungchang ngaihtuahin mi pawimawhte an ṭhukhawm a; mamit district ramri atan kum 1975-a sorkarin Mamit Sub-Division area tura a ruahman chu an pawm. Meeting-ah hian, district inawpna leh inrelbawlna felfai zawka a kal theih nan district boundary chungchanga harsatna awmte leh awm theite sawiho a ni a; Mamit district-a inrelbawlna a kal theih nan Mamit district boundary chu kum 1975-a sorkarin Mamit Sub-Division area tura a ruahman ang ni se, an ti. District boundary inkalthelha department hrang hranga hmalakna awmte chu department kaltlanga siam rem tura rawtna sorkarah thlen ni se, an ti bawk.

26th. Wednesday: International Day Against Drug Abuse & Illicit Trafficking a ni a; he ni pual hian Excise & Narcotics mite leh Police-te ruihhlo man, Rs. 22,79,00,478/- hu chu New Secretariat Complex-ah CM, Pu Lal Thanhawla’n a hal ral. Excise & Narcotics Department chuan heng ruihhlo thahnem tak hal ralna hi a buatsaih a, hal ral hma inkhawm tawi buatsaih, Excise & Narcotics Commissioner, Pu Lalbiakmawia Khiangte kaihhruaiah CM chuan, Mizo hnahthlak intiten Mizo te vek an run a, an rawk mek a ni, a ti a, Mizoram chhehvel chu ram buai a nih avangin ram ralmuang ber hi damdawi hman sual theih tawlh rukna atana hman a ni chu vanduaithlak a tih thu sawiin, Mizoram chhe lai apiang chu ram leilung faten an siam that tur a nih thu a sawi bawk. Tukina ruihhlo hal ral hi Heroin No.4 Kg. 3 chuang, Ganja kg. 275, Pseudoephedrine kg. 3,539, parvon Spas mum 7,71,010, Proxyvon mum 19,738 bakah ruihna atana hman thin, damdawi dang tam tham tak a ni a, a hal ralna-ah hian Vety Minister, Pu NK Chakma, Govt. Dy. Chief Whip, Pu RL Pianmawia, Parl. Secretary, Lt.Col. Z.S Zuala leh mi pawimawh dangte pawh an tel a ni.

27th. Thursday: Pu R. Lalzirliana Minister Home RD etc. chuan Zawlnuam-ah Hachhek Constituency huamchhunga mi harsa te hnenah inchung tur Rangva Bandle 4 theuhvin a sem. Semna inkhawm Thuampui Veng tualzawla, buatsaih Pu Lalnundika, BDO Zawlnuam kaihhruaiah thusawiin RD Minister chuan sawrkar in mi harsa, inchung tha pawh nei lote dinhmun hria-in theihtawp a chhuaha, Rural Development hnuaiah Rural Housing Scheme atangin chhungkua engngemaw zatin Rangva an dawng thei hi a ropui hle a ni tiin tun tumah hian chhungkaw 100 laiin dawngin a, bial huap ah chuan a dawng tam ber an nih thu a sawi bawk. Pu R. Lalzirliana Home, RD etc Minister hi Pu Dingluaia Commandant 4th IR Bn, Pu Henry C. Lalrawnkima PS , Pu C. Lalnunkima Deputy Director I&PR, Police hotute bakah Party hruaituten an tawiawm a ni.

28th. Friday: Lunglei District MJA Member, Lalbiaksiama Kawlni (57) chu kal na avangin Lunglei Ramthar Venga an chenna inah a boral. Lalbiaksiama Kawlni hian a nupui Zasangi leh fanu pakhat a kalsan a, amah hi Lunglei Journalist Association hruaitu hlun, President leh chanvo dang zawng pawh chelh kim tawh a ni a, tun hma lam khan Lunglei-ah ni tin chhuak chanchinbu, ‘Lengzem’ a chhuah thin a, he chanchinbu hi a tihtawp hnuah ZS Cable TV-ah Sub-Operator niin mipuite rawngbawl hna a chhunzawm zel a ni.

29th. Saturday: HPC(D)-ten an demand area chhunga YMA din an khapna, June 25, 2013-a an sût hnuah, YMA Tuisual group hruaitu ṭhinte chu New Vervek-ah an inhmukhawm a, YMA din leh dan tur chungchang an sawiho. Sawihona hun hi Tuisual group YMA president, LK Mawia’n a kaihruai a; an group huam chhungah YMA din leh turin Central YMA office-a group leh branch YMA seal an lo thehluh tawhte chu a rang thei ang bera lak ni se, an ti. Tuisual group YMA huam chhungah hian YMA ṭhiah a nih hnuah khaw eng emaw zatah Youth Association din a ni a, inthlanna-te pawh neih a ni. Youth association chu ṭhiah a, YMA branch din ṭhat tur nge, Youth Association chu YMA anga pawm turin CYMA ngen tur tihte an sawiho leh dawn a ni. Hetih lai hian, HPC(D) demand area tho, Tuivai group YMA huam chhunga YMA branch hrang hrang zinga a tam zawk chu an indin thar leh tawh a ni.

30th. Sunday: Mizoram Baptist Kohhran chuan BCM Salem, Lunglei-ah Missionary thar panga a tirchhuak. Heng missionary tirh chhuah takte hian kar hmasa lam khan BCM Office ah Oreintation training an lo nei tawh a, Missionary Tirchhuah Inkhawm hi Rev.B. Lalrinawma, Mission Coordinator-in a kaihruai a, BCM President, Rev.F. Sangvela’n Pathian leh BCM aiawhin a tir chhuak a ni. Tirhchhuah te hnen atangin Testimony tawi ngaihthlak a ni bawk.Heng Missionary thar panga tirhchuahte hi June 13, 2013 a Mission Board-in a lak an ni a. Beisei dan chuan July 10 hmaa an thawhna hmun theuh thleng tura tih an ni. Missonary tirhchhuah te hi Tv. Lalsangzuala Hnamte Arunachal Far East field-a Namsai khuaathawk tur, Nl. C. Zodinmawii Tripura field-a Elem English School, Dulukma-ah Evangelist Teacher a awm tur, Pu HS.Zodingliana Tripura field-a Elem English School-a thawk tur, Nl. Lallungawii Tong, Nghalimlui-ah Evangelist Nurse hna thawk tur bakah Nl. Mary Lalmuanpuii, Tuichawng a Evangelist Nurse hna thawr tur te an ni.