mi(sual).com

Saptawng hi a pawimawh si a. Ziah ringawt bakah a tawnga tawng alo ngai ta foa. Kan changkan tawh ngaihtuahin Mizo tam tak, phaia awm leh awmlo pawh, saptawng hmang hleitheilo hi kan la kat nuk maia. Phaiah chuan lohtheih lohvin hman a ngaia, mahse rei tak lo awm ve tawhte pawh hi a tlangpuiin kan nal zek zawk lo thin hle. Vai ho hi an fakawmna chu an tawng milin saptawng hi an hmang maia. Chu chu a thenin ‘Hinglish’ an ti a. Sap ho chuan hriatthiam har ti deuh mahse zak map lovin an hmang thova. A tawng neitu zawkte chuan hriatthiam chin an lo nei maia.

Mizote pawh hian saptawng kan zir hian kan lam nalh leh nalh loh lam hi kan ‘care’ mah mah thina, kan thiam chak theilo niin a lang. Lam nalh loh (a zo, a thring) min tih kan hlaua, mahse kumkhua pawhin kan lam ‘NALH’ tak tak thei dawn si lo. Ka sawi duh chu saptawng hi chu a ‘universal’ bakah a ‘flexible’ khawp maia. Hnamtin chitin hian mahni culture, ram leh zeizia milin duh duhin kan hmangin kan sawpkawi vel a ni ber. Awphawi hrang hrang lah a tam narawh. David Beckham pawh hi USA ah chuan “Ehe I tawng pai a ni maw nang chu? (You have an accent) an ti mai.
(more…)

Thuhma: Tun hnaiah hian ka va paws khat tak em!

Kamkeuna: Badam kan hmui rim nam chêk chêk chuan chaw ei pawh titui âwm rêng a ni. A rim ngawt pawhin hnar a tihtlai chuan a tak ngat phei chuan hrawk a fah lo thei lo. Buh chhum var siau, ei nuam tâwk chauha rum leh kil khata changkha chhum han pum khat lo let ngât nên, hmarcha pum hnih indi rial leh no lian ṭha pem pawma bete chhum han insuak vûm thar chu ka hmeh neih chhun a ni mai. Thirfiana buh ka hawlh niap niap lai chuan badam pakhat te hi a pâwlpuite aṭangin a rawn lum sawn vei nalh a. Chutia lum sawn ta chu tiin ka thirfian, lian ang hleih hlawih, nau hrâm deuh tawh pawh hrai ila, an helh âwl âwl thei ang tih tûr khawpa dawng hlâwk chuan ka’n lo rît hlawih a. A chan tûr rêng dawnpui loin ka chilh keh riap riap ta mai le. Mahse, chu thil chuan ngaihtuahna lamṭhuam thumah ding leh vei bo tawnin min hnutchhiah lek a lo ni.

Ṭhuam khatna: Chu ngaihtuahna lamṭhuam thum aṭang chuan ka bona chin ka han chhui lêt a, chhui chhuah zawh rual loha pik a ni tlat mai si. Ṭhuam khatna chuan nupui pasal neih hma nunah min hruai a; ngaihzawng a chhia a ṭha te pawh kan nei ve a, thu hnu dâwn nachâng hre ûk loin nupa kawp chawiah kan insiam leh mai ṭhin. Ṭhenkhat lah hian “I duhtui lutuk a nih kha, duhthusam te chu khawvêlah an awm tak tak lo” min ti mathlawn lo a. Mahse, he zilhna ânka nêm hi sîr lehlam aṭanga thlir chuan thang hlauhawm tak zuk ni thei a. A chhan chu, duhthusam hi awm ta lo se, ‘duhthusam’ tih ṭawngkam pawh hi a piang malêk ang. Chuvangin nupui pasal kan nei dâwn a nih chuan kan duhthusam ngei hi neih i tum ang u. Iai ru tak sia duh luihna hian he lamtluang kan zawhnaah hian hlîng leh khuarkhurum min daipui fo ṭhin.

(more…)