July 2013, Mizo(ram) Diary

August 3rd, 2013 6:36 pm by chhana

1st. Monday: Vanglaini chanchinbu buatsaih, Mizoram Year Review 2013 chu Zonet studio-ah Lengzem chanchinbu editor, Vanneihtluanga’n a tlangzarh. He lehkhabu-ah hian kum 2012 chhunga ni tina thil thleng langsar dah a ni a, phek 447-a chhah, Rs. 300/- man a ni.

2nd. Tuesday: Tlabung District Demand Committee (TDDC) huaihawtin Tlabung district siam an duhzia lantir nan mipuite’n Tlabungah kawng an zawh a; resolution pass in, “Kan ngenna hi a hlawhtlin hma loh chuan a ṭûl angin hma kan lâk chhunzawm zel dawn a ni,” an ti. Kawngzawhah hian Tlabung leh a chhehvela mipui 5,000 vel an tel a; Lunglei aṭangin Chhim Bial Chhantu leh NGO Coordination Committee hruaitute pawhin an telpui.

3rd. Wednesday: SSA Champhai district bultumin Champhai Venglai community hall-ah Champhai district chhunga Middle School 77 hnenah Computer Aided Teaching atan bialtu MLA TT Zothansanga’n computer a sem.

4th. Thursday: Industries department leh Clear & Opaque, ICA Group, Mumbai-te ṭangkawp chuan ni thum awh tur, thing deh dan zirna an buatsaih. Training-ah hian Clear & Opaque-in a thlawnin thing deh dan an zirtir dawn a, Industries department-in thil ṭul dang zawng a buaipui thung.

5th. Friday: Jonathan Lalruatzara (7) c/o Lalringa, Ramthar Veng, Lunglei chu an sikul, LT School bula ft. 5 vela sanga thîr kham aṭangin a tlain, lungah a lu a sawh a, a tlak hnu rei vak lo-ah a thi.

6th. Saturday: MHIP Day vawi 39-na a ni a; Mizorama MHIP branch hrang hrangte’n hlim takin an lawm a; MHIP gen.hqrs hruaitute’n branch hrang hrangah an hmanpui. MHIP Gen. Hqrs. President chuan Serchhipah hmanpuiin MHIP chu kohhran leh political party-ah tih bik nei lo a nih thu a sawi. MHIP hi July 6, 1974-ah din niin, a tirah chuan Mizoram Hmeichhe Insuihkhawm Pawl tih a ni a, May 31, 1999-ah Mizo Hmeichhe Insuihkhawm Pawl tia thlak a ni. Mizoram pumah branch 770 an awm mek.

7th. Sunday: Baptist kohhran chuan Missionary Day an hmang a, thupui chu ‘Chanchin ṭha mi tin tan’ tih a ni. Baptist kohhran hian kum 1939 aṭangin Tuikuk leh Takam zingah rawng an báwl ṭan a; kum 1970-a Assembly thutlukna angin, kum 1971 aṭangin Missionary Sunday an hmang ṭan a ni. BCM hnuaiah hian mission worker 884 an awm mek.

8th. Monday: Venghluia Central Hall bula Lalnuntluangi in, Assam type chu a kang a, thi leh hliam an awm lo a, a kan nasat zual hmain ṭhelh mih a ni. In chhung bungruate erawh a kâng chhe hman hle a, Rs. 1,10,000/- hû vel a kâng chhia a ni. In kan chhan hi electric current kal dik lo vang niin a lang.

9th. Tuesday: Director General of Civil Aviation (DGCA) chuan Lengpui Airport-a Instrument Landing System (ILS) chu a taka hman theih turin a pawm. ILS bun tawh chu tunhnai khan DGCA chuan an enfiah a, kum khat chhung a tan hman theih turin a pawm.

10th. Wednesday: Mizoram State Law Commission chu an chairman, R Lalrinawma, MLA hoin a pisa-ah an ṭhukhawm a; The Mizo Marriage Bill 2013, The Mizo Inheritance Bill 2013 leh The Mizo Divorce Bill 2013 te an thlirho. Bill pathumte sawihonaah hian siam rem ngaite siam rem a ni a; zau zawka sawihona (seminar/consultation) neih tura ruahman niin, chumi hnuah Assembly House-ah put luh a ni ang.

11th. Thursday: VC seal lem siam thubuaiah govt.deputy chief whip, RL Pianmawia, MLA chu Court-in anticipatory bail a dilna a hnâwlsak hnuah Aizawl Police Station-ah a inpe a; Court phalnain Central Jail-ah dah luh nghal a ni. RL Pianmawia hi April 17, 2013- ah North Serzawl VCP seal lem a siam hmanga a MLA fund, Rs. 1,00,000/- la chhuakah puhin Aizawl PS-ah FIR K Laldinthara chuan a thehlut a; chu chu June 28-ah chief judicial magistrate pawhin a pawmpui a ni.

12th. Friday: Lungleia Saikuti Hall-ah Clean Lunglei hawnna leh faina chungchang inzirtirna hun hman a ni a, Lunglei HPC vice chairman, Joseph Lalhimpuia’n a hmanpui. Joseph Lalhimpuia chuan, “Lunglei a lo fai theih nan UD&PA-te chauh ring lo a, naupang aṭanga puitling thlengin Lunglei tifai turin i thawk ang u. Lunglei khawpuiin hma a lo sawn theih nan tihtur kan nei a, kawngpuiahte bawlhhlawh paih mai mai loin, tifaitu nih i tum ṭheuh ang u,” a ti a; Lunglei a fai a, a thianghlim nana hma latu Lunglei DC, UD&PA. YMA, MHIP, MUP, MKHC, V/C -te leh sorkar official-te chungah lawmthu a sawi. Clean Lunglei hawnna hi Clean Lunglei chief organiser, C Lalhmingmuana’n a kaihruai a ni.

13th. Saturday: Vaivakawna Joint YMA Field hmun, tun hmaa neitu, Taramjit Singh Bhogal-a’n Mizoram sorkar hnenah zangnadawmna pe tura a phût chungchangah chief minister mawhphurhna latu, Home minister R Lalzirliana hoin sorkar hotute an ṭhu khawm a, Court-a ṭan lak dan tur an sawiho. Joint YMA field ram neitu, Taramjit Singh Bhogal chuan Mizoram sorkar chu zangnadawmna pe tura phûtin, District Court-ah a zualko a; Mizoram sorkarin square feet khatah Rs. 600/- hisâpa zangnadawmna pek a tum chu a pawm loh thu sawiin, a beisei zat pe turin sorkar a phût a ni. Meeting-ah hian Law & Judicial minister Lalsawta, UD&PA minister Zodintluanga, chief secretary L Tochhong, advocate general Biswajit Deb leh mi pawimawh dangte an tel a ni.

14th. Sunday: 7th. July atanga chin hriat loh a bo Lalthakima (30) s/o Laltluanga Vanzau chu an khaw hnuai Khiangzawl lui kama kham hnuaiah thi a hmuh a nia; vui nghal a ni.

15th. Monday: ICFAI University, Mizoram additional registrar atan ruat thar, Samuel L Dingliana chuan a hna thar a zawm. Samuel L Dingliana hi Trinity College, Ireland aṭanga a graduate hnuah IIM-Kozikode aṭangin MBA a zo leh a, industry lamah tawnhriat nei tawh a ni.

16th. Tuesday: Aizawl District Anti Tobacco Squad leh School Education department hotute chuan Thingsul Tlangnuamah joint inspection leh squad drive an nei. Thingsul Tlangnuam hi tobacco free village-ah puan a lo ni tawh a, chumi bawhzuina atan chuan squad drive an nei a, COTPA dan zawm a nih leh nih loh an enfiah a ni.

17th. Wednesday: LAD hmalaknaa cheng nuai 60.25/- sênga Champhai Park siam chu LAD minister, PC Lalthanliana’n a hawng. Champhai Park ram zau zawng hi bigha ruk a ni a; a chhungah hian swimming pool, rest house leh hall inkawp te, naupang infiamna thilte leh puipun ní atana hman theih bungrua hrang hrang a awm a ni.

18th. Thursday: Aijal Club-ah Mizoram State Sports Council (MSSC) General Body Meeting neih a ni a; hetah hian Aizawla MSSC enkawl khelmual pahnih – Ramhlun Sports Complex leh Republic Veng field-te chu inkhawmpui thlen nan leh mela tih nan hmantir tawh loh an rel. MSSC general body meeting hi ex-officio president, Zodintluanga, Sports minister-in a kaihruai a; Sports secretary R Lalvena, director Lalzirmawia Chhangte, MSSC hotute leh sports association hrang hrang hruaitute an tel bawk.

19th. Friday: Agape chanchinbu-in kum 25 a tlin lawmnan leh hriatreng nan ‘Thu ziak tha zual 50 thlan khawm’ lehkhabu chu Rev. P.C. Pachhunga, Executive Secretary i/c Kohhran Hmeichhia-in Synod Office Committee Room No. 2-ah a tlangzarh. Thu ziak tha zual 50 thlan khawm lehkhabu hi Rs. 100/- a hralh chhuah tur a ni. Agape chanchinbu hian kum 25 tlin lawm nan leh hriatreng nan hian tih tur pahnih an ruahman a; chung zinga pakhat zawk chu kum 25 chhunga chanchinbua thuziak tha zual 50 thlan chhuah a, a bu-a tihchhuah hi a ni. Mizoram Presbyterian Kohhran Hmeichhe Inkhawmpui Lian chuan kum 1986 atangin thla khat dan zelah chanchinbu chhuah tura a rel angin hemi kum atang hian AGAPE tih chu chhuah tan a ni a. Kum 1996 thleng khan thla khat danah tihchhuah niin, kum 1997 atang khan thla kipa chhuah a ni ta a ni. Agape chanchinbu hi kum 1986 atanga chhuah tan ni mahse, a Volume & Issue Number pek danah Sorkar hnuaia Registration neih atanga chhiar tur anih avangin kum 1988-a RNI neih atangin Volume khatnaa chhiar tan a ni a, a chhuah tan kum 1986 atanga chhiarin kum 2011 kha kum 25-na, Silver Jubilee kum chu a ni. A chhuah tan tirhah Copy 3,000 chhut a ni a, tunah (2013) hian Copy 38,700 tih chhuah niin Presbyterian Kohhran chanchinbu man nei tura chhuah zinga copy tam ber a ni. A chhuah tirh atangin tun thleng hian Editor 5 an awm tawh nghe nghe. Agape-ah hian thu hlawm hrang hrang Kristian Chhungkua, Sermon, Article, Testimony, Ei siam dan, Hruaitu thar te chanchin, Hriatzauna, Hriselna leh Rawngbawlna report-te tihlan thin a ni a. Mizoram, India ram state hrang hrang leh India ram pawn thlengin thawn chhuah a ni a, a thlawnin Missionary zawng zawngte thawn thin an ni bawk.

20th. Saturday: Samlukhai khaw nu pahnih, Sangluaii (70) leh a fanu Khawveli (50), July 18, Ningani-a an ramkalna aṭanga bote chu dam taka hmuh an ni. An insawi dan chuan an chawhmeh zawnte ngaha an inngaih hnuah an chaw fun dahna lam an pan tur chuan kawng diklo an lo zawh palh a; kal ngaihna hrelo in an bo ta a ni. Khawtlangin anmahni zawng tura tlang an au thawm pawh an hre vek a; tihngaihna a awm bawk silo. An chawhmeh lak rit tak chu phur chung zelin an kal a; khua a lo thim chuan thingkungah an riak ta mai a ni. A hnuah thlam ram tawhah an chawl a; chumi hnuah Hmuifang kham awih taka an rawn lawnchhuak chu motor hmu in an chuang a; Sumsuih khaw hmawra in pakhata lutin Samlukhai lam hriattir nghal anni.

21st. Sunday: Secretariat Complex kawngah welding nana hman carbine a puak a; Lalhmingsanga (25) s/o Rohnuna Champhai IB veng in hliam a tuar. Lalhmingsanga leh a thiante pahnih Robert Lalmuanpuia (26) leh Michael TBC Lalsipaia te chuan carbine hi an ai a; an ai lain a puak ta a ni. Robert-a leh Michael-ate hi police in an man nghal.

22nd. Monday: Saitual District Implementing Demand Committee (SDIDC) huaihawtin Saitual mipuite chuan demand Day hmangin, an khuaah kawng an zawh a; resolution pass in, Saitual district puan tawh chu a rang thei ang bera a nih tur anga kaltir an phût thu an puang. Saitual Demand Day hi chawhma dar 10-ah Keifang Dawrkawnah ṭan a ni a, Saitual leh Keifang bakah, Rulchawm, Ruallung leh Sihfa khaw mite an tel a; Keifang Dawrkawn aṭanga Saitual SDO (Civil) office bul thleng kawng an zawh a ni. Demand Day-ah hian Saituala sorkar office, zirna in leh dawrte khâr vek a nih bakah, Demand Day-a tel khuate aṭangin passenger phur lirthei an tlanchhuak lo a ni. Saitual Demand Day-ah hian resolution panga an pass a. Kum 1988 aṭangin Assembly inthlanah ṭum nga a zawnin Congress party candidate an thlang tling tawh a, Congress sorkar chu ‘láwm thâ sût nan’ a rang thei ang bera DC pe turin an phût a; thingtlang leh khawpuiah rualkhai zawka hmasawnna a thlen theih nan Aizawl district ṭhen a, Saitual district function tir phûtin, “Hmarchhak thimpui tia koh ṭhin ti-êng turin Saitual district hi a rang thei ang berin min function tir rawh se,” an ti. November 21, 2008-ah Rahul Gandhi-a’n inthlan campaign neia Saituala thu a sawinaah, Saitual district function tir a tiam avangin Saitual district puan tawh chu Assembly inthlan puan hma ngeia function tir thuai an phût thu leh, a rang thei ang bera chhanna lawmawm an dawn loh chuan a ṭul anga hmalak zel an tum thu an tarlang bawk.

23rd. Tuesday: Electric Veng, Aizawl VDP-te chuan an venga Sakawrpuluia taxi pakhat aṭangin Pseudoephedrine mûm nuai 10 chuang an man a; damdawi neitua puh Zomuanpuia (22), Falam, Myanmar leh Andrew Laldinpuia (22) s/o Pahnianga, Khawzawl Kawnzar Venga awm nia insawite pawh an man nghal a ni. Damdawi hi Rs. 70,00,000/- chuang hû a ni a, Electric Veng VDP-te chuan tui-ah chiahin an leihbua a ni.

24th. Wednesday: Mizoram Legislative Assembly paruknaa session hnuhnung ber tura ngaih chu a ṭiak. Session tawp ní-ah hian House leader, Lal Thanhawla chuan, ram leh hnam tana thil ṭha turah chuan member-te an inthurual tih a sawi a; senior member leh CM hlui, Brig. T Sailo pawhin, Assembly House-a a hun hnuhnung ber a nih tawh dawn avangin MLA-te fuihna thu a sawi. CM Lal Thanhawla chuan, House member-te chu lungrual taka an kalho ṭhin thu sawiin, “Ram leh hnam tana ṭha turah chuan kan inlungrual hle a ni. Sorkar bill pawh a ni se, a ṭhat chuan opposition lam pawhin an thlawp ṭhin. Ram leh hnam tana ṭha tura kan inlungrual hi a lawmawm hle a, member-te chungah pawh lawmthu ka sawi duh. Speaker pawhin ṭha takin member-te min kaihruai a, ani chungah pawh ka lawm hle,” a ti. MPC president, Brig. T Sailo chuan Speaker-in a phalsak angin thuchah hnuhnung a sawi a, “Vawiina ka thusawi tur hi he hmuna ka thusawi tawpna a ni dawn ta. He hmunah hian vawi tam tak kan ṭhuho a, rawng kan báwlho a, a rei ta hle mai. Tunah chuan kum 91 ka ni tawh a, inthlanna ka chuh ve dawn tawh lo,” a ti a; MLA atan thlang ṭhintu Zoram mipuite chungah lawmthu a sawi. Speaker R Romawia pawhin thu sawiin, “Kan tlin loh ang angin kan hun kan lo hmang zo dawn hnai ta a, dan pangngaiin rei lo têah House thar din turin kan inthlang leh dawn a, a ṭhente hi member kan ni tawh lo mai thei. Hun rei tâwk tak mipui rawngbawla dinhmun sang tak kan luah hi kan lawm ṭheuhin ka ring,” a ti a; member-te chu MLA atana thlan tlin an ni tawh lo a nih pawhin, mipui rawngbawltu an nih theihnghilh lo turin a chah a ni.

25th. Thursday: MPYCC chuan Hlimen khua-ah Health Clinic an buatsaih a, Hlimen leh a chhehvel khaw 16 atangin mi 400 an inentir a, a thlawnin damdawi pek vek an ni. He free clinic-ah hian Aizawl Civil Hospital atangin Specialist panga leh General doctor pakhat, an vaiin doctor paruk an kal a, Congress Thalai President, C. Lalawmpuii chuan politics hi Congress Thalai chuan mimal inpuh hmingchhiatna ngawr ngawra hman an phal loh thu leh, mi dang tana malsawmna atana hman hi an duh ber niin a sawi. Pu KS Thanga pawhin Congress Thalaiin a bial chhunga khaw lian ber, in 600 awmna khuaa Health Clinic an buatsaih chu lawmawm a tih thu a sawi a ni.

26th. Friday: North Vanlaiphai District Demand Committee (NVDDC) chuan Aizawl Press Club-ah thuthar thehdarhtute an kâwm a; N. Vanlaiphai chu district headquarter-a puang turin sorkar an phût. NVDDC hruaitute’n district an phût chhan an sawite chu – tuna an dinhmunah hmasawnna duh anga a ṭhan theih loh vang te, international ramri depa awm an nih avangin border trade leh border security chungchangah leh thil dang tam takah harsatna thleng mek laka an him theihna atan leh, Tuichangral mipuite’n hmasawnna dawhthlêng pawimawh an neih loh avangin hmasawnna an neih theihna atante a ni.

27th. Saturday: Environment & Forest department leh YMA sub-headquarters, Serchhip hruaitute chuan mautuai leh rawtuai khawrh leh zuar an vai a, mi pariat hnen aṭangin Rs. 2,000/- vel hû manin, mipui hmuh laiin an tichhia.

28th. Sunday: Synod Moderator Rev. Lalramliana Pachuau chuan Durtlang Pastor bial a tlawh a; Chawhma:Muthi Kohhran, Chawhnu:Leitan Ramthar Kohhran leh Zan:Leitan Kohhranahte rawnbawlna a nei.

29th. Monday: All India Services Coordinator Committee (AISCC) chuan Secretariat conference hall-ah an member Mizoram chhuahsan tur, Kunal (IAS), Suam Goyal (IPS) leh Ami Rajan (IFS)-te thlahna hun an hmang.

30th. Tuesday: Mara Autonomous District Council Fur thutkhawm, ni 3 chhung awh tur chu tan a ni. He session-ah hian session hmasa leh tun session inkara MDC hlui boral ta, Pu LC Hlychho sunna hun hman a ni a, a chanchin sawi a nih hnuah, amah sun nan member-te House-ah minute 1 chhung ngawi rengin an ding a ni. Tun tum session-ah hian Independent member pahnih, Congress Legislature Party thlawp ta, Pu LC Appo leh Pu Mahlei-te chu rorel lai pawl member thutna lamah thuttir an ni. Vawiin session-ah hian ngaihtuah turin Bill pahnih – Mara Autonomous District Council (General Service) Bill, 2013 leh Mara Autonomous District Council (Town Committee) Amendment Bill, 2013 put luh a ni. Zawhna leh chhanna hunah zawhna chhangin, Chief Executive Member Pu RT. Zachono chuan, MADC-a hnathawkte June thla hlawh atan RKVY sum puk a ni a ti a, June thla thlenga sum hman ral chu Rs.5,49,11,000/- a ni tih sawiin, kumin February thla atanga tun thlenga sum indaih lohna chu Rs. 3,39,21,000/- a ni a ti bawk.

31st. Wednesday: Zuangtui khawtlang chuan an veng pa, Lalnunmawia (22) s/o Sawichhunga, July 5, 2013-a Falkland Venga thia chhar chu a thih dan tun thlenga chhui chhuah a la nih loh avangin an veng chhungah kawngpui an dang. Kawngpui an dannaah hian mi eng emaw zat an pungkhawm a; kawngpui an dan chungchangah sorkarin thu leh hla a neih loh bakah, anmahni be tur tumah a tirh loh avangin tlai lamah Zuangtui tlangval lungawi lo ṭhenkhat chuan Falkland pan an tum a ni. Zuangtui tlangvalte chu Ṭhuampuiah police-in an lo dang a, hun eng emaw chen an innawr a, lungte’n an invawm a; Zuangtui mi parukin hliam an tuar a ni.