(Kan mithiam, ziak mi, journalist, prominent citizen etc ten Myanmar rama Zo hnahthlak awmte an hmuh dan leh hmalam an thlir dan hi kan ngaihven a, kan hriat tlan a tul ta takzet a ni. Chung zinga pakhat Prof JV Hluna thukhawchang, The Aizawl Post 6th August 2013 a mi hi a ngai ngaiin ka rawn post e)
Zo hnahthlak hi hnam khat ni mah se khawvel politics-in an ram chu India, Bangladesh leh Myanmar-ah a then darh a, chu chuan unaute laka an rilru puthmang thlengin a nghawng. India rama an dah tak Mizoram chu hmun danga Zofate’n an “Jerusalem”-ah ngai mah se chu state-a chengte hmuhsit leh endawng an hlawh fo.
Tun hnaia Myanmar-a Zofate tlawha zin Prof JV Hluna chuan Myanmar-a Zofate khian Mizoram hi Mizorama Zofate ai paw’n an hmangaih niin a sawi a, hmuhsit an hlawh thin vanga an rilru nat thu te pawh a sawi.
“Mizoram an ngaisang em em a, Aizawl hi an Jerusalem-ah an ngai. Hmuhsit an hlawh hi hrehawm an ti. ‘Nghapih’ han tih te, ‘Burma mi’ han tih te, hmusit taka a phek ena kan en hi na an ti,” a ti a,” Hmuh hniamna kan lo nei nasa lutuk hi na an ti em em a. Mizo hnahthlak zawng zawngin Mizorama zin an chak a, Aizawl hmuh an chak a. An rawn zin chang hian hlim takin awm thei turin ka duhsak a ni,” a ti bawk.
Burma ram insingsak dan enin hma a sawn chak hle tih a sawi a, “Nakinah chuan keini aia hausa, keini aia ram hausa tur niin ka hria a. Tam tak hi chu an pem chho duhin ka ring,” a ti.
Chin National Front (CNF) te’n Zo hnahthlakte insuihkhawm nana an beihnaa an sawm anga han tela khaw hrang hranga zin kual Prof JV Hluna hian Myanmar-a Zo hnahthlakte hian an hmakhua tur an ngaihtuahnaah theihtawp chhuahpui an ngai hle tih a sawi a, an ngaihsan em em Mizoram hian hmusit lo se a duh thu pawh a sawi.
Chin Hills leh chumi pawna Zofate awmna ram suihkhawma state hran neih an tum a, chuta an tawng hman tur chungchang chu an hna hmasa pakhat a ni. Paite khua, Duhlian tawng hmang chhungkaw khat chauh awmna Tiddim-ah chuan Prof Hluna te hian mipui ngaihdan an la a, 75%-in Duhlian tawng hman an duh. Committee dinin hmun dangah mipui ngaihdan lak zel an tum.
“Helaiah mi thenkhatin an sawisel thin na a, Korean film lehlin hian khi lamah nghawng a lo nei khawp a. Duhlian tawng hmang lote pawhin an en vek. Chu chuan hriat loh laiin inunauna a siam a. Tin, Mizoram atanga Zaithiamte zai leh lehkhabu thleng chhote hian inunauna a thlen khawp mai,” Prof Hluna chuan a ti a, Mizoram Synod-in Sunday School zirlaibu, Beginer atanga puitling zirlai thlenga a thlawna a thawn chho chu an hlawkpui hle tih pawh a sawi.
Khaw hrang hrangah hun an hmang a, Duhlian tawng hlirin hun an hmang. Mizoramin a ngaihsan chu an lo ngaisang ve zel ni-a a hriat thu a sawi a, chutih rual chuan Mizoram atanga zin chhote an han che mawi lo fo mai chu pawi an ti hle tih pawh a sawi.
“Cultural troupe te, zaithiam te, mi hrang hrang an chah chho a. Thil sawi hrehawm tak pawh a ni a, hmuh hrehawm khawpa zu han ina rui chhia an ni leh thin a. Anni pawhin mak an ti khawp mai,” a ti a, Zofate khawpui lian Tahan-ah chuan zu ngawl vei emaw drug addict emaw an awm miah lo tih a sawi bawk.
“Heta awmte ai hian Mizoram hi an hmangaih a. Mizoram hi thang se, changkang se an duh ngawih ngawih a. An chhuan em em, an Jerusalem hi hmangaih takin khita tang khian an rawn thlir vawng vawng a ni,” Prof JV Hluna chuan a ti.
Source: The Aizawl Post, 6th August 2013
Similar Posts:
- MIZO KHAWVEL THLIRNA Part-I
- Thil Pakhat Chauh
- Hmar hi Mizo hnam ani em?
- Mizo website thar
- Tute hi nge Mizo? Mizotawng hi enge?
August 7th, 2013 at 2:03 pm
A dik hmel viau. Mahse hrechiang meuh lova Aizawl rawn ngaihsan tlat mai chu a mak ka ti deuh. Aizawl hi khawpui (city) niin inhre mahse village lian tak bak ani lo.
Entir nan, sewerage pipe an zam lo va, an tui thli khawlaiah a luang zeih zuih a, a uih hem hem a.
Aizawl khaw lo plan tute khan Assam Rifles luah chin bak mimal leh biakin atan sem ral vek a. Fire brigade te, high court te, uinversity te, public park te khawpui danga khaw laili luah thin ho kha khawpui pawn, dai kilkarah an dah a ngai tlat.
Biakin a tam hle a, hospital tha chu a vang phian.
Mahni rama motor park na hmun nei hawt lovin car an lei a, khawlai ah an park a, traffic jam vangin kan buai kan buai a.
Aizawl hi awmna tlak ani lo achha anih hi. Lo ngaisang lutuk suh se.
Report this comment
August 7th, 2013 at 5:33 pm
^^Hahaha, a nithei mai awm mang tak e.
Korean serial lehlinin nghawngtha a nei tih hriat chu ka phu zawk tep a lawm le. Ni e, tawng hi inpumkhatna atan chuan a pawimawh ber mai.
A tha lam zel i beisei phawt mai teh ang u. ‘Tan rual hi chakna a ni’.
Report this comment
August 7th, 2013 at 11:53 pm
Duhlian tawng hi zohnahthlak dang te hian an pawm ang hian han pawm ve se hma kan va sawn dawn rua em. Tawng alo in an loh chuan a bikin naupang leh zual ah hmuh alien na a awm tlat thin si a. Khawvel ram dangah pawh an nih ka ring. Ring ringawt.
Report this comment
August 8th, 2013 at 8:45 am
#1, “Mahse hrechiang meuh lova Aizawl rawn ngaihsan tlat mai chu a mak ka ti deuh.” Mizoram hi Zohnahthlakte zawng zawng huap a khawpui ber angah an ngai niin ka hria, keima exprienced atang chuan.
Lusei/Duhlian tawng hi tum khat hnih lai Chin Hills pumpui a tawng tualleng ni turin Pu Lian UK te rawtna chu chak takna kalpui a lo ni tawh thin. An rawtna chhan ber pawh Duhlian tawng hmang an tam ber vang leh, mihrang ang a Mizoram leh Burma ram a Mizo te inen lohna tur a an ngaih vang a ni. Mahse, mipui 50% aia tam hretin an vote thla leh thin a ni. A chhan ni ber a an sawi chu posttu ziak atang khian a ngaihruat thiam theih maiin ka ring.
Mihrang ang a kan inen loh nan tiin Baptist khawmpui, Mizoram a Synod kan tih ang pawh hi Chin Hills Baptist Convention ti lovin, an lungrual theihna berin, Zomi Baptist Convention tiin a hming vuah a ni nghe nghe.
Burma ram, India ram, Bangladesh ram etc. a Zohnahthlakte hi unau ang a inen mai tur kan ni lova, thuhmun, chikhat kan ni.
Bumra ram a Zohnahthlakte khawsakna hi ka zin kual ve hle tawh a, post ziaktu sawi ang deuh khian, zu chu a zalenin a tam ngang mai. Kuhva zawrh ang hi a deuh ber mai. Mahse, Chin Hills-ah zurui pakhatmah ka hmu lo. 80’s erawh kha chuan Tahan-ah ka hmu ve tlat thung. Zu ngawlveite chu an nei ve tho awm e!
Report this comment
August 8th, 2013 at 10:01 am
Chhiar dawn ang.
Report this comment
August 8th, 2013 at 11:16 pm
Aizawl hi israel fate ianga Jerusalem ang hiala an ngaihna chhan hi chu ka lo ngaih ve dan chuan thu leh hla chhuahna hmun, tawngkhat hmanga zofate inbawk khawm tamna ber a nih vang hi ni turah kan lo ngai ve ngawt a. Pu H. Vangchhia sawi Zo hnahthlakte khawpuiah an ngai tih khi ka rin dan a ni e. Aizawl plan awm lo leh a khawpui chhung awmdan chu engpawh ni se.
Taka, Tahan Lamtluanga Pu Vanneitluanga’n Aizawl i kal tawh em? tia Tahan mipuite an zawh khan ‘Kal lo, vawikhat/vawihnih chu ka kal tawh’ tih vel kha a ni a. “Nuam i ti em?” tih zawhna ve thung ah kha chuan, Nui deuh chunga, “ka hre lo, step a tam lutuk a, kawngpui a chep deuh a’ tih vel kha chu hreh hmel deuh a an chhanna a nih tak kha maw le.
Mizo tih hi hnam hming a ni lo va. Huam zim tir kan chin lutuk thin vang nge Mizo tawng tihah pawh inlungrual a har phian.
Engpawhnise, hei lo liama nationalism inmung mek hi a awm chuang dawn em ni? A thandan tur dik takin thang mawlh tawh teh se.
Report this comment
August 12th, 2013 at 12:39 am
“Mizoram an ngaisang em em a, Aizawl hi an Jerusalem-ah an ngai.
Jerusalem chu lo nuam lutuk lemlo, Pathian pawh awm lo, Mosolman tam em em mai
Report this comment
August 13th, 2013 at 2:31 am
Hmangaihna aw ava ni em.
Zo hnahthlak sawlama awmte ka ngaisang asin!
Ka van ngaisang tak em
Report this comment