mi(sual).com

Fanghma thar ko
Zanriah chhum hun a pel a, tlai lam ruahsur tur intham tanpuitu khawpui thawm dim ang reng takin a ri nghawr der der a. Ral khat tlang chhip erawh ruah kungin a bawh paw chi chiai thung. Dai hnaia thereng chi khat chuan uar takin “reng-reng-fawk-fawk” tiin uar takin zai a lo vawr bawk. A ni taka sin, chu rengchal hlim taka zai vawr chu keini tan chuan nghahhlelhawm tak a ni tlat – engdang vang ani lo; ‘fanghma thar’ ko tia kan hriat a ni tlat.

Beisei lawk ang ngeiin, losul haw a hun meuh chuan, chhuahtlanga ka nu leh pa feh haw chu nghakhlel taka thlirin, fanghma tuai thar lam tak mai min rawn hawn beiseiin kan phur hle thin. Thenawm nu leh pate’n in an luh hmaa an fate fanghma an han pek a, nu leh pa’n min hawnsak tur an la thar loh chuan a hrehawmin rual awh a na ve thin hle.

Fanghma chanchin!
Fanghma hian hming a nei ve nual asin. Ka hriat leh in hriat hi inang tak maw? Hma-ram leh hma-hnip kan nei thin a; thalai tan chuan hma-ram han thial rik rap rap hi a nuam; chutih rualin hma-hnip hi ei a hahdam, tin a pian a mawi tlangpui zawk bawk.

Fanghma sen
Sen tih hi sihsen tia sen anga lam tur. Fanghma sen hian rin loh tak maiin a hnun hnaihah hling ang deuh hi neiin a bawl ve tiar thin. Fanghma sen pian nalh tak hi a duhawm riau.

Fanghma tuai
Tuai tih hi mautuai tiha tuai lam anga lam tur a ni. Fanghma tuai hian chhawlhal a chhawk ber awm e. Tin, mi tam zawk ei tam ber pawh a niin, a hming ang hian fanghma rah rau raua itawm ber a ni.

Fanghma hur
Fanghma tuai chu lawh mai loh chuan, a rawn a eng tan tuih a. Hetih lai hian thur si, thur tak tak si lo hun lai, fanghma tui loh ber lai a ni awm e. Chuvangin, a hming pawh a mawi teh chiam lo.

Fanghma tai
Fanghma tai chu a eng tak a, thur pawh thur tak a ni. A hawng chhah pawh ei tawh lem lovin, a laia phel phawkin a mu paih fai hnuin a a chhul leh a hawng (a tai chin) thirfianin kan ziat (scoop) thin a. Thur ngam vak lo vin chini an phul bawk thin, a tui thei hle.

Ka nu ipte thui ngei mai a fanghma tuai lian tha ler lawr pum hnih phur zo rual kan nih lai te kha a va ngaihawm thin em. Wai wai, magi, rum pum, ladt lei ngai lova, tui ti tak leh rual awt bik miah lova nu leh pate thar chhuah ngei tui ti tak maia kan han ei hluam hluam thin kha a manhla bik hian ka hre thin. Lung a leng teh e.

Similar Posts:

• Zanriah hnuhnung leh fanghma
• Aizawl ah Tuai an tam
• Mizote’n Fanghma chi engzat nge kan neih?
• Tuaitit
• Pawngsualna Rapthlak-lo???

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, October 6th, 2013 at 10:01 am and is filed under Luangliam, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.