mi(sual).com

HMANLAI KRISTIAN MARTAR MITHIANGHLIM A PUAN TAK THENKHATTE:

Sunday pual in…

Martar tih tawngkam hi chu kan hre theuh anga. A nihna takah chuan Kristiante hian ‘martar’ tih hi kan inti tatu viau na a, eng sakhua pawh eng rinna pawh, an rinna avanga an nunna chan phah, an nunna hlan te hi martar te chu an ni mai a, a sawi zau deuh phei chuan ram tan a nun hlan te pawh hi martar an ni tho e an ti thin. Helama a huam chin tih vel hi chu rawn sawi ka tum a ni lem lova.

Kristian sakhua a martar hmasa ber te kha chu Apostol ho leh Lal Isua Zirtir 12 te ho kha an ni a. Anni ho khan an rinna kha an martar pui thak thak hlawm a, chumi hnuah mi dang dang in Lal Isua an rinna an rawn martar pui chho ve ta zel a. Tunlai hun thleng hian Lal Isua avanga martar hi an la awm chho ta zel a, kan ramah ngei, kan Mizo pui ngei pawh martar kan nei ve ta nual mai a nih hi. Tun tumah hi chuan khawvel ram dang ami, hmanlai hun a Lal Isua hminga an nunna lo hlan ta, tun hnu a mithianghlima an puan tak langsar zual 10 te hi an chanchin tlangpui tawi te te nen ka’n sawi chho ve thung ange.

St. STEPHEN (d. 34-35 AD): Kan hriat theuh angin Kristian martar hmasa ber ni a sawi thin chu Stephan-a kha a nih kha. Ani hi a chanchin pawh Tirhkohte thiltih lamah kan hmuh nual kha. Kristian sakhaw aiawhtu hmasa ber te zing a mi a ni in amah hi Kristian hmasa te zingah khan a hming a lar in mi hriat a hlawh hle mai a synagogue a an puipa te ho nien a zirtirna chugchangah an thu a in hmu fuh thei ta lova, Mosia leh Pathian sawichha a puh a ni ta a. Heihian Jewish puithiam hotute a ti thinur ta tlat mai a, tichuan man a ni in Jewish tribunal ho rorelna hma ah din tir a ni ta a.

Jewish tribunal te hi chu sakhaw dodal ni a an ngaih lakah kha chuan an thutlukna leh an rorelna hi an khauh thei mai mai khawp a. Stephan-a pawh hi thiamloh chantir ni in mipui thinrim chuan lungin an denghlum ta a ni. Stephan-a lunga an denhlum lai hi a hmu tu leh hriatpui tuah pawh Saul-a a hnua Tirhkoh Paul-a lo ni ta pawh a tel ve nghe nghe a nih kha. Stephan-a lunga an denhlum kum hi AD 34 ni in an sawi a, heng Roman Catholic Church, Eastern Orthodox Church, Oriental Orthodox Church, Eastern Catholic Churches, Lutheran Church, Anglican Communion kohhran te hian mithianghlim Saint ah an puang a, tin, amah hriatrengna ni hi 26 December (Western) leh 27 December (Eastern) ah te hian an hmang bawk a ni.

St. MARK THE EVANGELIST (d. 68 AD): Roman historian Eusebius of Caesarea in a sawi dan chuan Petera kha Herod Agrippa-I in tihhlum a tum chu mak deuh maiin angel ho in an chhanchuak a, tichuan Canchin Tha hril in a zin kual ta a. Hetia a zin kualna ah hian Marka nen an in tawk hlauh mai a, tichuan Marka chuan a tawng let tu angin a zui ve ta a, a thu sawi apiang te chu a lo ziak chhuak zel a, tichuan Chanchin Tha Marka ziak hi a lo piang ta a ni a ti a. Isua Kraws a an khenbeh atanga kum 19 hnu vel AD 49 bawr khan Marka hian Church of Alexandria chu din in a Bishop hmasaber a ni ta nghe nghe a, mahse Chanchitha a hrilna lam ah chuan Alexandria khua, Pathian nung be lo ho chuan an ngaithei talova tih hlum an tum ta a.

AD 68 khan an man a, a nghawngah hruihrual a thlungin Alexandria khawlaiah sakawr an hnuh tir ta chiam mai a, tichuan a tawpah ni hnih hnuah April ni 26 khan a taksa chu an pawh darh tir ta vek a, mahse a lu tak hi chu a lo la him hlauh mai a. Tichuan a lu chu ama kohhran din ngei St. Mark Coptic Orthodox Cathedral, Alexandria ami ah chuan an dah ta a ni. Amah hi Africa rama Kristianna thehdarh tu ni in an sawi bawk. Heng kohhran Coptic Orthodox Church, Eastern Orthodox Church, Roman Catholic Church, Eastern Catholic Churches, Lutheranism te hian mithianghlim Saint ah an puang a, amah hriatrengna ni hi April ni 25 ah hman thin a ni thung a ni.

St. LUCIA (d. 304 AD): St. Lucia hi Latin tawnga a hming awmzia chu ‘Light’ tihna a ni e an ti a amah hi mitdel te Saint bik nia a sawi a ni nghe nghe thin a, a lem an ziahna velah hian ama mitmu hi rangkachak thlengah a chawi lai anga ziah a ni fo thin a, hehi a bul lo intanna ber ni a lang chu kum zabi 13 na lai bawr chho khan Lucia hi Pathian nung belo mi pakhatin nupui atan neih a tum a, mahse Lucia hian chu chu duh lo in a man tur atana chupa in a tih chu mi chanhai te tan a pe zawk turin a ti a. Tichuan chupa thinrim chuan Kristian a ni tiiin a hek ta a. hetih hun lai hi ‘Diocletian persecutions of 304 AD’ an tih hun lai Kristian te an tihduhdah hun lai kha ni in Paschasius, Governor of Syracuse chuan hal hlum turin a chungthu a rel sak ta a ni.

A tirah chuan nawhchi zawrhna hmunah an dah phawt a, mahse angel ten an ven tlat avangin tuman a awmna hmun atangin an la sawn thei lo niin an sawi. Amitmu hian sawisakna ah an ker chhuah sak niin an sawi bawk a, tin sawi dan dang leh ah chuan amah hian a nulat thianghlimna hum nan ama mitmu hi a ham chhuak a ni an ti bawk. Mak deuh mai in Pathianin mitmu thar, a hma aia mitmeng mawi zawk a rawn pe leh ta ni in a chanchin ziak tu te chuan an ziak bawk a, mahse heti chung hian hal hlum tur an ti ta tho a. Mahse mak deuh mai in meipui chuan a kang thei ta tlat lo mai a, tichuan an mangang chuan a hrawkah chemte in an vit hlum ta ringawt mai a ni. Lucia hi heng kohhran Roman Catholic Church, Eastern Orthodox Churches, Anglican Communion, Lutheran Church te hian mithianghlim ah ngaiin amah hriatrengna ni hi December ni 13 ah an hmang thin thung.

St. CATHRINE OF ALEXANDRIA(d. 305 AD): St. Cathrine-i thung hi chu a chanchin an ziah danah chuan lal fanu a ni a, tin mi lehkhathiam tak a ni bawk a. Tleirawlte ala nih laiin a hnenah hian Mari a rawn inlar a, tichuan Thlarau lamah Lal Isua nen a inneih tir ta a. Hemi hnu atang hian mi tamtak Kristianah a pek tir ta a. Cathrine-i hian Rome Emperor Maxentius kha tlawh in Kristian te a tihduhdah vak vak mai chu thil diklo a ni tih ava hrilh a. Mahse Maxentius-a hian a lo ngai pawimawh tehchiam lo a ni ang a ho te zing ami philosopher thiam rual Pathian nung ringtu nilo thah mai chu Cathrine-i va bei tur chuan a tir ta a. Mahse chung ho pawh chu Cathrine-i chuan Kristianah a lo let ta vek mai si a, tichuan Maxentius-a chuan a sawisak tir ta chiam mai a.

Mahse Cathrine-i chuan a rinna chu a phatsan duh chuan loh avangin Maxentius-a chuan nupuia neih atan a sawm leh ta thung a. Cathrine-i chuan Lal Isua nen an inneih tawh thu a a lo chhan tak si ah chuan Maxentius-a thinrim chuan an insawisakna ‘breaking wheel’ an tih ang chi hmanga thihhlum turin thu a pe ta a. Breaking Wheel a tih hlum an tum chu a wheel zawk chu a chhe ta tlat mai a, tichuan Maxentius-a beidawng chuan a lu a tan tir ta ringawt mai a ni. Cathrine-i hi heng kohhran Roman Catholic Church, Eastern Orthodox Churches, Oriental Orthodox Churches, Anglican Communion leh Lutheran Churches te hian mithianghlimah an puang a, amah hriatrengna ni hi November ni 25 ah an hmang thin thung a. Tin, halmawi chikhat han hal a a zit zawnga vir kual ‘Cathrine Wheel’ an tih, keini Mizovin ‘hal vir’ kan tih mai hi St.Cathrine-i hming chawia an phuah a ni bawk. Maxentius-a hi Emperor Constine-an a tuk dawl tak kha a ni thung.

St. OLIVER PLUNKETT (d. 1681 AD): Oliver Plunkett hi Irish mi, mi thianghlim a an puan hmasak ber a ni hial anga, tin, England a Catholic mi martar hnuhnung ber a ni bawk awm e. Amah hi Archbishop of Armagh ni in kum 1678-1681 inkar vel a Roman Catholic kohhran duhlohna leh inphiarruk neuh neuh na boruak a awm chhoh lai vel khan dawtna France in England a run tur anga thu an thehdarh chiamna velah khan inhnamhnawihna nei ve ngei a puh a ni a.

Man tur zingah a hming hi telh a ni in luman pawh thahnem tham tak neih tir a ni a, mahse a kohhran enkawllai te chu a tlanchhiat san duhloh avangin an man a Dublin Castle ah kum 1679 khan tan tir a ni ta a. A lakah hian England ram tana a hawksak na leh lal phiarrukna a a inhnamhnawihna engmah evidence awm lo mahse phiarrutu a puh ni in Westminster ah a chungthu rel a ni in thiamloh chantir a ni a, thi tura a chungthu rel a ni ta a. An tihhlum dan hi a khawngaihthlak khawp mai a, rei fe an khai phawt a, chumi hnuah an pawt fan leh hrep a, tichuan hmun li ah an pawt darh ta a ni. An tihhlumna hmun hi Tyburn of London ah a ni a, a lu hi St. Peter’s Church, Drogheda, Ireland ah hmuhntheih in an la dahtha bawk. 12 October 1975, Rome ah Pope Paul VI khan mithianghlimah a puang a, July ni 1 hi amah hriatrengna ni atan an hmang ve thung thin a ni.

St. GEORGE (d. 303 AD): Hmanlai thawnthu a dragon thattu lar tak mai St. George hi 208AD khan Lydda, Syria Palaestina, Roman Empire huam chhungah a lo piang a. Amah hi England, Portugal, Malta, Gozo leh Georgia ah te a an ‘patron Saint’ ni in Tbilisi khawpuiah phei chuan amah hriatrengna lungphun hi ropui tawk a awm nghe nghe a. St. George hi khawvel ram puma Kristiante zingah hriat lar a hlawh bakah Islam sakhua thleng pawhin an hre lar viau nghe nghe a. Kum zabi pathumna lai velah khan mi tha chhungkua atanga rawn piang chhuak in Roman army a zawm ve a.

Emperor Diocletian-an Rome sipai Kristan ni zawng zawng chu man tura thu a chhuah khan George-a hi khatih hun laia sipai hotu tha ber te zing ami ni in Emperor Diocletian-a hnenah chuan a thupek chu sut leh turin a ngen ve a. Mahse Emperor chuan a sakhua chu phatsan turin a lo ti ta zawk a. Mahse George-a hian a phatsan theihloh thu huai taka a sawi takah chuan Emperor Diolectian-a chuan thi turin a chungthu a rel sak ta a. Chutia thi tura an tih takah chuan George-a chuan a ro sum zawng zawng chu mi rethei te hnenah a sem ral ta vek a.

Ani pawh hi an tihhlum dan hi a rapthlak khawp mai a thil vir theiah ngunhnam hriam an tawn bet teuh a, chu chu an ti vir a, a taksa chu an taithler tir ta a. Nikhaw hreloa a awm tawh hnu chu vawi thum lai an ti harh nawn a, chutiang chuan a taksa chu an tai thler tir leh thin a, atawpah a lu an tan sak ta a ni. George-a an tih hlum ni hi April 23, 303 kha ni in heng kohhran; Roman Catholicism, Anglicanism, Lutheranism, Oriental Orthodox Church, Eastern Orthodox Church te hian mithianghlimah an ngai a, amah hriatrengna ni hi a thih ni April ni 23 ah hian an hmang thin a ni.

St. IGNATIUS (d. 108 AD): St. Ignatius hi AD35 bawr velah khan piangin St. John the Apostle an tih zirtir te zing ami a ni a. Apostol puipa panga te zinga pakhat ni in naupangte a nih lai atanga Kristian a inpe a ni a, Antioch, keini Mizo in Antiokei kan tih a Bishop pathumna a ni nghe nghe a ni. AD 107 khan Kristanna a phatsan duhloh avangin Roman Emperor Trajan khan Rome ah kal turin a ti ta a. Heta Rome a a kalna kawngah hian lehkhathawn pasarih lai mai a ziak a. Heng a lehkhathawn te hi Kristian thurin innghahna bulpui alo ni chho ta a ni.

Thi tura a chungthu rel a nih hnuah Colosseum ah sakawlh in an pawh sawm turin an dah ta a, sakawlh in an pawhsawm hma hian St Ignatius hian, “Kei chu Krista chhang ka ni a, sakawlh in an ha a an an her sawm tur ka ni, tichuan Krista chang thianghlim ka lo ni thei ang…” a ti a ni. St Ignatius hi heng kohhran; Oriental Orthodox Churches, Eastern Orthodox Churches, Assyrian Church of the East, Eastern Christianity, Roman Catholic Church, Anglican Communion, Lutheranism te hian mithianghlimah an puang a, amah hriatrengna ni hi Eastern Orthodox Church, Coptic Orthodox Church of Alexandria leh Indian Orthodox Church te chuan December 20 ah an hmang a. Western leh Syrian Christianity in October 17 ah an hmang thung.

St. JOAN OF ARC (d. 1431 AD): Joan of Arc hi 1412 khan Domremy-la-Pucellc ah mi rethei deuh chhungkua ah alo piang a. Hetih hun lai hi French ho leh English ho ‘Hundred years war’ an tih mai lai hun vel a ni. Kum 13 mi lek anih lai atangin van lam atangin ‘aw’ a hre tan a. Saint Michael-a ‘aw’ a ni e a ti mai a; chu aw chuan indona a France lal pui turin a hriattir ni tlat hian a hre thin a. A ‘aw’ hriat chuan lal hnena kal tur in a tur in a tur ut ut tawh mai si. Tuman engahmah an ngaih sak bawk si lo. Tichuan, 1428 ah English ho chuan Orleans vel an rawn bei tan ta. 1429 ah chuan an awmna a sipai hotu pakhat chu Chinon a an lal pakhat hnena hruai tur chuan a hmin thei ta hram a. Chinon ah chuan an lal chu Joan chuan amah chu an tana Pathian in a tirh ngei ani tih leh a ‘aw’ hriat te pawh chu van lam ‘aw’ ngei a ni tih chu a awih tir thei ta hlauh mai. Sipai an pe ta.

May, 1429 chuan chu thingtlang hmeichhe tleirawl te mai chuan French sipai ho hruai in English hovin Orleans an lo lak tawh sa chu mak tak mai in an chhuh let thei ta mai. Hetih hun lai tak hi atan chuan a ropui ve lai ber aniawm e. Mi zawng zawng in an ngaisang a; amah chuan ‘aw’ in a hrilh ang zel chauh in a awm a tih te a hrilh a. Chumi kum chuan ahma a alo sawilawk tawh angin Chinon a an Dauphin (ram khat awp tu lal tenau) amah sipai te pawh pe tu chu lal lukhum an khum tir na a, a kiangah a ding pha ve hial a ni.

Tichuan, May, 1430 khan Burgundians hovin Compigene ah an man ta hlauh mai a, English ho kutah an hlan a. Sakhaw thil a kal firfiak ah puh a ni a, dawithiam ah puh a ni bawk a; a chungthu an rel naah chuan Puithiam hmaah a ‘aw’ hriat te chu vanlam ‘aw’ nilovin ama phuahchawp mai mai a ni tih a puan chuan an ngaihdam tur thu an hrilh a, mahse a tih duh tak loh avangin May ni 30, 1431 khan he hmeichhe huaisen tak Joan of ARK hi an hal hlum ta a ni. Joan Of Ark hi Roman Catholic Church leh Anglican Communion te chuan mithianghlimah an puang a 16^th  May 1920 khan St. Peter’s Basilica, Rome ah Pope Benedict XV khan mithianghlimah a puang a, May ni 30 hi a hriatrengna ni atan an hmang thin a ni.

St. BARTHOLOMEW THE APOSTLE(d. 1st Century AD): St.Bartholomew hi Lal Isua zirtir 12 te zing ami Barholomaia kha ni in Chanchin Tha Matthaia ziak leh Marka ziak leh Luka ziakah te kha a lang ve anih kha. Eusebius of Caesarea in a ziah dan chuan Barholomaia hi Asia leh Africa lamah missionary in a kal a, tin, Armenia lamah te kal in Armenia ah hian a rawngbawlna a hlawhtling hle mai a, an lal King Polymius leh a nupui chu Kristian ah a in leh tir a, mahse heihi an ram a an sakhaw puithiam ho chuan duhlo in King Polymius-a unaupa hnenah hian an hek ta a.

King Polymius-a unaupa hi a lo thinrim nasa mai a, tichuan Bartholomaia chu tih hlum turin thu ape ta a. Bartholomaia an tih hlum dan pawh hi a rapthlak khawp mai a, a nung chunga a vun an lih hnuah a letling zawngin krawsah an khengbet ni in an sawi. bartholomaia lem an ziah thenkhatah chuan a kut veilam in ama vun an lih na hnu a kenganginan ziak thin nghe nghe a ni. Assyrian Church of the East, Roman Catholic Church, Maronite Catholic Church, Eastern Orthodox Churches, Oriental Orthodoxy, Anglican Communion, Lutheran Church te leh Islam sakhua thleng hian mithianghlimah an ngai a, August 24 (Western Christianity) leh June 11 (Eastern Christianity) te hi amah hriatrengna ni atan an hmang thin a ni.

St AGATHA (d. 251 AD): A ni ve thung hi hnute cancer vei te leh kangmei leh lirnghing laka venghimtu Saint a ngaih a ni a. Kristian a a inpek hnu hian an pathian biak ve thin te chu a hnawl vek a, tin, of Roman Prefect Quintianus chu chibai a buk duh lo bawk a. Quintianus-a thinrim chuan a rinna chu a phatsan mai ringin nawhchizawrhna hmunah a dah ta a, mahse Agatha hian a rinna chu a phatsan duhloh bakah nawchizawrhna ah chuan a inhlan duhloh avangin a hnute chu thir sa in a deh kan ral tir vek a, heti chung pawh hiana rinna a phatsan duhloh mai bakah damdawia enkawl duh lo in Petera thlarau in a ti dam angin a sawi tlat mai a.

Tichuan Quintianus-a tihnghaihna hrelo chuan lungalhthei ling sa ah chuan hal hlum turin thu a pe ta a. Hetia lungalhthei sa a an rawh lai hian lir a rawn nghing vak mai a bang a rawn chim a chu chuan Quintianus-a chu a delhhlum ta a. Agatha hi an sawisakna atang hian a dam chhuak leh a, taninah an khung leh a chumi hnu kumah chuan a thi ve ta a ni. Sawi dan pakhatah chuana puan bah thin hian Mount Etn tlangkang tur hi a ti tawp thak ni in an sawi bawk. St.Agatha hi Roman Catholic Church, Eastern Orthodox Church leh Oriental Orthodoxy ten mithianghlimah an puang a, February ni 5 hian amah hriatrengna hun an hmang thin a ni.

Heng mihuaisen kalta te hian hreawm nasa tak leh tihduhdahna nasa tak tuar mahse an tlantu Lal Isua chu an phat lo a, amah an rinna avang chuan rinawm takin an nunna hial an hlan ngam a ni a. Keini ve hi zawngin hrehawm tawrh leh tihduhdah chu sawi loh, kan nawmsakna tur um in thil nuam kan tih zawng avang zawk in Lal Isua hi kan phat fo thin a ni a. Heng mi huaisen kal hmasa te nun atang hian kan in bihchian hi a pawimawh hle a ni. An ni zawng Vanah Lal Isua tana mi rinawm te lal lukhum chu khum in Pathian dinglamah an la awm ngei anga, keini ve hian eng lal lukhum nge kan khum ve dawn le…???

*Source: Wikipedia/Top 10 Great Martyrs

BigDaddy Hmahmatea

Kulikawn

Similar Posts:

• KOHHRAN PAWL HRANG HRANG LEH AN DINHMUN TLANGPUI
• Who is a Christian?
• Referral Hospital vangin Catholic ah inlet lo
• Kristian-te Tiduhdahtu Rome Emperor-Te {Sunday Pual}
• Population of Nine biggest Churches in Mizoram

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Sunday, October 6th, 2013 at 7:59 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.