mi(sual).com

Hmeichhe huaisen Bible chhiar tawh loh intiam duhloh avanga thi tura brick a an rem hnan tak chu…

Kum zabi 16 na lai bawr chho vel khan Roman Catholic kohhran inrelbawl dan duhloh avang khan Protestant ho kha an in la hrang chho kha a ni a. Khatih hunlai khan Roman Catholic kohhran khan Bible hi a mi nazawng in anmahni tawnga an chhiar kha an phalo bur mai a, anmahni tawng a Bible lo chhiar ru te kha chu Roman Catholic sakhaw vuan ram awptute awpna hnuai a awm an nih chuan an man chuan na takin an hrem a an tihlum mai thin kha a ni a. King Philip II khan Duke of Alba chu Protestant mi leh sa anmahni tawnga Bible lo chhiar ru thin te dap chhuak a that chimit vek turin Flanders lamah a tir a. A thupek ang chuan Bible lo chhia ru an man chu khaihlum emaw, lungtum rit tak an ke a tawn beh a tui a paih emaw, chan sawm vek emaw, a nung chunga hal hlum emaw, a hrehawm thei ang bera tih hlum tur tih a ni tawp mai a.

Tichuan Duke of Alba leh a ho te chuan Bible mahni tawnga lo chhiar thin dap chhuah hna chu an thawk ta a. An ram bial chhunga khawtinah an kal a, in tin an dap a, man pawh an man chhuak hnem hle mai a, an manchhuah te chu an tihlum zel bawk a. Tichuan Brugge khua an rawn dap thleng ve ta a. Lal thupeka in tin dap tur an nih avangin Brugge khaw Mayor in pawh chu an dap kan bik ta hauh lo mai a. Chutah le Mayor in ah chuan an zawn ber Bible chu an hmu ta tlat mai a. Mayor ina cheng ho zawng zawng chu an ko khawm a, a mal te te in an dawp ta hlawm a. Chutia Mayor ina cheng ho zawng a mal te te a tunge Bible chu chhiar thin tih an han zawh chuan a tu a te mah chuan ka chhiar thin an ti ta hauh lo mai a, an inah chuan chu Bible chu engtianga lo awm ringawt nge a nih an hriatloh thu an sawi ta vek mai a.

Chutia Mayor chhung leh khat te zawng zawngin engmah an hriatloh thu an sawi vek hnu chuan an ina an chhiahhlawh nula awmpui nula la naupang tak mai Wrunken-i chuan Bible chu aman a chhiar thin thu chu a rawn sawi ta mai a. Chhungkaw pa ber Mayor chuan Bible chhiar thin te an hremna hlauhawm zia a hriatchian em avang chuan theihtawpa chhan a lo tum a. A ta chu a ni ngei a mahse a chhiar ngai hauh loh thu te a lo sawi sak ve zung zung a mahse Wrunken-i chuan dawt ringawt hmanga him chu a lo duh awzawng lo mai a, chu Bible chu a ta ngei a nih thu leh a chhiar thin thu leh thildang zawng zawng aia a ngaihhlut thu chu a rawn sawi ve leh ta mauh mai a, chhanhim ngaihna a awm ta lo.

Wrunken-i chu a chungthu an ngaihtuah a thi turin a chungthu an rel ta a. A tihhlum dan tur atana an rel sak zet chu a rapthlak kher mai le. Brugge khawpui hungna lungrem an chhun kuakah chuan dah a brick a rem hnan a thawchham a thi tura a rel sak a ni ta a, mahse Wrunken-i chu a zam eih lo thung. An tihhlum tur ni chu a lo thleng a, lungbang bulah chuan brick a rem hnan mai tur chuan a ding ran tawh mai a, Bible chu a chhiar tawh ngai lo ang tih a intiam chuan a nunna chu zuah a ni ang ti a an han hlem ngial pawh in Bible chhiar lo tur chuan a intiam duh tlat lo mai a, “Min Chhandamtu hi ka tan a thi a, kei pawh a tan ka thi ve ang…” a ti tlat mai a. Tichuan bangah chuan brick chu an rem hnan ta a, “Heti hian kan rem sang zel anga, kan rem phui anga thawchham in i thi mai dawn asin…chhiar tawh lo tur chuan intiam mai rawh,” an tih pawh chuan, “Isua nen kan awm dawn alawm,” a la ti ve zel a. A tawpah chuan brick chu an rem pum tep tawh a, pakhat chiah, a hmai zawn chiah rem tur a awm tawh tih chuan amah tihlumtu tur te chuan, “Vawikhat chiah Bible hi ka chhiar tawh lo ang, ka sim ang ti la i him ang,” an ti leh a. Mahse Wrunken-i chuan Bible chhiar tawh lo tur a intiam a dam chhuah ai chuan a Lalpa tan a thih chu a thlang ta zawk a, “Aw Lalpa, heng min tihlumtu tur te hi ngaidam ang che,” ti in a la tawngtai ta hram a. Tichuan brick chu an rem pum hnan ta a ni. Wrunken-i hian Bible, amah chhandamtu chanchin inziahna chhiar tawh ngailoh ai chuan a tan a nun pe tu Lal Isua hnena chatuana chawlh chu a thlang ta zawk a ni.

Wrunken-i ruhro hi kum tamtak hnuah an lachhuak a Brugge thlanmualah an phum tha ta a ni.

Wrunken-i chanchin hi kan naupan deuh lai atang tawhin camping leh crusade velah te thih thleng a Lal Isua tan ngam tih vel tehkhin thu atan chiangkuang vak lo hian ka lo hre fo tawh thin a, ‘Isua Phatsan Duhlo Tute’ tih lehkhabu K.Vanlalawia siam ka chhiarna lamah ka hmu leh nawlh mai a, ka lung hlui te pawh a ti leng hle mai a. Naupan deuh lai khan hnuk ulh teuh khan a chanchin hi kan ngaithla thin kha a ni a. Khang hun lai kha chuan Lal Isua tan a rinawmna leh phatsan duhlohna chungchang tehkhin nan khan an hmang ber thin kha a ni a, mahse tun tuma ka chhiar leh chu keimah lama a thawh dan a dang ta daih mai.

Kan Pathian lehkhabu Bible hi keini Mizote phei hi chuan chhungtin hian pali panga hi kan nei fer fur mai a, kan showcase leh kan khum bulah te hian kan dah thar ver vur hlawm a, inkhawm dawn in kan zakzeh chhuak a, inkhawm banah a ngai ngai in kan dah let leh a, kar tluan in kan dah vang vang a Sunday ah kan lek chhuak leh a, veng thenkhatah phei chuan KTP inkhawmah Holy Bible keng leh keng lo te ban kan in phar tir thul. Sandeskul lawmman hrang hrangah kan inpe a, inneih lawmpui nan leh in ral nan thlengin kan in pe a Thuthlung Thar bu ngat phei hi chu in tinah hian chhungkaw member inkawpkim bakah mikhual pali vel daih hi a awm takmeuh tih theih a ni a. Heti khawp hian Mizote hian Bible hi kan chelek a, kan uar a, kan leklam a. Chutih lai erawh chuan a chhiar lampang tak hi kan uar leh vak mang si lo a.

Bible hi inpek a tha, inral nan te pawh a tha lutuk, lawmman anga tan pawh a tha tho, mahse chhiar atan a siam a nih avangin leh Kristian te kan rinna leh zirtirna kalphung leh chanchin, kan Lal Isua chanchin inziahna anih avangin chhiar tur kan ni tawp mai. Biakin a inchei nan, ‘Holy Bible keng zawng ban phar rawh u,’ tih a intithei fe a hawi champ deuh chunga lek chhuah vung atan te, mutna khum bula bedside table cheimawi nan te, showcase vel a thar ver vur a rem tlar thut ringawt atan te a siam a ni reng reng lo tih hi kan hriat ngai in ka hria a. Bible chhiar chhuah leh chhiar chhuah loh hi chhandamna leh chhandam lohna lam nilo mahse, Kristian, Lal Isua ringtu inti ve si, mahni sakhaw rinna inngahna bu ber pawh vawi khat pawh la chhiar chhuak lo kan nih chuan keimahni kan inenfiah viau a ngaih hmel tlat. He post hi Bible vawikhat tal chhiarchhuak tawh chin chauh in ‘comments’ tur ti ta ila ‘comments’ tu hi kan tlem pharh mai ang tih hi a hlauhawm khawp mai.

Chuvangin in ti teh ang, mi chuan an rin Pathianthu inziahna bu hi an ngai hlu a, chhiar theih loh ai chuan thih hial pawh an lo thlang zawk a ni a keini ve chuan inchei nan, lan mawi nan leh khawi lai chang emaw la chhuaka a bawp-lawka mi va hnial nan bak a hmanna tur hre miah lo hian Bible hi kan lo kawl ve tun ringawt ang tih hi a hlauhawm khawp mai a. Chuvangin kan Pathianthu inziahna bu hi ngaina ila, bel chiang ila, Kristian Lal Isua ringtu kan nih chuan vawi hnih-khat tal chhiar chhuah hi kan bat ah dah ila, a chhunga thu te hi hriatfiah tum in zir chiang ila, a pawimawh berah chuan a chhunga thu te hi zawm in kan nun kaihruaitu atan hmangin a takin nunpui bawk ila tichuan kan ringtu nun hi a kal sual fo lo anga, mihring nunah pawh nunkawng dik kan zawh anga, rinna nunah pawn kan nun a ro lo anga, tin, Bible hi dah mawi leh ken mawi satliah atan ngawt niloin Wrunken-i ten an nunna hial hlan phah ngam khawpa an lo ngaihhlut nachhan thuruk chu kan chhar chhuak ve ngei ang…tih zawng hian keimah ah chuan Wrunken-i chanchin ka chhiar hi zu han thawk daih pek a mawle….

BigDaddy Hmahmatea

Kulikawn

Similar Posts:

• Mizo thalaite eizawnnan : Brick siam
• Zirtir Nei
• Zu Khapna Bible Ah A Awm Lo
• Tunlai ka mutmawh hnarmawh.
• Voters in TN elect dead man to be mayor

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, October 13th, 2013 at 8:56 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.