mi(sual).com

(Gen.12:1-3; Lk.10:33-34)

1. Mi tin kan in zawm tawn vek

Mihring hi awmkhawm tura Pathian siam kan ni a, mahni chauhva awm tur kan ni lo. Pathianin, “Mihring amah chauhva awm chu a tha lo ve; amah tanpuitu tur a kawppui awm mi ka siamsak teh ang” (Gen.2:18) a ti a. Tichuan a tira mihring pakhat chauh awm kha mi dang pakhatin a belh a, pahnih an lo ni ta a. An pahnih chuan awmdun tura ruat an ni. Mihring an lo pun zel hnuah pawh awm khawmin khua a lo indin chho ta zel a. Hei hi Pathian chatuan remruat a nih avangin khawpuiah phei chuan mihring nuai tam tak kan lo awm ta thin a ni.

Khaw te deuhvah chuan mihring awm an tlem avangin kum tam tak hnuah chuan inneihna avangin in chhungkhat kual vek an lo ni ta thin a. An inlaichinna pawh a lo thuk tual tual thin a ni. Mi tin hi famkim lo veka siam kan nih avangin tlak chhamna lai nei vek kan ni a. Kan tlakchhamna chu midangin min phuhruk sak thei.

Entir nan, thirdeng thiam
vek kan ni lo va, a thiamin hmanrua, tuthlawh etc. min chher sak a. A then mistiri thiam tak an ni a, a ni ve lovin in sak a duh chuan a sa thiam mistiri a ruai a, a mamawh a phuhruk sak a. Motor nei lovin hla taka zin a duh si a, motor neitu chuan a mamawh a lo phuhruk sak leh a. Chawhmeh zuartu chuan a nei ve lote lei turin a zuar a, sum a mamawh chu a leitu atangin a hmu a, chawhmeh thar ve lo chuan a zuartu hnen atangin chawhmeh a lo nei ve leh thei bawk a. Chu chuan mitin kan in mamawh tawnzia a entir a ni. Ram leh ram pawh chutiang tho chu a ni. Oil ngah ram (Arab ram etc.) an awm a, a nei tam ve lo hnenah an hralh a, tichuan mamawh phuhrukna an lo hmu tlang ta thin a. Khawvela ram hausa kan tihte pawh hian engkim an mamawh tawk an nei bik chuang lo va, ram dang atangin an lakluh a ngai ve tho.

2. Vantlang thil en dan dik a pawimawh

Mihring awmkhawm hi vantlang chu a ni mai a. Khaw tinah mi mal ta ni lo, vantlang thil neih, vantlang ta a awm thin. Entir nan, kalkawng hi mi mal ta a ni ang bawkin vantlang
ta a ni a, kan intawm tlan vek (common property) a ni. Tuikhur pawh vantlang tuikhur a ni a, khelmual (Playground) pawh vantlang ta a ni a, ‘khaw reserve’ kan tih pawh hi vantlang mamawh lamna atana zuah a ni. Damdawiin leh sikul pawh vantlang tana din an ni a, kan intawm tlang vek a ni. Sawrkar thil leh sawrkar bungrua kan tihte pawh hi vantlang tana sawrkarin a sum senga a dah an ni vek a. Mi mal ta bik ni lo, kan intawm tlan thil tam tak a awm thin a, chung laka kan rilru put dan tur hi zir a pawimawh hle a ni.

Ram changkang leh changkang lo danglamna langsar tak chu vantlang thil kan enkawl danah a lang chiang hle. Vantlang tana zunin/ekin han en ila, building tha fu si, a chhung tawp tak a nih chuan mihring an changkang tawk lo tihna a ni. Mihringte hian thil intawm tlan zir kan mamawh. Neih bik duhna rilru- duhamna hi mihring khawsakho tiharsatu a ni. Mi pakhat chuan vantlang tuikhura tui chawi thinten fian an ken ziah a ngai a, an ken theihnghilh chuan an let leh a ngai thin chu tih zangkhai nan tiin ama sumin fian a lei a, intawm tlan turin tuikhurah a dah a. Mahse a awm rei lo kher mai, a hmang hmasa bertuin a hawn nghal a ni ang, rei a awm lo va, a bo nghal daih a nih chu! Dik tak chuan Chhandamtu (Isua) pakhat, kan intawm tlan turin Pathianin min pe a, hei pawh hi kan intawm thiam lo a ni ang chu Isua hming lam theuhvin pawl hrangin kan awm a, kan in sawisel tawn reng bawk si te hi ngaihtuah tham a awm.

Vantlang thil kan endan hi a changkan loh chuan hmasawn a harsa thin a ni. Sawrkar thil pawisak loh leh a ruka lak te, vantlang thil mahni ta anga en lo va, tih riral emaw, dim lo taka hman emaw kan chin chhung chuan hmasawn a harsa ang. Kan ta tlang vek a nih tih hi rilruah kan neih theuh a tul tak zet a ni. Vantlang thil uluk leh dimdawi taka hman leh enkawl hi mahni tan bawka tha a ni tih hriat a tul tak zet a ni. Bawlhhlawh taka kan dah chuan kan vaiin hri tha lo kan kai thei a ni tih pawh hriat a tul.

3. Thil tha tih- Inelna tha

Mimal mal infinkhawm hi vantlang a nih avangin mahni tana thil tha chu vantlang tana thil tha a ni nghal a. Kan vaiin min huam vek tihna a ni. Chuvangin vantlang tana thil tha kan tih chuan a hlawkna teltu tur chu keimahni tho kan ni. Vantlang tana thil tha chu sawi zawh sen a ni lo vang. Inelna khawvelah kan cheng mek a. Infiamna thilah inelna chi hrang hrang, veng huap emaw, ram huap emawa inelna pawh a awm reng a. Chutiang bawkin hmasawnna kawng dangah pawh inelna chu a rukin a kal reng a. Sumdawnna thilah pawh inelna a nasa hle a. Khawvel ram tin hian an thil siam chhuah hralh tamah an inel ngar ngar reng a ni. Chungtianga inelnaah chuan China chu khawvela mahni ram thil siam zawr chhuah lamah (World Market Reserve) a sang ber a ni ta a. Ram dangin khum tumin theih tawp an chhuah mek bawk a. He intlansiakna hi chu mahni in haivurna kawng a ni a. A ruh no no chhuakah tih ang maiin midang aia chan tha chan tumna a ni.

Kan sawi tum erawhchu inelna dik leh tha chung chuang a ni. Mahni hmasialna dah bova, mi dangte tana thil tha tih tam tuma inelna a ni thung. He tih kawngah hian hman laia Mizote nun kha a mawiin a chhuanawm a. Mi tlawmngaite nun chu mi dang tanpui tumna rilruin a khat a. Miin a puihna an mamawh tih a hriat rual rualin mahni a inpe pumhlum nghal a, phut let nei miah lovin mi dang tan thil tha tih a tum a, ‘ber’ nih tumin a tha neih zawng zawng a seng thin. Tun laiin Mizo nula leh tlangvalten damdawiinah thisen a thlawna pek an ching te hi inelna tha tak pakhat a ni. Mi mangang tanpui te, hrehawm tuar thlamuan te, tanpui ngai apiang tanpui te hi kan inelna tur tha chu a ni.

4. Khawtlang tana thil tha tih chu malsawmna

Khawtlang hi mi mal mal infinkhawmin a siam a nih avangin khawtlang tana tha chu mi mal tan pawh a tha sa a ni. Hman lai kan pi leh pute hunah chuan vantlang zahna an in
zirtir tha hle thin a. In sak chungchangah te hian vantlang kawng dala in sak loh hram an tum thin. Vantlang ensan nih te an hlau va, chu chuan mimal leh chhungkua a in siamrem tir lo thei lo thin.

Tun lai hunah hian vantlang kawng zah lohna te a hluar ta deuhvin a hriat a. Kawngpui nekchep zawnga in sak leh compound hung duham vangte hian buaina a chawk chhuak tam ta hle a, thenawmte nena in hnial buaina pawh a tam ta khawp mai. Vantlang kawngpuia ruah tui far phak ngei tura in sak thlawk pawh Aizawl khawpuiah chuan veng tin deuh thawah hmuh tur a awm.

Vantlang kawng te hi mitin intawm tlan a ni a, enkawltu bik sawrkarin ruat mahse an enkawl hneh tawk lo va, kawng tha khawiah mah kan ramah a awm tak tak thei lo. Hetah hian mahni in zawna khuar chhe te awm hi lungin hnawh vat thin ila chuan a khuar zel tur a veng ang a, tui tling motor dai per kan tuar lo ni mai tur kha, PWD emaw BRTF emaw tih torah kan ngai nghet tlat si a, vantlang tana thil tha tih hi kan harsat ta deuh ni chuan a lang. Mahni in bula tuihawk luankawr thenfai leh kalkawng khuar awm hi a zawna mite hian kan mawhah dah thei thin ila a duhawm hle.

Chutianga kan tih theih chuan khawtlang tan thil tha a ni a, mi tinin a hlawkna kan tel theuh ang a, khawtlang tan malsawmna kan lo ni mai dawn a ni. Thianghlimna kawngah hian hmasawn kan mamawh hle bawk a. Vantlang kalkawng hnawk te, vantlang in emaw hall emaw, vantlang zunin leh ekin emaw te hi mikhual hmuh atan a sitawm thin khawp mai. Bawlhhlawh paih mai mai lo va, a bawma dah zel hi kan nunphungah nei ila chuan vantlang tan malsawmna kan ni theuh dawn a.

Zunram thiarna phei hi chu rei lo teah inthiarna tlak loh khawpin a tui-tang lo thin a, kan hnamin hmasawn kan ngaihna lai langsar tak tak pakhat a ni. Mi dang tana thil tha tih hi kan tih sakate tan chauhva hlimna leh lawmna ni lovin mahni tana nun hlimna a ni tlat a ni.

NB: He thu hi Kristian Thalai Pawlin kumpuan thupui an neih thin a October & November chhunga zir tur a nia; 21st. Monday zana thupui hawng tura ruat ka nih avangin min lo zirpui tur leh min lo tawngtai pui tura sawmna ni pah fawmin ka rawn post a ni e. Ka lawm e.

Similar Posts:

• Panlai Nun – Tu Zung Thui Thei Thei?
• YMA a kal her em ni!
• Hringnun zirlai
• Hriselna lam bik blog thar!
• Pipu sulhnu i humhalh ang u

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, October 20th, 2013 at 9:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.