1st. Friday: Mizoram Foundation Movement chuan I&PR Auditorium-ah health worker zir chhuak thlahna, Capping & Lamp Lighting hun an hmang. MFM hnuaia nurse zirlai pass tharte hi 4 an ni a, sathau khawnvar chhi in an hnathawhna tura rinawmna thu an tiam a ni. MFM hian missionary nurse leh health worker tirhchhuah tumin tan an la mek a, nurse leh health worker 52-te chu an hnen atangin an zir chhuak tawh a, missionary 32 an tir chhuak tawh bawk.
2nd. Saturday: North Vanlaiphai damdawi-in (PHC) kum 100 tlin hriatreng nan leh lawmna atana N Vanlaiphai Youth Association-in documentary film, “N Vanlaiphai Damdawi In leh Khawvel Indopui 2-na” tih chu Inrinni khan Aizawl Press Club-ah Dr F Lalhmingthanga’n a tlangzarh. N Vanlaiphai damdawi-in hi kum 1913-ah British hoin an sak a ni a, kum 1913-a sak tawh chu tun thlengin a la ding a ni. Khawvel Indopui Pahnihna March 28,1944-ah Japan indo thlawhna parukin damdawi-in leh a bula doctor quarters-te chu a bei a, chung hnuhmáte tun thlengin hmuh theih a la ni.
3rd. Sunday: UPC (NEI) chuan India hmarchhak pum huapin Orphanage Sunday an hmang a; chawhma thawhlawm zawng zawng chu ASC Home (fahrah châwmna) atan an hlan.
4th. Monday: Mamit, Luangpawla Rokhuma in, Assam type, chhungkaw pahnih luah lai chu gas leak avangin bungrua chuh hman lohin a kâng ral.
5th. Tuesday: November 25-a Mizoram Assembly inthlan lo awm turah political party hrang hrangte candidate-te chuan nomination an file ṭan a; vawiin a tantirh ni hian mi paliin hming an pe lut. Heng zingah hian Chalfilh constituency-a INC candidate, Ngurdingliana Sailo chu nomination file hmasa ber a ni.
6th. Wednesday: Mizoram University chuan under graduate second semester leh fourth semester exam result a tichhuak a; second semester-ah candidate 4,803 zinga 2,194 an pass a, fourth semester-ah candidate 2,552 zinga 1,819 (71.27%) an pass.
Second semester exam-ah hian regular student zingah exam beitu mi 3,778 awmin, chung zinga 1,721 (45.55%) chu an pass a; repeater candidate 1,025 awmin, chung zinga 473 (46.14%) chu an pass a ni. Second semester leh fourth semester exam hi May 2013 khan neih a ni.
7th. Thursday: Chief minister Lal Thanhawla kaihhruai Mizoram sorkarin sorkar khalh ngiltu tura a din, Ethics Committee-in an hnathawh hrang hrang dah khawmna lehkhabu, “Reports of The Ethics Committee (2009-2013)” tih chu I&PR auditorium-ah MKHC chairman, Rev. Lalramliana Pachuau-in a tlangzarh. Reports of The Ethics Committee-ah hian Ethics Committee-in chief minister hnena lehkha an thawn copy te, pawl dang – Central YMA leh Mizoram Kohhran Hruaitute Committee hnena lehkha an thawhte pawh tarlan a ni.
8th. Friday: November 25, 2013-a Mizoram Assembly inthlan awm tur atana nomination file hun chu a tawp ta a, mi 142-in chuh tumin hming an pe lut a, bial tinah candidate 3.55 awm ang a ni. INC leh MDA-te chuan seat awm zawng zawng 40 an chuh vek a, ZNP in seat 38, BJP-in seat 17, Nationalist Congress Party-in seat pahnih, Zoramthar Duhtute (ZTD)-in seat pakhat leh, Jai Mahabharat Party (JMP)-in seat pakhat chuh an tum a ni. Bial pahniha ding tur mi pathum an awm a; chungte chu MPCC president Lal Thanhawla (Serchhip leh Hrangturzo), ZNP president Lalduhoma (Aizawl West-I leh Kolasib) leh, Lalawmpuia Renthlei (independent ve ve)-te an ni. Kumin inthlana chuh tuma hming pe lutte zingah independent candidate pahnih an awm a, chungte chu – Champhai South-a din tum B Sangkhumi leh Serchhip leh Hrangturzoa din tum Lalawmpuia Renthlei te an ni. Candidate tura hming pe lut tamna ber bial chu Hrangturzo, Hachhek leh Mamit bialte niin, mi panga ṭheuhin hming an pe lut a; candidate tura hming pe lut tlemna ber Palak bialah chuan mi pahnih chiahin hming an pe lut thung. Constituency 17-ah candidate pali an awm a, constituency 19-ah candidate pathum an awm a ni. Kuminah MLA inthlan tura nomination file zingah hmeichhia pali an awm a, chungte chu BJP aṭangin mi pathum, leh INC leh MDA aṭangin aṭangin mi pakhat ve ve an ni.
9th. Saturday: Kolasib-a CZS studio-ah national legal services day hman a ni a, NE state zinga legal service-ah Northeast-a Kolasib district chu a tih ṭha ber an nih an lawm nghal. He hun hi H Vanlalnghaka, Consiliator, Lok Adalat, Kolasib-in a kaihruaia, chief judicial magistrate Liansangzuala chuan thu sawiin, “Kolasib district-in north east leh Mizoramah district legal services tiṭha ber a ni hi a lawmawm hle. Tunlai khawvel ṭhang zelah mitinin dan kan hriat zel chu kan bat a ni. Dan kan hriat loh chuan harsatna thui zawk kan chungah a thleng thei a ni,” a ti. District legal services hian ukil rawihna tur nei lote a thlawnin ukil a rawihsak ṭhin a, kum 2013 chhungin mi 150 chuang a thlawnin ukil a pe tawh a ni.
10th. Sunday: Synod Moderator Rev. Lalramliana Pachuau chuan Sihphir Vengthar Pastor Bial tlawhin chawhmaah Sihphir Vengthar Kohhran Biak Inah rawngbawlnna neiin chawhnuah Nausel Kohhran Biak Inah a nei thung.
11th. Monday: MNF party chuan an member, B.Sangkhumi chu MNF aṭangin tiamchin awm loin an hnawtchhuak. B.Sangkhumi an hnawhchhuah chhan hi MNF inkaihhruaina dan bawhchhia a, Champhai South bialah MNF official candidate a din thuah vang a ni.
12th. Tuesday: Mizoram College of Nursing (MCON) chuan Falkawna an college-ah kumina B.Sc (Nursing) zir chhuak mi 29-te thlahna leh thutiam lakna, ‘Lamp Lighting Ceremony’ an hmang a; Health department principal director, Dr .Lalrinliana Sailo-in a hmanpui. Principal nursing officer (Rtd), Lalthari Ralte kaihhruaiin nurse zir chhuakte’n bati chhi in thutiam an la a; nurse zir chhuak thar mi 29-te chu Apollo Gleneagles, Kolkata-a thawk tura appointment hmusa vek an ni. MCON hi nursing school aṭangin October 11, 2005-ah nursing college-ah hlan kai a ni a; tunah hian Falkawna mahni puala building tharah awmin, zirlai 120 an awm mek a ni.
13th. Wednesday: Excise & Narcotics department enforcement-te chuan Tuirial Airfield Vengah ganja kg. 2.533 an man a, a neitu nia hriat Zosangpuii (23) d/o Ralkaptluanga (L), Tuirial Airfield Veng inti an man bawk.
14th. Thursday: National Children’s Day a ni. Children’s Day hi khawvel pumpuiah naupangte chawimawina atan hman a ni ṭhin a; kum 1954-ah khawvel puma hman tura rel niin, November 20-a hman turin Unnited Nation-in a ruahman a, mahse India ramah chuan November 14, Jawaharlal Nehru, India prime minister hlui pianchamah hman ṭhin a ni. He ni pual hian Social Welfare hnuaia District Child Protection Unit chuan Kolasib Diakkawn YMA Hall-ah hun an hmang a, Kolasib chief judicial magistrate, Liansangzuala chu khuallian a ni.
15th. Friday: Chi vang tur niawma sawi a awm avangin dawr hrang hrangah chi leia intlar an tam hle. Mi pakhatin lei deuh teuh an tum avangin lei tur zawnga hmu zo lo an tam phah hle. He thil thleng hi thuthang diklo satliah vang mai nia hriat a ni. Dawt a nih ringlo engemawzat an awm avangin Food, Civil Supplies and Consumer Affairs Department lam chuan kudam a stock a tam thu thuchhuah siamin an tarlang nghal bawk.
16th. Saturday: Prime minister, Dr.Manmohan Singh chuan lehlanga Aizawl rawn tlawhin, Mualpuia 3rd. MAP field-a vantlang inkhawmah thu a sawi a; Mizoram thingtlanga chenna in ṭha nei lote harsatna sut kianna turin New Rural Housing Scheme an ruahman thu sawiin, Mizo mipuite chu Mizoram hmasawnna atan Congress thlang tling leh turin a sáwm. Prime minister vantlang inkhawm hi MPF president, Rev. Lalramliana Pachuau-in a kaihruai a; Dr.Manmohan Singh chuan, Mizoram hmun hrang hrangah chenna in lama harsatna nei an awm thu sawiin, “Sorkar laipui chuan chenna in nei lote harsatna sukiang turin hma a la a, New Rural Housing Scheme hmangin in nei lote harsatna sut kian a ni ang,” a ti a, NLUP pawh chhunzawm zel a nih tur thu a sawi bawk.
17th. Sunday: Synod Moderator Rev. Lalramliana Pachuau chuan Chaltlang Pastor Bial tlawhin chawhma : Lily Veng Kohhran, chawhnu : Chaltlang South Kohhran leh Zan : Chaltlang Kohhranahte rawngbawlna a nei.
18th. Monday: Mizoram Excise & Narcotics department officer-te leh Central YMA ofice bearer-te chu Excise commissioner, Lalhmunsanga pisa-ah an inkawm a; Excise & Narcotics department leh YMA hruaitute chuan, zu leh ruihhlo lakah Mizoram a fihlim zel theihna tura hmalakna lungrual leh chak zawka kalpuiho an rel a; inthlanpui lo awm turah leh Krismas/kumthar vuakvetah zu leh ruihhlo do tura thawk dunin, ‘joint operation neih ni se’, an ti.
19th. Tuesday: Saikhawthlir Middle School-a pawl sarih zirlai mipa naupang pakhat chuan Saikhawthlir Primary School-a pawl khat zirlai Lalhriathlua (6) s/o Thangkima, chu feikhawh (javeline throw)-in a khawh fuh palh a, Lalhriathlua hi damdawi in panpui a nih hnu in a thi.
20th. Wednesday: Lai Autonomous District Council-a MDC ni lai, JH Lallianngura (60), Tuithumhnar bialtu chu hrawk cancer avangin a thi a, vuiliam nghal a ni. JH Lallianngura hi October 5, 1953-ah Tuithumhnarah a piang a, kum 1988-ah Tuithumhnar bial aṭangin a vawi khat nan LADC MDC atan thlan tlin a ni a, tunah hian MDC term thum a nihna a ni. JH Lallianngura hian a nupui T.Lalramdinthari leh a fate pali a kalsan a, amah vuinaah hian LADC aiawhin V.Zirsanga, EM-in thu a sawi a ni
21st. Thursday: All India Congress Committee vice president, Rahul Gandhi chuan Champhai leh Kolasib a tlawh a, NLUP hmangin Mizoram economy siamṭhat mek a nih thu a sawi. Rahul Gandhi hian Champhaiah chuan Kahrawt khelmualah thu a sawi a, Kolasib-ah chuan Ṭumpui khelmualah a sawi. Khawpui pahniha vantlang inkhawm hi MPF hruaitute’n an kaihruai a, MPCC president, CM ni bawk Lal Thanhawla pawhin thu a sawi a ni.
22nd. Friday: Regional Institute of Paramedical and Nursing Sciences (RIPANS) chuan Zemabawka an campus-ah Graduation and Lamp Lighting ceremony an hmang a; State Planning Board member-secretary, PL Thanga, khuallian a ni. Inkhawmah hian, B.Sc. (Nursing) zir thar turte chu bati chhí-a thutiam hun neihpui an ni a, RIPANS Nursing department-a principal, Lalfamkimi kaihhruaiin thu an tiam a ni. RIPANS-ah hian B.Sc. (Nursing), B.Sc. (Medical Laboratory Technology), B.Pharm, B.Sc. (Radio Imaging Technology), B.Sc. (Optometry & Ophthalmic Techniques)-te zir theih a ni a; tunah hian zirlai 583 an awm mek a ni.
23rd. Saturday: Bihar-a Fatuha rel chawlhhmunah B.Hmingthansiama h/o Lalpanmawii, Champhai Vengthlang Norh ruang hmuh a ni a, rel chîl hlum ngei nia hriat a ni. B. Hmingthansiama hi SSB-a ṭanglai niin, Jay Nagar, Bihar-ah a awm a; Mizorama rawn haw tumin a awmna hmun a chhuahsan hnu lawkah hetiang hian hmuh a ni ta a ni.
24th. Sunday: Family Guidance & Counselling Centre (FG&CC) in November 13 (Nilaini) atang a Pastor-te puala Intensive Residential Pastoral Care & Counselling Training vawi 23-na, Synod Conference Centre-a an buatsaih chu kharna neih a ni a, training kharna inkhawm hi Rev. R. Lalhmingthanga, Director, FG&CC-in a kaihruai a, Rev. PC Pachhunga’n training chhuakte hnenah Certificate semin thuchah a sawi. Training chhuakte chuan training an hlawkpui dan a lema an ziak chu entirin an hrilhfiah a, Rev. K. Lalzarzova’n training te aiawha thu sawiin, Mizoram Synod Choir an zai bawk. FG&CC hian 1991 atang khan Pastor-te pualin Counselling Training hi a buatsaih thin a, kum 2002 aang khan Kohhran Upa te pualin a buatsaih thin bawk. Pastor 390 leh Lay Leaders 332 hnenah Training pek an ni tawh a ni.
25th. Monday: Kumin 2013 a Member of Legislative Assembly inthlanpui chu harsatna lian tham awm lovin tluang takin neih a ni a, mipui te’n boruak muanawm takah vote an thlak a ni. Vote hi zing dar 7 aṭanga tlai dar 4 thleng thlak tura ruahman ni mah se, hmun ṭhenkhatah chuan polling station huam chhunga lut tawhte chu tlai dar 4 hnuah pawh vote thlaktir an ni. Mi 5,57,841-in vote an thlak a, hei hi vote nei zawng zawng 6,86,874 aṭanga chhûtin 81.23% a ni. Hei hian postal ballot hmanga vote tlate leh Tripura refugee camp-a vote tlate a huam lo. Hmun eng emaw zatah EVM chhia a awm a, EVM chhiate chu a danga thlak nghal zel a ni a, harsatna lian tham a awm lo. Saron Veng, Aizawlah chuan EVM pakhatah vote eng emaw zat thlak a nih tawh hnuah EVM a chhiat avangin, information mike hmanga mipuite kokhawmin, vote thlak ṭhattir leh an ni. Hmun thumah official-te chhinchhiah leh EVM-a vote tla inmil lo erawh a awm. Hei bak hi chu EVM avanga harsatna lian tham thleng hriat a ni lo.Mizoram Assembly inthlanah hian Parvatui khuaa Thanglianchhungi, kum 105 mi chuan vote a thlak a, vote thlaktu zinga upa ber a ni. Mizoram puma vote thlaknaah Electronic Voting Machine (EVM) hman a ni a, Aizawl Dist-a Assembly bial 10-ah phei chuan EVM-in vote te a chhinchhiah ngei em? tih chianna VVPAT hman a ni a, Mizoram hi ramchhunga he khawl hmang hmasa ber state a ni nghe nghe.
26th. Tuesday: Mara Student Organisation, Saiha leh Saiha District Legal Services Authority-te chuan Saihaa I&PR conference hall-ah Law Day an hmang. Saihaa chief judicial magistrate, Dr HTC Lalrinchhana’n ‘The Ideal of Law, Justice & Social change with reference to Mizoram’ tih thupui a sawi a; Cindy S Ngotlia-in ‘Carrier in law, problems and prospects on legal education’ tih thupui a sawi bawk.
27th. Wednesday: UPC (NEI) General Sunday School-in kum 2014-a puitling zir tura an buatsaih, ‘Kristian thurin chhuina’, Rev. R Lalrinsanga ziah chu an general hqrs. office, Mualpuiah general superintendent, Rev. VL Dika Sailo-in a tlangzarh.
28th. Thursday: November 25-a Assembly inthlana Republic Veng polling booth I-a official-te chhinchhiah leh EVM-a vote tla a inmil loh avangin vote thlak ṭhat a ni a; vote nei 1,104 zinga mi 869-in vote an thlak a, vote tla zat hi 78.71% a ni. He constituency-a candidate-te chuan inthlan ṭhat a ngai chu pawi an ti a, mipui leh sorkar lakah an inthlahrun thu an sawi. He inthlan thatnaah hian mipui an kalkhawm tam hle a, party hrang hrang hruaitute an hmel hmuh tur a awm reng a, MPF-te pawh vote thlak hmasak aia ngawrh lehzualin an duty a ni. Vote tla hi vote thlak hmasak aiin a tam a, vote thlak hmasakah chuan EVM-ah vote 837 a tla a, official-te chuan 853 a ni thung a; niminah erawh chuan 869 tlain, vote tla hi a EVM tla aṭanga chhut chuan a hmaa mi aiin 32-in a tam zawk a ni. Republic Veng polling booth I-a vote thlak ṭhat a ni hi a chhiat phah thei niin INC candidate, R Vanlalvena chuan a sawi a; ZNP candidate, K Liantlinga chuan inthlan ṭhat hi a ṭhat phah theih a inring a, MDA candidate, RK Lianzuala chuan vote thlak hmasak nen a dinhmun a danglam a ring lo thung.
29th. Friday: Lai Autonomous District Council (LADC) ni khat awh thlasik ṭhutkhawm (winter session) neih a ni a; hetah hian tun hnaia Congress aṭanga hnawhchhuah tâk LADC chairman, F.Rohnuna chuan LADC executive secretary kaltlangin Governor hnenah bânna a thehlut. He session-ah hian November 20, 2013-a thi, Tuithumhnar bialtu MDC, JH Lallianngura sûnna hun hman a ni. LADC CEM, C.Ngunlianchunga, EM V.Zirsanga leh MDC dang pahnihin JH Lallianngura an uina thu an sawi hnuah sûn nan ngawi rengin minute khat an ding a ni. Sûnna hun hman zawhah zawhna leh chhanna hun hman a ni a; House-a chhan chi zawhna paruk lutte chu chhan hman vek a ni.Private member resolution pakhat sawiho a ni a, mahse hnâwl a ni. LADC session hi chairman ni lai, F Rohnuna chu Congress party aṭanga hnawhchhuah a nih avangin deputy chairman, T Zakunga’n a kaihruai a; chairman F.Rohnuna rin tâwk lohna motion a lut chu F.Rohnuna’n LADC chairman aṭanga bânna Governor-ah a thehluh avangin, amah rin tawk lohna motion chu LADC session-a sawi ho tum chu thulh a ni.
30th. Saturday: LPS Jr. Comedian Search vawikhatna hun rei tak ata an lo urlawk tawh chu zawh a ni taa; a pumpuiah Ruben Lalhruaitluanga, Bethlehem Veng chu pakhatna a niin Rs 30,000/-, trophy mawi tak leh mi thil phalte hnen atangin thilpek thahnem tak a dawng.
Similar Posts:
- VC leh LC Inthlan result
- November 2015, Mizo(ram) Diary
- LADC in hnathawktu Muster-Roll (MR) 145 a bantir
- ELECTION REFORM
- LADC Budget Session tan ani
December 1st, 2013 at 8:18 pm
1st 1la a n1 ma1 a1awm
Report this comment
December 2nd, 2013 at 10:14 pm
Chhana nge nge, thil a chhianchhiah peih thin mang e.
Report this comment