Mihringte hian kan hriselna hi kan ngaih pawimawh a kan in uluk a ṭul hle. Taksa a hrisel lovin engmah tih a nuam ngai lova, neih sum tam tak senralna thlentu a ni ṭhin fo bawk.
Khawvel ram changkang zawkahte chuan inhrilh nawn fo ngai lovin an bengvar thei viau hlawm a ni. Damdawi lam thiamte hnen a uluk tak a inentir fo e tilo chuan hetiang ram changkang tam tak, entirnan USA ang a mi tamtak te erawh, ei leh inah an insum theilo em em a, chutiang a nih vang chuan zunthlum, thisen sang leh lung (heart) lam natna khirh tak tak a tam viau tho mai. Eitur duh ang ang, tui tih ang chi a awm kim em mai a, engzat nge an ei an ngaihtuah ta lova insawizawi (excercise) an lak tlem leh si vang pawh a ni mahna le; chet hlekin lirthei lekchhuah alo ni zel bawk nen taksa tan hrisel a har viau pawh a ni mahna!
Mizoram hi kan la vanneihna chhan chu ke a kal ngai ala tam hi a niin ka hria. Kan awmna ramah (USA) te chuan step tlemte a awm pawhin elevator/lift hmang lo hram hram turin an infuih lawm lawm tawh a ni, “Step tlemte nitin i kal khan i nunna a pawt sei thei,” ti zawngin.
Ke a kal ngaihna a la awm tam e tilo chuan sa leh eitur lamah insum harsa ti em em hnam kan ni leh tlat thung. Vawk thau tak tak sa lo chu kan han ei ṭha duhlo ngat maite hi a manganthlak deuh chu a ni e. Vawk thau tak sa chu sawi loh, a thau ṭha ṭha kan la hmawm hmaih hmaih zui mawle! Kan ei tur hi khawi aṭang a lokal nge, engtia enkawl nge a nih te, kan thlai chawk chhuahte hi eng rannung hlo hmang a enkawl nge a nih pawh kan ngaihtuah ngaiin ka hrelo. A dawng ṭha ṭha kan thlang mai nite hian ka hre ṭhin.
Ke a kalna a la tam a, a hranpa a insawizawi lemlo pawhin kan lung (heart) hriselna tur awm tawk chu ke a kal ṭhin awm tak kan ni a, kan ka lam a kohram em avang hian lungphuchawl a thi thut thut te, zunthlum leh cholesterol sang leh thil dang tam tak kan nei fur mai chu a nih si hi mawle. India ram a state hrang hrang han thlir hian a mihring awmzat aṭang a chhutin state pawn a damlo thawnchuah ngai nei tamber kan ni thei hialin ka ring rum rum ṭhin. A chhan nia ka hriat chu kan induat loh vang te, kan ngaihsam vangte, damdawi mahni thu a ei mai mai kan chin vang te ni theiin ka ring a, thil dang tam tak pawh a awm ngei ang!
Mizo-te hian hriselna hi kan ngaih pawimawh takzet a hun tawh. Dam loh zual hnu a mangang a inenkawl buai leh chung ai chuan hmakhalh a lo inven theihna apiang a kan chet vat zel a ṭul tih hi kan rilruah tuh nun reng a pawimawh a ni. Mitinin kan tih theih pawimawh em em nia ka hriat chu, kumkhatah vawikhat tal kan taksa pumpui, kan thisen, kan mit, kan beng, kan kawchhung, kan vun, kan ha etc. hi uluk takin enfiah tir ziah hi niin ka hre bawk. Chutiang aṭang chuan thil la awm thei tur chi, entirnan, zunthlum neih hlauhawm takte pawhin an ei leh in etc. pawh an lo fimkhur theih phah dawn a ni.
Mizoramah hian naupang te te a kan vuiliam tak an tam ta hle mai. A na chang kan hriat loh vang leh kan ngaihsak loh vang a mual liamlo tur an tamin ka ring. Sawrkar lamin a thlawnin Disaster management hnuaiah CPR leh thil dang chi hrang hrang, mihring nunna chan theihna a thlawnin a zirtir thei an tih nghe nghe kha. Khatiangte kha zir theihnan hun insiam theih fo ni sela chuan mi tam tak nunna kan chhan theih ka ring tlat bawk.
Kumkhatah vawikhat tal taksa pumpui dâktawrte i inentir ṭhin ang u. Chutiang tih chuan kan nunna pawh seiin a awm thei fo mahna. “Nunna chu Pathian thu thu” tih thlazen hi a tawk lova, Pathian thu lovin kan pawttawi zawk fo ṭhin niin a lang.
Similar Posts:
- In leh mihring
- HRISELNA ATAN “DALDA” A THA LO
- Hnathawh hi hriselna a ni
- Slutwalk!
- I hnâr bengchheng thin em?
December 18th, 2013 at 9:03 am
Tha lutuk tlat….
Report this comment
December 18th, 2013 at 11:16 am
A dik khawp mai, thra lutuk tlat..
Report this comment
December 18th, 2013 at 1:48 pm
Mitthi tawh hnu buaibui hrep ai chuan hriselna ngaih pawimawh a that hmel viau.
Report this comment
December 18th, 2013 at 6:13 pm
A tha kher mai. Tunlai chu misual.com chhiar a manhla thei khawp mai. A lawmawm e.
Report this comment
December 18th, 2013 at 8:18 pm
Dâktawr leh hospital kut a kan hriselna leh kan nunna kan nghat lutuk hi a fuh em em lovin ka hre thin. Thawhah chhuak thut, stroke, heart attack, cardiac arrest etc. ah hospital leh dâktawrte hnen kan thlen hmain a nih tur tha lo tak tak kan chhungte leh keimahniah a thleng hman thei thin. Chutiang lak a invennan chuan uluk tak a mithiamte hnenah kan taksa kan checkup tir fo a pawimawh.
Thleng thut palh a nih pawh a pre-hospital care inpe thei turin 1stAID/CPR tal train chhuak tam thei ang ber kan awm a ngai. Mi tu emaw inti palh tase, thisen nasa takin put chhuak sela hospital thlenpui hmain engtia hmalak tur nge tihte, thawhah (Asthma) chhuak thut chu damdawiin kan thlenpui hmain engtin nge kan enkawl ang tihte khatiang tlem tlem, mi nunna chhan theihna si hi keimahni, kan chhungte, kan vengte, kan ram tan zir hi a pawimawh em em a ni tih hi kan hriat a pawimawh takzet.
Report this comment
December 21st, 2013 at 1:35 am
Advice tha tak, vawn reng chi a nih hi mawle.
Report this comment
December 23rd, 2013 at 10:38 pm
Report this comment