mi(sual).com

Matthaia 2:1-18-a kan hmuh angin, Lal Isua Bethlehem-a a lo pian khan, Khawchhak Mifingte, Lal Heroda leh Berampute khan Chibai an bûk ţheuhva. Chibai bûk tu mi chi 2 kan hmu a – Tihtak zeta Chibai buktute (Mifingte & Berampute) leh Adera Chibai buktu (Heroda) te an ni. Vawiinah hian Matt.2:1-18 thu aţang hian Lal Isua Chibai Bûktute Mi Chi 2 Zinga “Tihtak zeta Lal Isua Chibai Bûktu Mifingte” Chanchin hi kan zirho dawn a ni.

1. Mifingten Judate Lal Arsi An Rawn Zui
Khawchhak Mifingte hi Zawlnei Balaam-a khan Messiah (Judate Lal) lo pianna tur-a Arsi lo chhuak tur thu kha a lo sawi lawk tawh avangin, Mifingte pawh hian kha Thuhrilhlawkna (prophecy) kha an rawn umzui tih a lang a (Numb.24:17). Anmahni ngaihtuah chhuah mai mai a ni lova, Pathian Thlarauvin a rawn tirh-te an ni tih alang chiang hle.

2. Mifingte Tihsual – Heroda In-ah Judate Lal An Zawng!?
“Judate Lal Arsi” (Bethlehem Arsi tia kan koh tak) ngei chu zuiin, he Arsi ngei hi En-in Jerusalem khaw bul thlengin an rawn kal a ni. Arsi-in hruai a tumna hmun Bethlehem khua hi Jerusalem khawpui kal pelh a, mel 5 vela hlaa awm a ni. Mahse, Jerusalem khawpui an thlen hian, Judate khawpui a nih avangin “Judate Lal” chu Jerusalem khawpui, Judate khawpui ngeiah piang turah an ngai a, Arsi en tawh lovin, an mihring rilru thiamna leh finna chu hmang zawkin Jerusalem-a Lal Heroda In-ah an lut a, “Judate Lal lo piang” chanchin chu an zawt ta a ni (vv.1-2).

Ringtu nunah hian “kan rinna siamtu leh tifamkimtu Lal Isua” lam en nachang hre lo leh Thlarau Thianghlim ‘aw’ ngaithla lo leh rawnna chang hre lova, mahni mihring remhriatna hmanga kan chet apiangin Setana thlêmnaah kan inbarh-lut ţhin a, ringtute kan chesual ţhin.

3. Awm Lohna Tura Awm Hi Buaina A Ni
Lal Heroda’n Mifingte ka aţanga “Judate Lal Thar” lo piang chungchang a hriat chuan a mangang êm êm a, Jerusalem-a mi zawng zawng pawh an mangang ve a (vv.3-4). Hetih hunlai hian Lal Heroda hi “Judate Lal” (King of the Jews) title pek a nih daih tawh avangin, amah Heroda hriat loh chuan Lal dang an awm thei lo a ni. Hetah hian thil pawimawh tak inzep chu, Lal Heroda leh Jerusalem-a mite ti-mangangtute hi Mifingte an ni tlat mai! Mifingte hian an kal lohna tur hmun (wrong place)-ah an kal a, Zawh lohna tur hmunah zawhna an zawt (right question in the wrong place) a, chu chuan mi tam tak a khawih pawi (effects them & others) ta a! Anmahni ngei pawh dinhmun hlauhawm takah an ding hial a ni. Lal Heroda’n a tihlum nghal vek lo kha an vannei hle mai! Pathian venhimna a ni.

Ringtu ţha tak leh hman tlak tak-te hi, kan awmlohna turah kan awm chuan a buaithlak ţhin. Ringtuten Zu hmunah, Eirukna hmunah, Insualna hmunah, nawmchenna hmunah, mipat-hmeichhiatna hmunah kan awm chuan mahni mai bakah midang tan (ringtu leh ringlo thlengin) kan ti-mangang a, harsatna kan siam ţhin.

Thil hi a awm-ai deuh leh a nihna tur dik tak hi a awm vek a. Biak In-ah Zu lei tur a awm leh awm loh Pastor zawt ila, mak tih piah lamah nuihzat kan hlawh ang. Zu zawrhna (Bar)-ah Bible lei tur zawng ta ila, mâwl leh â nih bak kan hlawh lovang. Chvangin, ringtuten kan awmlohna tura kan awm a, kan tihloh tur kan tih a, kan tihtur kan tih lohva, kan sawi tur sawi lova, kan sawi loh zawk tur kan sawi te hian, keimahni leh ka ringtu-pui mai bakah, ringlo mite thlengin harsatna kan siam sak a, kan rawngbawlna a ti-ţhuanawp a, ringlote pawh Lal Isua an rinna turah harsatna a siam a, Lal Isua hming sawichhiatin a awm ţhin.

4. Ringtuten Engnge Zir Tur Kan Neih? 
Mifingte khan, Lal Heroda thiltih kual vel dan aţangin an tihsual an hrechiang hle a. An fellohna langsâr tak pawh an hrechiang hle. An sualna ngei khan hmun dik lohvah a hruai a, midang tan harsatna leh chhiatna a thlen a ni tih an hrechiang hle ang. A hnu-a an chet dan leh an thiltih dan hian an Thiltihsual an hria a, an sim a ni tih a tarlang bawk (vv.3-6, 12).

4.1. Krista Hmel Hliahtu – Sual Langsâr leh Sual Inthup
Ringtute hian tum miah loh leh, tum reng vang pawhin, langsâr leh sual inthup hi kan khawih fo ţhin. Hei ngei hi Pathian nen-a min ţhen hrangtu, kan Thlarau nun-a harsatna min siamtu leh Thlarau Thianghlim thiltihtheihna hnathawk thei lova siam ţhintu chu a ni. Zawlnei Isaia’n a lo sawi chiang khawp mai, “Ngai teh u, LALPA kut chu chhandam thei lo tûrin tihtawiin a awm lo va; a beng chu hre thei lo tûrin a ngawng hek lo: In khawlohnate chu nangni leh in Pathian kara tla-in a tiţhen zawk che u a ni a, benga a hriat duh lohna tûrin in sualnate chu a hmai chu a hliahsak bawk che u a ni. In kutte chu thisena tihbawlhhlawhin a awm a, in kut zungţangte lah khawlohnaa tihbawlhhlawhin a awm si a; in hmuite chuan dawt a sawi a, in lei chu suahsualna thu sawiin a phun nuah nuah ţhin” (59:1-3).

Ringtute hian, kan in Check-up-na tur pawimawh tak pakhat chu, kan ţawngţaina-ten tuihnang a neih tawh lova, kan Thusawiin hna a thawh tawh lova, mi nun-ah thu a sawi tawh lo nia kan hriat a, kan ringtu-nun a inthlahdah a nih chuan sual langsâr leh sual inthup kan nei a, min tichhe thuai dawn a ni, ti ila a sual lovang. Kan in-enchian a, sual sim a, damna kan chan theihna tura Kalvary damdawi kan ei thuai thuai a ţul.

Thil mak tak chu, Kristian (ringtu) sual-a a lo tlûk hian, ringtute chauh an zak lova, ringtute-ah chauh pawi a khawih lova. Ringlo mite pawhin Ringtu suala tlu leh hnungtawlh chu an lo hmusitin an lo diriam êm êm a. Ringtu sual leh hnungtawlh chu ringlo mite pawhin an ring zo tawh bik lova, kha ringtu suala tlu avang khan Lal Isua hming thlengin an rin duhloh phah hial a ni! Hei hi a thil khawih-pawi râpthlak êm êm chu a ni. Ringtute  fimkhur ang u.

2. Damna – Sim Leh Sual Kalsan, Thian Sual Thlah
Mifingte khan Arsi en tawh lova, anmahni mihring finna hmanga Lal Heroda In-a an kal kha an tisual a ni tih an in-hrechiang a. Lal Heroda In aţanga an chhuah khan Arsi pawh an hmu leh nghal tih kan hmu a (vv.9-10). An thiltih sual hi an in-hrechhuak a, an sim a ni tih hi an thiltih leh awmdan khan a tichiang hle (cf. v.12).

Matthaia hian a lo record fel khawp a, “Tin, Heroda hnenah kir leh lo turin an manga hrilha an awm avangin, anmahni khaw lamah kawng dangah an haw ta a” (2:12) tiin. He thu hian, Mifingte khan, an thiltih sual kha an hrechiang a, Lal Heroda kha pan tlak leh belh-tlak, biak tlak a awm lo a ni tih an hrechiang tawk a. Lal Heorda Thurawn, “kei pawhin amah chu chibai ka rawn bûk ve theih nan in hmuh veleh mi rawn hrilh ang che u” (v.8) a tih lawm lawm pawh kha engah mah an ngaihsak ta lova, kawng dangah an haw ta daih a nih kha!

Lal Isua ringtu dik tak kan nih chuan, Thlarau pawmpui loh, ringtu nun min ti-ţhuanawptu kan Lawmna leh hlimna te, khawvel taka thurawn min pe a, min tihlimtu kan ţhian ţha te zawng zawng pawh simna thinlung nen-a kan thlah vek an ngai ţhin. Tirhkoh Paula pawhin a lo sawi daih tawh a, “Ţhian sualte chuan nungchang ţha an tikhaw lo ţhin,” (1Kor.15:33) tiin. Hetah hian Paula hian “Ţhian” a sawi hi “mihring” a sawina ni mahsela, kan mihring ţhian-te mai bakah, kan Nun min tihlimtu hrang hrang (assets, money and electronic gadgets) te, nuam kan chenna leh tawlna in leh hmun te, kan ngainat zawng thil etc. zawng zawngte hi kalsan a, thlah a, Pathian hnena kir leh turin Lalpan min duh a ni.

He Krismas lo thleng turah hian mihring rilru ni lova, Thlarau Thanghlim hruaina en reng chunga, sual sim tur kan neih te sim a, kan tana Nau Thar Duhawm lo piang hi Chaibai bûk ţheuh turin kan in-sawm a ni.  Lalpa’n a Thu Malsawm rawhse, Amen!

Similar Posts:

• Bethlehem Arsi leh Khawchhak Mifingte.
• Wise Men from the East to Jerusalem
• Christmas hlathu diklo ka tih thenkhat
• Krismas Thuchah
• Krismas Thuchah

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Monday, December 23rd, 2013 at 12:45 am and is filed under Christmas, Religion. You can follow any responses to this entry through the RSS 2.0 feed. You can leave a response, or trackback from your own site.