1st. Sunday: Lungdai Pastor Bial huamchhungah rawngbawlna neiin Synod Moderator Rev.K.Lalhmuchhuaka chuan hetiang hian hun a hmang Chawhma:Lungmuat Kohhran tlawh, chawhnu:Nisapui Kohhran tlawh leh zan : Nisapui Kohhran tlawh.
2nd. Monday: Election Commission of India (ECI) chuan state pathum Mizoram, Karnataka leh Arunachal Pradesh-a Rajya Sabha MP inthlan neih tur atan hriattirna a tichhuak. State pathumah hian June 19, 2014-ah Rajya Sabha inthlanna neih a ni ang. Rajya Sabha-ah hian member 250 an awm a, chung zingah 238-te chu state leh UT-a MLA-te’n an thlang ṭhin a, a bak member 12 chu mi chungchuang, ram tana rawngbawlna leh hna thawk ropuite aṭangin India President-in a ruat ṭhin.
3rd. Tuesday: Governor Vakkom Purushothaman chuan Old Age Home, Luangmual a tlawh. Larsap hian home-a awmte chu blanket pakhat ṭheuh a pe a; home enkawltute’n an mamawh hrang hrangte an lo hrilh bawk. Old Age Home hi March 1, 1989-ah Mission Vengah din niin, November 5, 1996-ah Luangmualah sawn a ni a, mipa panga leh hmeichhe pathum an awm mek a ni.
4th. Wednesday: Khawbung JAC chuan Burma zu (BEDC) fun 220 an man a, zu neitu nia puh Lalhriliani d/o Lalauchhunga, Champhai Vengsang; Lalpekmuani d/o Lalnunzama leh Lalnunmawii d/o Thatkham Champhai Kanan Veng nia insawite an man bawk
5th. Thursday: World Environment Day a ni a, Enviroment & Forest department bultumin Assembly Annexe conference hall-ah hman niin, E&F minister Lalrinmawia Ralte-in a hmanpui. Inkhawm hi PCCF-in a kaihruai a; Mizoram University-a Zoology department-a mi, Dr Zothansiama’n sik leh sa mumal theih tâk loh dan leh a chhan te, mihring leh nungcha, thil nungte tana nghawng a neih dante a lem nen a hrilhfiah. World Environment Day hi kum 1972-a Stockholm, Sweden-a UN General Assembly-in June 5-a hman turin a ruahman a, June 5, 1973 aṭangin hman ṭan a ni.
6th. Friday: Kum 2005 hnua Mizoramin Miss kan thlan leh hmasak berah Armed Veng South nula, H.Lalchhanhimi chu Miss Mizoram 2014 atana thlan chhuah a ni a; lawman tangka fai Rs 110,000/- a dawng.
7th. Saturday: CID (Crime) hnuaia Special Narcotic PS staff-te chuan Pseudoephedrine mûm 40,000 an man a, a neitua puh Vanlalzawma (45), Falkland Veng nia insawi an man bawk. Vanlalzawma hian khehpuam hi Rs. 1,40,000/- a hralh a tum laiin an mansak a ni.
8th. Sunday: Pentikos Ni a ni a, Mizorama kohhran pawl hrang hrangte’n an hmang. Pentikos Ni hi Isua thawh leh ni, Easter Sunday aṭanga a ni 50-naah hman ṭhin a ni.
9th. Monday: Mizoram aṭanga Rajya Sabha member tur thlanna, June 19-a neih turah INC aṭangin Ronald Sapa Tlau leh MNF aṭangin L Ramkinlova ten an chuh dawn ta a; candidate pahnihte hian returning officer hnenah nomination paper an thehlut a ni.
10th. Tuesday: Chief minister Lal Thanhawla chuan nimin khan New Delhi-ah Development of North Eastern Region (DoNER) minister Gen. VK Singh a pisa-ah a kâwm a; hmasawnna hna thawhnaa Mizoramin harsatna a tawh te, Mizoram mamawhte leh hmarchhak mamawh hrang hrangte a thlen. Chief Minister hian DoNER Minister hi Mizorama zin tur a sáwm nghalin Gen. VK Singh chuan remchang hmasaah Mizoram tlawh ngei a tum thu a sawi. CM hi minister Zodintluanga’n a ṭawiawm a ni.
11th. Wednesday: Laltluangkima (35), Khawzawl Vengthar chuan a pa, Lianhenga (83) chu a that. Laltluangkima hi tual a thah hnu lawkah police-te’n an man nghal a ni. Lianhenga inah hian amah leh Laltluangkima bakah, Laltluangkima u Lalbiaktluangi leh a pasal leh an fate pathum an khawsa a, pawi khawihna thlen lai hian Lalbiaktluangi pasal chu ramah a riak a ni. Lianhenga hi bengchhêt tawh, tar chak tawh lo tak a ni a, tun hnaiah kawṭhaloin a zût avangin khumbetin a damlo mek a ni. A pa a thah lai hian Laltluangkima hi a buai hle a, a inhrosa nasa a, a bul hnaia awmte pawh thahah a vau a, an dang zo lo hial a ni.
12th. Thursday: Ṭhuampuia sipai damdawi-in, 457 Field Hospital chuan Sihphirah a thlawna inentirna an buatsaih a, mi 417 an inentir a, a ṭul angin a thlawnin damdawi an pe nghal. Free clinic hi Sainik director Sgn.Lt. Dr Lalnuntluanga’n a hmanpui a ni.
13th. Friday: June 22nd. a tan tak NECS Cup chu a vawi hnih nan Lammuala final khelhah Ramhlun South-in Malsawmfela goal hmangin Armed Veng 1-0 in an hneh a, champion team hian fair play award an dawng tel bawk. Pahnihna Armed Veng ṭantute an chemawi a, organiser lamin an hmuh hmaih lo – Best Supporter an dawng thung. Top Scorer-ah Vanlalthlamuana (Goal 9),Ramhlun South chu thlan a ni bawk. Saiha Tlangkawn mi chuan goal sawm chuang a khung naa; dan pela a chet avangin khelmual atanga hnawhchhuah a niin a goal thun tam paw’n awmzia a nei ta lo a ni.
14th. Saturday: National Liberation Front of Tripura (NLFT) hel pawla tel ten Mizoram khawthlang lam, Rajiv Nagar leh New Kawnpui inkar aṭangin hnam dang sumdawng mi pahnih an hruai bo. Anni hi Kanchanpur aṭangin Rajiv Nagar-a sumdawnga kal an nia; an haw leh lamah NLFT te hian an chuanna motor lo tidingin an hruaibo a ni. Sumdawngte hi Nepali pakhat, Chakma pahnih leh Bengali pathum an ni a, Bengali pakhat chu a tlanbo nghal a, a bak mi pangate manin a hnu lawkah Nepali leh Chakma-te chu an chhuah a, Bengali pahnihte chu an hruaibo ta a ni.
15th. Sunday: Baptist Church of Mizoram (BCM) chuan kohhran tinah ‘Chhawmdawlna Pathian Ni’ an hmang. Chhawmdawlna niah hian ‘Environment humhalh pawimawhna’ tih thupuiah hman a ni. Kohhran mipuite chu ram leilung leh nungchate nena an inkungkaih tawnna te, an ṭhatna tura humhalh chunga enkawl tur te, khawvel sik leh sa lo danglam nasat tak vanga ei leh bar thawh chhuah a harsat phah tial tial thu te; chumi vanga natna lo pung zel dante leh a tuartu chu mihringte kan nih thute zirtir an ni.
16th. Monday: Ch. Chhunga Truck Terminus thlang khâmah Lalkhawmawia (56), Bungkawn Venglai chu Laltlanzova, Phuldungsei khua nia insawiin a nem thla a, Aizawl Civil Hospital thlenpui a nih hnuah a thi.
17th. Tuesday: Remote sensing leh GIS thiamna hmanga Mizoram leilung awm dan zir chianna leh hman ṭangkai theih tur dahkhawmna – Space Based Information Kiosk (SBIK) chu chief secretary L.Tochhong-in CS conference room-ah a tlangzarh.
18th. Wednesday: Mizoram Pradesh Congress Mahila chuan Vanapa Hall-ah an party president leh chief minister Lal Thanhawla an chawimawi. Chawimawina inkhawm hi Mahila president Tlangthamawii’n a kaihruai a; Lal Thanhawla chuan MPCC-in sorkarna a chan loh chuan Mizoramin khaw êng a hmuh tak tak dawn loh thu sawiin, “Kum 1998 khan tla lo ila chuan Mizoramah kan intodelh mai ni loin, kan hralh chhuak tawh ang. Tui leh inkalpawhna kawngah pawh chuti tho chu a ni,” a ti.
19th. Thursday: Pu Ronald Sapa Tlau, INC candidate chu Mizoram atanga Rajya Sabha MP thar atan thlan tlin a ni. Election Commission of India (ECI) remruatna angin Mizoram Legislative Assembly-a MLA 40 te chuan Mizoram aiawh tur Rajya Sabha MP thlanna atan Legislative Assembly Secretariat-ah vote an thlak a ni. Pu Ronald Sapa Tlau hian vote 34 hmu in thlan tlin a ni a. Pu R. Ramkinlova’n vote 6 a hmu a ni.
20th. Friday: Mizoram State Compensatory Afforestation Fund Management and Planning Authority Governing Body chu an Chairman, CM, Pu Lal Thanhawla hovin Chief Minister Office Cabinet Room-ah an thu khawm a, an hnathawh tawh dan leh sum hman dan leh mamawh dan turte an sawi ho.
21st. Saturday: Ramhlun South branch YMA chuan NECS Cup 2014-a Ramhlun South local council team champion lawm nan Aizawl Civil Hospital-ah thisen unit 61 an pe, a petute hi mipa 55 leh hmeichhia paruk an ni.
22nd. Sunday: Zemabawk AL Road-a F.Lalenga te luah lai Assam type chu lungremin a chimpui. In chim lai hian a chhungah mi pakhat a awm a, mahse, hliam na lutuk a nei lo hlauh. In chim hi khawtlangin an senghawi nghal a ni.
23rd. Monday: Lunglei High Powered Committee (HPC) vice chairman S Laldingliana chuan Ngenrual, Thingfalah Agriculture department department in ‘Custom Hiring of Farm Machineries’ a hawng. Farm Machineries Custom Hiring hnuaiah hian loneitute hnenah Agriculture department chuan kum khat chhung loneitute tractor a hawhtir dawn a, an tih ṭhat viau chuan an neih hlentir dawn a ni.
24th. Tuesday: Synod Music Committee-in Kristian Chhungkaw Hlabu a buatsaih thar chu Synod moderator Rev. K.Lalhmuchuaka’n Synod Conference Centre-ah a tlangzarh. Hlabu-ah hian kum 2010-a Kristian chhungkaw hla inphuahsiaka hla thehluh zinga 302 dah a ni a, chhungkaw hla 184 leh inneih hla 118 a awm.
25th. Wednesday: Lunglei District Cooperative Union (LDCU) Ltd. chuan YMA sub-hqrs. conference hall-ah general assembly an hmang a, Lunglei HPC vice chairman S.Laldingliana’n a hmanpui.LDCU Ltd. hnuaiah hian thawktu pasarih awmin, president leh vice president bakah Board of Directors pariat an awm a; kum 2013-14 chhungin sorkar aṭangin cheng nuai 27/- an hmu a, Rs. 19,62,888/- an hmang ral a ni.
26th. Thursday: MBSE chuan HSLC leh HSSLC 2014 Compartmental Examination result a tichhuak. HSLC exam-ah exam beitu mi 334 zinga 154 an pass a, pass percentage chu 46.11% a ni. HSSLC Arts compartmental exam-ah mi 163 zinga 56 (34.36%) an pass a, Science-ah mi 55 zinga 29 (52.73%) leh Commerce-ah mi paruk zinga pahnih (33.33%) an pass.Compartmental exam-a pass-te nen hian kumina HSLC pass zawng zawng chu mi 12,630 an a, chu chu 68.38% a ni. HSSLC-ah a pumpuiah Arts-ah mi 6,020 (71.52%), Science-ah mi 1,843 (77.73%), Commerce-ah mi 449 (75.08%) leh Vocational-ah mi 205 (52.30%) an pass bawk.
27th. Friday: Industrial Training Institute (ITI), Aizawl chuan kumin hian kum 50 a tling a, an golden jubilee hi parliamentary secretary (LE&IT) Lt. Col. ZS Zuala hoin an lawm.ITI, Aizawl hi kum 1964-a din a ni a, kum 1974 khan tuna a awmna hmunah hian a building-te sak zawh a ni. Engineering trade 16 leh non-engineering trade panga a zir theih a, zirlai 400 vel an awm mek a ni.
28th. Saturday: Niawh¬tlang khuaa Pakiauva chuan a ṭhianpa Suithang¬a (52) chu a kâp palh a, Suithanga hi Aizawl Civil Hospital panpui a nih laiin a thi. Pakiauva leh Suithanga te hi an ramvâk dûn a, Pakiauva chuan Sui¬thanga chu sa emaw tiin ulhbun silaiin a kâp a, a bek veilamah a kâp fuh a ni.
29th. Sunday: Mizoram police leh BSF ṭangkawp chuan Raju Chhetry (37) s/o Mohan Chhetry, Chhinga Veng hnen aṭangin pawisa lem Rs. 1,07,000/- hû leh sapzu ûm 93 an man. Pawisa lem hi 1000/- leh 500/- note a ni.
30th. Monday: MNF party chuan Mizoram hmun hrang hrangah Remna Ni hmangin, inkhawm an buatsaih a, MNF president chuan Lungleia Mizo Hnam Runah a hmanpui a, MNF general headquarters-a hruaitu dangte’n khaw hrang hrangah an hmanpui bawk.MNF president chuan, “Kan duhthu a sâm emaw, sâm lo emaw, he inremna siamtute hi insawisel leh indem thei tumah kan awm lo. Pu Laldenga khan sawiselin dem se la, ama mawnga a hlim tihna a ni. Congress chu sorkar laipui neitu leh an phal leh phal lohin awmze nei ber zawk an ni,” a ti a; India sorkar leh hotute’n inremna thuthlung chu an sawi nêpin an sawisel ngai lo tih a sawi bawk.
Similar Posts:
- Kan President a rawn thleng e
- June 2009, Mizoram Diary
- MNF-in India a dona chhan, CM-in a sawifiah
- December 2016, Mizo(ram) Diary
- November 2016, Mizo(ram)Diary
July 7th, 2014 at 9:17 pm
Misual hian ka lung a len.
2010 FIFA world cup te kha chuan kan la ri luih2 asin mawle, kumin Ual Kap zawng, kan reh ta duak sia
Report this comment
July 7th, 2014 at 9:25 pm
misual chu a la thawk ve hram hram hi
Report this comment
July 8th, 2014 at 7:50 pm
Kan admin thar? hi i fakawm ka ti ngei mai. Tlem lai deuh atang khan kar khata vawi khat luh a tawk a; tunah erawh nitin luh ziah a ngai ve taa; a lawmawm ngei mai. I tang zel ang u.
Report this comment