YMA KUMPUAN – RAM LEH HNAM HUMHALH
MS-a
Tlem lai deuh khan mipa pakhat leh hmeichhe pakhat, an hmel en reng reng pawha Mizo tawng pai tur hmel ngawih ngawih hi an lo kal a; a hmeichhia zawk chuan, “Hei ka thianpa hian Birth Certificate a nei tawh a; mahse, Court lamah la tihfel a ngai an tia, min lo pui teh” a rawn ti a; an Birth Certificate rawn ken chu ka’n en sak a; Birth Certificate-ah chuan Mizo hming hian a lo inziak a; Lunglei Veng pakhata piang ang hian a lo inziak bawk a; khawi atanga an neih nge tih ka zawh chuan, an veng chhunga Birth And Death Registrar-in a pek chhuah niin an sawi leh ta nghal a; ka’n enchianga signature leh engkim chu a lem niin a lang si lo. Ka ngaihtuah an ti thui hle mai; YMA ten Ram leh Hnam Humhalh Kumpuanah kan neih mek laia hetiang thil ti duh kan la awm hi a pawi ka ti hle mai. Ram leh Hnam humhalhna rilru pu-in ka tanpui duh ta bik lo!
Ni e, he ram riangtê-a hnam tlem tê hi humhalh kan tul tak zet a niang chu, Mizorama NGO lian ber pawhin vawi 6 lai kumpuan thupuiah tun hma lama a lo neih tawh hnuah leh kumpuan thupui dangte kan neih leh tawh hnuah kum 2012 thupui atan Ram leh Hnam Humhalh chu kan han puang leh ta a ni a; YMA hnuaitute kovah chauh kan nghah chuan he Kumpuan hi a hlawhtling dawn lova; kan zavaia kan tanrual a tul takzet a ni. Engtin nge Ram leh Hnam chu kan humhalh ang le?
Ram Leh Hnam Humhalh dan tur kei aia sawi tur hria tam tak kan awm ang; mahse, ka ngaihpawimawh tlemte ka han tarlang ve chauh dawn a ni:-
DÂN A AWM ALAWM:
Mizote hi chimral kan nih lohna turin Dân siam a lo ni tawh thin a; a then chu kan la hmang mek bawk:
1. District Council hunlaia Vai sumdawng (khuahkhirh theihna dan) Trading by Non-tribals (regulation) Act 1953, Sixth Schedule Para – 10 chu paih a nih tawh a. He dân ang hi chhimlam Autonomous District Council ten an la chhawm thei.
2. Trading by Non-tribals (Regulation) Act 1974 chu Mizoram sawrkar nawrna avangin kum 10 chhung (1975 – 1985) atan India President-in a pawmsak ta hram a, tihnun a ni leh ta lo.
3. Bengal Eastern Frontier Regulation 1873, Section – 3 hnuaiah Inner Line Permit (ILP) kan nei a. Hei hi inhumhimna kan neih leh kan chelek theihber chu a ni ta a. Nagaland leh Arunachal te hi ILP hmanna state ve tho an ni a, mahse an him tak tak lo a, hnamdang – vai (non-tribals) ten an chim nasat tawh avangin an sawrkar leh mipuite pawh an beidawng tak zet tawh a ni.
Tuna kan dân chelek ber ILP hi a tirah chuan Mizote humhalh na’n ngawr ngawra siam niin a lang lo (helai thu hi chu kan sawi thui lovang, a sei deuh dawn avangin). Mahse, Mizoram pawn atanga hnamdang lo lut tur ten Permit an neih a tul tlat avangin a siam chhan chu enga pawh chu ni se; kan tan chuan inhumhimna kulhpui tha tak a ni a; chutihrual erawh chuan,Permit-neia an lo luh pawhin phalna pek ang chauh an thawk thei a ni. Hetiang dan tha tak Bengal Eastern Frontier Regulation 1873 hi chimralna laka min vengtu a ni tih kan hriat a pawimawh a. Hnamdangte sorkar-in phalna a pek bak hi chu i chhawr lo ang u.
HNAMDANG SUM DAWN NANA MIZO HMING HAWH TIR: He lam hi chu kum hmasa (2011)-ah pawh khan Zoram pum huapin kan buaipui chiam tawh a; Mizo hming hawha hnamdang sumdawng te pawh dap chhuakin ti tawh lo turin ngenna pawh siam a ni tawh. Mahse, kan zawm dan erawh duhthusam a la ni lo.Hnamdangte sumdawn nana Mizo hming kan hawhtir hian ram kan hmangaih lohzia a lantir a. Kan ram hmangaih miah lotu, sum leh paia hlawkna chauh duhtu hnena kan hming hawhtir hian kan ram leh hnam kan hralh a ni. Kum 2011 khan Aizawlah Mizo hming hawha hnamdang sumdawng Hardware leh nepnawi dawrah 264 vel an awm a; Lungleiah 40 dâwn an awm bawk. Heng Mizo hming kan hawhtir te hian ram mipuite tana thil tha thlir lovin anmahni hamthatna leh hlawkna tur chauh an thlir a, a hlawkna sum pawh ram mipuiteah lêt lovin ram dangah a luang liam a, ram dang miin an hlawkpui ta zawk a ni. Kan harh a va hun êm! Dawr kawngka lu chunga Mizo Hming inziak, mahse, sum leh pai hnamdang kuta awm leh si te hi thil zahthlak a ni. Keimahni sumdawnna chu keimahni ngeiin enkawl ang u.
NUPUI PASAL CHUNGCHANG: Nupui pasal inneih chungchang pawh hi Ram Leh Hnam Humhalhna kawngah sawi ngei ngei tur niin ka hria; Kum hmasa mai khan mizo hmeichhia hnamdang pasal nei te kha khaw pakhatah chuan an buangrua khawtlangin an theh chhuahsak niin ka hria; engatinge kha mizo hmeichhia khan hnamdang pasal a nei a nih chuan a pasal te ramah a awm mai loh le, awm nise buaina a awm lo tur. Nupui pasal chungchangah a inneiate inhmangaihna tawnna kha kan dah pawimawh ber pawh a ni mai thei; mahse, hnamdang mi pasala nei te hi an pasal te hian kan hnam min hmangaih phah kherin a rinawm lo. Chuvangin, Ram leh Hnam Humhalhna zâwn atang chuan hnamdang nena nupui pasal inneih pawlh hi a him lem lo. Helamah hi chuan Mizo tlangvalte hi chu an fihlim viau chuan ka hria. Hmeichhe thenkhatin, Mizo mipaah neih tlak awm hek lo, ti-a an hmeichhiatpui te tan zawnga an sawi hi chu ka pawmpui meuh lo; Mizo mipaa neih tlak hmu lotu chu mizo mipa tan paw’n a neih tlak bik lovah ka ngai!
SETANA DAWI HLO: Mizo thalai te Ruihlo tâwnah kan tlawm mai ang tih ka va hlau êm! He Ruihhlo hian kan ram thalai nunna tam tak min suat sak tawh a; chhungkaw nun a tibuai a; khawtlang tan a him lova; ramin kan buaipui ta a nih hi. Hnamdangin min chim miah lo mah se, ruihhlo avang hian kan hnam hi a ral mai ang tihte pawh a hlauhawm ta! Heti taka kan buaipui laia; kan mizopui ngei tena an la zuar duh te hi a va rapthlak em! Kan ram hruaitu thenkhat ten Ruihhlo zuar chu tlang chil an rawt deuh titih te pawh hi Ram leh Hnam hmangaihna rilru atang chuan ka pawmpui viau asin! Mahse, Dân kan nei a; tunhmaa a hremna a na lo deuh ti-a mipuiten kan sawisel thinna pawh kha a zia viau tawh a nia. Assam Drugs Control Act hmanga hremna kha chu a nêp deuh va; mahse, tunah chuan Parvon Spas zuarte pawh hi ND & PS Act hmanga charged an ni zel tawh a; a hremna pawh a na tawh viau ania; he ruihhlo hi i do zel ang u. Nangpawh aw thalai, Ruihhlo bawiha i tân chhung chuan, i farnu te an thlamuang lova, i nu leh pate rilru a hah a, khawtlang min tihah asin. Kan ram leh hnam nghahfak hi ruihhlo avanga i thamral mai chuan he hnam hi ral mai dawn asin; sim tum rawh.
DIKNA, RINAWMNA LEH TAIMAKNA: Awle, a hmasa bera kan sawi tak ILP te khian tawp hun a la nei mai thei; kan ramah hian ramdang mi zalen taka an rawn luh theih hun pawh a la awm ang. Mahse, he ram mipui te hian Dikna leh Rinawmna kan vawnnun tlata; hnathawh kawngah hnamdangte aia kan taimak pawh chuan he hnam hi a ral ka ring lo. Chuvangin Dikna, Rinawmna leh Taimakna te hi ram leh hnam humhalhna hmanrua a lo ni. YMA member i nih chuan i thatchhe thiang lo. I lo thatchhe thin a nih pawhin Ram leh Hnam humhalh nan taimak chhuah rawh. Engati nge kan ramah hnamdang an tam em em? Kan thawh peih loh an thawk peih tlat alawm. Hnamdang te thawh ang kan thawh thiam ve chhunah pawh kan inchhiar to em em zel si. Ram leh hnam humhalh nan, dikna leh rinawmna vawng nung la; taimak chhuah rawh.
Similar Posts:
- Hnamdang ka neih chuan ka hnam ka phatsan
- Ram leh hnam Humhalh
- RAM LEH HNAM HUMHALH – II
- Hnam Dang Pasal Nei Chhui Dawn
- Aizawlah Chuan (Ram leh Hnam Humhalh Version)
July 10th, 2014 at 3:13 pm
Hnamdang nupui hi chu nei thei ka ni tawh lo hrim hrim.
Report this comment