mi(sual).com

RAMHUAI CHIHRANG HRANG KAN PI LEH PU TE LO HRIAT THIN DAN:

Ramhuai chungchang hi khawvel hnamtin mai hian sawi tur kan nei theuh hlawm awm e. Heng khawvel hmun hrang hrang a ramhuai an hmuh dan te leh an ngaihdan te hi rawn sawi ka tum a ni lemlova. Kan Mizo pi leh pu ten engtinnge ramhuai hi an lo hriat dan thin hi mi hrang hrang sawi ka lo hriat ve dan atang te leh keimah in ka lo hriat ve dan atang te a rawn lakhawm in thangthar ten kan pi leh pu te ramhuai lo hriat dan kan hriat chian ve deuh theih nan ka rawn sawi ve dawn a ni. Ramhuai te hi an awm lo tih ngawt theih a ni lova, tun thlengin kan ramah leh khawvel hmun dang dangah an la hmu reng a, tin, kan Bible ngei pawhin an awm zia chu chiang takin a sawi bawk a ni.

Kan pi leh pute kha ramhuai bia, thingbul lungbul bia hi kan ti fo mai a. Hei hi a dik hlel ve deuh hlekin ka hre ve thin a. Kan pi leh pu te khan ramhuai hi sual deuh leh tha deuh te,hlauhawm deuh leh hlauhawm lo deuh te awmin an hre thin a. A sual deuh mihring tihnat ching nia an hriat deuhte chu an mahni tihlungawi nan inthawina chi hrang hrang an lo nei thin a, lung lianpuiah te, thing lian pui puiah te puk chungah te awm a an rin avangin chung hmunah te chuan ramhuai ho chu tlawn lungawi a, an mahni an tihnatloh nan an inthawi thin zawk a ni a, chuvangin ramhuai be mi, thingbul lungbul bia kan tih fo mai hi chu a dik lo deuh a ni. Ramhuai kha an va ‘worship’ tlat lo. Ramhuai thenkhat te erawh chu chuti taka hlauh leh biak hial turah chuan an ngai lo va,hlauh erawh chu an hlau ve tho ani. Hmuh theiha an inlar changa an pianhmang leh khawsa-zia ang zelin ramhuaite chu heti hian an hming an lo vuah thliah hlawm a. Heng ramhuan tha , a sual lo chi ni a an ngaih te leh ramhuai sual mi tina thei chi ni a an ngaih te hi lo sawi chho dawn ila atha awm e:

Ramhuai fel mi tina theilo chi ni a an ngaih te:
‎1) SI-HAI: Kan pi leh puten ramhuai zinga nun nem leh zaidam bera an lo sawi thin a ni.Rampalaileng leh dai bul hnaiah an awm deuh ber thin.An pianhmang chu naupang duhawm tak ang hi an ni a,an lu hi a kir deuh chhip chhep hlawma mipa leh hmeichhiate pawh an awm ve bawk.

2) MAIMI: Maimi hi ramhuai tha leh hlauwam lo pawl bawk a ni a, muthilh hlana mi lo zial emaw, thawh attir emaw a ching thin a, mi tihnat erawh chu a ching lo emaw tih tur a ni. Kan pi leh pu te khan mai mizial kan tih anga kan awm hian ramhuai ‘maimi’ an tih hnathawh ah an ngai a ni.

3) RAU: Rau pawh hi ramhuai hlauhawm lo pawla chhiar bawk a ni. In vel leh dai bul naupangho chettlatna lai hi an chenna ber niin an ngai.

4) RAWT: Kan pi leh puten ramhuai zinga dawih bera an lo sawi thin chu rawt hi a ni. Lo riahnaah te hian mi tihthaih an hrat em em a,’rawt,rawt’ tiin an hram noh noh thin.Rawt hram hi mi thenkhat chuan engemaw rannung hramah an ngai thung .

5) KHUALTUPUI: Ramhuai hlauhawm lote zinga chhiar an ni a, mihring hriat tura thawm an neih dan ber chu thlam te, in te a sawi chiam thin.

6) HMUITHLA: Hmuithla hi ramhuai anga ngaih theih ve, mahse, mihring ang taka ralkhat atanga inlar thina sawi a ni. An rawn inlar chang pawhin hnaih theih pawh an ni lo va, pan hnaih dawn chuan hmuh loh karin an bo mai thin a ni.

7) KHUAVANG: Khuavangho pawh hi kan pi leh pute chuan ramhuai tha mi nia an lo ngaih thin a ni. Mihringte pawh hi min enkawlin min veng thei hial niin an lo sawi thin.Pangti khawimaw laia thil dum te tak te te lo awm thin pawh hi khuavangin min hriat hran theihna tur emaw, eng emaw avanga min lo chhinchhiah theihna turah an ngai a, a hmingah pawh ‘khuavang chhinchhiah’ an vuah a ni. Kan kiang velah hian hmuh theih si lovin an khawsa ve a, mihringte ang bawkin nupui pasalte pawh an nei ve a, a chhungkua te pawh an din ve nia sawi a ni. Mihringte hmuah pitar angin a inlar deuh ber thin a, an lung tih-awi chuan mal min sawm thei leh an duh loh zawnga awm chuan min tichhe theituah an ngai.

LASI: Pi puten ramhuai tha mia an lo chhiarho zingah cuan lasi hi a lar ber leh a chanchin an lo hriat tam ber a ni. Nula hmel tha tak tak an ni a, tar emaw naupang emaw an awm an sawi ngai lo. Ramsa leh ranvulh chunga thuneitu niah an ngai a, Lasi zawlte chuan sa an kap thei em ema ngaih a ni. Tan Tlang leh a chheh vel Lurh te khi lasi awmna niin an ngai a ni.

Ramhuai sual a an ngaih ho te:

1) TAU: Ramhuai chi khat hlauhawm thin tak chhunlawnah pawh kham karah leh thing zarah te nilum aia thu duai duai thina, a lu vun te hika a hrikte en thin nia sawi a ni a, thenkhat chuan ‘tau luhik’ an ti deuh kher thin. Chuti anga awm hmu chuan a mi melh ringawt pawh lu kawlh rawta natna a ni an ti. Zanah a rualin kham leh ngaw velah te hian meichher chhiin an kal duah duah thin, ralkhat atang chauhin a hmuh theih a ni; chuti ang chi chu ‘tau meichher chhi’ an ti thin.

2) KHAWHRING: Khawhring hi chu ramhuai sual leh vir tak a ni a, mi thil neih an it avangin an buan thluin an pum te a tihnat sak thin. An khawchhungah an lut a, anmahni hmang chuan an thil duh leh phutte chu an lo sawi chhuak thin a ni. Nula hmel tha deuh hian khawhring hi an nei duh bik a, chuti ang an nih avang chuan mi thenkhat chuan in itsikna leh in tihhmingchhiat duhna avanga inpuhna mai niin an rin phah bawk.

3) KHAW-MU: Khaw-mu chu ramhuai sual mihring hruai bo leh lak bo ching a ni. Mihring chin hriat loha bo ta daih te hi khawmu chawi bo an ti thin. Mizoramah hian sawi tur atam hle mai, thenkhat chu an bo hlen daih a, a then chu ni eng emaw zat hnuah an hmu leh bawk a, anmahni zawnga mipui an vah huai huai pawhin an sulhnu hmuh tur reng reng a awm ngai lo va, chawia chawi bo an ni tihte pawh a rinawm ve khawp mai. Khawmu chawi an tih ho an hmuh leh hovin an sawi dan chuan an zakhnuaiah te dawmin an thlawh pui thin a, tin, hmun nuam tak tak ah te kalpui in eitur tuihnai tak tak te an pe thin in an sawi a mahse an kalpuina te chu ramhnuai pilril tak tak te leh kham kar chhengchhe tak tak te a lo ni thin a, an thil ei te pawh chu changpat te pangang te theirah engemaw mai mai te a lo ni thin. Mak deuh mai chu an kalna hi mihring pangai tana han kalna rual loh a kham chhengchia te a lo ni thin a ni.

4) TULUM: Ramhuai chi khat mak tak tak leh rapthlak tak taka chet hmang a ni. Mithi tawh kawchhungah te a lut thin a, mihring ruang hmang chuan mak tak takin a khawsa thin a ni. Hetianga mithi kawchhunga ‘tulum’ a luh hian rei tak erawh chu dam angin an awm tawh chuang lo. Tulum a chhuah veleh khan an thi/che theilo leh chawpchilh mai thin. Mitthi lo nung leh rapthlak tak taka han khawsa thin chu a hlauhawm ema mite’n an rap hle thin.Tin, minung lai kawchhungah te pawh lut in bawraw tak takin a khawsak tir bawk thin ni in an sawi.

5) PHUNG: Ramhuai sual leh hlauhawm zinga mi a ni a, hlauhawm leh rapthlak taka mihring mithmuha inlar ching a ni. Lianpui mai, hang ren run leh hmul deuh thup, hnute fuak duai mai a ni. Anmahni hmuh ringawt pawhin lu kawlh rawta natna a ni. Tin mihring pawh an sawisa hrep fo thin. Phung hi chi nga lai a awm in an sawi a:-

a) Kawlkawlha Phung: Mizo upate’n phung hlauhawm bera an lo sawi thin a ni. Lian em em hmul der dur leh dum zun a ni a,mi rilrute pawh hre vek niin an hria a, chu vangin phung rilru hriate pawh an ti thin a ni.

b) Phungkur: Khawlai leh dai vela cheng thin phung sang em em, kur dulh mai, van tawng hiala lang thin a nih avangin ‘phungkur’ an ti a, a mala hmuh thin a ni. In thum lai pawh kan zo a nih avangin thenkhat chuan inthum kar an ti bawk.

c) Tualphung: Hang mek muk, hmul them thum, hmel chhe tak, a hate pawh fangra tiat nia sawi a ni. Khaw chhunga cheng a nih avangin tualphung an ti thin. Phung hian piring hi an duh em em a, an hmuh chuan an inchuh luih luih thin a ni an ti thin a ni, chu vang chuan thil kan duh leh kan inchuh huai huai thin angte hi, ‘phung zinga piring vawrh ang mai’ tiin tawngkam hi kan lo nei ta a ni.

d) Chawm: Ramhuai chi khat phung nen pawha inang ve tak, lui dung leh kawr ruam vela cheng thin an ni a, hmeichhia vek an nih avangin chawnu an ti deuh kher thin. Nu lian pui, hnute fual diai duai, hang mek muk leh sam hram tak bu niin an sawi a, kawngkawrawi te, piring te, tumbu te hi an chaw ni berin an sawi. Mihring tan hlauhawma an chet sawi a awm lo va, a pianhmang hrim hrim hi tihbaiawm a ni. A hmu apiangin an hlau ve thung a ni.

e) Dengsur: Ramhuai hlauhawm leh sual zinga mi bawk a ni a, phung leh chawm lam pawl bawk an ni. Ramhnuai puk leh thing kawrawngah a cheng thin nia sawi n ni a, hlauhawm tak leh kawlh tak, tih thinrim phei chuan mi vawm fur fur ching niin an sawi. Tun thgleng hian ‘Dengsur” in a lunga a vawm sawi tur an la awm fo mai. Ramriahna ah te mi thlam a riak te lungin an vawm thin a, mak tak main a vawmtu hi hmuh tur an awm ngai lova, tin, ruahsur nasat lai pawhin an vawmna lung hi a hul phing zel a ni, Tin, mak leh deuh mai chu hetiang lunga pawn lam atanga a rawn vawm hian thlam bang chhe miah si lo hian thlam chhungah te lung hi a rawn lut thei thin a ni.

6) HUAI: Kan pi leh puten ramhuai ti a an lo sawi ber thin chu huai chi hrang hrang, an chenna hmun azira hming hran hran an lo vuahte chu a ni a, chung huai chihrang hrang te chu:-

a) Tuihuai: Pi pute khan li lian leh thuk bikte, lui tam takte hian anmahni chenchilhtu huai neiin an lo ring a, an hmingah pawh tuihuai tiin an lo vuah a, a hranpa taka mi tihnat leh tih-khawloh chu an hmang pawh niin an sawi lo va, amah erawh chu tihlungnih loh chuan mi a tihlum mai thin an ti. Rannung leh ramsa chi hrang hrangah te an chang thei a, chuti ang pianghmang chuan mihringte hmuhah a inlar thin. Chuti ang chu ni ngei tur a ni tlangval talawmnai leh huaisen hmingthang Vanzema pawh Mat li pakhat huaite’n an tihlum niin upaten an sawi a, tun thleng hian Mat luaia li pakhat chu Vanzema Li tih a la pu reng a ni.

b) Tlang huai: Pi pute khan tlang lian deuh leh ram leh kham rang nasa deuhte hian huai neiin an lo ring vek a, inthawina thiam-hlaah pawh khawchhak tlang an hriat hlat ber atangin an awmna tlang thlengin an chham thin a ni.

c) Bung Huai: Kan pi leh pu te khan thing lianpui pui a bik takin bung khung lian pui te khan huai neiin an ring a, chung bung huai te chuan mihring te pawh ti damlova, ti thi thei niin an ngai a an hlau thei hle a ni. An lo neih turah te bung kung lian tak a awm chuan a huai tih lungawi nan inthawina hlan hmsa lo chuan lo atan a nei mai ngam ngailo a ni.

d) Sih Suai: Hmanlai kan pi leh pu te khan ramhnuaia sih lo awm hi chuan huai an nei vek in an ring thin a chung chu ‘Sih Huai’ an ti a, mihring pawh tina thei leh chhiatna thlen thei ni in an ngai a. Sih awmna hi chu lovah pawh an nei ngam ngai lo a ni.

Aw le, hengte hi Mizovina ramhuai chuhrang hrang kan neih ka hriat te mi hran hran ziah atanga ka lawr khawm te leh keima lo hriat ve te an ni a. A dang hria chuan han thawh khawm ve teh u khai.

BigDaddy Hmahmatea

Kulikawn

Similar Posts:

• Kristianna leh a Hnamzia..
• CHANCHIN ṬHAIN KAN RAMAH RAMHUAI A UM BO TA
• Thlahrang/ramhuai
• Mi bo leh Zoram khawvêl
• Ramhuai nena Intawhna Hlauhawm!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, July 21st, 2014 at 3:12 pm and is filed under Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.