mi(sual).com

PATHIAN, HUN LEH CHATUAN

French Bible-ah chuan ‘Chatuan’ (Eternal – the Eternal or the Eternal One) tih hi Pathian hming sawi nan leh Pathian hming aiawhtu atan te an lo hmang a, Entirnan French Bible a Sam 106 :48 an ziak dan chu :

            Chatuan Pa, Israelho Pathian chu fakin awm rawh se

            Chatuan ata Chatuan thleng pawhin!

            Mi zawng zawng chuan ‘Amen’ ti rawh se

            Chatuan Pa chu fak rawh u.

Isaiah 9:6b “A hmingah chuan Maka…..Chatuan Pa..” tih kan hmu bawk a. Tin Sam 90: 2b “…. Chatuan ata chatuan thleng pawhin nang chu Pathian i ni,” tih ka hmu bawk a. Heng Bible chang leh a dang atangte pawhin Pathian hi kan awmna Universe siamtu, hunte an lo pian hma leh Chatuan hmasa pawha Pathian a nihzia chiang takin kan hmu a ni. Tichuan Chatuan hmasa a awm a, Chatuan dang lo thleng leh tur a awm bawk a, Chatuan hmasa leh Chatuan lo thleng leh tur inkarah chuan ‘Hun’ a awm. Tunah hian Hunah chuan kan cheng mek a. Chatuan leh Hun chuan danglamna an nei a. Tichuan Engvanga Huna lo awm nge kan nih? ‘Hun chu engtiklai khan nge a lo intan?’ tih leh Enge a pawimawhna? tih zawhna chi hrang hrangte hian kum 2007 Feby thlaa ka u duh takin motor chetsual avanga min boral san ka han hriat hnu chuan ka thinlung an luah tlatin ‘Chatuan’ tih thu hi a cham reng avangin hriatna beitham tak chung leh mahni insit tak chungin he article hi ka han ziak a ni.

Hun leh Scientists : Bible a Pathianin ni 6 chhunga lei leh van a siam dan leh mihringte min lo siam dan atang chuan kan chenna khawvel upat dan hi kum 6000 erh awrh vel chauh ni maiin a rin theih a. Scientists-te thil hmuhchhuah leh leilung upat dan an finfiah nen chuan thil inmil thei lo leh inkalh tlat niin a lang. Chu mai pawh ni lovin mihringte kan lo pianchhuah dan leh kan chenna Universe lo awm tan danah pawh ngaih dan hrang hrang ‘Evolution theory leh Big Bang theory’ te a lo piang a. Engpawh nise, Bible thiamte leh Scientists-te thil hmuhchhuah leh rin dan atang chuan Thilsiam tantirh (Universe lo awm tirh) atangin tuna kan hman mek ‘Hun’ hi a lo intan a ni tih hi an thutlukna leh ngaihdan thuhmun an neihna leh inanna chu a ni. Mahse engtinnge lei leh van hi a lo insiam a, engtinnge mihringte kan lo awm? tihah ngaih dan hrang hrang a lo awm avang hian Kristian tam takte chu rinna kawngah chauh phahin tam takten Pathian awm rin loh hialnate an lo neih phah a. Evolution theory leh Big Bang theory te ai hian Bible hian kan hmuh leh hriat theihah chuan thudik an tarlang fe zawk a ni. Entir nan: Evolution theory hi a dik theih loh zia finfiahna chu, Pathianin ni 6 chhunga a thil siamah khan thlaite, thingkung leh ramsate chu ‘anmahni nih dan tur ang theuhvin’ a siam a, tuipui lily te thingkung lian taka lo changta pawh kan hmu ngai lo a, chuvang chuan nih phung bik leh awm dan tur bik tak neiin a siam vek a, chumi ramri pela thil lo thang danglama thil chi danga lo inthlak pawh hmuh leh hriat tur a awm lo a ni. Tin Big Bang theory ah pawh, thil engemaw sakhat (Singularity) atanga kan awmna Universe hi lo piang ni anga pawm dawn pawhin kha thil sakhat a bul ber kha siamtu awm loin a awm thei chuang reng reng lova. Tichuan, science lama mi thiam ber berte pawhin Universe lo intan dan hi an finfiah thei chuang lova, chuvang chuan ‘Evolution thoery’ leh ‘Big Bang theory’ te hi thil ni theia rin leh ngaih mai an ni a, a dikna tuman an finfiah thei chuang lo tih hi Kristian ten kan hriat chian a pawimawh hle a ni.

Scientist-te thil hmuhchhuah dan hi chu a danglam fova, kum 10 kalta vela thil chiang (fact) ni ngeia an hriat kha kum reilote hnuah hmuchhuah dan chi dang an nei leh a. Bible erawh hi chu englaimahin a inthlak danglam ngai lo a ni. Tin Bible hi Science zirtirna tura ziak a ni lova, misualte Krista hnena kan hawikirtir leh theihna tura ziak a ni a. Tin, Bible hi mihringte hnena Pathian inpuanchhuahna leh leilunga mihring kan lo awm vena china kan chanchin ziahna leh Thlarau lam thil kan mamawh te ziakna bu a ni. Scientist te erawh chuan thil lo awm tawh sa an zir/hmuchhuak mai zawk a ni. Tin, Bible hian kan awmna Lei upat dan hi a sawi lo a, mihringte he Universe-a kan lo awmve na chin hi a sawi mai a ni. Tin Bible hi chu Pathian leh a siam mihringte inlaichinna tur atana thil pawimawh chin min hrilhna mai a ni, Gen 5:1 “Hei hi Adama thlahte chuanna lehkhabu chu a ni,” tih kan hmuh angin.  Chuvang chuan Hun lo intan dan atang hian Pathian chu Chatuan ata Chatuan Pathian a nih ziate, Lei leh Van siamtu a nih ziate Genesis bungkhata a thilsiam chungchang Bible thiamte hriat dan atangin i han sawi dawn teh ang.

Hun & Thilsiam: Genesis 1:1-2″A tirin Pathianin lei leh vante (heavens in english ) a siam a. Tin, lei hi a chhia a, a ruak ngawt a ni a, Tui thuk tak chung chu a thim mup a, Tuipui thim tak chung chu Pathian thlarauin a awp tlat a” tih kan hmu a. Han chhiar ngawt chuan Gen 1:1 a Pathianin lei leh vante a siam hun hi ni 6 chhunga mihring te leh ransate thenkhatte a siam hun lai ami ni ve maia ngaih theih a ni a. Mahse ‘A tirin (In the beggining)’ tih a Pathianin ‘Lei‘ a siam leh Gen 1:2 a ‘Tin lei chu a chhia a, a ruak ngawt a ni a,‘ tih ami ‘Lei’ hi chu  an dinhmun a inang ta lo a ni, a chhan chu ‘chang hnihnaa ‘Lei’ hi chu a chhia a, a ruak ngawt a ni a’ a tih avangin. Isaiah 45:18 : ” … Ani chuan leilung hi a din a, engmah lovah a siam lo va, mihring awm nan a din zawk a ni.“ tih kan hmu a. Bible thiamte hrilhfiah naah chuan, Pathian chuan thil engmah chhia leh hman tlak lohvin a siam lova.  Chuvang chuan changkhatna leh changhnihna inkarah hian kum sang tam tak hriat hleih theih loh hi tlazep tawh nia rin leh hriat a ni, Tichuan ‘A tirin’ tih chang khatna thu hi Pathianin lei leh vante siam duhna rilru a neih laia a siam tantirhna ber, ‘A tir ber’ Chatuan hmasa atanga tuna kan hman mek ‘Hun’a a lo insawn lai sawina a ni thei ta a. Gen 1:2 hi English ah chuan ‘Now’ tia ziak a nia, Mizoah chuan ‘Tin’ tih tawngkam hi hman a ni. Tichuan, chang hnihnaa lei chhia leh ruak ngawt mai chu Changkhatnaa Pathian thil siam dik tak (Original ) kha chu a ni theiin a lang lo. Isaiah 45:18 a ‘Engmahlo‘ tih hi Hebrai Bible-ah chuan ‘tohu‘ hman a ni a, a awmzia chu ‘hmun ram, tikhawhar, rauhsan‘ tihna a ni. Tichuan hemi tifiah lehzual tur hian ni 6 chhunga Pathian thil siam chungchang Genesis bung 1 thu hi lo en leh ila:

Ni 6 chhunga Pathian thil siam: Genesis bung khata Pathianin ni 6 chhunga a thil siamah hian Bible thiamte ziak dan leh Hebrai tawng atangin ‘Siam’ tih hi lo bih chiang ila. Mizo Bibleah chuan ‘Pathianin lei leh vante a siam a,….. mihring a siam a.. etc.’, tiin ‘siam’ tih hi hman a ni ta deuh vek a, Hebrai Bible a thumal 3 te hi en ta ila,

            (1) ‘bara’ – create ( engmah lo atanga siam );

            (2) ‘asah’ – making, fashioning (hmanrua awm tawh sa atanga thil dang siam/din)

            (3) ‘yatsar’ – mold, shape ( hmanrua awm tawhsa atanga thil dang siam chhuak.

NIV Bible a Pathianin ni 6 chhunga a thil siam ah hian ‘bara/create’ tih hi vawi thum a hmang a,

            i) Gen 1:1 – “A tirin Pathianin lei leh van a siam a,”. hetah hian ‘Create‘ hman a ni.

            ii) Gen 1:21 -“Tin Pathianin tuipui sa lian pui puite chu a siam a,” ..’create‘ hman a ni.

            iii) Gen 1:27 -“Tin Pathianin ama anpuiin mihring a siam a’. .. ‘bara’ (create) a hmang

Tin ‘made/asah’ tih hi vawi 4 a hmang bawk a, chungte chu:

            i) Gen 1:6 – ‘Tui leh tui inkarah boruak zau tak lo awm sela’. ‘made’. a hmang a,

            ii) Gen 1: 14-16 – ‘Chhun leh zan thenna turin .entute…lo awm bawk rawh se”. ‘made’ hman a ni.

            iii) Gen 1:25 -‘ … Ramsa anmahni chi awm dan tur ang theuhin …. a siam a’. ‘made’ hman a ni.

            iv) Gen 1:26 -‘Kan anpuiin, keimahni ang takin mihring siam ila,’ hetah pawh hian ‘made’ hman                      ani, a chhan chu mihring taksa kha, thil awm tawh sa ‘lei/hlum’ atangin a siam a ni.

Tin. ‘shape or form/yatsar’ hman nate:

            i) Gen 2:7 – ‘Tin Lalpa Pathianin leia vaivutin mihring a siam a…,’ ‘form’ hman a ni.

Heng bakah hian Isaia 43:7 hi NIV Bible English ah chuan ‘Every one that is called by my name, and whom I have created for my glory, whom I have formed, yea, whom I have made,” hetah hian ‘create, form, and made‘ tih words thum hi a rawn hmang kim vek a ni. Tichuan Gen 1:9-ah chuan, khawmual chu ‘siam thar’ ni tawh lovin lo lang turin thu a pe mai a ni, chutiang zelin a dang pawh an ni.

Job 38:7-ah chuan Pathianin Angelte a lo siam tawh thu kan hmu bawk a, tin, Setana pawh hi Eden huana Evi leh Adama a thlem khan, a lo chhuahna sawilan a ni lo, ni 6 chhunga Pathian thil siam hma hian a lo awm (exist) tawh a ni tih a hriat a, Tichuan ni 6 chhunga Pathianin thil a siam hma daih tawh, kum tam tak kaltaah khan Pathian chuan lei leh van hmasate leh Setana leh Angelte a lo siam tawh a ni tih a tichiang at a ni. Chutiang a lo nih chuan Genesis 1:1 ‘A tirin Pathianin lei leh van (vante) a siam a” tih ni 6 chhunga a thil siam leh a tir bera Angelte, Lucifera leh lei leh van hmasate a siam inkar chu hla tak, kum tam tak kaltaah a lo ni dawn ta a, a inkarah hian kum engzatnge ral tawh tih pawh hriathleihtheih a ni ta lo a ni. Chutichuan hetiang hi a lo ni thei dawn at a ni; Pathianin kum tam tak hnuah mihring tana luah tlak leh hman theih turin kan awmna lei leh thil dangte hi ni 6 chhungin a lo siam tha (restored) ta a, tichuan engkim siamthat leh luah tlaka a tihfel vek hnuin a luahtu tur Evi leh Adama a lo siam ( create ) at a ni. Hetiang a lo nih chuan scientist ten leilung upat dan kawng hrang hranga an hmuhchuah dan leh Bible hi a lo inmil thei zawk dawn a lo ni.

Tichuan hriatthiam a awl nan Gen 1:1-2 chu hetiang hian han sawi ta ila, “A tir berin (Chatuan hmasa chu Huna a chantir lai khan) Pathianin lei leh vante a siam a, mahse chhiatna rapthlak tak engemaw avangin tunah chuan lei hi a chhia a, a ruak ngawt a lo ni ta a, luah tlak lohvin a lo awm ta a ni“. tiin

Similar Posts:

• Pathian, Hun leh Chatuan (Part 1 of 3)
• Pathian, Hun leh Chatuan (Part 2 of 3)
• Pathian kan nihna
• Mihring te hi zawng thlah kan ni em?
• Abortion hi tualthahna a ni

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, August 24th, 2014 at 6:24 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.