1st. Friday: Mission Venga Lt.Col. ZS Zuala, parliamentary secretary (Home) in bulah bomb a puak a, mihring thi leh hliam an awm lo a, in tihchhiat erawh a nei nual. Bomb puak hian parliamentary secretary te compound hungna bang a vawrh chhe hneh hle a, ZS Zualate mut pindan bathroom kawngkhar leh darthlalang leh bungraw ṭhenkhat a tichhe nual a; inchung lama hmeichhe hostel tukverh leh tukverh darthlalang eng emaw zat a tikeh a, tuizem lian pahnih a tichhe bawk.
2nd. Saturday: Dawrpui Vengthar West branch KṬP chuan Aizawl Civil Hospital-ah thisen unit 30 an pe a, a petute hi mipa 27 leh hmeichhia pali an ni.
3rd. Sunday: Rolui, Lunglei district-a hmeichhe pakhat chu mi pasarihin an pawngsual rawn. Hmeichhe pawngsualtu zinga pali chu kumtlinglo an ni a, kumtling tawh mi pathumte chu – Phunoso s/o Indu Kumar, Buddhasen Chakma s/o Kheda Chakma leh Hanaseda s/o Monua Chakma-te an ni a, an vai hian Rolui khua vek an ni.
4th. Monday: Sipai chawimawina sang, Shaurya Chakra dawngtu Lallawmzuala, Ṭuahzawl khua chu Home minister R Lalzirliana’n a office-ah Mizoram sorkar hmingin lawmpuina thuchei leh Rs 5,00,000/- a hlan. Lallawmzuala hian Jash-e-Mohamed leh Lashkar-e-Toiba commander Qari Yashir , luman ` 1,25,00,000/- lainei a kahhlum vanga he chawimawina hi dawng a ni. Lallawmzuala hian Shaurya Chakra a dawn avang hian sorkar laipui aṭangin thla tin a dam chhung zawng ` 3,000/- a dawng dawn a, Mizoram sorkarin lawmpuina `. 5,00,000/- a pek bawk bakah Lance Naik leh Naik bawhkânin sipai lu mûm aṭangin Havilder-ah a kaisang dawn bawk.
5th. Tuesday: Directorate of School Education Conference Hall-ah School Education Minister Pu H. Rohluna hovin Education Department hotuten meeting pawimawh tak an nei.Meeting-ah hian Parliamentary Secretary Pu Joseph Lalhimpuia, School Education Secretary Pu R. Lalvena IAS leh officer dang engemawzat an tel a. Education Department chhunga thawktu hrang hrang School Education Secretariat, Directorate of School Education, SCERT, S.S.A leh R.M.S.A aiawh ten kumin chhunga an hmalakna leh an thawh tawh chin te chipchiar taka report pe in uluk takin an thlir ho a ni.
6th. Wednesday: Mizoram Governor Dr Kamla Beniwal chu Governor aṭanga bàn a ni a; Mizoram Governor hna hmui rih turin Manipur Governor VK Duggal chu ruat nghal a ni. Kamla Beniwal bàn a nih chhan hi hriat ni lo mahse Gujarat Governor a nih laiin chief minister, tuna Prime Minister ni ta Narendra Modi nen an inhmuhthiam loh thin vang nia hriat a ni.
7th. Thursday: Eptu party pathum – MNF, MPC leh ZNP ṭhalai elected office bearer-te chu MPC party office-ah an ṭhukhawm a; AMC sorkar thar a lo piang chu lawmawm an tih thu leh councillor-te an chhuan thu an tarlang.
8th. Friday: Mizoram Governor aṭanga bân tak Dr Kamla Beniwal chuan Mizoram a chhuahsan taa; Governor thar tur Vinod Kumar Duggal chu lo thleng ve nghalin Gauhati High Court judge BK Sharma-in rinawmna thu tiamtirin Mizoram Governor atan a la lut. Vinod Kumar Duggal hi Manipur Governor ni lai a ni a; Mizoram hi min hmui tel dawn a ni. A ni hi 1976 khan Aizawl DC a lo ni tawh nghe nghe.
9th. Saturday: FCS&CA Minister, Pu John Rotluangliana leh Lok Sabha MP Pu CL Ruala te chuan Union Minister of Consumers Affairs, Food and Public Distribution, Pu Ram Vilas Paswan hmuin buhfai lak luh tam deuh dan tur leh in kalpawhna chungchang te an sawipui.
10th. Sunday: Mizoram Baptist Kohhran chuan National Council of Churches in India (NCCI)-in India ram puma Black Day hman tura ruahmanna a siam chu an zawm ve. Black Day hi Indian Constitution-ah Kristiante Scheduled Caste-a dah phûtna a ni. Hetih lai hian, Mizorama kohhran lian ber Presbyterian chuan Black Day chungchangah lehkha an hmuh ve loh avangin he hun hi an hmang ve lo.
11th. Monday: Mizoram Departmental Officers Association (MDOA) office bearer-te chuan Minister Lal Thanzara a pisaah an hmu a, an mamawh leh harsatnate an thlen.
12th. Tuesday: State Central Library-ah Librarian’s Day hman a ni a, Art & Culture secretary Rosangpuii khuallian a ni. Mizoramah kum 1969-ah sub-divisional library din a ni a, chumi hnu kum ngaah State Library din a niin tunah hian lehkhabu 57,066 a awm mek a, library member 5,274 awmin, chung zinga 661 chu naupang an ni. Sorkar laipuia Ministry of Culture hnuaia Raja Rammohun Roy Library Foundation, Kolkata duh dan angin kum 2009 aṭangin ‘Father of Library Science’ tia hriat Dr SR Ranganathan piancham, August 12-ah Librarian’s Day hman ṭhin a ni a; Mizoramah chuan kum 2010-ah hman ṭan a ni.
13th. Wednesday: Urban Development & Poverty Alleviation (UD&PA) leh Aizawl Municipal Council (AMC) chuan I&PR conference hall-ah Aizawl khawpuiin chak zawka hma a sawn dan tur leh kum 2040-a Aizawl khawpui dinhmun tur sawihona an buatsaih. Aizawl hi Jawaharlal Nehru Urban Renewal Mission (JNNURM) hnuaia hmasawnna hna thawhna turin India rama khawpui (Mission City) 63 thlan a ni a; Aizawl hi Mission City zinga pakhat a ni.
14th. Thursday: Aizawl District Anti Tobacco Squad (ATS) chuan New Market-ah vaihlo khuahkhirhna dan COPTA 2003 Section 7-in a phut anga vaihlo hralh chhuah turte báwmah health warning a awm leh awm loh an enfiah a, health warning chuang lo cigarette eng emaw zat an man. Hetih lai hian, vaihlo, vaihlo zial leh tuibûr zuartute chuan an thil zawrah health warning an tár ṭha hle a, ATS-te chuan vaihlo leh tuibur zuar zingah man an nei lo. Vaihlo leh tuibûr zuartute hian health warning sticker-te chu a tê ` 2/- leh a lian ` 10/- in an lei a, an thil zawrah an bel chawp ṭhin a ni.
15th. Friday: Independence Day vawi 68-na chu Mizoram pumah lawm a ni. A lawmna pui ber, Aizawla Lammualah chuan zing dar 9-ah ṭan a ni a, Chief Minister Lal Thanhawla khuallian a ni. Chief minister chuan, India ram ropui tak dintute hmathlir tihhlawhtling tura inhlan thar ṭheuh turin mipuite a sáwm.
16th. Saturday: Clean Lunglei buatsaihin ‘Cleanliness Walk’ Lunglei khawpuiah neih a ni a. He hunah hian Clean Lunglei Volunteers mi 50 chuang thawk chhuakin volunteers te hian bawlhhlawh chhar faiin faina chungchang ziak Pamphlet an sem a, Lunglei khawpui lunlai takah bawlhhlawh bawm pahnih an hung thar bawk. Clean Lunglei hi 2013-ah din niin \um engemawzat an hnatlang tawh.
17th. Sunday: Lalduhawma (24) s/o Sangzuala, Hnahthial chuan hmeichhe naupang kumtlinglo a pawngsual. Lalduhawma hian naupang hi a inkhawm kal tur lo pawt pêngin, naupangte in bul kâwm karah hruaiin a pawngsual ta a ni.
18th. Monday: MADC sum ` 7,20,800 senga dawh Kawlchaw luia lei chu MADC CEM RT Zachonoa’n a hawng. Lei hi concrete-a dawh niin, metres 20.5 a sei leh metres 2.15 a zau a ni.
19th. Tuesday: Tourism Minister John Rotluangliana chuan Sihphir rama Sakawrhmuituai tlang chu a tlawh a; helai hmun hi khualzin te hip thei tura siam dan tur an en. He tlang hi mizorama tlang sang pasarihna a ni a; hmar lamah Bagha phei, thlang lamah Jampui tlangdung, chhim lamah Lunglei thlengin leh Chhak lamah Kawl phai thlengin a lan phak avangin Tower leh Mizorama a hmasa ber atan ropeway siam turin ruahmanna an siam. He tlang hi 1535m laia sang a ni.
20th. Wednesday: Excise & Narcotics department hnuaia Anti-Narcotics Squad-te chuan Electric Vengah Thangkhuma (28) s/o Hunliana, Tahan ‘G’ Group, Myanmar hnen aṭangin heroin gram 16 an man.
21st. Thursday: Aizawl Urban ICDS Project buatsaihin Chanmari YMA Hall-ah Aizawl khawpuia hmeichhe tleirawl kum 11-18 inkar, sikul kal tawh lote pualin ‘Sensitization Training of Sakhi/Saheli’ neih a ni a, thupui chu ‘Empowered girl – Empowered society’ tih a ni. Sakhi/Saheli training-ah hian anganwadi centre 161 aṭangin tleirawl an kalkhawm a, anganwadi centre pakhat aṭangin tleirawl pathum zel – sakhi (leader) pakhat leh leh saheli (secretary) pahnih an tel.
22nd. Friday: Horticulture minister PC Lalthanliana chuan a pisaah Central Agriculture University (CAU) vice chancellor Dr SN Puri a kâwm a, Mizorama Horticulture College din a nih thuai theih nana ṭul leh pawimawhte an sawi dun. Mizorama Horticulture University din tur hian Central Cabinet sanction nghah mek a ni
23rd. Saturday: Excise & Narcotics department-a Anti-Narcotics Squad-te chuan Aizawlah Methamphetamine mûm 20,000 an man a, Aizawla an hralhna ang chuan ` 31,00,000/- man a ni. Excise & Narcotics chuan Meth an man hi an chhui zui zel avangin a neitu hming tarlan a remchang rih lo niin an sawi.
24th. Sunday: Central sorkar chuan Mizoram Governor thar atan Maharastra Governor tanglai K Sankaranarayanan chu a ruat. Mahse, K Sankaranarayanan hian a zawm dawn lo nia sawi a nih avangin lo dawngsawng tura inbuatsaihna an kalpui lo.
25th. Monday: ZNP president Lalduhoma chuan Kolasib-a ZNP Workers Meet-ah sorkar laipuiin Mizoram Governor tur a dah leh a sîksâwi vel dan chu Mizo mipui hmuhsitnaa ngaih theih a nih thu a sawi.
26th. Tuesday: School Education Minister, Pu H. Rohluna’n an New Delhi-ah Union Minister for Human Resource Development, Pi Smriti Irani a kawm a, zirna lama Mizoram mamawh a sawipui a ni. Pu H. Rohluna chuan Hindi zirna leh tihhmasawnna atana sorkar laipuiin sum a pek thin, kum 2017 atanga tihtawp tur nia sawi chu titawp lova pek chhunzawm zel turin Central sorkar chu a ngen a ni.
27th. Wednesday: Govt. Region Higher Secondary School, Lawngtlai-a Geography leh Sociology zirtirtu hna ruak hnawh khah phutin Lai Students Association chuan Lawngtlaia zirna in thenkhat leh Education Deptt. pisa kai turte an dang. Govt. Region Higher Secondary School-ah hian kum 2013 atang khan Geography leh Sociology zirtirtu hnate hi a ruak niin an sawi a, hnawh khat tura tum tam tak, thuneitute an ngen hnu-ah pawh tun thlengin hnawh khah a la ni lo.
28th. Thursday: F.Laldailoa(45),h/o Lalchhandami, Sihphir chu cancer natna avangin Cancer Hospital, Zemabawkah a boral. Pu F.Laldailoa hian a nupui bakah a fate panga a kalsan.
29th.Friday: Nursing pawl pathum¬a telte [(All Mizoram Contract Nurse Association (AMCODA), All Mizoram Nursing Degree Holder Association (AMNUDA) leh Non-Government Nurses Association of Mizoram (NOGNAM) ]chuan Mizoram sorkara a ngheta thawk tur staff nurse 20 lakna tura MPSC-in written exam a buatsaih chu sorkarin kaltlangpui a tum nia an hriat avangin an hna thawhna hmun ṭheuhah lungawi lohna lantir nan badge dum an bel.
30th. Saturday: Sihphir Venglai Kristian Thalai Pawlte chuan Synod Camping Center-ah tawngtai retreat hlim takin an hmang. Pathian Thlarau Thianghlim pawlna an dawng nasa hle.
31th. Sunday: Presbyterian Kohhran Ramthar Ni a ni a, Mizorama Presbyterian Kohhrante chuan urhsûn takin an hmang. Ramthar Ni pualin chawhnu leh zanah inkhawm a awm a, chawhnuah thupui ‘Thawk zêl la, i thawhah lawm rawh’ tih niin, zanah thupui ‘Zân a lo thleng dawn, thawk ru’ tih a ni. Ramthar Ni hi Mizorama Presbyterian Kohhran dintu Rev. David Evan Jones (Zosaphluia) Mizorama a rawn thlen ni a ni.
Similar Posts:
- School zirtirtu hmeichhia ten karkhatah ni hnih puan bih a ngai tawh dawn…
- Kan President a rawn thleng e
- MBBS seat thlang tha dawn
- Mizoram-ah Institute of Technology din tum a ni
- CYMA-in dan loa sumdawngte hming Home Minister hnenah an hlan
September 14th, 2014 at 9:24 pm
Ava lunglen thlak ve Chhana chu ila taima tluang reng anih hi
Report this comment
September 15th, 2014 at 9:37 am
A la tha zel e. Ti tang tang rawh. Ka lo save zel a nia.
Report this comment
September 16th, 2014 at 9:05 pm
Kumtharah a hlawma a bua tihchhuah ka lo rilruk deuh a.Kum sarih lai ni tawh mahse, a hma kum hnih ami kha chu a chipchiar loh deuh bakah a chhah dawn lutuka; a bi kim deuhin kum nga anga kal pui nise ka ti deuh a.
Report this comment