Zir sen loh leh zirloh theihloh he hringnuna ka hun hmante hi ngaihtuah leta thlir kir hrehawm khawp hialte awm mahse hlim ni leh vanneihni pawh ka ban phaka a awm chang a awm ve fo thin. Ka zawnloh leh ka dil nimiahlovin hmangaihna thifimin min chhem a, a mawina leh duhawmna ka pawh dawn chauh tihah chu thlifim chu khaw durin rawn hliahin lungngaihna thlipuiin min rawn nuai a, lungngaihna tuifawnin min lenkual a, lungngaihna chirh dupah min len lutin min kai chhuak duh tawh silo.
He ka chanchin lungngaihthlak tak hi I hlimpui a I tahpui ve atan I piancham lawmpui nan pek che ka duh tlat chhan hi min zawt mahla ‘ka hre bik lo’ tih baka chhan dan tur che ka hre biklo tlat. Thil tha, mawi leh hlu chu kei aia nei leh pawimawh zawkten an hlan ang che tih ka hria, chuvangin he ka chanchin phek tlemte hi I Birthday a ral hma ngeiin ilo chhiar chhuak dawn a nia – “I piancham dam taka hmang nawn leh turin Khuanun vengin hualhim che rawh se.”
Fur a intan tawh a, ruah sur cherh cherh karah City Bus atang ka tum thla thak a, bathlara ka chawlh khawmuan chuan School ka tlai dawn bawk si. Ka bag chu ka khuma, tlan ka tum lai tak chuan Vantirhkoh aw ni hiala mawi hian ka hming ngeiin min rawn ko a. Vantirhkoh aw hi ka hre tawh a ni lo, mahse lei mihring hmeiche dangte aw ai chuan ani aw hi chu a mawi tlat a ni.
Min kotu chu ka hmuh hma khan tunge anih ka hre thei asin. Bus chhungah khan ka hma lawkah a thu a, ruah a sur deuh avangin bus atanga ka chhuh khan kal nghal ka tum a, nihliap ka ken loh avangin ka bag khum ka tum nghe nghe, chuan min rawn ko ta chiah a nih kha.
Min kotu lam ka va hawi chuan a aia mawi awm tawhlo tur hian Kim Kimi chuan min lo nuih a. A nihliap ang chhungah chuan ka tan hmun a awm tih ka hrethiam ve nghal mai. Hnial ka tum lova, ka phal hek lo. Man nei pawn hralh dawn ila, to tak pawhin ka hralh phal chuang lovang.
Hemi ni zet hi chuan Chanmari leh kan school inkar hi hnai ka ti ngei mai. Kawngah chuan lehkha zir chungchang te, kan Principal chanchin te, pawlsawm kan zirna leh kan result-te kan inzawt tawn a. Kan vawikhat inbiakna nimahse kan innelin kan inpawh nghal em em a, kum tam tak lo inkawm tawhang mai kan ni.
Science leh Arts building a hran avangin kan building lamah ka phei san ta a, tlaia haw rual turin min sawm a, a tawngkam tha chauh pawh lo nise khami ni kha chuan nghah ka tum hrim hrim. A uang biklo a niang, class an zawh hma zawk avangin min lo nghak a, haw kawng pawh rin ai daihin a lo tawi leh pek.
Hemi ni atang hi chuan zing tin chanmariah kan ingnhak a, tlaiah kan haw rual leh thin. City buste chu tawt takin a tlan tih kan hre chang tawh lova, ruah a sur phei chuan nihliap pakhat hnuaiah lungrual takin kan inkuah haw thin. School chawlhte hi kan tan chuan a hreawm mah zawk a, kar tawp phei hi chuan rei kan ti dun thin khawp mai. Chawlhnite hian kan inlen pawh a, a nu leh pa, a unaute pawn min hre tawh khawp mai. Inrinni bazarte hi kan pahnih tih turah an dah tawp tawh a, keini tan hnial phal rual a ni silo. Aizawl bazar leh millinium Centre-te khu kan khawvel parchhuahna hmun a ni a, khang hun lai khan hetiang hian hreawm ka insiamna tur a ni tih kan hrethiam pha der silo.
Kim Kimi hi tawng tam leh harh tak nilo mahse nuih peih tak a ni a, a nuih zawnga a ha var rual tha tak lo lang leh inthlahrun hmel taka a biangsum lo lang thin hi a duhtu tan chuan tlukchhiatpui tham ni hiala mawi a ni. A pumrua te fel thlap, pian in remkhawm fuh tak leh a nungchang ngainatawm tak hian amah a ti mawi a. A inrintawkna ringawt pawh hi ngaihzawn tham niin ka hria. A sam nung tak hian a mitmeng mawi tak hi a chawimawia, duhawmlo lai reng kei chuan ka hmu velo a, ka hmu phal hek lo.
Sawi vek dawn ila ka sawi kim seng dawn chuang lova, kan hlimnate kha ka sawi chhuak pha hek lo ang. A changa office a zirtirtuten min hauh dante, zirlai nih laia inngaihzawn that loh zia te min hrilha, an thin kan tihrim zual chang phei chuan classroom-ah kan thiante awm laiin min hau bawk thin. Mahse chungte chuan kan inzawmna a suihnghet zual zawk a, thihna chauh lo chuan min pawt then dawn tawhlo ti ila kha tih huna laia kan inzawmna nghehzia sawinan a tawngkam hi a la nghetlo ka la ti zawk hial. Kan thinlung hi pakhat a ni tawp a, kan inlungruala, kan inhmangaih tak zet bawk.
Thla eng lawma haw nachang ka hriat loh zan te, Lammuala inkhel kan en tum a kan hlim zia te, an ina chaw ka ei tuka a pa thu min hrilh zawng zawngte kha sawikim vek dawn ila I chhiar zo peihlo ang tih ka hlau bawk si. Mahse sawiloh theih loh pakhat a awm, chu chu kan hlimna ten a hmawr an bawk zan a lo ni reng tih ka hrilh nghal law law mai ang che.
December thla chawhnu lam a ni a, a boruak pawh krismas tawh tak a ni. Bazar a lunin zan lamah pawh dawr in hawng hmuh tur a awm a, kei pawh kan khaw lama ka chhungten haw tura min nawr ngun tawh em avangin haw lo thei ka ni tawhlo. Kim Kimi’n hawlo tura min tih nat em avangin ka ticket pawh vawi hnih lai ka cancel leh nghe nghe. Chuan december ni 21 a haw turin ticket ka tifela, zan lama Millinium Centre chunga bazaar turin Kim Kimi nen chuan kan chhuak dun a.
Hemi zan hian kan hlim thei reng reng lo. Kan inkai a, coffee-te kan in dun a, thawmhnawte kan lei dun bawk a, kan inthlansak tawn a, t-shirt hring min lei nghe nghe asin. Kei pawn t-shirt sen, ka rawng duh ber ka leisak a, kan ha haw nghal nghe nghe a, inhmeh kan inti dun bawk a, midang kan ngailo khawp mai. Kanina ka thawmhnaw min pack fel pui zawhah an inah kan phei leh a, kan sawilo na mut hma chu kan tumlo khawp mai.
An tuala thing buk hnuaiah chair kan la chhuaka kan thu duna, vawithum ngawt chu haw ka tum a, mahse kan inthlah thei lo. Duhthawh takin kan in fawp a, kan inkuaha, a tawpna a awm thei tak tak silo. Ka thlah thei lo a, ani pawh chutiang tho chu a ni. A mittui lo tlate kha Awle mittui a nilo tih ka hrechiang a, tuna ka ngaihtuah leh phei hi chuan haw kha eng vanga lo tum lui tlat nge ka nih ka hrethiam bik tawh lo. Pathian remruat ka tih dawn chuan kan chhiat nan Pathianin rem a ruat ka ring theilo, tunge ka dem ang tih pawh ka hrethiam lo.
Dar hnih velah inthlahlel takin kan inthlaha, ka fawp a, duhthawh takin min chhang let a, hawi pawh a lo hawi ngam tawhlo. Tap chuingin an kawngka a pana, kei chuan ka thlir reng a, a room a luh hnu a a light a off hnu chuan kan in lam ka pan ve ta a.
Krismas leh kum tharte chu nuam takin ka hmang thei ta reng reng lo. Krismas tuk atang Kim Kimi chuan ka phone call a la duh tawhlo a, midang phone atang ka tih pawn ka aw a hriat chuan a dah hmak thin. A chhan min hrilh bawk silo, insawifiahna hun reng reng min pe velote chu ka thin a rim a, mahse ka thinrim rei thei chuang bawk silo.
Kum thar velah Aizawlah ka chhuk nghal a, amah hmuh vat ka duh avangin ka chhungte bulah ka lehkha zir ka chhuanlam a, an ni pawn min hrethiam takin min chhuhhma tir kha a ni a. Mahse a tak takah chuan lehkha zir chu a langlo hrim hrim.
Kim kimite in ka kal leh hmasak ber ni chuan an kawngka ka kik a, a nu’n min rawn hawn a, “Kim kimi a damloh thu leh min hmuh duhloh thu” min hrilh a, kawngka a khar leh nghal hmak. A awmzia ka hrelo viu nain Kim Kimi nu hmelah khan khawngaihna hmel leh lungngaihna in chawhpawlh ka hmu a, thinrimna reng reng ka hmu lo. Mahse ka mipa thinlung sak a rawn thawk ve ta. Min hmu duhlo tu chu eng vangin nge ka hmuh bik ang, ka tihsual sawi tur a hria pawh ni chuang silo. Min be duhlo ve tawp a, engvang nge min hrilh duhloh a, min hmu duh bawk silo.
Kar khat zet chu zantin ka ngaihtuah a, ka muhil thei ngailo. An ina va kal ka tum a, ka chhuah vek tawh hnuahte ka let leh thin. Ka mu thei lova, ka theihnghilh thei chuang bawk silo. School kan lut a, kal chakna ka nei ngailo a, ani lah chu school pawh a lo kal ngai tawh silo.
Kar hnih a liam hnu chuan Kim Kimite in chu ka pan leh nge nge a, mahse thil danglam engmah a awmlo, anu bawk khan min hmuh duhloh thu min hrilh leh a, kawngka a khar leh nghal. Luhlul chhuahin tualah darkar khat aia rei ka awm a, mahse engmah a danglam chuanglo. A thiannu hnen atang Kim Kimi chu a damlo tak tak tih ka hria a, a cher tawhin amah pawh a chawrche tawh viu a ni awm e. chaw a ei ngai lova, a muhil tlem em a, a harh chian vakloh phei chuan ka hming a lam nasa thin niin a sawi.
February thla inrinni vawi hnihna chiah a ni, kar hnih zet chu Kim Kimi chanchin ka hriat lohna a nita. Ka insiam mawlh mawlh a, hmana a t-shirt hring min lei sak kha ka ha a, ka kekawr a duh zinga aman inhmeh min tih ber thin secondhand jeans ka ha bawk a, converse dum ka bun a, he ka dress hi Kim Kimi duh ber thin a ni.
PWD peng zawna ka chhuk thlak lai chuan Kim Kimi nu hian ka darah a rawn kuai her sawk a, a hmanhmawh hle anih ka ring. Restaurant-ah kan thu lut a, tawng hmasak kan hreh dun khawp mai.
A ip chhunga lehkha khawr tawh tak chu a rawn phawrh chhuak a, ngawi rengin min pe a, kei chuan a ngaihna hrelo tak hian ka en reng a, lehkha chu ka bih leh a, tihian a lo inziak a.
“Nang nena hringnun kan hman dun hlimawm tak tak atanga min kai hrang a, thihna lui lama min hnuk luttu hi khawngaihin lo ngaidam hram ang che. Kei chuan ka ngaidam thei ngai dawn silo a.
Rum leh tahna khawvela min nuihtir a, lungngaihna khawvela hlimna min petu I hmangaihna kha tunah chuan dawng tlak ka awm ta lo. I pangpar mawi tak, nitina I chawm, tui I pek thin hi khawngaihna leh dimdawihna tel miahloin min thliak a, par chhuah leh thei tawh ngailo turin min siam a, I enkawl tlak ka awm ta lo.
A.. ……. Ka sawi tawh mai ang, hreh luat vanga thih theih chu nise mual ka liam tawh tur. Engvanga he hringnun hi ka chunga nunrawng bik nge maw anih le…….????
Mitinin Isua piancham lawm tura an sum leh tha, an thinlungte an hlan zan khan kei chu ka thianghlim venate tihbawrhbanin a lo awm asin. A hming leh nihna engmah ka hrilh ngam lo che, achhan chu min hmangaih em vang a phuba I la tur hi ka ngaingam lo a ni.
Ka grape wine in turah damdawi an lo telh a, chu damdawiin ka taksa a hna a thawh meuh chuan mihring pangai pawh ka ni tawh lo. Ka sawi ngam tawh lo mahse maw nang lo chu ka ngaihtuah lo asin. Kha mihring, mipa a zawnga tenawm ber khan khawngaihna leh duhsakna nei miah loin min pawngsual a, kei lah ka damdawi hna thawh avangin tang tur ka awm silo. I hming ka lam char char asin, engatinge min rawn chhan loh……..i awm silo tiraw?
Mihring pangai rilru ka put leh meuh chuan I tan mitenawm ka lo ni ta. Ka hmu ngam tawhlo che a ni satliahlo, I aw takngial pawh ka hre ngam tawh lo. Ka hre chaklo a nilo a, ka hmu duhlo che a ni hek lo, ka ngam tawh ngang lo a ni.
Kan ina I lo kal nite khan ka tap asin nangmah hmuh chak vangin. I haw hnu khan pawna I thutna ngaiah ngei khan ka rawn thu a, ka zawng vak che asin mahse hmuh tur I awm tawh silo. Ka va ngai tak che em, I aw ka hre chak lutuk ringat pawh hi atna tham chu a ni tawh asin. Ka thinlung chhung rila inthlahrunna awm hian nangmah hmu ngam lo turin pindanah min khar khum a, khaw eng hmu ngamlo tur khawpin min sawisa a, min chhan thei an awm silo.
Ka chau ta, ni tam tak chaw ka ei thei tawhlo a, ka muhil thei bawk silo, dam pawh ka dam rei tawhlo ang. Ka nun min awm tawp a, nilengin ka tap a ni ber mai. Ka nu pawh hian min hnem thei tak tak lo, a lungchhe tap hi ka hmuh hmaih ngailo, mahse tunge inhnem chuang ang?
A tawp ber atan, nang ka lo tawng che hi ka lawm a, hlimna min lo pek tawh zawng zawngte kha a mal phei chuan ka hre seng tawhlo. Mahse ka thinglungah leh mitthlaah an cham reng a, nitin hian khang nite kha ka chhuikir a , kohkir leh ka chak thin.
He ka hringnun chawhnu tawh tak, ka damni upa tawh lamah hian Khuanu khian duhthlan tur pakhat chauh pawh min pe se, ka hmangaih, ka thih hma ngei a I hmui fawh lo chu thlan tur ka neilo, chu chu ka thih thlamuanna tur awm chhun a ni.
Hmmm… kei chu ka dam rei tawh dawn lo, khawngaihin min theihnghuilhla, I hringnunah kei ang hmeichhe vanduai hi I tawn nawn tawhloh nan khuanu ka lo dilsak ang che. Chu chauh pawh chu Pathian ram thlen min chak tirtu a va ni si em… mangtha…..mangtha ….ka hmangaih che.”
Lehkha ka chhiar zawh chuan Kim Kimi nu chu ka en a, a mittui a lo hru char char tih ka hre chiah. Engmah sawilovin ka chhuak a, Rahlun North a Kim Kimite in lam chu hman hmawh takin ka pan nghal a, a nu pawh chuan min rawn zui ve nghal a.
Mahse a tlai tawh, an in ka thlen hma chuan tlangval tlawmngai tak takten Kim Kimite ina bungrua an thiar chhuak chu ka hmu ta, hrilhfiah leh chuan ka ngai tawh lo. Ka mit sulh sulh a, ka lu a hai mum mum a, engmah ka hre ta lo. Ka hminga hmeichhe awin min ko ri ka hre zuai zuai a, mahse a chiang lo. Tap thawm leh au thawm ka hria a, dar ri pawh a tawp lam chu ka hre hman, mahse kei hi khawnge ka awm?????
Similar Posts:
- Naupang inawkhlum Vanlalpeka chanchin
- FARKHAWI DAI-AH
- Please Help!
- Novelist Kaphleia of Tachhip
- A sawm che!
March 22nd, 2015 at 9:54 pm
Tha hle mai.
Report this comment
March 24th, 2015 at 10:16 am
Italic vek a nih chu le.
Report this comment