Pathian Chatuan Thil Tum.

August 17th, 2015 11:45 pm by Laltanpuia Tpa

*PATHIAN CHATUAN THIL TUM*
Laltanpuia Ngente (Tpa)

A hmasain he Pathian thu chang tawite atang hian eng chenin nge Pathian thu kan pawm tih i han inen hmasa lawk teh ang. Rom 11:36 “Amah atang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se, Amen.” He Pathian thu hi thinlung tak takin kan ‘Amen’ ve thei em le. Pathian thuin a sawi hi tunge hnial thei awm. Engkim mai hi Pathian tan a ni vek a, amah atanga chhuak vek a ni a, amahah bawk a hmawr bawk a ni vek bawk ang. Lal Isua thihna leh thawhlehna te kha ‘nang leh keia tan’ bil chauh emaw i lo ti palh ange, a hmasa berah chuan Pathian tan a ni a, a pahnihnaah mihringte chu kan awm ve chauh. Van ram i kai a nih chuan i tan khawngaih thil thlawn pek ropui tak a ni anga, a hmasa berah chuan Pathian siam i nih ang bawkin Pathian tan bawka chhandam i ni; a chatuan ro luah pui turin. Lei leh van siam te, mihring siam te, tlukna te, tlanna te, rinna te, chhandamna te, hremhmun te, vanram te, ropuina te, lalna te, heng zawng zawng hi Pathian atanga chhuak, Pathian vanga lo awm, Pathian tan vek a ni tih hi i ngaihtuah ngai em. Thil zawng zawng tih hian huam phak loh chin pakhat mah a nei hauh lo. Chutah chuan keini tan malsawmna leh anchhia a phum a lo ni.

‘Pathian chatuan thil tum’ tih leh ‘Pathian chatuan rem ruat’ tih hi ngaih pawlh lo ila. A pahnih hian inkawp leh in laichin tlat, mahse thil hrang daih ni si an ni. Chatuan chu kan hria a; bul tan ni nei lo tawp ni pawh nei lo. Chu chatuanah chuan Pathianin thil tum (Project) pawimawh tak pakhat a nei a, chu chu ‘Pathian chatuan thil tum chu a ni. Tin, Pathian chuan chu a thil tum chu a hlawhtlin theihna turin kawng fel tak chatuan hawlh tlang rang ruahman lawk sa a nei bawk a, chu chu ‘Pathian chatuan rem ruat’ chu a ni.

Aw le, tunah hian “Pathian chatuan thil tum” sawi kan tum a ni a. Amaherawh chu Pathian thil rel dante hi ziak ve meuh siah chuan a hre tlem ber ka ni hial si ang. Mahse ka sawi dik emaw dik lo emaw thlarau lamah hlawkna nasa tak ka chhar phah a, nangni pawhin kawng khat tala in lo hlawk pui ve chuan hlawhtling hleah ka inngai ang. Kan Pathian hi mihring finna atanga hriat fiah zawh rual a ni si lo va. Pathian chu thilsiamte hnenah a duh angin a inpuang thin a, a duh chin a hriattir a, a duh chin a thup bawk a, Pathian a nih avangin tuma hnial theih a ni lo.

* Leia vaivuta mihring a siam hma leh, Vantirhkoh ten thil an tih sual hma daih tawhah khan, van hmunah te chuan Pathian chu ropui takin a inkulh rup tawh a. A awmzia chu, mihring ngaihtuahnain a chhui theih hmasa ber ai pawha hma zawkah khan Pathian chu a ropui hle tawh tihna a nih ber chu. A ai a ropui reng reng tumah an awm lo va, a tluk pui pawh an awm hek lo.

Tichuan Pathian chu engkim chunga thu neitu a ni a, thil zawng zawng chu a ta a ni a, awm lo te nen lam a ta a ni vek a. Englai pawha a rawng bawl sak tur Vantirhkoh chhiar sen rual loh a nei bawk a. Nimahsela chung zawng zawng chungah chuan a lawm a kim thei lo va, a nun ruak hnawh khata, a chatuan hlim leh lawmna thlen thei tur, chatuan lawmna fa neih a duh tlat a.

A chatuan lawmna fa a zawnna leh a buatsaihna kawnga Pa remruat dan hi a makin a ropui takzet a, he a chatuan lawmna fa buatsaih hi a ni “Pathian chatuan thil tum” tia kan sawi chu. A duhtuiin a duh uluk em em a, a kawngte chu a felin Pathian tak a nih zia nasa takin a lan tir chiang em em a ni. Amah hretu tan chuan fak loh rual a ni lo.

Ani chu hun leh hmunin a thunun ve loh, hun chunga leng a nih avangin, van boruak zau taka ni leh thla leh arsi zawng zawng te, leilung leh a chhunga thil awm zawng zawngte a taka an lo lan chhuah hma daih khan Amahah chuan engkim siamin a awm tawh a. (Thuhriltu 3:15 Thil awm mêkte hi lo awm tawh sa kha a ni a: thil lo awm tûrte chu lo awm tawh sa bawk kha a ni; Pathian chuan a bo tawhte kha a rawn la kir leh zel a ni.)

Leia vaivuta mihring a siam hma leh, Edenah tlukna a thlen hma leh, Mihring fapa kross lera khaikana a awm hma daih khan Pa thinlungah chuan chung zawng zawng chu a thleng famkim vek tawh bawk a.

“Ngai teh, ka lo kal thuai dawn e; mi tin an thiltih ang zela pek turin ka lawmman ka hnenah a awm” tih te, “A hmaah chuan hnam tin an inkhawm ang a: beram vengtuin kel zing ata a beramte a hlir angin anniho chu a hlir ang”, tih zawng zawngte pawh hi thil siamte tan chuan kan hmabak ni rih mahse Pa ah chuan eng kim thawh zawh tawh vek ang a ni.

Tichuan Pa Pathianah chuan thil bul ber atanga a tawp ber, leilung pian hma atanga chatuan thlengin engkim awm tawh leh thleng tawh vek a ni; ani chu hunin a thunun ve loh avangin. Heng zawng zawng hi aman hun a ruat ang leh a rel lawk ang zelin a takin a lo lang chhuak a, hun lo la awm turah pawh a la lang zel bawk ang. A chianna atan heng chang te hi tar lang ila. (1 Petera 1:20 ani chu leilung pian hmain ruat lawkin a awm ngei mai, nimahsela hun hnuhnungahte hian nangmahni avangin inlarin a awm a.) (Hebrai 4:3 ……. leilung pian tirh ata hnate chu thawh zawh a ni tawh na a…)

* Helaiah hian ruat lawk chung chang sawi fiah ngai a awm a, tlemin han kal peng lawk ila. Ruat lawk chung changah hian kan hriat tur pawimawh em em a awm. Mi thenkhatin chhandamna chang tur leh chang lo tur te, mimal tin pian hun leh thih hun, an dam chin tur te thlengin Pathianin a rel lawk vek angin an sawi thin a, hei erawh hi chu Pathian rel lawk dan a ni lo tih hriat a tha. He lai chung chang hi ‘Pathian chatuan rem ruat’ tih chhungah khunh theih a ni ang. Pathian chuan khawvel kalphung pangngai tur ruahman sa a nei a, chu mai bakah van lam te thleng khian kalphung a siam vek a. Chutah chuan hunbi te, natna te, vanduaina te, kawng tha leh tha lo te, nuihna leh tahna te, malsawmna leh anchhia te, thil dang tam tak te pawh dah a. Mihringte chu chi tam tak thlaha leilung luah khat turin min ruat lawk a, kan tana kawng tha leh tha lo min hrilh bawk a, zawm leh zawm loh chu kan zalennaah a dah mai a ni.

Mimal tin chung thua Pathian rel lawk dan pawh tihian sawi dawn ila. Entir nan, Thufingte 23:21 ah chuan, “Zu rui mite leh sa heh mite chu an lo rethei dawn si a.” tih kan hmu a. Tichuan, Liana chu rethei tura ruat lawk a ni bik lo, zu rui mi leh sa heh mi a nih chuan a hmabak chu retheih a ni mai. Tin, Ephesi 6:2-3 ah chuan, “I nu leh i pa chawimawi rawh,” (chu chu thupek tiam nei hmasa ber a ni.) “Chutichuan, i tan a tha ang a, leiah hian i dam rei bawk ang.” tih kan hmu bawk a. Nu leh pa thu awih chu dam reina a ni a, a lehlamah awih loh chu dam rei lohna a ni leh mai.

Heng bakah hian mihringin kan hriatthiam phak loh vanduaina tia kan sawi te pawh a awm kan ti bawk thin a. Amaherawh chu, vanduaina kan tih tam tak hi chu Pathian thil rel lawkte mihringin kan chhut thiam loh vang leh kan chhut peih loh vang a ni ve fo bawk a, tam tak hi chu pumpelh theih niin a lang. Entir nan, nu pakhat chuan an chenna kawr kam boruak hrisel lo avangin pneumonia veiin a fa sen chu a thih san hlauh mai a. Pathianin mihringa finna leh remhriatna a dah hmangin chutiang hmun hrisel lo chu chen nan hmang lo sela a natna chu a vei lo mai tur a ni a. Tichuan, nu thihna chu nausen tan chuan vanduaina a nih rualin nu thihna erawh hi chu pumpelh theih a nihna lai a awm ve bawk. He entirna atana thihna kan sawi ang te hi a thih dan tur leh thih hun tura Pathian ruat lawk ni loin, heng ang te hi keimahnia kan tawng buak leh kan sut kuak tura a dah te a ni a, chu chu kan kalphung tura a ruat lawk dan a ni zawk a ni.

Chhandamna chung changa Pathian rel lawk dan pawh hetiang hi a ni. “….. Amah chu tupawh a ring apiang an boral loh va, chatuana nunna an neih zawk nan”, ringlo te tan erawh chuan chatuan thihna a ni leh mai. {Thupuan 22:17 Thlarau leh mo chuan, “Lo kal rawh,” an ti a. A hria apiangin “Lo kal rawh,” ti rawh se. Tuihal apiang lo kal rawh se; a duh apiangin nunna tui hi athlawnin la rawh se.} Chatuan nunna chaka tuihal ten nunna tui chu an duh phawt chuan an lak theih turin a dah a. (Thlarau Thianghlim hnathawh leh ring thei tura min puih dan te, chhandamna changtua min siam dan te, Pathian min zawn chhuah dan te erawh chu ziak danga ka tar langa, hetah hi chuan kan sawi hman rih lovang.)

Tin, Pathian chuan mitin a hmangaihna a inchen vek a, duhsak bik leh duhsak loh bik a bei lo, hei hi Bible ah pawh chiang takin kan hmu a ni. Thenkhat chhandam tur, thenkhat chhandam loh tura a siam chuan Pathian dik leh fair a ni thei lovang. Hetiangin duhsak bik a neih loh zia kan hmu a:

(Tirhkohtr 10:34-35 Tin, Petera chuan a sawi a: “Pathianin mi duhsak bik a nei lo tih dik takin ka hria e; nimahsela hnam tin zingah tupawh amah tiha fel taka ti apiang a lawmzawng mi an ni thin.)

(Rom 2:11 Pathianin mi duhsak bik a nei si lo va.)

(Ephesi 6:9 Tin, nangni hotute u, chutiang bawkin, anmahni leh nangmahni Hotu chu vanah a awm tih leh, ani chuan mi duhsak bik a nei lo tih hriain, vau lovin an chungah ti ve rawh u.)

Tin, Pathian chu mitin hnenah a in hriattir vek a, mihringin chhuanlam tur kan nei lo. {Rom 1:20 “A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, thil siamah chuan a lang a ni; chuvang chuan chhuanlam tur an nei lo” tih ziak ang hian. Tin, Tirhkohte 14:16-17 ah pawh “Chu Pathian chuan hman laiin hnam tin mahni kawng theuh zawh a phal thin a, nimahsela amah hriattirna awm lovin a insiam lo, chutin thil a ti tha thin a, van ata ruahte leh kum that kumte a pe che u a, in rilru ei tur leh lawmnain a tikhah thin che u kha.}

* Aw le, kan thu hmasa ah khan lut leh ila. A chatuan thil tum leh a remruat dan te chu kan hriat fiah theih nan hengte hi han bih chiang hmasa leh dawn teh ang.

Engvangin nge Pathian chuan suala tlua chhandamna hna thawh sak leh ngai tur mihring a siam.? Keini tel lo pawh hian a rawng bawl sak tur vantirhkoh chhiar sel loh a neih tehlul vei nen.

Engvangin nge Eden ah khan tlukna leh thihna a dah?

Engvangin nge Engkimtitheia chuan a pathianna leh a thil tihtheihna hmangin Diabola kha, duh taka a siam mihringte thlema bum thei hauh lo tura a phuar mai loh.?

Engvangin nge Pathian Engkimtitheia chuan a pathianna leh a thil tihtheihna hmangin a mihring siam chu thlemna a tlu lo tur leh a thu chauh awih tura a thunun tlat mai loh? A ti thei lo em ni.? Thei tehlul mai, thei lo se Pathian rin tlak a ni nang. Tih loh chhan a nei a ni mai.

Engvangin nge chuti teh hrepa kan Pathian chu a in ham buai a, chhandamna te min buatsaih sak leh si.? Chhandam buai leh vel ngai lo tur khan engvangin nge a anpuia a siam tawh mihring kha tlukna lakah a hum tlat mai loh.?

Zawhna atthlak in ti maithei e, mahse hei hi Pathian thu laimu, Pathian chatuan thil tum chhunga a pawimawh lai tak te an ni a. Heng zawng zawng hi mathei lova thleng ngei tura a ruat lawk te an ni zawk.

Tichuan, khing zawhna zawng zawng te khi a chhanna tawite pakhat a awm a, chu chu hei hi a ni. “Pathian chuan a rawng bawl sak tur vantirhkoh chhiar sen rual loh nei mah se a lawm a kim lo va, a chatuan lawmna tifamkim tur, a chatuan lawmna fa tur a zawng a ni.” Hei hi a chhanna hnial rual loh a ni.

A nih loh leh a chatuan lawmna fa a zawnna kawngah chuan ei loh tur thupek kha pek kher a ngai em ni.? Ngai e le, thupek a awm loh chuan thuawih leh awih loh a hriat theih nang.

A nih loh leh suala tlukna leh chatuan thihna te hi siam a ngai kher em ni.? Ngai tehreng mai, chatuan thihna a kan tluk luh zet loh chuan chatuan nun hlut zia leh Pathian chauh hi chatuan nunna neitu a nih zia kan hre thei dawn lo asin. Lei leh van hian hei hi hria se a duh tlat a ni. Tin, Rom 11:32 ah chuan Paulan heti hian a sawi a. “Pathianin a khawngaih vek theih nan mi zawng zawng awih lohnaah a khung ta vek si a.” tiin. Pathian chatuan lawmna fa dinhmun hi a hlu em em a, chuvangin a changtute chuan a hlutna hi an hre ngei tur a ni. A hlutna hre lo leh ngai hlu lo hnena pek hi Pa rem ruat dan a ni tlat lo.

A nih leh chatuan nun kan neih leh theih nan Pathian thisen a luan kher a ngai em ni.? Ngai tehreng mai, Pathian thisen chauh kan damna a nih mai bakah a thisena min tlan loh chuan min hmangaih zia kan hrethiam thei nang. Min hmangaih tih hi kan hriat ngei a duh tlat bawk.

Chutiang taka duhtui leh uluk chuan ani a chatuan ro luahtu tur te chu a buatsaih ni. (Thuhriltu 3:14 Pathianin a tih apiang chu a awm hlen ang tih ka hria: engmah belh theih a ni lo vang a, lak then theih pawh a ni hek lo vang; mihringin amah an tih theih nan Pathianin chutiang chuan a ti a ni.)

* Heng zawng zawnga a pawimawh lai ber luahtu chu a hmangaihna hi a ni. Hmangaihna chu a thuk zawh poh leh a thikthu chhiatna pawh a nasa thin a, heng zawng zawng hi Pa hmangaihna ah hian a lang a ni. A hmangaihna ngainep a, a thisen thianghlim chu thil naran a ruattute chuan thih hnihna, Pa ruat lawk chu an hmabak a ni mai.

Aw le, a chatuan lawmna fa a zawnna kawnga hmun pawimawh lai ber luahtu, a hmangaihna leh a thikthu chhiatna lam hi han thlir leh lawk ila. (Johana 1:11 “Amah a mite hnenah a lo kal a, amaha miten an lo lawm si lo.”) Hei hi NIV chuan, ‘He came to that which was his own, but his own did not receive him’. tiin a ziak a. KJV pawhin, ‘ He came unto his own, and his own received him not’.

Kan Lalpa chu a ta te, a property te, duh taka a siam, a hmangaih leh a thlakhlelh em em, hlim taka hun hman pui a duhte hnenah a lo kal a, mahse keinin kan lo lawm si lo.

Ka nupui, ka hmangaih, ka duh ngawih ngawih, ka ta bil chauh ni a ka ngaih chuan min rinawm loh sanin kei ai a duh leh hmangaih dang a lo nei ta a, ka hmangaihna chu engah mah a ngai ta lo. Nang pawh, i pasal, i innghahna neih chhun, i ta bil chauh nia i ngaih leh i inpumpekna, i khing phel ang hiala i en khan a ngaihsak ta hauh lo mai che a, nang ai a duh leh ngaihsak zawk dang a nei ta tlat mai… a na vawng vawng hle a ni lawm ni.., i hriat tirh phei kha chuan i thinlung a keh sawm a ni lawm ni kha. Mihring tawrhah hian hei ai a na hi a awm dawn chuang em ni.?

Kan Lalpa chu a hmangaih ten nupui uire ang mai leh pasal rinawm lo ang maia kan uire san chung pawhin a hmangaihna chuan min hnungchhawn thei chuang lo va, a umin min umzui ruak ruak a, (Pathian anga awma Pathian tluka awm chu thil thlakhlelh hleih theihah a ruat lo va), kan uirena bawlhhlawh zawng zawng tleng fai turin a thisen hial min la pe ta cheu va. Chuti chung pawh chuan keini zinga mi tam tak chuan chuti khawpa min hmangaihna chu kan la haider a, a thisen meuh pawh chu engmah loah ngaiin thil naranah kan la ruat sak a. Hmangaihtu thinlung chu engtiang takin na ang maw aw.!

Mihring tawrhnain a tehkhin zawh phak rual loh khawpa na hi kan Lalpa hian engvangin nge a tawrh a lo ngaih tak mai. Nang leh kei vang a ni lo vem ni.? Ni tehlul mai, nang leh kei min hmangaih em vanga heng zawng zawng hi tuar a ni asin. A chatuan lawmna fa ni turin nang leh kei hi min duh em a ni.

Pathian Engkimtitheia chu engati nge chutiang taka hmangaihna nasa leh tawrhna nasa ah chuan a in barh luh tak mai le, a makin a va han thuk em.!

* Aw le, a hmangaihna thute kan sawi mek lai hian langsar taka tar lan ngai a awm bawk a, chu chu hei hi a ni. (Thupuan 21:6-8 Tin, ka hnenah, “A lo thleng ta. Kei Alpha leh Omega, a Bul leh a Tawp ka ni. Tuihal apiang hnenah chuan Nunna Tuikhur ami athlawnin ka pe ang. Hnehtu apiang chuan chung chu an luah ang a, kei an Pathian ka ni ang a, anni chu ka fate an ni ang. Amaherawhchu, mi dawih te, ring lo te, tenawm te, tualthat te, inngaih ching te, dawithiam te, milem bia te, dawthei zawng zawngte chantur chu mei leh kata kang dilah chuan a awm ang; chu chu thih hnihna chu a ni”) tih thu hi.

Tin, Johana 1:12 ”Nimahsela amah lawm apiang chu, an hnenah Pathian fate nih theihna tur a pe, a hming ringtute chu” tih leh, Marka 10:14-15, “Naupang tete ka hnenah han kaltir ula, hnar suh u; Pathian ram chu hetiang mite ta a ni si a, tih tak meuhvin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp lo vang,” tih thu te hi.

Chhan let loh hmangaihna hi zawng tawrh thiam a har a ni e ti rawh u. Hmangaihnaa khat kan Pathian meuh pawhin, duh taka a siam, a anpui ngeia a din, a chatuan lawmna fa ni tura a duh em em tam tak te chu, hmangaih em em chungin a chatuan thinurna meipui lamah a thlir liam a la ngai ngei dawn a nih hi. A chatuan lawmna fa a zawnna kawngah hei hi a thlen ngei a tul tlat si.

A fiah lehzual nan mihringah i han tehkhin dawn teh ang aw.

Nu leh pa ten fa kan nei a, kan fate chu tha tur leh kan thu awiha sual khawih lo turin kan duh theuh a, thu tha kan hriat engkim kan hrilh thin a. Mahse an va chhuak a, ruih hlo chi hrang hrang leh sual tinreng an va khawih fo mai a, kan zilhnate chu engah mah an ngai si lo. He dinhmunah hian Pa thinlung chu a rum thin a ni lawm ni.?

Tichuan, nu leh pa kan nihna leh kan thu neihna hmangin kan fa chu sual khawih thei hauh lo turin kan phuar bet tlat thei a, pawn chhuak miah lo turin kan khung bet tlat thei bawk a. Mahse chutianga kan tih chuan kan lai a dam angem.? Dam hauh lovang tirawh u. Phuar beh avanga sual khawih lo ringawt chungah khan kan lawm a kim hauh lo vang. Kan fate zalen taka an awm a, khawi hmunah pawh kal theia an awm a, sual thlemna tam tak karah pawh kan duh dan hriaa kan thu an awihnaah chiah hian kan ngaih a ngam a, kan lawm a kim thin a ni lawm ni.?

Chutiangin Pa Pathian chuan, a pathianna hmanga phuar beh te chungah lawmna a neih theih dawn loh avangin min phuar bet lo va, zalenna min pein khawvel sualna leh thlemna karah pawh atana rinawm turin min duh a ni. Chutiang anga a thinlung damna leh hlimna siam saktu tur chu a duh leh a zawn chu a ni. (2 Chronicles 16:9 A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni.) Hei hi a zawn ni lo sela, mihring siam te, tlukna te, chhandamna te, heng zawng zawng hi a thawh buai kher a ngai hauh lovang.

Tihian kan chiang ta a ni lawm ni. Pathian chatuan thil tum pawimawh tak chu, a chatuan lawmna fate nena chatuan hun hman a nih chu.

Rom 11:36 “Amah atang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se. Amen.” He thu hi kan nun chhungril ber atangin kan ‘Amen’ ve thei tawh em le. A chatuan lawmna fa ni ve thei turin Lalpa lam i hawi ang u.

(Isaia – 45:22 Kawlkila mi zawng zawngte u, ka lam lo hawi ula, chhandamin awm rawh u: kei hi Pathian ka ni si a, a dang rêng rêng an awm lo.) “Ka lam lo hawi ula,”

(Thupuan 3:20-22 Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang. A hnehtu apiang ka lalthutphahah ka hnenah ka thuttir ang, kei pawhin ka hneh a, ka Pa hnenah a lalthutphaha ka thu ang khan. Thlarauvin kohhranho pawlte hnena thu a sawi hi beng nei chuan hre rawh se.)

(Deuteronomy – 30:19 In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen.)

A chatuan lawmna fa ni tura min ko tu Pathian Chungnungbera chu fakin awm rawh se, Amen.