-H.zate
Hmar Run
Beidawnna leh lungngaihna hual velin, bawrhsawmna leh natna tam takin a bawr thin che a. Harsatna leh hreawmna tinrengin a bawm thin che, mahse, chutiang hunah pawh chuan hlim hmel pu reng thin ang che.
Facebook leh Vantlang inbiakpawhna site dang dangah i luangliamin i ziak kur dup dup a. Lehlama i hriat miah lova lo thlir a, i status leh i thil post tinreng lo bih thintu lam hi i ngaihtuah ngai em? A ni chu i hlim chuan a hlim a, i lungngaih thu i post chiah khan lungngaihna in a khat ve nghal thin. Tu emaw laka i luanliam thu leh a laka i nat thu i sawi khan a ni chu tihtheih a nei lo tih inhre chungin a lo na ngawih ngawih thin. Ngam leh ngam lova i thil phochhuak a rawn tuihnih a i lo ngaihsak loh phei hi chuan a na ngawih ngawih thin.
Beidawnnain a hual vel che vanga dam i thlakhlel loh thu i tarchhuah chuai chuai lai khan i kianga reilote tal thut ve chak leh thlahlel ngawih ngawih a awm a sin. Tu emaw vanga i nat vanga i nun pawh hlut lova i hman laia khan tu emaw tan chuan i hluin a tan chuan a damchhan i ni fo. Ni tina i nun hman kha a tan chuan a hlu a, tu khaw khain an ngaihsak pawh ring lova fb-ah “Vawiin chu ka va hlim tak em!!” i tih ringawt pawh kha i nun engkim lo chhiartu tan chuan hlimna thlentu a ni thin.
Hmangaihna vanga i hlim thu i thairan chiam te khan thik deuh siin i hlimna a nih miau a vangin a lo hlim hle thin a. I nun a hlim a, i hlim hmel, nui sen sen chunga i thlalak i chhawpchhuahte kha a tan chuan hlimna vawrtawp thlentu leh thlir ninawm loh a tling fo.
He khawvel, mihring sang tam kan lennaah hian , Ngaihsaktu nei lo anga i inhriatlai khan a ruka lo thlir rengtu che a awm a. I hlim vanga lo hlim ve em em thin a awm a. I tan i nun i uluk peih lova, i tan i nui peih lo a nih pawhin a ni tan tal chuan nui ve la. Chu mi, i hlim vanga hlim thin, i tah vanga lo tap thin. I nat changa lo na ve a, i nun engkim lo chhiar thin tu tan tal chuan.
Bawihte, Tap suh, NGAIHSAKTU i nei, Ngaihsaktu nei lo anga i inngaih lai khan a ruka ngiahsaktu i nei. Chu ngaihsak tu chu nangmah vanga a nunin hlutna a neih, nangmah vanga nun nuamtitu i mihringpui , lo vei ngawih ngawih thintu che leh mihringte tel lova nun nuam ti lova, sual laka thi khawp hiala nunna thapa tlantu che, amah fak ning lotu van angel tam tak nei chunga Leia a tlansate fak phut tlattu I Lalpa ngei chu an ni.
An ni hian i nat an phal ngai lova, i tah an phal hek lo. Hlim reng la, hreawmna phena malsawmna awm hi chhar fo turin an duh che a sin.
https://hzate.WordPress.com/
19 May 2016, Thingdawl
July 1st, 2016 at 10:54 pm
Ropui hle mai.
Report this comment