mi(sual).com

“Lalazarzo chawei siam rawh”

A awka leh a tawng ki atang chuan a sawitupa lungawi lohna chu a hriat theih a, chutih rual erawh chuan a hmel hmu miahlo pawhin chu pa chuan tuisik danglam a in tih an hre ngei ang le. Thlasik lai tih takah boruak chu a vawt a, current a awmlo bawk nen chu awka rawn chhuahna in, hla phuahtu ina “Run in tlawmte” a tiha mawi ah chuan bati lian chi pathum hi kawisawi takin a inchhi eng a, inchhung lai takah chuan sikri alo ling vam hiamin , chu sikri lo aia thu napang 2 te chuan an Pa rawn haw chu hlauh hmel taka enin , an hmel ah erawh zantin an tawn thin tihtakah mak tihna a lang lemlo.

“Lalzarzo, Mihur nu, chaw ei siam rawh ka ti che ani lawmni”

“Ka insu laklawh alawm le. A mak vak vak thin, tinge i rawn ruih leh tak ni”

“Ka duh leh ka rui ang, nanga sawi tur a awmlo” chu tawngka chu a vinin a ring tawh hle a, mahse Pi Zari chuan a hriat fo thin tawngkam anih avangin engtin vakah a ngai lemlo.

“Mihurnu”

“A mak teivet e, naupang awmlai in tawngkam chhe tak tak hmang fo suh ka tih thin…”

(more…)

Thlasik boruak nawm lai a niin sik leh sa a nuam a, Masi boruak a nam tan tawh bawk nen mipui mimir boruak zangkhai laitak tur nimahse tunlai thilthleng rapthlak chuan Zoram mipui a tichiai a, a ti mangang ani. Ani taka, nitin chanchinbu lianber leh a te ber thlengin nimin lawka hmeichhe naupang kum 14 mi, a thiannu nena an masi bazar hawng lam, tlaia zuruiin an pawngsual chungchang kha an chhuah nitin a. Zan lamah lah LPS leh Zonet lamin an chhuah awllo in tlawmngai pawl hrang hrang lahin an do thu te an tlangaupui a, a then lahin bati chhi a kawng te zawhin, a na thei ang bera pawngsualtu hrem ni ngei se an duhthu an lanchhuahtir bawk nen. Zoram hmun tin, Khawpui leh thingtlang lamah pawh Masi boruak leh titi chu, chu thil thil thleng rapthlak tak chuan a lan hnehin a bik takin chhun enlai ngei a, chutiang thil a thleng chu Nu leh Pa tam tak an ralkhel a, an fanu te him talo a hriatna neiin chanchinbu leh Fakselna lamah pawh chulam thu chu a ri ring hle.

Aw a tam a, dodalna a nasa a, Political party te lahin remchangah hmangin sawrkar chaklohzia, kan Police nepzia te tlangaupuiin Home Minister bang tura nawrin tawhsual tawk naupang khawngaihthlak Lalnunsangi chu a inenkawlna tur tumsak turin leh a chhungte thlenga sumfai tamtham taka tanpui turin an ngen puiin sawrkar nawrna pawh a nasa hle a. Chung thil thlengte avang chuan nitin mai thuthar a awmin MHIP lam lahin a hma atanga an thukhel pawngsual tute Pa thei lova siam chu an thar thawh leh a, Masi boruak ni a mawi lovin thu rothap pui pui rawtna leh aw a tam hle. Kumdang angin Masi bazar te chu nitin la innek luih luih mahse kumdang aiin Masi boruak zangkhai tak chu a awm lo ti ila kan sawi sual awm love. Chu chu tunlai a Zoram boruak anih avang chuan thu dang mitin rilru ah a leng mawlh lo.
(more…)

“Airport ah chuan lo kal ve ngei ngei ang che ”

Kan inhnuaia a u (cousin) te chhungkua a rawn awmchilh lai khan kei chu pawl 9 chauh ka la ni a. Ka hmuhtirh chuan thingtlang tlangval cher chhe ve tak, hmeltha em em lo ni mai khan ka hria a. Zanah hian a rawn leng zeuh zeuh a, ka pa nen hian an inkawmngeihin an titi tui thei khawp mai. Lehkha ka zir loh laia an titi ka lo ngaihthlak ve thin atang chuan ka rin ang ngawta thing a ni lo tih chu ka hre thei mai a. Pawl 12 a zo tawh a, Technical Entrance pe turin a inbuatsaih mek thu a sawi a, a hawiher leh a tawngkam fel fak mai te, a mizia cool raih te chu ka lo chik ru leh neuh neuh thin.

Zingkarah coaching a kal thin a. A awmnate hi an hausak vak loh avang leh an chhangchhiat avangin chhunah chuan a tul tul a thawk ve mai thin. Ka pa hian titipui nuam a tih em avangin zanah hian leng turin a sawm zauh zauh a, a bak chu lehkha zir nan a hmang vek ti ila ka sawisual awm lo e.

Ka thiannu u nen hian class 11 leh 12 an kalho thin a, ka thiannu hian a thiamtheihzia te, a u in a ngaihsan zia te, class 10 ah pawh Mizorama langpha hial khawpa thiam a nih thu leh, class 12 ah pawh Mizoram puma pakhatna ni tura an beisei thute a sawi thin a. Chumi hnu phei chuan ngaihsanna mit nen ka thlir tan ta a, zinga a class kal turte hi ka room tukverh atangin ka thlir liam ta fo a.

Uangpui chang suh ila, Pathian zarah hmel leh pianah thiante pawhin an awh em em ka ni ve a ka kum phu lovin ka pumrua a lian a,  kan rualpui mipa harh hma deuh, min rawn bem leh chawttu pawh an awm ve deuh reng. Mahse ani chuan naupangchhe enin min la ni hmiang, mawihnaia min be ve zeuh zeuh tih loh chu kan inbe tam lova, a hmuh turin han awm vel thin mah ila a mitmei chu sawi loh, a mitsir takngial pawh ka chang lo a ni ber mai.
(more…)

Chu mipa naupang, a kum phu lova fel chuan a ‘toy’ neih ve chhun thingbung te chu a ching let a ching let a, khawih ngun tih hriat tak mai chuan chung thingbungte chu an tliang hlarh mai a. Ama tawk chuan a tlei ve em em a, naupang awh ngah rual, Mizo naupang silai lem leh football pheikhawk pawh awt ve em em rual, amaherawhchu, a kum phu lova a rilru a puitlin avang chuan engmah beisei nei pawhin a lang hauh lova.

Chhuatah chuan amahin tlei takin a neih chhun te te chu a khalh kual a, naupang tam takin khalh sen loh an neih hnu pawha cheng sang chuang man ngena an tah a, chhungte an tih mangan laiin Rinfela erawh chuan, a neihchhun thingbungte chu lungawi takin a khalh a; naupang dangin ‘transformer, octimus prime, money in the bank’ tia bazara chhungte thawmhnaw an uai ngawng ngawng laiin ani erawh engdang ngai bik lovin a neih ang ang chu a khal a, chung a thingbungte chuan an kawm hlim ve tawk em em a ni.

Tichuan, kan titi ta melh melh a. A kum phu loh chuan a lo fel zek lehnghal a. Kan titi chhoh dan lah chu puitling leh naupang indawr pawh kan ang lo, puitling pahnih titi te pawh ka inchan rum rum a, kawng tam taka ka tluk lohzia ka hriatchhuah phah ta a.

1. “Rinfel, kum engzat nge i nih tawh a, i toys te chu thingbung mai mai a ni sia, a dang a aia tha te i awt em?”

“Kum 7 ka ni ve tawh a; aaa….awt ve thin tho e..mahse awt viau mah ila maw, adang leina tur kan nei si lova, a puin mi in a sakna atanga a thingbung min hawnkhawm ania, vawiinah pawh TMB tur min lo hawn leh dawn a, nangin JCB hian lei min lo pe anga, keiin ka lo va phurchhuak zel ang a…..”
(more…)

Kimkim-i chuan ka kut chu nghet takin a vuan a,a hmai chu mittui in abual huh vek bawk a,hnem ngaihna reng ka hre tawh lo a ni.Ka thianpa Rokima vuina hun serh pawh chu a tawp ta a.Thluak cancer a nei tih hi a thih hnu chiah a ka hriat ve a ni.A fanu hi a kal san ala hun lo asin mawle.Engtin nge zua tel lova hringnun a hman chhoh ve ang,naupang mai ala ni asin.Mahse aduh vang reng a ni lo,a duh vang renga cancer a ni hek lo.A thih hmaa a fanu ahmangaih zia thu min hrilh te kha a thinlungin a hmangaih tak tak ani tih a chiang reng si a.He khawvel natna te chuan thihna kut vawtin tuam mahse he lei hringnun hrehawm tak chu a mangtha a tul ta si a ni.

Kimkim-i chu ka pawm a,a hmel ka han en a ka va han lainat tak em!Hlim hmelpu lo mahse a hmel a duhawmna chuan a hmelthatzia a ti lang chiang a.Naupang kum 6 mi lek la ni mahse a puitlingin a fing em em bawk a ni.A biang a hmangaihna mittui luang chuan mi tamtak thinlungah khawngaihna leh lainatna apian tir a,fahrah mai ni tur chuan ka la phal hauh lo a ni.A hringtunu ngei pawh hmu hman lovin he khawvel eng hi a rawn rap ve a,mahse zuapan mual a liamsan leh ta si.Vanduaina hi atan chuan a nitin chaw ang lek a ni.

Kimkimi pa lehkhathawn min hnuchhiah chu ka jacket atang ka phawrh a,ka chiar nawn leh a.Ka rilru a ti buai ve hle a ni.Eng vanga a fanu enkawl seilian tur hian kei min thlan tak le.Chhung leh khat laina a nei ve lo em ni?,nie,laina hnai a nei lo tih chu kei tluka hre chiangtu an awm lovang.Mahse,nupui ka la nei bawk si lo tlangval satliah ve mai ka la ni si.Ka enkawl duh loh vang ni hauh lovin ka zuam lo mai zawk a ni.Kimkim-i tui taka a muhil lai chu ka thlir vawng vawng ringawta,a hmel lainatawm tak mai chuan ka thinlungah mawhphurhna min pe a,ka thianpa thuchah hlen tur chuan thu ka intiam ta a ni.

Kar khat a liam meuh chuan Kimkim-i hmel pawh a eng sawt tawh hle mai a,a hma aiin a tawng ve duh tawh bawk a.Mi tawng tlem thin tak ni mahse a mi ngainat te bulah chuan a tawng duhin a tawngka chhuak a puitling em em mai a,hei hi ka mitah chuan a duhawmna lai ber a ni tlat…..
(more…)

A hmel en chuan kum 50 ai maha upa niawm niin a hmai a thlantui rawn luang chu a han hru phak a, chiang deuha en tan chuan a hmai te chu duk nasa viauin rim taka hna thawk thin ani tih hriat mahse a hmaifang erawh a chhe hauh lo tih an hmu ngei ang. Em khat tlata nepnawi hrang hrang phur khat tan chungin a kutin vei lamin vur bawm sen hlui tawh tak a khai a, a kut dinglam chuan a fanu ni ngei tur naupang kum 8 mi awm vel hi kaiin chu hmeichhe naupang, hmel felfai tak mai leh ngo ving veng tak chuan a nu ina a kaih lohna lam ah chuan kuhva hring hi a khai bawk. Hmanhmawh takin lammual sir ah chuan an kal hlawk hlawk a, an bul lawk khelmuala inkhel hmuhnawm tak mai mitam takina en tura an rawn kal khawm chhan chu ngaihsak awm pawhin an lang hek lo.

Nia, anni nufa tan zawng inkhel lam a pawimawh lova, chu ai chuan chawlhlawk laia mipui zunram thiar velina an dawr awlsam theihna tur khelmual sira hmun awl leh mipui tamna lam chu an pan a ngaiin chuvanga an thil zawrhna hmun kopang chhak lama thutna atanga kalsawna chulam pan chu aNni. Mipui tamtak zingah chuan an hmelhriat an awm lova, an mahni hria an awm heklo. Nilengin hah takin mipui sang tamtak karah chuan badam,kuhva, meizial leh vur te chu an zuar kualin ni a sat avang em avang chuan an thlantui te pawh a luang nasain an hmel en thuak pawhin chu mite nufa chu an hah tih chu a hriat a, chiang lehzuala entu tan phei chuan a fanu bula ding chunga amah dawrtu te hnena pawisa kir mektu nutling chuan rilru hah avangin nizan lamah mutmu a tuah tawhlo tih a hmel atang chuan an hre ngei ang le.

Chu Nu kan tih mai chu a hming tak erawh a pa ina lungsi taka Zomuankimi tiha a phuah niin a fanu kum 8 mi nena Aizawl veng tlabirh zinga pakhata mi in luaha khawsa mek ani. Lehkha thiam a nihloh avang chuan atan zawng kuthnathawh bak hrawk chawmna kawng a awm lovin a rem rem nepnawi te a zuar kual thin a. Kawla ni chhuak chhiarin nitin a thil zawrh lai nen a chhuak a,thil chi hrang hrang a bikin Burma lam chhuak DVD atanga radio leh mobile charger thlengin a zuar kual a, a thawhchhuah beitham te atang chuan amah leh a fanu mahmawh ang te, a bik takin a fanu zirna lam mahmawh te phuhruk a tum hram hram thin. (more…)

“He nula hi i nupui atan i nei thei lo ang. I nei dawn anih chuan he in hi i chhuahsan a ngai ang” tih chu Johny-a pa thu chhuak chu a ni ta mai. Hemi zanah zet hi chuan Johny-a chu a mu lo a ni ber mai. A hmangaih Lucy hmel chu a mitthlaah a lo lang a, chutih lai vek chuan a pa thu a awih a, a ro sum leh hausakna tam tak a neih tur chu a lo lang zut zut bawk a….

Johny-a hi sumdawng hausa tawn taw fapa mal neih chhun a ni a, a tet lai atanga enkawlna dawng tha tih takah lehkha a thiamin a pa pawhin a sumdawnna enkawl chho zel tura a lo suangtuah leh chutiang tura a enkawl chu a ni. Amah a puitlingin a hleitling a, a hmel a tha bawk a, nula mai bakah Mi nu te lamin an ngaihzawng a nih loh pawhin an fanu tan an be tha em em vek mai a ni.

zan khat an thian hoa Bazara an kal chu a nun tidanglamtu a tawng ta tlat mai le. A thiante pawhin an hau a, nawmchenna mai a hmang turin an fuih thin…… chu nula chu Bar Dancer… Bar-a mipa lo kalte hmuh tura lam chunga in phelh ruak thin a ni tlat mai le.Mahse Johny tan chuan Rose par thianghlim ber, mawina leh duhawmnain a thuam LASI nula a ni miau si..(atawi zawngin sawi ta mai ila.. an in hmu a, an inkawm nel a, an leng duna, an infawp a, an in ning thei ngang si lo). Chutih lai chuan Johny-a pa lah chu pa rorum tak, a thu chhak chhuak tawh thulh duh mai mailo mi a lo ni si. Lucy hnenah chuan a pa rilru zawng zawng a hrilh ngam vek si lo..Duhthlanna chu a ma siam a ngai ta si a…

(more…)