Office of Profit Vangin MNF MLA-te MLA Atanga Ban Ring Leh Ring Lo An Awm
Aizawl, Oct 23 : Office of Profit thubuai kal zelah Mizorama sawrkar lai party MLA pali aia tlem lo chu bantir (disqualify) an ni mai thei. Election Commission of India chuan Mizoram ruling party MLA 12 ten Office of Profit an chelh a ni tia an hnena khianna (complaint) thleng chu tun thla ni 3 khan ‘full bench’ thukhawmin ngaihthlakna New Delhi-ah an nei a. Heta tel ve Pu Lalnunmawia, Secretary, MPCC hnen atang hriat danin MNF MLA 12 zinga Pute Radhik Mohan Chakma, Dr.R. Lalthangliana, Lalchamliana leh (Dr) Lalzama te chu Commission hian a chingfel tawh a, ban loh turin thu a titlu tawh a ni a ti a. MNF MLA dang Pute K.Vanlalauva, Chairman, KVI, D.Thangliana, Chiarman, MIFCO, Lalthlengliana, Chairman, ZIDCO, Vanlalthaliana, Chiarman, ZENICS, Aichhinga, Chairman, MAMCO, R.Khawpuithanga, Adviser to CM te chu an thiamthu sawi ngaihthlakna neih zawh tawh a ni a. Election Commission hmaa heng MLa 6-ten an thiamthu an sawi leh anmahni khingtu lam ukilte tanfung atangin heng MLA 6 zinga Pu R.Khawpuithanga leh Pu Aichhinga te tih loh chu MLA an nihna atanga ban (disqualify) theih ngei an nih a beisei thu Pu Lalnunmawia chuan a sawi.
Hetih lai hian Pu K.V. Tlangmawia, (Asstt.Advocate General), MNF MLA-te ukil puia he thubuai sawi laia awm ve chuan MNF MLA-te hi disqualify an nih a rin loh thu a sawi nia sawi a ni a. Heng MNF MLA ukil lamte chuan Mizoram state-in dan a neih kum 1975, 1987 ami te leh kumin May thlaa Mizoram Assembly-in an pass ‘The Mizoram Legislature Members Removal of Disqualification Act 2006’ chuan MNF MLA-te hi a humhim niin an ngai thung nia sawi a ni.
Pu Lalnunmawia hnen atanga hriat danin, Election Commission hmaah chuan heng MLA khingtute lam chuan heng MNF MLA palite hi May ni 4, 2006-a Mizoram Assembly-in an himna tur dan thar ‘The Mizoram Legislature Members Removal of Disqualification Act 2006’ chang 8-na-in a siamsakah Corporation leh Board Chairman-te “compensatory allowance chauh la an nih chuan” office of profit avanga MLA paih theihna atangin an him ang” tih a n a. Mahse, chutih laiin heng Corporation leh Board chairman-te hian compensatory allowance chauh ni lo, Industry department-in hlawhbi (honorarium), house rent,etc. a lo siamsak tawh la reng an nih avangin dan thar hian heng MLA pali-te hi paih theihna atangin a chhan (humhim) lo a ni an ti a. Hei bakah hian Supreme Court-in ni 8.5.2006-a Jaya Bachchan versus Union of India inkhinnaa Jaya Bachchan thiam loh chantir a, MP atanga paih a nihnaah “daily allowance bakah compensatory allowance hming chawia in luah man, man lova in luah, leh car te sawrkar sum senga pek an nih chuan hlawh a ni chiangin sum leh paia hlawkna a ni a, chuvangin hlawkna telna (profit) a ni” tia thutlukna an lo siam tawh sawi chhuakin heng MNF MLA te hian motor te dawngin, house rent sawrkar tum sakin, driver te a pe a, chuvang chuan MLA an nihna paihsak theih an ni an ti bawk.
Pu Lalnunmawia chuan MLA 6 zinga Pu R.Khawpuithanga chu May ni 4, 2006-a Mizoram Assembly-in MLA-te himna dan an siamah khan Advisers to Chief Minister tih ziahluh thar a nih avangin a him theiin a rinawm a, Pu Aichhinga pawh MAMCO Chairman atana a appointment-ah ‘temporary’ (nghet lo) tih a nih avang leh ama ministry enkawl hnuaia Corporation a nih avangin him thei tura ngaih a ni bawk a, mahse, hei pawh hi Election Commission ngaih dan dan a ni ang a, sawrkar hnathawk zawng zawng appointment-ah pawh ‘temporary’ tih a nih avangin ‘temporary’ tih vang ringawt hi chuan a him lo thei tho mai thei a ti.
MPCC Secretary chuan Mizoram State Planning Board Vice Chairman Pu F.Lalthanzuala thubuai chu la hrangin Election Commission chuan ‘show cause nnotice’ October ni 10, 2006 thlenga chhan theih turin a pe a, Pu F.Lalthanzuala hian a thiamthu sawina pawh a thehlut tawh a ni a ti.Mizoram State Sports Council President Pu Z.H.Ropuia chungchang chu Election Commission chuan action a la la lo.
Thlipuiin Aizawlah In 83 A Tichhia
Inrinni tlai thimhlima Aizawl khawpui leh a chhehvela thlipui,ruah leh rial thawk chuan Aizawlah in 83 a tichhia a, in 8 chu luah tlak lohin a chhia. Aizawl khawpuia in chhiat tam deuhnate chu Kulikawnah in 16, Tlangnuamah in 10, Upper Republic-ah in 9, Mission Vengthlangah in 6, Republic vengah in 5, Tuikhuahtlangah in 5, Venghnuaiah in 4 leh Thakthing vengah in 3 an ni. Nimin khan Aizawl DC office-a officer-ten veng hrang hrangte tlawhin chhiatna an tawh dan an en a, veng lian deuh leh chhiatna tawrh nasat deuhnaahte chuan hnatlangte tan Rs.1,000 te, veng te deuh leh chhiat nep deuhnaahte Rs.500 an pe. Aizawl DC chuan vanduaite tanpui nan nimin khan silpauline 70 a sem chhuak.
MNF-in MPF An Palzut
MPYCC & MPCY Coordination Committee chuan Tlungvel bial bye election campaign chhoh mekah MNF campaigner-te chuan sawrkar lai an nihna chhuang taka in-show-in Mizoram People Forum (MPF) duh dan leh ruahmannate an palzut a ni a ti a, hengte hi a chhanletna chu Tlungvel mipuite kutah a innghat a ni an ti. Inrinni khan press release chhuahin MPF ten sum leh pai sen tam loh dan tura ruahmanna tha tak tak an siamte chu bawhchhiain kopang leh in ruakah MNF-te chuan party flag an tar uar em em a, ruaitheh anga lan loh nan hotelah chaw an oder a, an vawikhat chaw eikhawmna pawh Rs.11, 460/- lai te a ni thin a ni an ti a. MNF party chuan vote zawn silpauline te pawh an sem a ni an ti.MPF local forum te kamkhat tawk pawh an awm ta zeuh zeuh niin an sawi.
MPYCC & MPCY Coordination Committee chuan an candidate Pu Lalthanliana chu Tlungvel bial mipuiten an hlutin a boruak a sang chho zel niin an sawi a, Pu Lalthanliana chu hmui mistiri lo, a thawka thawk tak tak tur mi, mahni tih theih loh pawh tiam zel mai mi ni lo, rilru chhungril dik tak sawi mai thin a ni tiin Zoram politics siamthatna tura mamawh mihring ngei a ni an ti.
Hetih lai hian MNYF press release chuan tun dinhmunah MNF & MCP candidate Pu Lalchhandama Ralte chu mipuiah zawrh a tla ber a ni an ti a, thalai rual leh nu leh pate chuan ruling party biala awm ve an duh avangin Pu Lalchhandama dinhmun a tha chak hle a ni an ti.
Electric-in Man Hlum
Electric Vengchung, Aizawl tlangval Lalhmingthanga, 24 Pu V.L.Bela nupui nau Pi Rammawii fapa chu inrinni thimhlima ruah leh thlipui lo thawkin electric a tihchhiat Tuikhuahtlang-ah siam a, electric bana a lawn chu electric-in a man vang nia ngaihin nimin dar 10:00 a.m. velah a tla a, Aizawl Civil Hospital thlenpui a ni a, a boral. Vawiinah vui liam a ni ang. P&E department-a Muster Roll worker Tv.Lalhmingthanga hi a pa Pu Liansu-a a ni a, a nu leh a pa hi an inthen a, a nu hnenah awm a ni.
Mizo 2-in Lawmman La
Ministry of Development of North Eastern Region (DoNER) bul tuma National Institute of Fashion Technology (NIFT), Kolkata-a zir tura Mizoram Industry department tirh mi 6 chuan tha takin an zir zo a, an zinga Ramtharnghaki Hauzel d/o Pu H.Zathuama, Dinthar Aizawl chuan ‘Best Lifestyle Product’ lawmman a dawng a, Lalhlimpuii Langel d/o Lalzabiaka, Chanmari, Aizawl chuan”Best Garment Construction’ lawmman a dawng bawk.
Shooting Competition
1st Mizoram State Sports Festival chhung October ni 25 leh 26 dar 10:00 a.m. – 3:00 p.m.-a Firing Competition neih tur chu a hmun Mualpui atangin PTC Firing range-ah sawn a ni a, mahni silai intum tur a ni a, a mu erawh hree a ni ang. Air rifle (male) 10m-15 rds-3 posn-Fee Rs.100, Air rifle (female) 10m-15rds-3posn -Fee Rs.100, .22 rifle (open) 5-m-15rds-3 posn-Fee Rs.200, .22/.32 pistol/revolver (open) 10m-5rds-standing-Fee Rs.200 a ni.
Zionkhawpui Tlangzarh
Vawiin dar 11:30 a.m.-ah Directorate of Food, Civil Suplies & Consumer Affairs Conference Hall-ah Lalbiaktluangi zai gospel album hamsa ber “Zionkhawpui” chu zaithiam Pi Vanhlupuiin a tlangzarh dawn a, Master of Ceremony Pu K.Lalnghinglova, IAS a ni ang.
Electric Hnathawkte An Buai Hle
Inrinni tlaia ruah leh thlipui na tak khan Mizoram hmun tinah tihchhiat a nei a, thing leh mau tlute leh rangva thlawk velten electric hrui leh bante hmun tamtakah a tichhia a, Aizawl veng hrang hrangah pawh inrinni zan atang kan electric pek theih a ni lo. Poqwer & Electricity department Officer-te leh staff-te chuan zankhuain an buaipui nghala, nimin Pathianniah pawh an thawk a, veng tamtakah electric pek leh a ni. Tlawmngaih chhuaha lo puitute chungah lawmthu an sawi a, hetia ruah leh thlipui avanga electric chhia-ah hian P&E department chuan mipui hriatthiamna an ngen.
MNF-ah Mi 338 Lawmlut
Hemi chungchangah MNF press release-in a sawi danin kar kal ta zirtawpni khan Tuikum bial (Lungpho bial)-ah party hrang hrang atangin Pu R.Tlanghmingthanga, Health Minister leh Treasurer, MNF chuan Chhiahtlang-ah mi 338 MNF-ah a lawmlut. Lawmluhna thu a sawinaah Pu Tlanga chuan ‘Politician chi nih an awm a, chi khat chu mahni hamhaina leh hlawkna uma politics khel an ni a, hnamin a chhiatphahte an ni a. Pakhat chu mahni inphata mi dangte tana an theihna zawngzawng hmanga politics khel an ni a, hetiang mite hi ram leh mipuitye mamawhte an ni a, mipuite hnena dawta inpuhna ringawt awi mai lova, an hnathawh rahah en zawk turin mipui a ngen.
Telephone Adalat
November ni 7, 2006-ah Telephone Adalat neih leh a ni dawn a, telecom service chungchanga lungawilohna chi hrang hrang (bill-ah te, connection tihtlai, insawn, a chhe repair,etc.) nei chuan Divisional Engineer (P&A), Telecom Department, Aizawlah Oct.ni 31 aia tlai lovah thehluh tur a ni a, bill leh document neih ang thil tel tur a ni. Lehkhaip pawnah “Cases for Telephone Adalat, November 2006” tih leh Exchange hming ziahlan tur a ni.
Similar Posts:
- Aizawl Municipal Council inthlanna tura candidate ten Election Commission thupek an zawm lo
- Mizoram State Law Commission chairman dan kalhin a che em ni?
- Pu H.Vanlalauva Ex-Minister a boral
- ‘Youth for Clean Mizoram’ din
- VC leh LC Inthlan result
October 23rd, 2006 at 3:54 pm
In 83 teh meuh han tih chhiat chu avan pawi em em ve….
God bless them….
Report this comment