mi(sual).com

A hla thluk han ngaihthlak chuan lung a tileng a, a thu han belhchian erawh chuan lung a tichhe si. He hla hi chu a tha ngawt mai han ti dawn ila, a thatna sawitur ka hre lo va, a satu hi a thiam han ti dawn ngawt ila zaithiam leh thiamlo pawh hre hranglo val sawi mai mai hi tu mahin chaw tak khukin min khuk pui awm si lo va, chuvangin ti hian mahni awmhmun atang hian mahni ngaihdan mawl te chu i han phawrh leh ang hmiang.

“Hmangaihnain a dawhthei a, ngil a nei bawk thin. Hmangaihnain a itsik lo va, mahni hma a sial lo va… sual lamah a ngaihtuah lo va…..” tih bung leh chang kha chu tuna ka sawitur ah hi chuan a thleng dik lo hulhual a ni. Mahse hmangaihna avanga thil thleng tho a ni lawi si, chuvang chuan Hmangaihna kan tih tak hi engnge ni ta ang le?? (ngaihtuah peihte tan) kei zawng ka hrilhfiah thiam hlei long e. Pathian Hmangaihna a awm a, Nu leh pate hmangaihna a awm leh a chutah nula leh tlangval inkara hmangaihna an tih hi a awm leh a, heng hmangaihna te hi a inanglo anih ngai chuan Hmangaihna kawngah chuan kei sipai bo hi ka bang maps e.

He khawvel lo awm tan tirh ata tawh Hmangaihna hi chu a awm a, mi hausa leh reithei a thliar lovin, mi huaisen leh dawizep a thlei hrang hek lo, hmun nuam leh hrehawm pawi sa loin hmun tin maiah a awm a ni.

Kum zabi sawmpakua (19th century) lai vel khan Willie an tih mai chuan a chenna khua a nula hmeltha tak leh a hmangaih em em mai chu tlaikhat Ohio lui kama lenpui atan a sawm a, Ohio lui kama ke a an kal dun lai chuan Willie chuan tun hma atanga a thinlung kaptu lo ni thin leh a sawi ngam thin loh thu chu a duh em em leh a hmangaih tak hnenah chuan a sawi chhuak ta a mahse le…., Willie tan chuan a chhanna chu beiseina beidawnthlak mai a ni si. Lui kamah chuan an kal dun zel a, nupui atana neih a duh zia te leh kumtluang atana a kawppui atana a duh zia te han hrilh ngial pawhin chu nula hmeltha tak mai chu Willie aia tuanrang val’an a nupui atana a hualna zungbun chu a lo buntir der tawh mai hi a lo ni a. Hun kha leh chen a lo hmelhriat tawh, a duh em em mai chuan hun reiloteah; a hmuh leh tawh ngai reng reng loh tura lengdang tawnah khiang a awihsan mai dawn tih an hriat chuan Willie chu a bing mup mup ngei ang le, mahse Ohio lui kamah chuan an pahnih chauh chuan an la kal duh zel a. Hmun fianrial lai an thlen meuh chuan nupui atana a neih theih loh tur, a Hmangaih em em si chu a Tlahthi (Chemte) ken chuan a awmah vitin Ohio lui kamah chuan a that ta a ni.

He mite inkara hmangaihna nunrawngin ro a relna thu chu hla ah siamin hla lar em em mai Banks of The Ohio tih chu a lo pian phah ta a. He hla hi vawi duailo zaithiam hrang hrang Johnny Cash, The Carter Family, The Blue Sky Boys tihte chuan 1936 khan an lo sa tawh a, 1973 khan Paper Moon tih film ah pawh hman a lo ni nghe nghe bawk. The Monroe Brothers, Joan Baez, Olivia Newton John te leh Doc Watson te chuan an rawn tharthawh leh a, tun thleng hian he hla hi hla lar ber pawl a ngaih a la ni.

BANKS OF THE OHIO (Olivia Newton John Version)

Lui tui te an luan del delna hmun
Ohio lui kam ngei mai ah chuan
Ka hmangaih ber chu len pui ah ka sawm a
A kam vela leng mai mai turin ka sawm a ni.

Lui tui te an luan del delna hmun
Ohio lui kam ngei mai ah hian
Tu dang reng ngai lovin
I thinlung kha ka tan min hlan rawh

A awm zawnah chuan chemte chu ka han lek a
Ka kut chu nghet tak a manin a chelh a
Chutah tap chung chuan “Duhlai, ka chungah zah ngai la
Rihsangmual liam zawng ka la zuam lul lo”

Dar sawmpahnih leh dar khat inkara in ka thlen chuan
Run min rempui lo tur D
“Ka hmangaihber chu thihna kutvawt ah ka hnuk liam ta
Engthil nge ka tih tak le Lalpa?”

Lui tui te an luan del delna hmun
Ohio lui kam ngei mai ah hian
Tu dang reng ngai lovin
I thinlung kha ka tan chauh lo hlan rawh

VIDEO : Banks of The Ohio by Olivia Newton John

Similar Posts:

• Lo innei ta se..
• What is Love? What does it mean to me?
• Love Theory!
• I Duhlai Hlu Ber Kha…!
• Hmangaihna hi enge a awm zia aw?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, January 25th, 2007 at 9:27 am and is filed under More than words, Music and lyrics. You can follow any responses to this entry through the RSS 2.0 feed. You can leave a response, or trackback from your own site.