mi(sual).com

David M. Thangliana

Mizo journalist-te zingah hian Prime Minister of India zuitu hi kan la tlem hle a, kei hi a pathumna ka niin hemi hma hian kan senior te pahnih, Pu D.R. Zirliana, editor, Mizo Aw leh Pu Robert Lalchhuana, editor, Romei te’n an lo zui tawh a. Heng kan senior journalist zahawm tak pahnih hniakhnung zuia Pu Manmohan Singh, Prime Minister of India, Philippines a 12th ASEAN Summit leh India-East Asia Summit a tel tur zui ve tura Ministry of External Affairs, New Delhi-in min rawn sawm hi Pathian malsawma ani kei chuan ka ti lo thei lo.

SAWMNA KA DAWNG NAWLH MAI

2006 Krisma hma deuh khan telephone-in New Delhi atangin min rawn bia a. Ka cell phone a min rawn biak avangin ka hrechiang hlei thei lova. Krismas chawlh te a lo ni bawk nen, he telephone-a min rawn biakna hi ka ngaihtuah zui lem ta lova. December ni 28, 2006-a Zalen Sunday paper office a ka awm laiin telephone call chu ka cell phone-ah ka dawng leh ta a. Chutah chuan “Engtin nge i tih dawn, Prime Minister chu Philippines-ah i zui thei dawn em?” min rawn ti a. Ka bangbo ang reng hle. “Eng maw? I thil sawi chu ka va hrethiam love?” tiin ka chhang a. New Delhi lam chuan, “Ele, email-ah khan ‘Prime Minister Philippines-a kal i zui duh em? I duh chuan December ni 27 hmain min rawn hriattir leh rawh’ tiin kan rawn thawn che a, hei vawin ni 28 a ni tawh a, i chhanna kan la hmu bawk si lova,” a rawn ti a. Kei chuan, “Anih tak chu maw le, email chu min rawn thawn tha leh ula, mahse in la pawm thei dawn em ni, hun a tepter tawh ang reng si a,” tiin ka chhang let a. New Delhi lam chuan, “Min rawn chhan nghal vat chuan kan la pawm thei e,” an rawn tih chuan, “Ka email chu ka lo en ang e,” ka ti ta a.

December ni 28 zan chuan in lamah ka email chu ka han check a, sawmna chu alo awm ngei mai le. Engtinnge ka kal dawn, eng sumin nge ka kal dawn tih pawh ngaihtuah lo chuan ka pawm thu chu ka thawn let nghal a, form fill up tur an tih zawng zawng leh thlalak thawn tur an tih te chu email-ah chuan ka thawn ta nghal a. Mahse hei hi ala tawk mai lo. Email hmang thovin 12th ASEAN SUMMIT Organising Committee chu ka biak pawh a ngai a, internet kaltlanga in register ala ngai. December ni 29 chuan ASEAN website-ah lutin registration te chu ka han ti leh a. Mahse registration tihfel chhung hi kar hnih atanga kar thum a ngai ang tih hi an website-ah chuan an lo tarlang tel a. “Eheu, ka va kal thei lo mai awm ve,” ti rilru chung chuan kalna sum ngaihtuah a ngai a ni tiin sorkar office lam ka pan ta a.

SORKARIN MIN PUI

Zah pawh dawn lovin Chief Secretary Pu Haukhum Hauzel office chu PM zui tura min rawn sawmna lehkha xerox copy kengin ka pan ta chawih mai a. Pu Hauzela’n ka lehkha a hmuh veleh chuan Information office lam a phone nghal a, Information office-ah chuan min tir ta a. Director Pu L.R. Sailo (Pu Ruatliana) chu alo fel ngiang mai a, Aizawl atanga Delhi ka panna leh ka lo hawna tur (thlawhtheihnain) chu min tih sak theih tur thu min hrilh bakah ni 10 chhung atana ka ei leh in Rs 5000 min tum sak theih tur thu min hrilh bawk a, ka thaw a vengin ka lawm hle a ni. (Ministry of External Affairs khan Delhi atanga Philippines kalna tur leh lo hawna tur chu PM thlawhnaa chuang ve tur kan nih avangin mahni sum sen a ngai lovanga, mahse thildang zawng zawng chu mahni-a intum tur a ni tih min lo hrilh tawh a ni.)

Philippines ka kal theih nan hian min tam takin min pui a, a then chu sorkar officer te niin an mahni sum leh pai te pawhin min tanpui a, an hming te pawh han tarlan a chakawm rual rualin a remlohna lai te a awm avangin ka tarlang lo mai ang a, an chungah ka lawm tak zet zet a ni tih erawh chu an mahni leh Zoram mipui lo hriat atan hian ka rawn tarlang a ni.

DELHI LAMAH BUAIPUI NGAI BUAIPUIIN

Thil tihfel tur neuh neuh, security pass, visa tih ang reng ala awm avangin Delhi pan turin Aizawl chu January ni 6 (Inrinni) khan Silchar panin ka chhuah sana (hetih lai hian Lengpui Airport a tum tur thlawhtheihna an cancel fo avangin Lengpui atanga kal chu ka thlang ngam lova, Silchar lam ka pan ta zawk a ni). A tuk, Sunday January ni 7 chuan Kolkata panin ka thlawk thla ta a, Kolakata atangin hian zan dar 8-ah New Delhi panin ka thlawk chho leh ta a ni. New Delhi chu rinaia kan thlen tlai tak avangin zan dar 12:30ah Mizoram House Vashant Vihar ka lut thei chauh a, hetah hian Pu Lalhmingthanga Ngente, Asst. Liaison Officer chuan ka thlenna tur te min lo ruahhman saknaah chuan ka invawm lut ve ta ni.

Thawhtanni chuan External Public Relations (XPR), Ministry of External Affairs office, Shashtri Bhavan panin ka chhuak ta a. He hmun ka va thlen hian ka va inzawng buai hle a. Gate a luh nan ringawt pawh ka ID phawrh a ngai a, inchhunga lut tur phei chuan ka hmuh duh kha reception atangin ka telephone phawt a ngai a, chumi chuan rawn kal tir rawh a tih loh chuan a luh theih loh a ni. Tichuan Publicity Officer Bhandari chu ka’n phone-a, a ni chuan receptionist hnenah chuan “Rawn luh tir rawh” a ti a ni ngei ang, ka hming te ka ziak lut a, pass min pe a, chu chuan ka lut ta a. Bhandari chu engtin tin emaw office in khar hnan thip thiap atanga ka zawn hmuh hnu chuan ka lehkha pawimawh te ka pe a, kan kal hun tur te ka zawt a. “January ni 13, Inrinni chawhma dar 11 khian Delhi chhuahsan tur a ni,” a ti chu ka huphurh khawp mai, Delhi khawvawt tak mai a kar tluan han cham chu. Delhi khua chu a vawt lutuk a, January ni 9, 2007 atang khan kar tluanin Primary zirlai, class V thleng chu Delhi sorkar chuan school a khar sak ringawt mai a ni. A vawh lai berin 3 degree Celsius a ni.

DELHI KAN CHHUAHSAN DAWN TA

Delhi-a ka cham chhung hian a kal tur te leh MEA official te nen tum hnih meeting kan nei a. Kan meeting hmasa zawk chu January ni 10 khan a ni a, hetah hian MEA Secretary (East), N. Ravi chuan thil chinchang te min hrilhin keini a kal tur te chuan hriat duh kan neih te kan zawt a. Kan meeting vawihnihna chu January ni 12-ah a ni a, hetah hian kan passport (a hma-a kan thehluh) te, kan air ticket te, thildang pawimawh leh airbag te min pe a, Cebu (Philippines) chanchin tlem min hrilh bawk a. Briefing min petu chuan, “Naktuk chawhma dar 11-ah kan thlawk chhuak dawn a, media ho kha zing 8:30 leh 9:30 inkarah Palam Airport-a Air Force base Technical Area-ah in lo kal a ngai a. Kalna tur engmah kan siam sak dawn lo chu u, mahni-a rawn thlen dan in ngaihtuah a ngai ang,” a han ti chu ka huphurh hle mai. Vawikhat te pawh la kalna ngai loh, venhimna uluk thei ang bera-a an tihna hmun va ar khaw thim dai ngawt mai chu huphurh awm tak a ni. Tichuan Inrinni zing khua alo var chuan ka ken tur tawk ni-a ka ngaih chu kan siam fel a (Philippines-ah hian thlasik a awm ve vak lova, Celsius degree 23 atanga 30 vel a ni deuh reng), Palam Airport Air Force Technical Area pan chuan tourist taxi, a hma-a ka lo biak lawk tawh chuan ka pan ta a. A hmun ka va thlen chuan zing dar 8:20 a ni a, gate chhungah khan ka taxi hman chu luh an phal lova, kei pawh ka pass neih ang ang ka phawrh hnu-ah min luh tir chauh a ni. Tichuan gate chhungah chuan motor dang, thlawhthiehna awmna hmuna min hruai tur alo awm a, chumi chuan security area lehzual chu ka pan ta a ni.

He hmunah hian Palam Airport a kal tura min sawmna, ‘Invitation’ chu min lo dil a, ka entir hma chu security check pawh min tih tir lo. Min sawmna an hmuh hnu chuan venghimtute chuan ka suitcase chu x-ray khawlah min dah luh tir a, kei erawh chu metal detector kaltlang tura min tih angin ka kal ta a. Hetah hian security-a thawk pakhat chuan uluk tak mai in ka taksa a dap a, ka nawalh ken chu min chhuhsak a, min luh tlang tir ta a. Ka kaltlang tawh mai tura ka ngaih laiin ka airbag ken chu check tir alo la ngai leh a. Mahse check ta lem lo chuan a kal tur hming list-ah khan ka hming an zawng a, serial number 75-ah ka lo awm vang a, list-a an chhinchhiah hnu-ah ka kal tlang leh ta a. Mahse hei hi alo la tawk mai lo. Ka suitcase chu hung chhung lamah alo awm tawh a, chu chu lain security sealin ka va tawn tir leh a.

Sir khatah hian dawhkan sei chi hi an lo rem put mai a. He dawhkanah hian Air India a hnathawk, ticket lo tifel tur an awm a. Tin, anni bakah hian immigration lama thawk an awm in India pawisa US dollar-a thleng duh tan bank lam hnathawk an awm bawk a. Ka ticket chu kan tifel hmasa phawt a, AIR India-a thawk nula (?) pakhat chuan list-ah ka hming a han zawng leh a. Kal kan tam em avangin (mi 100 vel kan kal a ni), ka serial number kha ka han hrilh vat a, awlsam tein ka hming chu a hmu a, ka ticket chu min laksak a, a piaha a thianten hnenah boarding ticket la turin min tir a. A piah lamah chuan ka va kal leh a, tah hian boarding ticket (thawlhtheihna chhung luh theihna) chu min lo pe a, kal tak tak tur ka ang ta viau mai. Mahse tihfel loh pakhat ka la nei – immigration clearance. Immigration ho awmna chu ka pan phei leh a, chutah chuan ka passport leh a hma ni-a min pek, zan lama ka lo fill up diam, departure card chu ka pe a. Immigration ho chuan ka passport-ah “India a chhuahsan e” tih stamp chu min lo chhutsak a, waiting area lam chu panin waiting roomah chu ka va lut ve ta a. (A hma niin Delhi-ah pawisa hi ka lo thleng tawh avangin he hmunah hi chuan pawisa hi ka thleng lo.) Thil tih tur alo la awm cheu mai. Dawhkan pakhatah hian badge hi an lo dah dul mai a, mi pahnih hian a hmaa hming list copy kha an lo keng leh ran a. Anni chu kan pan leh a, ka hming pawh sawi buai duh lovin “Serial number 75,” ka va ti a, ka hming zawnah chuan an lo thai leh a, an bula an thiante awm, badge in-charge ho hnenah khan badge number an hrilh a, anni chuan badge pakhat, a awrhna hrui uk hi min lo pe a. Ka han enchian chuan Security Pass, AIG, Special Protection Group (SPG te hi VVIP security enkawltute an ni) in a sign thlap hi alo ni a, ka badge-ah chuan “MEDIA” tih a inziak a, tin, “Valid only for Prime Minister’s visit to Philippines January 13 – 15” tih a awm bawk a, ka thlalak pawh alo chuang va a ni. Tichuan Prime Minister thlawhtheihna chhunga luhna tur atana pawimawh zawng zawng chu chu ka ti zo ta.

AIR INDIA 1 AH KAN CHUANG TA

Prime Minister kha chawhma dar 11-a thlawk chhuak tur a nih avangin keini ho chu dar 10-ah thalwhtheihna chuan lut vek turin min ti a. Waiting room piah lawk a thlawhtheihna lian pui mai lo ding, AIR INDIA tih inziah kuau na, Boeing 747-400 a lut tur chuan thian dang te nen pawn lam chu kan pan ta a. Hetah hian ka security badge lo pawimawh zia ka hre chauh a ni. Pawn kan chhuah dawn chuan kawngkharah hian duty an lo awm a. Ka boarding pass an han enchiang phawt a, chumi hnuah security badge ka awrh vang tawh chu an han check leh a, thil fello a awm loh avangin pawnah chuan min chhuah tir ta a. A piah lawkah chuan metal detector nen a mihring lo check tur an lo awm leh a, chumi te chuan ka taksa vel chu an han check kual a. Silai emaw, hriamhrei hlauhawm emaw ka keng lo tih an chian hnu chuan ka badge awrh chu an han enchiang leh a, chumi hnu chuan thlawhtheihna chhung luh nan a kailawn an lo dah chu ka pan theih ta chauh a ni. Kailawn bula lo duty hnenah chuan ka boarding pass, a hma daih a min pek kha ka han entir a, a ni chuan a pawh bunna turah pawt bungin a bung lian lam chu min pe a. Lawn chhoh mai ka tum lai chuan min rawn ban a, ka security badge kha a check leh a, tichuan ka lawn theih ta chauh a ni. Security badge kha nei lo ila chuan engti kawng mahin PM thawlhtheihna chhungah khan ka lut thei dawn lo alo ni.

Thawlhtheihna chuan luhna kawngka pahnih, a hma lam leh a hnung lamah a nei a. Kan luhna hi a hnung lam zawk kawngka-ah a ni. A chhung ka rah chiah chuan min pahnih, thlawhtheihnaa thawk, hmeichhia leh mipa hian nui sang hian min lo welcome a, kan luhna chu bungrua, thlawhtheihna chunga an sem tur ilo vel an dahkawhmna hmun alo ni a. Ka seat number, 59 A zawng chuan chu bawngraw dahna pindan chu kal pelin thlawhtheihna hmalam chu ka pan phei a. Pindan dang lo awm chu tlar khata mi 10 thut theihna, a kara kalkawng pahnih awm a ni a. He pindana seat inrem dan chu hetiang hi a ni – a vei lamah seat 3, a ding lamah seat 3 bawk a, a lai-ah seat 4. Seat 4 awmna leh 3 ve ve awmna inkar tawn tawnah hian kal tlang na kawng a awm a ni. Hetah hian official ho an lo thu hmur tawh a, kei chu ka seat number zawng chuan hmalam ka pan zel a. “Galley” an tih, Mizo chuan “choka” kan ti mai ang chu, hetiang pahnih ka kal pelh hnu chuan media ho awmna tur pindan chu ka va thleng a. Media awmna tura an ruahman leh thlawhtheihna hmalam zawng chu ‘PRIME MINISTER” tih intarna pindan chuan thlawhtheihna vang zawng zawng zawng luah deuh thaw chuan min dai dan a. Ka seat chu tukverh bul, PM cabin atanga tlar thumna a ni a, hetah hian Kerala chanchinbu SWATI neitu, Vermu Balaram nen kan thu dun ta a ni. Media ho chu min lo duat khawp bik khawp mai tih a lanna chu ka thutna tlat phei kha a thawl bik em em mai a. A hma a ka sawi tak, official ho tlar ang lo takin media ho tlarah chuan seat paruk chauh a awm a, a sir berah pahnih, a lai-ah pahnih, a sir lehlamah pahnih. A tlar lai zawnah chuan keimahni lam hmachhawn hian seat pahnih a inrem a, a hma-ah dawhkan a awm bawk a. Ka han zawh chian chuan helai hi Prime Minister emaw, President-in emaw, press conference thlawhtheihna chhunga an neih huna an thutna thin alo ni.

MEIZIAL A ZUK RUK THEIH

Chanchinbumi tih takah kei anga meizial heh an lo tam ve khawp mai a. Kan thutna hma bangah khan “NO SMOKING ZONE” tih a in tar kuau avangin Prime Minister kan nghah lai chuan air hostess pakhat chu ka kova, zial a zuk theih leh theih loh ka zawt a. A ni chuan, “He flight-ah hian kawng tluanin mei zuk khap a ni a, mahse mei zu duh tan chuan a hnung lamah sawn a zuk ruk theih,” tiin nui sangin min chhang a. “Mahse ka pu, boruaka kan awm hma chuan chu hmunah pawh chuan meizial a zuk theih loh a nia,” tih chu a han belhchhah a. Kan thlawhchhuah hun nghakhlel tak chuan ka thu ta hle hle a ni.

DARKAR 6 LEH A CHANVE KAN THLAWK

Thawlhtheihna chhunga awm kan nih avangin leh thlawhtheihna a len tham em avangin a hmalama kawngka kan hmu phak lova. Prime Minister lo thlen leh thlen loh pawh kan hriat theih loh avangin kan nghak ta ngawt ngawt mai a. Dar 11 a rik pawh a kan la thlawh chhuah loh avangin PM chu lo la thleng lo turah ka dah ngawt a. Tichuan dar 11:15 vel ni tain ka hria, thawlhtheihna chu a che ta hrut hrut a, “E, PM alo thleng tawh a nih ngei dawn hi” ka ti rilru a, chumi tih lohah chu PM a chuan ve leh chuan ve loh pawh kan hre thei lo a ni. Thui fe mai lei a kan tawlh kual hnu chuan thlawhtheihna chuan speed ala ta a, reilote-ah kan kang ta vuah vuah mai a. Kan hma, a tlar lai zawnah hian screen, feet li bial awm vela lian hi a awm a. Chutah chuan kan thlawh dan chanchin, a ziak a ziak leh map te in an rawn tilang vek a. Kan thlawh chhuah atangin feet engzat a sangah nge kan thlawh a, engtianga chakin kan thlawh tih chu a rawn rawn reng a. Hemi bakah hian dar (time), local leh kan thelnna hmun tur (destination) a dar zat an rawn tihlan tel bakah dar engzatah nge kan thlen theih dawn tih te an tilang thin bawk a, a bengvar thlak duh hle. Map anga an rawn tihlan chang chuan political boundaries awm lovin physical map ang chauh an rawn tilang, ram hming pawh awm loving khaw hming chauh an rawn tilang a. Tin, thlawhtheihna lem a awm in kan kan dan tur kha a inrin ruah a, chutah chuan kan thlen chin chinah thlawhtheihna lem chu a awm mai a ni.

Darkar ruk leh a chanve boruak sanga awm tur kan nih avangin tu pawh kha kan relax em em mai a. Kilometre thum leh a chanve a sang kan thlen chuan seat belt sign kha an timit a, chu veleh chuan kan tho sung sung mai a. Midang thawh chhan kha kei chuan ka hriatpui lem lova, ka thawh chhan chu meizial zu turin a ni. A hnunglam ka pan phei vang vang a, toilet bulah hian mi pakhat meizial lo zu pat pat hi ka va hmu a, chu velah chuan ngam pa takin ka cigarette ka phawrh a, chupa chu lighter ka va dil nghal a. He pa hi pa fel tak mai, thlawhna chhunga hnathawk alo ni a, welcome takin lighter chu min pe a, darkar hnih dawn meizial nghei tawh ka nih avangin tui ti takin ka zial chu ka zu ta a. Hetia ka awm laia ka thil hmuh chhuah pakhat chu hei hi a ni: a hma a ka sawi tak, security badge kha a awrhna kha colour code nei vek alo a ni a. Keini media ho security badge awrhna kha a rawng uk a nih laiin thlawhtheihnaa hna thawk ho awrhna chu a eng a ni a, tin, official ho awrhna chu a pawl a ni. Kan badge a thil inziak pawh en ngai lvoin badge awrhna rawng atang khan eng mi nge kan nih tih kha awlsam takin a lo hriat theih zung zung a ni tih kan hriat chhuah chuan, “Hnampui zawk nge nge, thil an lo ngaihtuah kim mang e,” tiin ka rilru chuan ka fak hle.

Ei leh in kha englai pawh tih theih tur hian thlawhna hnathawk ho khan min rawn pe reng mai a. Min pek loh karah khan kan duh a nih chuan kan lam thei reng bawk a. Chawhnu dar khat vel chuan trolley hi an rawn nawr phei bauh bauh a, chu trolley kan en chuan in tur chi hrang hrang hi alo awm a. Zu duh tan scotch whiskey tha ber ber chi, beer te, champagne te a awm a. Zu in lo mi tan juice chi hrang hrang, coca cola tih leh soft drinks dang a tlar tuar bawk a. Scotch whiskey kan in khat bawk a, prohibition a awm lo bawk nen, kei chuan scotch whiskey kan lam a. “Ka pu, eng scotch nge I duh? Soda pawlh i duh nge a hlangin i in dawn,” tiin a semtu chuan min zawt a. Kan en vang vang a, Scotland-ah pawh scotch whiskey tha ber pawla an sawi, Glenfiddich chu thlan pahin, “Tui min pawlh sak rawh,” ka ti a. Aperitif an tih, zu nena hmeh tur kha min pek tel pahin, “Ka pu, caviar i duh tel em?” min ti a. Caviar hi enge a nih chu ka hria, a to em em a, sap hovin an ngaisang a, mahse vawite khat mah ka la ei ngai lo. Chumi avang chuan rang tak hian “Duh tel e,” ka ti a, sangha tui chu fiante khat ka plate-ah chuan an rawn dah tel a. Ka rin ang hehu a lo ni vak lo, a to ang hu leh mi’n an ngaihsan ang hu in a tui ka ti lem lo. A thang ngher a, tlemin a al a, chu zawng chu ni ta maiin ka hria. Darkar chanve hnu velah chuan lunch (chawchhun) an rawn sem leh ta a. Zu emaw, thildang emaw la in zo lo tan kha chuan a hnu-ah pawh a lam leh theih tho a, mahse kei chuan ka duh tawk ka ngah tawh avangin lunch chu lawm takin ka lo la a, Five Star hotel vela an sem thin niawm tak hi a ni kan lunch dawn chu. A chi hrang a tam lutuk a, ka sawi seng lo a ni ber e. Lunch ei zawhah chuan thingpui duh tan thingpui, coffee duh tan coffee a awm leh a, chumi te pahnih chuan thlawhtheihna a hnathawk te chuan min rawn vil leh ta ran mai a. Kei erawh chuan meizial han zuk vang vang ka chak zawk avangin a hnunglam ka pan leh a, meizial chu ka va zu ta a.

Hetia meizial ka zuk lai hian tukverhah chuan ka dak chhuak a, kan hnuailam chu tlangram hlir mai alo ni a, Burma a nih dawn hi, ka ti rilru a, kan lo thlawk hniam viau a ni. Reilo te hnuah chuah khaw pakhat hi ka hmu ta a, a khaw bulah dil lian zet zet pahnih a awm bawk. Kawng te chu a dum zur e tilo chuan motor tlan hmuh tur reng reng hi a awm lova. Inti hria fahran hian ka bula media mi meizu ve mek hnenah chuan, “Khu khu Burma ram chhung a an khaw engemaw ber a ni ang. An khawsak a harsat zia a hriat theihna chu khu motor kawngah te khuan motor tlan a awm miah loh khu,” ka’n ti pek a. Ka lo hre sual nasa mai. Thawlhtheihna a thawk pakhat lo kal chuan, “Tunah hian China chunga kan thlawk mek a, a hnuai mi khu an khaw pakhat a nih khu,” a rawn ti mai chu hnar a lian lek lek a ni. China ram chhim hmawr kan han thlawk lut zawk alo ni a, ngil takin Philippines chu kan lo pan ding hauh lo alo ni.

Philippines kan thlen hma hian thlawhtheihna chhungah dinner kan ei leh a, ei hma in chaw ei huaina kha a ngai te in an rawn sem leh a, zu in thiam lo tan chuan chah thlak mai a awl duh viau dawnin ka hria, inthlahrunna tur engmah a awm si lova. Diner kan ei hma hian thil thlawn pek an rawn sem a. Chung chu Toilet bag leh a kit, Swiss siam chocolate bur lian deuh pakhat leh Italian siam perfume 40 ml bur khat a ni. Thawlhtheihna atanga kan chhuak chu mahni hand baggage bakah kan thil dawn te avangin kan bawr chhuak hlawm khawp mai.

PHILIPPINES KAN THLENG TA

Philippines hi kan ram India aia a awmna a khawchhak zawk avangin an hun hi keini hun aiin darkar hnih leh a chanve in a hma a. Philippines kan thlen hian India hunah chuan tlai dar 6 a nih laiin Philippines-ah chuan zan dar 8:30 alo ni der tawh a, khua pawh a thim hle tawh a ni. Thlawhna kha Lapu-lapu International Airport si chiah a awm, Philippines Air Force base ah a tum a, thlawhna atanga kan han chhuah fel meuh chuan dar 9 alo ri reng tawh a. Kawngkhar hmalam ka va thlir phei chuan red carpet hi an lo phah zui mai a, kan Prime Minister lo hmuak tur Indian leh Pilipino official te chu an lo intlar nghuk mai a. Ka va pan hnai dawn a, sipai duty te chuan min lo hnawt kiang a. Official-a zin mah ni ila, PM thlawhna chhungah chuan VIP ve teh mah ila, PM hmuahnaah chuan kan VIP pha ve ta hauh lo mai. Motor engemaw zat, media leh official kan thlenna hotel a min hruai tur kah an lo ding khup mai a, “MEDIA” tih intarna motor pakhat chuan kan lut a, driver chauh hi alo awm a. Saptawngin driver hnenah chuan, “Tunlai khua enge a an?” tiin kan zawt a. Saptawng nalh tak mai hian driver chuan, “Its very pleasant. Now that you have arrived, the rains that we have been experiencing has stopped,” (A nuam khawp mai. Ruah alo sur thin a, mahse hei in lo thleng ta bawk a, ruah pawh a sur ta love) a ti a. Driver mai mai pawhin saptawng chuti taka an thiam chuan saptawng an uar viau a nih dawn hi, ka ti rilru a. Reilo hnuah chuan ka thiante pawh an rawn thleng a, kan thlenna tur hotel lam pan chuan kan Air Froce base chu kan chhuahsan ta a. Hotel kan pan chhung hi minute sawmhnih vel a ni a, mahse ka ip tluan chhuak deuh thak. A chhan chu Philippines-a an motor tlanna lam hi India nen alo letling hlauh mai a, hemi avang hian an motor te pawh left hand drive vek a ni a. Kalkawnga motor kan tawh hian kan awmna lam kha dik lovin ka hre tlat a, kan insu dawn emaw ka thin a, ka lo ip leh zawr zawr thin.

HOTEL CHANGKANGAH

12th ASEAN Summit a awm avang hian Philippines-a hel ho chuan buaina an lo siam thin a, inthahna te pawh alo awm zeuh zeuh a. Hemi avang hian security pawh an lo uluk hle mai a. Kan hotel thlenna tura min lo ruahman sak chu Costabella Beach Resort tih a ni a, Mactan Island, Cebu thliarkar nena inhlat lo te-a awmah a ni a. Security an uluk em avangin kan hotel thlena luh hma hian security gate pahnih kaltlang a ngai a, luh pawh a buaithlak duh khawp mai. Mahse kan thlen zan hi chuan an lo inhrilh lawk a ni chek ang, kan lut tluang hle a, bus atanga kan chhuk chu hotel a thawk, nula nalh tak takin min lo welcome pahin tuikep atang siam thi mawi tak mai min lo awrh tir theuh a, kan VIP leh ta! Gate bul mai-ah chuan building pakhat lian vak lo, chhawng pawh neilo hi a awm a, chu chu India media ho hman atan Media Centre-ah an lo buatsaih a. Hotel tak tak kan thlen hma chuan Media Centre-ah chuan min hruaitute chuan min luh pui phawt a, hetah hian Philippines-a kan cham chhunga kan hriattur pawimawh leh kan registration card te awmna, bag an lo dah dul mai a. Mahni hming awmna bag kan lak sap sap hnu-ah kan thlenna tur room lamah hotel hnathawkte chuan min hruai ta thliah thliah a.

Costabella hian thlenin chihnih a nei a. Media Centre bul lawkah thlenin pakhat a awm a, chu chu tlema man tlawm chi a ni a. A piah deuh hlek, pen 100 vela hla-ah building chhawng ruka sang a awm a, hei hi a to zawk a, hetah hian kan room tur chu min lo book sak a. Kei chu ka roommate, Kerala mi, Balaram nen khan Room No. 493 min dah a. Kan room kan han lut chu air condition an lo tih nun avangin a dai huai huai mai a. Double bed kan tih ang chi pahnih, inhnaih lutuk lo hian a awm a, fridge te chi pakhat a awm a, TV a awm bawk a. Varenda lian vak lo a awm a, chutang chuan tuipui a hmuh theih mai bawk a. Tuipui kama awm a ni bawk a, tuipui chu kan hotel atang chuan pen 20 vel leka hla a ni. Kan han inbual fai a, kan building kawtah khan diner ei tur a ni tih min hrilh lawk avangin zan dar 10:30 velah chuan ka roommate nen chuan kan chhuk a. Hotel kawt ah chuan ei tur dah lumna, chawhmeh chi hrang hrang awmna alo inhung dul mai a, tin, a bul dawhkana chuan sap zu tha mi chi hrang hrang leh beer a inhung tlar thut mai bawk a. Ka thianpa leh kei chu a thleng thla hmasa pawl kan nih avangin rei vak lo chu kan thiante dang kan lo nghak a. Kan thiante an lo thlenkim hnu chuan zaimi (band) Spanish guitar pahnih leh double bass hmang mi panga chuan zaiin min rawn awi a. Kei lah pek chu no hnih khat ka lo in tawh avangin ka phur ta thut a, “Hla ka thlang dawn,” ka ti a. Anni lah chuan min lo lawm phian a, hmanlai sap hla, country song eng engemaw ka thlang a, an lo thiam ve zel bawk a. An zai tunu ber nula bulah chuan va ding ve in hla te chu ka va sak pui a, ka thiante chuan min lawm hle a, “Our musician” min tih phah nghe nghe.

Dinner kan eizo, room kan han thleng leh chu zing dar 2 alo ri reng tawh mai a. Mut zai kan han rel dawn a, ka muhil thei ta hauh lo mai a. Varenda atang chuan hotel kawta restaurant ang reng an siam te chu ka zu thlir a, mi lah an lo la awm nuai nuai a, ka zu chhuk leh a, hotel hnathawkte kan kawm kual hnuah mu tur chuan ka kal leh ta a, engtin tin emaw chuan ka muhil thei ta a ni.

SIGHTSEEING KA MISS

A hma khan min hruaitu External Affairs official te chuan Sunday January ni 14 chu print media in tih tur engmah in nei lo, sight seeing a kal in duh leh in kal dawn nia tiin min lo hrilh lawk tawh a. Zing dar 10 a chhuah tur a ni. Ka mut har luat avangin a huhova sightseeing hi ka tel hman ta lova, ka harh chuan dar 11 hi alo ni der tawh a. Ka’n inbual faia, khawpui-a chhuah miah loh chu tiin hotel hnathawktute chu taxi ka koh tir a, ka chhuak ve ta rawih mai a. Mactan Island-a hmunpui berah min hruai rawh tiin driver chu ka hrilh tawp a, a kutah ka innghat ta a. Kan kalna hmun hming kha ka chhinchhiah emaw ka ti a, mahse ka lo chhihchhiah lo nge, ka chhinchhiahna ka tibo nge, ka hre ta lo. Mahse shopping mall (kan Millinnium Centre ang deuh) building lianpui mai hi a ni a. Taxi chu ka innghah tir a, ka va lut ve ta a. Mall mah nise security alo khauh khawp mai a, kawngkharah chuan guard hi an duty fur mai a. Mahse 12th ASEAN Summit ID card kha kan hmuh a, chu chuan awlsam tein min luh tir thei ta a ni. Sum inren a na bawk a, T Shirt pakhat, Peso 185 man ka lei a, ka duh tawk der mai.

PILIPPINO HO MIZIA

Philippines ram mipui chu Mizo nen hian kan inang khawp mai. An ngo bik lova, kan hmaitlang awmdan pawh a inang hle. Taxi-a tlan pah chuan chik takin an nunphung niawm chu ka zir a, ka hmuh dan chuan an nula tlangvalte pawh Mizo nula leh tlangval te ang thovin an innel a, Indian society nen chuan a inang bik lo hle. Khua a lum em avangin tam tak chuan kekawr bul ang deuh, lian hnek hnuk hi an ha a, T Shirt an uar hle bawk. Nula tam tak chuan kekawr tlawn an ha ve tho. An kawngte pawh highway tih loh, khawchhung kawng chu a te in a chhe ve hle a, dawrte neuh neuh a tam ve hle. Mi hausa leh mi rethei kar a hla hle bawkin ka hmu. Hotel leh shopping mall te tih lohah chuan inchhawng sang a awm mang lova, khawr chawp ni awm tak hi a tam ve hle bawk.

Taxi chu Toyota company siam deuh vek niin ka hria a, Mizoram ang deuhin a rawng a var vek a, a chungah “TAXI” tih a intar a, chumi veilam leh dinglamah chuan “VACANT” tih leh “OCCUPIED” tih hi a inziak bawk a. Passenger an neih chuan “OCCUPIED” tih chu an ti eng a, an neih loh chuan “VACANT” tih kha an ti eng a, phar sual a har khawp mai. Town bus hi ka hmu miah lova, mi naranin an hman ber ni a lang chu auto rickshaw ang deuh hi a ni. Motor-cycle ani ber a, a sirah hian in (passenger phurhna tur) an siam a, chutah chu hmalam hawiin mi 2, hnunglam hawiin mi 2 an chuang thei a. Hemi bakah hian driver hnungah passenger pakhat an chuang thei bawk a ni.

BEACH PARTY-AH KAN KAL

Hemi zan (Sunday January 14) hian media zawng zawng, foreign leh local, chu Summit organising committee chuan Maribago Blue Water Resort-ah Beach (Tuipui kam) Party ah min sawm a, hei hi “Media Night” an ti a. He resort awmna hi kan thlenna atanga hnai te, motor-a minute 10 emaw vel chauh kal a ni a. Indian media delegation chu kan kal kim hle a, ama’rawh chu kan kal hun a inang vek lem lo a ni. Hei hi a chhan chu thenkhat kan awl em em laiin thenkhat chuan news an thawn a. News thawn tur a awmna chhan pawh tlai dar 5:30 khan India Trade & Commerce minister Kamal Nath leh National Security Advisor M. Narayanan te’n kan hotel-a press conference an koh vang a ni.

He press conference ah hian kan kal tha hle a, India media mai nilovin ramdang atang journalist lo kal engemaw zat an tel bawk a ni. Trade lam thil vek a nih avangin kei chuan zawh tur ka van hle a, mahse uluk takin ka ngaithla tho a, a pawimawh nia ka hriat chu ka chhinchhiah ve zel a, mahse news chu ka rawn thawn ta lem lo a ni. Mizoram concern a awm loh em vang a ni.

Tichuan mi 10 vel chu a thleng hmasa-ah kan tang a, kan party neihna tur resort chu kan thlenna aiin alo changkang zawk lehnghal a. Kan party neihna tur chu thliarkar te reuh te, resort atang lawnga inthiar kai ngai a ni a. Lawng leng engine nei hian min dah a, mahse vaukam lehlam lehlam chu in auh phak lek a ni tho. Indian media ho chu kan tlangnel deuh nge, kan zak theilo deuh, live band in music-a min awihna tur zawn taka dawhkan sei tak an lo dah chuan kan inrem a. He party hi khawvela beer siam lama hmingthang, San Migual Corporation an tih sponsor alo ni a, hemi avang hian beer chu duh tawk in tur a awm a ni. He kan party-na hmun tur kan va thleng chu nula tunlai tak tak hian min lo welcome a, ka’n zawh chian chuan “student volunteer kan ni” an ti a, hemi zan bik atana organising committee te’n an sawm an lo ni.

Live band-in min awih hma hian cultural programme min entir a. Hetah troupe pakhat, Hyas Ng Bituin an tih te chuan Philippines lam chi 13 min entir a, mit a tlai hle mai. An lam tam zawk erawh chu Spanish lam rawngkai a ni a, an inchei dan pawh Spanish inchei dan nen a inang khawp mai. An lam min entir hnuhnung ber chu cheraw a ni ve tlat mai! Mahse Mizo in mau a inkawkalh a cheraw kan kan ang hian an kan ve lova, mau pahnih chauh an hmang a, tin a kan tute pawh hmeichhia leh mipa an inpawlh a ni. Step hran an nei lem lova, an neih ber chu a kawkalhtu a awm ve loh avangin mau chu an kal kual pui thei a, tin, a tawpah rang mangkhengin an kan a ni. Cultural troupe member te chuan entute chu min rawn pawt chhuak a, kan turin min ti a, zei nghal mai an awm laiin zei lo fe fe pawh an tam mai. Ka thiante zinga dul kiar fe fe in zei lo zet mai a an han kan phei chu a nuihzatthlak hle a ni. Kei erawh chu ka intizei deuh bawk a, kan thiam min ti deuh a ni ang, ka’n kan ve chu an ti rang tawlh tawlh a, a tawpah phei chuan ka tlanchhe ta ringawt a ni.

Live band-in min han awi chu ka thiante chuan lam turin min tur min tur ta mai a. A hma zana music ka ngaina tih an han vang kha ni ngei tur a ni, “David, go and dance” (David, va lam rawh”) min ti chhen mai a. Chuti na na na chu ka ti a, an student volunteer zinga pakhat chu ka kai lawk a, lamtual angreng deuh an siamah chuan ka va suk pui ta nghawng nghawng mai a. Chutia kan han lam takah chuan midang pawh an lo chhuak tuk tuk a, lam tual chu reilo te-ah kan khat ta hmur mai a, kan phe suau suau hi a ni ber mai. Music kha chhum lo chat lova an tum reng avangin lam pawh a tawp thei lova, mahse hah hun hunah khan kan thutna lam kan pan mai a, beer kan va in a, kan hahdam deuh hnu-ah a peih chu an va lam leh mai thin a, a nuam hle mai. Ka vai thiante thalai tawh lo tak tak pawh an phur hle a ni ang, ka rinaiin an lam peih daih.

INDIA PAN A HUN TA

Sunday zan hian kan rei ang reng phian mai. Hotela kan let leh chuan zan dar 12 alo ri reng tawh mai a. A tuk programme en tur chuan Media Centre-ah chuan kan lut leh tham tham a, white board-ah chuan “Everyone should pack their baggage and place it outside their room by 8:30 am in an unlock condition. Breakfast – 9 a.m. Everyone should complete check out formalities by 12 noon. Lunch will follow. Departure for airport – 1:30 p.m.” tih hi alo inziak a. (Tu pawhin an bungrua zing dar 8:30-a room pawna inkalh lova dah hman turin an inseam fel tur a ni. Tukthuan zing dar 9. Hotel bill vel zawng zawngh dar chhun 12-a tihfel vek tur. Chawchhun in hei hi a zui ang. Airport pan hun – chawhnu dar 1:30)

Zing dar 8:30-a room pawna dah tur tih chu ka roommate nen chuan kan bawhchhe lova. Mahse tuanfum tak tak an awm avangin dar 9:30-ah pawh hotel hnathawk bungrua la thiar ka hmu cheu. Engmah tih hman a awm tawh lova, airport kal hma a breakfast ei a, hotel bill tihfela, chawchhun fak a, haw a ni tawh mai a. Hotel bill ka’n pe chu ka rinaiin alo tlem a, US dollar 385 (hei hi India pawisa chuan Rs 17,325 vel a ni) a ni.

Airport a min thlah tur kan bus kha rin ang lo takin a rawn thleng tlai a, chawhnu dar 1:30 pawh chuan alo la thleng ta lova. Kei lah pek chuan ka thiante hnenah chuan, “It appears as if even in the Philippines, we are still using Indian Stretchable Time,” (Philippines-ah pawh India hun pawh sei theih kan la hmang cheu a nih dawn hi) ka’n ti zauh a, an nuih a za hle. Dar 2-ah bus chu a rawn thleng a, ‘Luxury Coach” an tih ang tak tak hi a ni a. A chhung chu air condition a nih mai bakah TV pahnih a awm a, a bus chanve atang a hnung lam zawng chu sitting room pangngai ang mai thuthleng leh dawhkan te rem a ni a, bar a awm bawk. Ka enchiang ta lo na a, telephone niawm tak pawh hmuin ka inhria.

Kan haw lama airport kan pan chu kal lam aiin kan thang rei daih mai a. Hei hi a chhan chu January 15 (Thawhtanni) hi Summit tawp ni a nih avangin ram hruaitu hrang hrang khan airport an pan ve sup sup hlawm a, traffic jam-ah kan tang rei deuh a ni. Airport kan va thlen chuan security kha an lo uluk hle mai a. Ka suitcase-a a len loh avangin ka hand baggage-ah chuan San Migual Corporation siam, a hma zana party-naa min pek Brandy um khat hi ka dah tat a. Hand baggage reng rengah tui lam chi keng phal loh khawvel pumah dan nikum kum tawp lam mai khan siam alo nih tawh avangin x-ray machine an kal tlang chu Brandy um kha airport security te chuan an lo hmu ran mai a. Ka taksa min check zo, ka airbag la tura ka va kal chu security guard pakhat hian, “Sir, can you please open your bag?” (Ka pu, khawngaih takin I bag hi I hawng thei an gem?” tiin polite tak hian min lo zawt a. Hawn mai ka tum lai chuan security guard tho, hmeichhia pakhat chuan, “Its all right. Its liquor and his traveling on his PM’s plane,” (A pawi lo, zu a nih kha. An Prime Minister thlawhtheihnaa chuang tur a nih kha) alo ti a. Bag chu hawn tir lo chuan min lak tir a. Ministry of External Affairs a thawk ho chuan min lo vil nghal vat a, ticket lakna tur te, boarding pass lakna tur te chu min lo kawhhmuh vat vat a, kal lam ai kha chuan thil kan ti fel hma zawk hle. Rei pawh kan nghah hma chuan thlawhtheihna lam pan tur, an rawn ti a, mini-bus ang vel a lianah hian a leng tawk kan inhnawh a, kan zinga pakhat chuan boarding pass lak nachang alo hre lo, kan kal tep tih chuan an chhuk tir leh a, keini chu kan kal ta thova. A hnunga bus dangah a rawn pakai leh ta niin ka hria. Thlawhtheihnaa luh pawh an strict tawh lo. Kan boarding pass an en a, an pawtthlera an duh tawk der mai.

Kan haw lam hi chu thlawhtheihnaa hnathawkte nen pawh kan lo inhmelhriat tawh vangin kan innel tlang tawh hle a. Mahse anni chuan VIP treatment min la pe thova, a nuam em em tho. Kan rawn haw lam hian Prime Minister chu a tuka Assam tlawh tur a nih avangin Kolkata lamah thlawhtheihna chu kualin heath hian a chhuk a, hemi vang hian darker khat dawnin kal lam aiin kan thlawk rei zawk a. Kolkata-ah haw lamah kan chawl zawk dawn tih chu hria ila chuan Delhi-ah khan thawmhnaw ka dah then lo tur, tul lo deuhin Delhi ka pan leh dawn nih hi, ka ti rauh rauh a, security an uluk lutuk avanga advance-a engmah min hrilh lo chu pawi ka ti hle a ni. Hawlamah hian Air India chuan gift (thilpek) min pe leh a. Air India airbag rit nalh mai hi media ho chu min rawn pe vek a. Eng tak ni maw tia ka’n hawn chuan Johnnie Walker Black Label whiskey um khat, Benson & Hedges cigarette carton khat, toilet kit leh a bag pakhat hi alo awm a, a lawmawm duh khawp mai. Duty Free an tih mai, excise emaw, customs emaw tax chawi lohna dawrte hi haw lam chuan thlawhtheihna chhungah chuan an rawn nawr a. Hetah hian lei tur chi hrang hrang zu atanga perfume, cigarette atang tlereuh te a awm a. Nupui fanau te hawn tur tiin tlereuh dollar 70 chuang man chu ka’n lei ve hram a, ka lei loving tih hlau hle mai, Delhi-ah thil leina hun ka nei ta si lova.

Delhi chu zan dar 10 velah kan thleng a, immigration te kan han tih fela kan bungrua te kan han lak meuh chuan 1 alo hnai thuak tawh a. Motor min lo hmuak tura ka chah kha gate chhunga luh an phal loh avangin gate thleng chu thiante motorah ka bet a, gate-ah chhukin ka motor chah chu a driver cell phone in ka bia a, a ni gate hnaih lutuk lova lo awm chu lo kalin Mizoram House kan pan ta nal nal a. Mizoram House-ah hian ticket min lo laksak chu ka han en a, Kolkata flight kha a tuk zing dar 7 niin Kolkata atang Aizawl chu chawhma, hemi ni tho, dar 11 alo ani a. Driver hnenah zing dar 5-a min rawn lam turin ka chah ka, tichuan dar January ni 16 zing 7 flight-ah Kolkata chu kalin chawhma dar 11 flight-ah Kolkata atang hian Aizawl ka rawn pan leh a ni.

HRIAT VE ATAN MAI MAI

Philippines khu thliarkar 7,107 a ni a, khawmual pui kan tih hi an nei ve lova. Kan zu kalna Cebu thliarkar kha Spanish rama cheng, Portuguese mi Ferdinand Magellan’an kum 1521-a a hmuh chhuah a, ani hi Philippines hmu chhuak tu a ni. Cebu City chu rei tak Philippines khawpui ber (capital) ani thin a, engtik lai atang khan emaw ni, Manila-ah khawpui hi an sawn a, mahse Cebu chu khawpui ber pahnihna ala ni reng tho a ni. Thlasik hi an nei lem lova, nipui-ah pawh khua a lum lutuk lem lo. Nipui leh fur hi an sik leh sa neih chu a ni deuh mai. Thlipui (typhoon) erawh chu an tuar ngun hle. Buhfai hi chaw a an rin ber a ni a, tukthuan hi a tlangpuiin Cebu-ah chuan a mi chengte’n zing dar 6, dar 7 velah eiin chhunah chawchhun an fak a, tlai lamah thingpui leh a hmeh an in leh a, zan dar 8, dar 9 velah tlai chaw an ei leh a ni. Tuipui kama hnaih a awm an ni bawk a, tuipui lam sa an uar a, sangha rep (ni-a rep ro) hi an duh hle bawk.

Similar Posts:

• Security Master Code for Nokia
• Singapore hna
• Ritz Hotel ah ka thleng ve a
• [URGENT] Lalhmachhuana awmna chin hriat a la nilo
• Hotel Management Chungchang – 2

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, March 2nd, 2007 at 5:09 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.