mi(sual).com

(Kha le a vaiin….hnawk mai a….)

Khawngaih takin….chim suh se!

Thian inleng neih te kha kan han chak ve viau thin a, kan han neih tak tak erawh kha chuan kan ip tluan chhuak hi a ni thawthang thin. Thutthleng te nei ve tawh hek lovi, dawhkan leh khum te kha kan thutna neih that vete an ni mai a. Sitting-room ni bawk, choka ni bawk, bed-room ni nghal bawkah khan inleng kan lo chiau-au ve thin kha a nia, lei laih nen a hahthlak lam a inang reng. Kan chaw ei dawhkanah khan pahnih chu a thut ve theih a, pahnih aia tam thut chu thil thiang a ni lo. A len thu-ah chuan panga pawh an leng ta ve ang, mahse, pahnih aia tam thut chu a neitute’n kan phal lo va, sawi ve thei sela chuan a dawhkana pawh khan rem a ti bik lo vang, rit han la vak chi kha a ni bik tlat lo.

    Thian ngamtlak tak takte an lo len kha chuan tihdan a awm mai thin a, thian thate’n kan hmelhriat ve loh khawi lam mi hausa fate emaw an rawn lenpui thut chang kha a lo awm lo thei lo va, kan buai a zual thin. Thutna tur awm chhun a nih miau avangin khumah khan an han thu tlar tham mai a, a ri tuarh anga chhuatah an insawn thla dial mai ang tih hlau reng rengin kan lo ip chawih chawih a, tho then tura han tih ngawt thu lah awm si lo. An thut chim ang tih hlau rilru siin rilru tawngtaina nen kan han zi kual vel a, mit sirin khum ke chu kan han melh ru ran ran a, a hma ai khan lo te thar ta riau ten kan han hre leh ta nghal a! Ka siam zawh hlima ka nuihzat rilruk em em- a ke pangana pawh chuan nuih a tiza tawh lo. A hlu em em ringawt mai a ni. Ani chu awm lo sela chuan zah lutukna lamah a pu hi ka lu a bung thei hial tawh ang.

    Ka khum chang kha a ni lo, kan bungruaah khan hlu lo tak tak chu a awm hauh lo mai. Kan dawhkan ding nghet duh miah lo te, kan chhuar din fuh dan te nei leh, kan bungbel un dan inang lo thiau, mahni tawka ung ve tawk tak vek mai te kha milian In chhunga bungbelte anga awm mai mai an awm ve lo va, tangkai lo an awm hek lo. Kan bel thenkhatte kha chu an indaih lo em em zawk a, thingpui lum bel nih leh behlawi rep bai bel nih te an kawp a ngai a, thenkhat chuan dailuah chhum bel nih leh chaw bel nih te an kawp bawk a, a neitute aiin an buai lo bik chuang lo.

Sapthei hnah soup

Ei leh in chungchangah pawh khan kan ropui lutuk lo. Dal chhum leh a kan kan hmeh tih hriaa min nuihzat em emtute khan kan chaw ei lai chu min hmu se min nuihzat lovin min awt zawk ta ve ang. Kan chaw ei a tui lutuk tlat. Bekang ro leh behlawi rep bai dum nguk mai nen chauh te khan puar el euhin kan ei thei a, kuain a ngeih leh ngeih loh lam ngaihtuah hman kan ni lo. Kawmthlanga zawngtah lah chu ei chakin kan thlir bang thei lo va, ruk ruk duhna rilru sual hial min puttir thut thut thin. Tu emaw zawk zawkin kan phur deuh tuma chawhmeh chi hnih aia tam kan lo siam vaih chuan tawngkam thain a inbiak hleih theih tawh thin lo va, inhau ngam chiah si lovin thleng kan seng tau nghawng nghawng tawh mai thin. Economic policy kha apply fuh a ngai lutuk a, inhmuh thiam lohna a chhuah phah fo lo thei lo.

    A zawna ni thum vel inhlawhna han hmuh loh hi chuan tu fiamthu thawh mah hian nuih a tiza thei tawh tak tak lo va, chhungte chawhmeh rawn thawn loh tum nen a innan fuh hlauh phei chuan hahthlak tak a ni, ek rawng lah a mawi thei tawh hek lo va, pum lama sound a titam duh leh zel hian a tibuaithlak zual thin. Tukverha dak chungin thenawmte sapthei hnah chu chilthli tla duahin kan thlir a, “Zu lo rawh u,” an lo tih mial beiseiin kan han leng lut a, anni lah chuan ei mi a nih pawh an lo hre mang lo lehnghal a. Zah theih loh tawp chhuahin a tuizia kan han kamkeu dek dek a, ei an phal ta maw tihah kan ei hlumsak tep a, a ni em em love tih hnuah min han khap leh a, kan han kut chi lo hawi leh ang he haw a, a thinrim zawk zawkah te kan la tang zui leh ta nghal a, a ropui loh theih thin khawp mai.

Sa Suangtuah

Chawlhni tuk te mawlh mai kha ka duh ai hian a lo thleng zing thin a, kan thu lah chu a ni mang bawk si lo. A zawna ni nga chhung vel dailuah chhumkawi kan hmeh hnuah vawksa thlak pawlh atana zikhlum leh antam chung changa Inchungte inhnial thawm kan ngaithla a, mu meng kur chungin ‘zikhlum ai chuan antam nen a inhmeh zawk’ te kan lo ti rilru ve zut zut a. Inleh thawk pahin thenawmte ar talh thawm kan ngaithla leh a, dawl rep bai chhuan laia a hmul thliin a rawn chhem luh palh hlauh phei chuan awmze nei lo hian kan lo inhrosa ve kuk kuk a. Sapthei hnah min lawhtir te kha chu kan hre chhuak duh tawh lo va, awmhmunah tan khawhin an nau tahbelhzia te chham tel nual chungin kan lo phun lungawi ve mai mai thin.

    Zing lama kan rel phar hrep hnute khan eng mah hre lovin tlai lamah sa thing min han suah leh hlauh mai a, mahni inthiam lo ru veng veng chungin anni chu vanram kai tur chiang saah kan han dah leh a. An naute, ni danga kan chhawnchhaih peih mang hleih lohte kha ngaina thar leh ta thut ni awm takin kan han pawm kual vel a. That leh that kan inlawm a kan hlim ve leh viau thin.

Nula mawlh mai hi…

 Tlangvala pumpa chuan nula te kan lo ngaihtuah ve lo thei lo va.  A hmai fai leh a kethiah nalh te lah chu a hre thei hlei hlei kan la ni leh ta nghal a. Inhlawhnate fanu, kesir no deuh tena thingpui pek paha min han biak lumlam deuh hlek chuan kan lo meng tang nghal hru a. Suangtuahna nena chawh pawlh kual velin min melh no riau ten kan han hre ve deuh reuh a, duhthusam ropui tak tak sam chhuah pahin min ngaizawng ve tak tak ni te hian kan han hre hman deuh rum rum a. Chutah, a tlawh vu thei chin an lo lang a, sam leng vawk vawkin an han inphur chhuak a, tawngkam thaa mi biak chu sawi loh, mi hmelhriat awm pawhin an lang leh tawh thin lo va, phung mual liam tur hmu ni awm takin kan thlir zui vung vung a, an liam felah ngai kan awh leh hram thin. 

    Tlai thim dawnah In kan han thleng a. Thlasik lai a ni emaw, nipui lai a ni emaw, tui luma inbual chu thil thiang a ni der si lo; budget a buai vek a ni mai. Tui lum nana hawnvartui ngai zat leh khawnvartui mana pawisa ngai zat te chu entawn lo paw’n kan sawi thei vek a, sahbawn lo ei hek thintu sazu pawh zankhuaa sairawkherh nena chang peih khawpa economic lama kan tlak chhiat tawh laia tui luma lo inbual chu thil tih chi a ni lo, a nghawng a na lutuk….

    Thawmhnaw bal banga inkhai dir derte han hmuh chuan engtik lai maha kan thlakhlelha kan ngaih em em ngai hleih loh kan farnute kha kan han ngai thar leh a. Hun kal tawha min hauh hmuar hmuar leh min an khum dur dur te kha chu ‘ka thiam loh vang reng a lo ni’ te kan han ti leh hnuhnawh a. Mi farnute ang em em lo deuh pawhin, ‘instalment-in Rs 250-a duh awm se’, te kan lo tih rilruk thin kha cheng sing khat pawhin kan han ui thar leh vei thul.

    Mahse, remruattu hian thil hi a lo rel thiam khawp a, hetiang hunah pawh hian thenawm hnai nula tu emaw ber rilruah hna a rawn thawk a, min ngaihzawn vang ni miah lovin min rawn suk faisak leh mai thin. Chutianga bengvar rawn chhuahte chuan fak an hlawh zui nasa thin khawp a, khum ke panga neia mu chik tuarh tuarh chungin zan lai pelh thleng rawk ten kan sep zui leh chiam thin. Zangkhua te a bungbut a, lei rem rah hun te a la awm ve a nih ngai chuan, a leh engemaw zata rulh ve theih ngei kan inbeisei.

Similar Posts:

• Khum ke panga nei I – Dârrokima
• I zung ang u!
• Zei Book – Part 1
• Rilru a hah ve mai a ni e…
• Thehkhawm mai mai..

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, March 6th, 2007 at 3:35 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.