mi(sual).com

-Lalhmachhuana Zofa
“Min chhan ru, min chhan ru…. chhantlak ka la awm e…”tih ri chu a thangkhawk ri raih raih a, chu ri lo chhuahna chu khawilam nge tih hriattumin, chu ri hria te chuan an beng leh mit an len vel ruai ruai hlawm a. A chang in hnaite niin an hria a, a changin hla taka, mangang au thawm ri ni hian a hriat thunga. Zawlbuka tlangval meilum at te pawh chu an hawi kual nasa hle hlawm a,zawi te te in an inhrilh kuala. Chu thawm rapthlak tak lo chhuahna chu, an hriatdan a inang thei tawh lova, dai thlang tuikhur bul mai ni a an hriat laiin, a then chuanvai lang tlang atanga thawm chu lo chhuak niin an hre thunga.

Zonunmawii inleng te pawh chu, an thutna anganga ding chhuakin pawn lam thawm ngaithla chiang turin an chhuak hlawm a, zan tir mai a la nia, mut hun pawh a la nih rih loh avangin,chu thawm rapthlak tak mai chu hrelo pawh an awm meuh lo. Naupang pawnto nui ri au bengchheng chel chul te pawh a rehnghalthiap a, thenkhat phei chuan an hlauh em avangin, an tualchaina hmun atangin, Nuuu ‘ ti lauh lauh chungin hmanhmawh takin an in lam an pan sawk sawk hlawm a. An nute tang chhungah beiin, an ip chawih chawiha, an hlauh thu pawh an sawi tha ngam lo.

Tlangval huaisen leh tlawmngai deuh te chuan chu thawm tihbaihawm tak lo chhuahna ni a an rin lam chu meichher nen an pan hlawm a, chu Thla ai ri chu a rapthlak bawk a,tiril hi a fan raih raih mai a, hmeichhe thenkhat phei chu an mu ngamlova, tapchhak zawl chuhin, meite chu a alh nasat loh hlau ang hrimin thing an tuah belh sauh sauh a. An hlauh thu leh an rap thu an sawi awl lova. Tuallaia Bawng leh Sial bawk te pawh chu an hawi tang hru hlawm a, chhiara Ar te pawh chu an tik(Trik) dial dial a.

Naupang inti huaisen deuh mahni inlam pan mai lo te pawh, “Awi ka nu … a na em mai” tih ri an belh meuh chuan……
‘Tin dial ah tin dial ah;
Naktukah khuavar sela,
Inkawm leh dial dial ang u,
Mahni in la kawh theuhah’

tih hla, pawnto tin dawn a an sawi rual ziah thin te chu sawi hman lovin hmanhmawh baklengin an tlan hawng dawr dawr a.Pa-Valai deuh leh Upa Zawlbuk awm tual mei ai te pawh chuan, chinchang hriat tumin an beng an chhi a, upa thil chinchang inti hre deuh te chuan an thil hriat te chu sawiin TUNLAI HUN CHU HMANLAI HUNAH AN CHANTIR A;an hun liam tawh hnu leh an thil tawn tawhte sawiin an phun bal bal hlawm a.

Chu Thla-ai chuan ram hla zawk lam a pan zel a, tlangval rual thenkhatte chuan an rawn tinsan a,THLA-AI chu a hmun ngeia va tawn chilh tum, Tlangval huaisen leh tlawmngai rual thenkhatte chuan hmalam an pan thung a. Upa awmtual mei ai ho pawh chuan an chinchang ngaichangin, an naute ho ram lam pan mekte chu an lo nghak a, an ngaihtuah thu sawi chungin, an lo let leh nghakin thingte chu an vur belh sauh sauh a, Siruk pawh khawthlang lamah a her liam dawn ta! Khawvar a hnaiin, zan lalnu chhawrthlapui pawh a duh leng tawng ta ang hrimin tuma dan rual lohvin uih zawn ang vut vutin tlang dung thim run lam chu panin a phe vut vut a, zan arei tial tial a, khawvar a hnai a, Thla-ai ri chu a rapthlak zual ta emaw tih turin a tih baihawm zual a, kut humruh teuh chung pawhin tiril hi a khur ru der der mai ani.

Zan lai ar te pawh a khuang ta chiah chiah a, khua a vawt zualin a lo thim bik a, khawfing a chatin khua a var . khua a var dawn ta….ENGTIN AWM ZEL ANG MAW ??Kan Zoram mawi leh nuam tak chuan “MIN CHHANRU CHHAN TLAK KA LA AWM E,” tiin min au va , natuar rum ri chu a ringin a rapthlak em em in a tihbaihawm tel bawk si.Mutmu pawh han tuah ngamna chi zia zang ani ta lo. DIK LOHNA, RINAWM LOHNA, KHAWVEL HRI THALO TINRENGIN A BAWM MEK E……

Mizoram chhungah hian, mihring nuai riat vel kan awm a, lehkhathiam tamna ram niin, College kal lai ringawt pawh sing engengemaw zah awmin leh kuthnathawk za zelah sawmsarih aia tam kan awm a.Aram leilung sik leh sa hi a tha in thlai chitin that duhna hmun ni mahse,”RAM INTODELHLO” niin, dehchhuah leh thawn chhuah engmah sawitham awm silo,”TAM RENG MAI’kan nisi. Kuthnathawktute thlai thar chhuah chu, mi rama a man to dan hre reng chungin mi ram athleng phak tak tak lova, sawrkar in a lei chhun te chu, hralh theih loh in a tawih ral mai mai lawi a….”Engatinge?Hetiang ringawtte chu” tiin han in kheuh kual thin mah ila, kan POLITICIANte leh Sawrkar hnathawkte a lian a te in khawtlang leh Kohhran mi inhmang tak tak, thiamna lam nise tluk rualloh kalkhawm enkawl kan ni lawisi a.”NGAWLVEI CHHUNGKUA KAN NI E, ENTAWN TLAK KAN AWM LO,”ti theuh awm kan nih laiin Kristian sakhaw bia in tiin, THUTHLUNG HLUI LEH THUTHLUNG THAR BU keu thin, vawi tam chhiar chhuaka kan hriat hnem, vangnge?kan hriat tlem vang zawk? Kohhran pawl hrang hrang sawmruk chuang lai kan awm in, kan tum chu Vanram a ni theuhin leh mithianghlimte lenna ram nghakhlel taka thlirtute kan ni a.

Bus fair tur pawisa nawi takngial pawh a chhia chhia thlang thin mahse, Conductor hnen atanga pawisa thar tha dawn tum thiau kal khawm, mahni in hmun lo ramchin hre em em, tuihawk luang lut tur chu ruah pui sur hnuai ah pawh veng peih thenawmterama luanglut erawh ngaimawh duh der lo.THENAWM THA NEIH DUH THIAU,mahni,THENAWM THA NIH TUM SI LO. Mahni venga ruitheih thil zuar leh ruk ching awm phal lo, mi venga awm erawh pawiti hauh silo,RAM HMANGAIHTE NI MAH ILA…AW ZORAM i natna hi sawisen pawh a ni ta lo!!Mahse, Mahse, theihtawp chhuahin “ZORAM, AW KAN ZORAM TANG FAN FAN “….

“Kristian kan ni” in tihna ram, Kristiante nun dan tura nung leh khawsa hmuh tur vang si…. kan ram, Zoram leh a chhunga cheng Zofate …Politics,Economics, Social Life, Religion, Education etc… a kan natna hi NGHALENG THAWIIN A DAM LOVA, SIALA THAWIIN A DAM CHUANG SI LO.laifei leh chengrang chawi ila, adam chuang lawng e,Nang leh kei kan puanven sawi tha in RINAWM LEH DIKNA, HUAISENSA NEN,Zonun kal lai i her rem ang khai.

Mizo sa leh ral hma a zam ngailo, rinawmna leh dikna vawng him thin, tlawmngaihna nunze mawi neitute, Huaisenna Nopui dawng thin, kha kan ni lawm ni. “ZORAM TANG FAN FAN “khua a var dawn ta, kawl a eng e, khaw var hnuai ah, hnehna hla mawi sa in kan zai ang, Zoram sual khurpui a tla pil mek chhanchhuak tur hian, Zofate kan tling tawk, kan ram leh hnam chhanchhuak tur hian tudang mah an ngai lo,”NANG LEH KEI CHHINLUNG CHHUAK ZOFA , ZONUNMAWII LEH ZONUNDIK KAN NGAI E”Pathian Engkimtithei a, rawn chuang zelin, Zoram kal siam ila,ZORAM KHUA I VAR TIR ANG.

Similar Posts:

• ZORAM TANG FAN FAN
• Zoram ah khua a var tawh em?
• Airtel Mizo customer care
• Phengphe Khua
• Rawlthar tang fan fan

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, April 23rd, 2007 at 4:21 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.