Serchhip MZP in concert hmangin Khampat Bungpui tungding dawn
Mizo history-a hmun pawimawh leh theihnghilh theih tawh loh tur zinga mi chu tuna Burma ramri chhunga awm mek ‘Khampat Bungpui’ khi a ni. Kan Mizo pi leh pute khan an inthen darh dawn khan eng nge an tih kha? Khampat Bung an phun a; ‘He Bung zâr hian lei a tawh hunah kan inhmukhâwm leh dawn nia,’ an ti a nih kha.
Tûnah hian kan pi leh pute phun, Khampat Bung zâr chuan lei a tawk tawh a ni satliah lo, a Bung tak chu hmuh tur a awm mang tawh lo va, a zâr thenkhat leia awmte chu hmuh tur la awmchhun an ni mai a, chu pawh enkawl thuai a nih loh chuan thi mai thei dinhmunah a ding mêk. Kan hnam rohlu – Khampat Bungpui, ral mai thei dinhmuna ding mêk hian chhantu a ngai a; amah chhan tur hian Burma mi a mamawh lo, amah phuntu Mizo ngei a mamawh a ni. He kan Khampat Bungpui humhim hna thawk tan tur hian Serchhip MZP te chuan May ni 23 Nilaini zan khian Khampat Bungpui pualin Concert an huaihawt dawn.
Concert for Khampat Bungpui : May ni 23 zan a ni ang a, Serchhip MZP buatsaih ‘Concert for Khampat Bungpui’ chu a duh apiang tan en theih a ni dawn a; ticket awm lo vang. Mahse, he concert hi Mizo hnam rohlu, chhanchhuah ngai khawpa dinhmun derthawnga ding mek puala buatsaih a nih avangin a phal apiang tan thawhlawm (donation) khawn a ni thung ang. Kan Mizo rohlu humhalh duhtute tana sum thawh theihna hun remchang tak a ni.
Concert-ah hian Serchhip khaw chhunga zaithiam ber berte leh Mizoram pum huapa zaithiamte’n hun an hmang dawn. Serchhip khaw chhuak zaithiam– Laithangpuii te leh Ruatsangi te pawh an inlan dawn a. Aizawl lam atanga Mizo ‘heritage’ humhalh duhte tan zaina hun a inhawng mêk bawk e. “Aizawl lam atang pawhin zaithiam zai tur biakfel kan nei nual tawh a…, Youth Icon star, Zomuanpuii pawh zai turin kan beisei bawk,” tiin Serchhip MZP President, Lungduhsanga chuan a sawi a. Concert zan hian ‘Khampat Bungpui’ tih hla, Zodi ho lo hit tawh kha Serchhip-a zaipawl pakhat chuan an sa dawn. “Tunah hian he concert-a tel duh, rock band emaw zaithiam zai duh tan hun a la inhawng reng a, phone 9436146602-ah zawhfiah theih reng a ni,” Sangtê-a chuan a ti bawk.
“Khampat Bungpui hi humhalh a ngai takzet tawh a. Hemi kawngah hian kan Kristian researcher Dr PC Biaksiama pawh a hmuna kalin he Bung dinhmun derthàwnzia hi a mit ngeiin a han hmu tawh a… Bung humhalh tur hian pawl pawh an din tawh nghe nghe a… Concert kan buatsaih atanga kan sum hmuhte pawh Khampat Bungpui humhalhtu pawl hnenah hian kan hlàn vek dawn a ni,” tiin Lungduhsanga chuan a sawi.
Khampat Bungpui-in Chhantu a ngai : Khampat Bungpui awmna kiangah hian Khampat lui a awm a, he lui hian Khampat Bung hi a hrût ral tial tial a. Tunah hian lui hi lian ta se Khampat Bung dinna hmun chu tuilian hian a la thei reng a; Bung hi hmuh theih tawh loh tur dinhmunah a ding mek a ni.
Khampat Bungpui dinna hmun hi tuihâwkin a hrût ral loh nan leh tuilianin a lâk loh nan a humhalhtu pawl hian Retaining Wall siam a ngaih thu an sawi a. Dr PC Biaksiama kaihhruaina hnuaia Khampat Bungpui humhaltu pawlte chuan retaining wall siam a nih theih nan vehbur an khawn mek niin kan thu dawnna chuan a sawi a. An treasurer Pu C Lalrambuatsaiha (Editor, Aizawl Post) hnenah thawhlawm thawh theih reng a ni bawk.
I Hnam Ro i humhalh dawn em? : Khampat Bungpui khi tun anga a awm reng chuan Mizote chuan kan hnam ro pakhat kan chân dawn tih a chiang. Hemi puala Serchhip MZP buatsaih concert-ah hian kal ve ngei rawh. A thlâwnin zaithiam zai i ngaithla ang a, Mizo heritage, chhan ngai khawpa awm mek hi i humhalh ve duh chuan i phal ang tawk sum i thawh ve dawn nia.
Khampat Bung chanchin hi i hrechiang duh a nih chuan Serchhip MZP chuan May ni 23 chhun dar 11:00 hian Seminar an buatsaih dawn a, kan MP zahawm tak Pu Vanlalzawma chu khullian a ni ang. Hetah hian Serchhip District-a mi hmingthate hnenah chawimawina hlan a ni bawk ang. Zan lamah Khampat Bung puala concert neih chhunzawm nghal a ni dawn a, hetah hian Pu P Lianhrima chu khuallian a ni thung dawn a ni.
Similar Posts:
- Khampat Bung concert ka chhim ve a
- Khampatbungpui lo tlawh ve r’u
- Khampat hi eng nge?
- Khampat-ah Khampat Bung
- Airtel Roof Top Party
May 15th, 2007 at 3:42 pm
a tha khop mai
Report this comment
May 16th, 2007 at 2:57 am
They can only save a tree
Report this comment
May 16th, 2007 at 3:07 am
ka van khongaih tak…thingkung maimah ni se…ka hrawk te poh a ti kham deuh…….hung hnatlang with bawng ek retreat.. yma leh mzp neih puii la a tha ang ………( with out S.R .S)..misual ho te poh hian.. kan vawk ek te kha am deuh tak kha han donate ila….
Report this comment
May 16th, 2007 at 4:34 am
Hnam fing leh ropuite chuan an hmun hlui te an pi leh pute sulhnute an roh tha a, hriatrengna eng emaw tha tak nen an hung tlat thin tih kan hre theuh ang a, Vai ho ngat phei chuan an mi ropuite hriatreng nan eng eng emaw hmingah an chawi chiam thin tih kan hre ngeiin a rinawm. Chu mai pawh ni lovin, an lim te lian pui puia siamin khawlai pawimawh laiah an hung thluah thin a ni.
Vai chauh an ni lo va, Sap ho hlei hlei hian an ching. Japanese leh Korean ho pawh khian an ching viau bawk a ni. Keini mizote erawh Politics tenawm lutuk avangin kan mi hmasa huaisen, ram leh hnam tana tlawm ve ngai lo Zoram humtute ngei ngei pawh a nihna ang turin ngaihsan nachang kan hre tlat lo. Ropuiliani te, Lalburha te, Lianphunga te, Vanhnuailiana te etc.. bakah Pasaltha tam takin Mizoram hi an lo humhalh hram hram avanga thangtharten luah thei chauh kan ni si a.
An lim mai bakah Kawng hming leh thil hrang hrang te hi an hming chawia siam ni ve se a duhawm hle mai. Thangtharte entawn atan.
Report this comment
May 18th, 2007 at 3:29 am
Nia ilo entawn vek teh ang u
Report this comment