Hangi lunglên tlang
Tlai khat chu aia û te inkhelhna sira ball liam changa kan thut thap laiin nula (Pa-til!!) pakhat hi guitar nen lo kalin, kan bulah chuan a rawn thu a, ‘Cham rih la tlai tla eng mawi no ruai….‘ tiin a rawn zai a. A hla sak chu ka vawi khat hriatna a ni. Ama phuah nge mi hla a sa tih ka hre lo a, a zaithiam leh thiam loh pawh ka hre hek lo. A hla sak chuan khawthlang lama ni tla tur eng sen phût lam chu min thlir tir vawng vawng ringawt mai a ni. Chu chu he hla avanga tihdanglama ka awm vawi khatna a ni.
May ni 15 zan a ni a, I&PR Auditorium-ah Joseph Zaihmingthanga chu zai turin a lo ding chhuak a. Music track a rawn ri a, eng hla nge a sak dawn a hriat mai loh. Chutah, “Aw ka thlir vel tlai tla eng mawi, Aw..a lo mawi chuang ma’nge” a’n ti mai chu!!!! He hla vanga tihdanglama ka awm vawi hnihna chu a thleng ta a, kut bengin ka zawm lo thei lo!!!
He hla hian ‘tlai tla eng’ mawizia a hrilhfiah zo lo ai hian he hla mawizia ka hrilhfiah zawh lohna hi a nasa fe zawk awm e. Tum teh mah ila ka ziak chhuak thiam lo, thianpa Darrokima pun a ngai leh ta tlat mai.
Mizoten ‘hla‘ kan tih mai hi literature thuang lian tak tak hlawm li zinga a upa ber a ni a, mihringten he leilung kan luah atang hian hla hi engzat chiah nge piang tawh tih hi chhut chhuah tum chi pawh a ni lo. Mihring nun leh hla hi lakhran theih miah loh, inzawmna thûk tak nei a ni a. Hlimna vawrtawp puanchhuah nan hla aia sawi chhuahna thlanawm zawk a awm lova, chutiang bawkin, lungngaihna kaw tawpa tangte tan hla aia hnemtu tha leh lungngaihna tawmpui theitu a awm kher lo mai thei.
‘Hla tha‘ tehna hi kawng tam tak a awm thei. A pawimawh ber pakhatah chuan hla tha chuan hringnun hi a pho chhuak tur a ni a, a tlar tam leh tam loh lamin a hlutna a hril ber lo. Hla tlar tlem têin thil tam tak a sawi thei hi hla tihlu zualtu a ni. PB Shelley hla tlar khat lek, “If winter comes, can spring be far behind” tih hian a thil sawilan phena thuhruk a ngahzia hi kan ngaihtuah phak ngai em? He thu phena hringnun nihna tam tak inphum ru hian Shelley-a ropuina a puang chiang khawp asin.
Khuarel mawina atchilh tlattu Wordsworth-a khawvel te kha aw…, mi pangngai hmuh phak loh leh hmuh thiam loh a hmuh thiam tlat bikna kha a hla tiropuitu a ni thin a. Ni lo chhuaka tla leh mai thin te, zinga daifim lo far keuh keuhte kha a tan chuan dam man ti-awm zualtu an ni. Chutiang boruak thlir thiam phak tan chuan maw;
Aw ka thlir vel tlai tla eng mawi
Aw…, i lo mawi chuang ma’ng e
I hmel thar hrailengten lo lawm
tih hla te hi hla naran a ni thei lo va, a tlar tlem hian chhetê mahin a vaw pai lo ang. Thlangah ni a her liam dawn a, chimawm khawpa lung tilengin a sen phût a. Chu tlaitla eng hnuaia khawvel lungkham nei lo hringfate leng dial dial kara a lungleng fal bik lo nih chu a va hlu dawn tehlul em!! Mi dangte hlim taka an len suau suau lai khan he hla phuahtu hi chu amahin a awm a nih ngei ka ring. A duh vanga amah chauha maltlat bik pawh a ni lo ang. A thunun phak loh khuarelin a awm dan chu a her chhuahpui a ni ngei ang.
Chu tlaitla eng no nghelh maiah chuan nunhlui ngaih a va na dawn rua em!! Mi pangngai a nih chuan mi ai aia ngaihawm kha nunhlui a nei ve ngei ang. Chu’ng a nunhlui liamhnu chuan chu tlaitla eng no ruih mai hnuaiah chuan a rawn thing let leh dawn tihna a nia. Tu nge han tuar zo tehlul ang ni? Hetiang hunah hian alawm mipain mipa ka ni kan tih theih hlek thin loh chu!! A lunglen chawk thotu kawl sen phût mai chu thlir tawh loh mai te pawh a duh hial ta ve ang. Mahse, thlir loh phal chi a ni si lo. Chhuanlamah “Cham rih la hraileng zawng lo lawm nan maw…,” a han ti a. Hraileng zawng lawm nan mai zawng a tih bik ka ring lo. Ama tan, a nunhlui ngaihtir ngawih ngawihtu kha amah ngei khan liam mai atan a phal thei ngang lo a nih ka ring zawk daih mai.
Kumpui sul a lo vei hian
Hun leh ni te a lo dang
Ka ngai thin lenrual hlui then hnute,
Helai chang tak mai hian kan thusawi tak khi a rawn nem nghet ta! Nunhlui ngaihnain mihringte min run nat theih dan hi a namai lo. Kum a lo vei a, hun a ral a, ni a liam zel a, nunhlui ngaih hi a na tulh tulh lo thei lo. ‘Khaw’nge an awm zawh tak?‘ tih hi rilru-ah a inthum rawn a, rual hluite mai ni lovin, di hluite thlengin mitthlaah hian an rawn lang nawn awn awn a, hun hi kan koh kir rual a ni thin si lo. Chutiang hunah chuan alawm mihringte hian nun awmzia tak tak hi kan lo hriat chhuah chauh thin a, hringnun hlutna laimu tak tak hi kan hriatchhuah chauh thin ni!!
He hla hi hranghlui C.Lalrinmawia’n tho-thang tak, lung tileng em em siin a sa a, tunah Joseph Zaihmingthanga’n muang fan raihin a rawn sa ve leh ta a, a mawi dan erawh a dang chuang lo. ‘Mahse‘ tih a awm ta tlat mai. Album release hma-in sawi nawi tur a awm, a hla thu a inang lo. Chang hnihna chiah a inangin an sa a, chang dangah leh a thunawnah hla thu thenkhat inang lo a awm tlat. Tu sak nge dik zawk ang le?
C.Lalrinmawia: Aw ka thlir vel tlai tla eng mawi
Aw..’i‘ lo mawi chuang ma’nge
Joseph: Aw ka thlir vel tlai tla eng mawi
Aw..’a‘ lo mawi chuang ma’nge
C.Lalrinmawia: Cham rih la tlai tla eng mawi no ‘ruai‘
La la la la la la la la la la
Cham rih la hraileng zawng ‘lo‘ lawm nan maw..
Joseph: Cham rih la tlai tla eng mawi no ‘riai‘
La la la la la la la la la la
Cham rih la hraileng zawng ‘lung lawm‘ nan maw..
C.Lalrinmawia: Lenkawl ‘cham‘ duai tlang dum dur
Joseph: Lenkawl ‘kham‘ duai tlang dum dur
Thil dang zawng hi chu a hriatthiam theih mai a. Mahse, chang thumna tlar bul hi chu….. ‘cham‘ tih hi chu dik zawk tur ni-awm tak a ni a, ‘Lenkawl ‘kham‘ duai tlang dum dur‘ han tih hi chu…a hla thu lo deuh em aw?? A….a phuahtu ka hre si lo-a tu sak dan hi nge dik zawk tih ka hre bik lo a ni e. Chu bakah Joseph-a hian a album a la release lo a, a sak dan a la thlak ve leh thei tho bawk. Tin, a sak dan hi a lo dik zawk reng thei bawk. Eng pawh ni se a mawina zawng a nep tak tak chuang lo e.
Similar Posts:
- ‘Nang ang ‘ tih hla Rebecca-in a phuahtu phuah angin sa lo
- Sikni Eng
- Theihchang se
- Hmangaihna Par – Lalrintluanga Varte
- Kum hlui
June 14th, 2007 at 3:32 pm
He hla hi chu a nalh thlot a ni. i ron soi takah chuan……..he hla nalh tak mai hi chuan tlai ni tla tur nalh ka tih thin zia kha min hriat chhuah tir. It reminds me of my good friend whom i used to share those ‘sunset feeling’……..
Report this comment
June 14th, 2007 at 6:14 pm
Phiah deuh a êng phât saw ‘tlaitla’ chu a ni maw?
Mawi khawp mai.
Report this comment
June 19th, 2007 at 11:24 am
Ka hriat ve thin chu C.Lalrinmawia sak ngei mai kha a ni. Tlem a lo nawm deuh tawh lamah phei chuan ‘lalalalalalala’ lai hi chu an uar tlang thin khawp mai. A phuahtu phei chu ka hre lo. Joseph-a sak chu ngaihthlak a chakawm tawh khawp mai, min lo thar tem teh u.
Report this comment
June 19th, 2007 at 12:10 pm
C Lalrinmawia sak dan hi a dik zawk ka ring..
Joseph-a hian Lallianmawia hla “Dawt leng an sel” tih ah pawh khan hlathu her rem a nei, amah Lallianmawia sak ngei ka ngaithla a,
“Mahse i chun nuleh chinlai leng ten
‘Sirah kan hnawl, rairah’ min lo ti.
tih hi “Sirah min hnawl, rairah min lo ti” tiin a thlak.. chhungte remtihna nen anih leh nih lo chu ka hre pha lo naa, mahse amah a phuahtu ngeiin a dah dan hi chu respect hram2 thei ila ka ti..
“I liam tur maw lo ni zawk le..” tih lai hian tu emaw ni i liam ni kha ka hre chhauk ziah a, khami tlaia ni thla tur engmawi zia kha aw,,
Report this comment