Chhungkaw pa ber nih tum hautak zia nitina ka hrechhuak ziah hi chu thuhran ni rawh se. A behbawm khawvelah hian kei ve teh lul hi ‘buai’ ka va in ti ve tak em!! Ka daily dose misual dot com takngial pawh tunlai chu ka tlawh hlei thei lo.
“I Rami A Ko Che” tiin ka phi buaisek a, chutah mi thenkhatin kei ve teh lul hi min beih dan tur an zawng ve sek a, ka thusawi leh ziakte Hnam Run writter lamin an lo helh a, article-a hminglem hmanga “party thar dinnaa tui” tia min lo ti tawk an awm, Biate MNF lahin ka thusawi chhang turin Aizawlah PR an rawn siam bawk!
Chutah gas a vang a, ka fapa birthday lawmna ho te ka siamah ka gas neihsa ka hmang zo titih bawk. Pahmei tana nitin zantina chhuak chunga gas zawn chu namai lo tak a ni, gas lah a vang tual tual bawk si.
Makpa lo nih ve teh cheng chuan puzawn ber thihngama a nat lai a nih avangin damdawiin lamah riahpui a lo ngai ve bawk nen. Ka nupui leh fapa uap loh hlauin in lamah awm ka am ve bawk. Thla khat liam daih tawha kan hmalakna Talent Hunt lah bul kan tan tawh bawk si, tunlai chu pathum tal ni thei ila tiin duhthu ka sam vel mai mai thin.
Aizawlah lah chuan khuain that zai reng a rel thei si lo, lirthei ke pahniha vakchhuak thin tan chuan buai inti duh ila chuan ‘buaina’ tur hi ava’n tam tak em!! Chutah ka bike seat lah chu Aizawl Venglaia ka dah hlanin an lo zai thler duar leh nghal a, ke kawr mawng huh bak chan ka nei lo.
Kar khata ni sarih hnathawh chu thuhran ni teh se, a behbawma kan inhmanna tam vanglai a la ni lehnghal a, hetiang reng renga nitin zantin hun ka hmanlai hian ka vanneihzia ka lo ngaihtuah ngai lo reng reng. Ka nau pasal lah chu sipai tranning-na lamah malaria vangin khum betin a lo damlo ve bawk, a tlawh turin ka nu lah chuan keimah bak thawhchhuahpui tur a nei bawk si lo. Nitina chhum a zing chuai ang mai hian ka zing chuai a ni ber mai.
Tihian ka ngaihtuah ta zawk a, buai theia min siamtu chung Pathian hian tun dinhmunah chuan hriselna tha tak min pe a, ka thawh sen loh hna ka hmaah a chhawp a, thawk theiin min siam a, khawvelah hian mi ‘buai’ apiang hi vannei chu an ni kher lo ang, mahse buai theia awma hriselna ka nei hi ka vanneih zia ka hre chhuak nawn thin.
Chutah hma thar la theiin ka awm a, misuala ka thiante’n min puih ve ngei ka beisei, tunah hian thlakip chhuak magazine, “A HO & TAK LENNA THLAKIP BU” HAWILO tihchhuah tumin hma ka la ve mek a, thianpa Mamuana pawhin The Y2Goal Agencies siamin hma a la mek a, Inrinnia ka hna ka chawlh ve theihna turin ka ka’n la ve a ni e.
Zirsa, SAKA, Gerrard-a Pa te leh misual ho zawng zawng mahni duh zawng, ho lutuk awm lo, tak lutuk awm lo hmaga thua min rawn pui turin ka sawm che u. Ka rilruk ve dan mai mai chuan he magazine-ah hian tunlaia ziaktute’n an lunglen chang leh thil ho tak tak an ngaihtuah changa an ziahna huanga leng chiah si lo an rawn thawhkhawm theihna tur siam ka tum ve ngawt, a hlawhtlinna chu chung lamah a innghat e.
