mi(sual).com

By Denis Lalfela sdb, Rome.

Pathian thil rel dan hi a va mak em tih nun i tem ve tawh em? Thihna hial tawk, an tahna piahlama Pathian thiltihtheihna an hmuh avanga lawm ta tlat te hi mak i ti lo maw? Harsatna, hmusitna leh thihna tawh lai a, Lalpa remruat a ni, kan tan engkim a rel thin tih chu mihring thlirna atang chuan a àtthlak takzet mai. Mahse a remruatna leh kan duhdan a in pelhsawlh fo avangin, ringtu dik chuan engkim Lalpa ah nghatin, nitin thlarau aw chu an ngaithla thin.

Kristian nun chu Kraws kawng, harsatna leh manganna keng tel a ni. Catacomb ka tlawhin Krista avanga engkim chantu martar-te thlanah ka tawngtai thin. Hmuh theih lova chu an rinna mita an hmuh tlat avangin, thihna an hlau hauh lo. Rinna chuan hmuh theih loh min hmuhtirin huaisenna min pe. Nitin nunah pawh rinna kan mamawh fo. Bus a kan chuanin driver chu thiam tak, zurui lo, kan kal tumna min hruai thleng thei a ni tih ringin ngaihngam takin kan chuang thin. Cancer zaitu chu doctor thiam tak anih kan ring a, a thiamna check turin zaina pindanah kan va lut kher lo. Nupa pawh mit an insiai zauh atang khan an inhmangaih tih an hria a, a tu emaw zawk inringhlelin office ah an va kal duk duk lo. Thlarau nunah erawh rahbi thar kan kai tur a ni. Hmangaihna Pathian a ni ti fo mah ila, mahni nuna a hmangaihna kan experience si loh chuan rinna a ni ve tlawng mai a. Harsatna leh thlemnaah chutiang hriatna/ rinna chu min chawm ahnekin a tlu mai thin. A hmangaihna temtu erawh chu tihdanglam leh tihchakin an awm a. Biak tlak Pathian an neihzia hriain, harsatnaah an tlanchhe ngai lo, Pathian auh leh hnaih nan an hmang hlauh thin. Chutiang mi chu an hmel a èng a, thlarauin an khat a, biak an nuamin an tawngkam leh chetziaah Krista kan hmu thin. Chu chu testimony ropui tak a ni.

Rinna chuan hmuh theih loh thil a tinzawn avangin, ‘kan rin ang hi a lo ni lo mai anga’ tih hlauin kan ring ngam lo fo. Ringtu nghet pawh rinhlelhna in kan khat leh thin a, duhthlanna fumfe siam lovin kan vakruai thin. Rinna kawnga duhthlanna chuan tihduhdahna hial min thlen thei, mahse tah chuan tawp lovin, thlamuanna leh beiseina nung min pe. Duhthlanna siam ngamlo ringtu chu a nung ve tawp mai a, harsatnaah belh tur nei lovin beidawnna in a khat a, sualah inhnemna zawngin, hlimna emaw a tih khan a thlarau nun bakah a taksa hial pawh a eichhe thin. Chutiang Setana bawih rinawm, khawtlang hmelma hiala chang sal tangte chhanchhuah chu Kohhran leh ringtute tih màkmawh a ni.

Khawvel thilin min chim hneh a, Krista thlan reng har kan ti. Dik tak chuan rinna kawngah pawh risk kan la a, kan rin ngam pauh leh a hlawkna kan tel thinzia erawh sawilan a ngai lo. Nitin a aw hre mah ila, kan zalenna hmangin kan hnawl fo. A aw chhangtute erawh chu Lalpan a khawngaihnain a thuam a, natna khumah pawh hlim hmel puin, rilru zangkhai tak leh Lalpaah lawmna thinlung pek an ni thin. Taksa hrisel nei tura chaw tha kan ei ang hian, rinna a thang turin nitin thlarau chaw kan ei a ngai a. Kan ei loh chuan kan hriat lohva Isua kalsanin, mihring takin kan nung a, sum duhna leh sual pawisak lohna a lo lal a, kawng dika kir leh a har thin. Chuvangin nitinin kan inhlan thar tur a ni.
Pathian thilmak tih kan sawi seng lo. Kan ruahmanna tipuitlingtu pawh amah a ni. Amah chauh belh tur kan nei tih min zirtir fo. Chumi atan eng kawng pawh a hmang thei, hauhsakna ata retheihna, chapona ata tlawmna, nawmna ata tuarna thlengin. Krista Kraws atanga nitin harsatna thlirtu ten tuarna phena malsawmna an haichhuak thin. Nitin kraws min pekah tlanchhe lova, a hmel mawi min hmuhtirtu a kan hman hi Lalpa duhdan a ni. Thatni a Pathian hrechang lo, chhiatni a mawh zawng zawng phurhtirtu ringtute hian, Krista kraws ah chiah damna kan hmu ang. Ringtute chu rinna a chak takte kalkhawm an ni lova, nitin an kraws theuh pua bei hram hram tute an ni. Chhelna leh beih hràm hràmna hi ringtute tinungtu, huaisenna leh phurna thar pe zeltu a ni.

Tuarna phena malsawmna la dai baw lo leh rinna mit a mahni nun enlet lo chuan kan sawi ram hi a hrethiam kher lovang. Engkim malsawmna a chantir theitu hnena inhlan thlap hi a har anih hi! Krista mi hriat chu khawvelah tlan mahse a hlim thei tawh lo. A tlan thui pauh leh a beidawnna a nasa tial tial. Mangang si tal chhuak thei si lovin a awm thin. Sual bawiha kan tanna theuh ata tal chhuah tumin kan bei em? Nang leh kei atana thia tholeh Lal Isuan kan hneh theih loh min hnehsakin, mitin nunah rawn lalber se kan va ti em! Lal Isua kan dah lal apiangin, kohhranah inunauna tha zawk leh chhungkuaah hlimna thuk zawk kan nei zel dawn a ni. Kan nitin kraws te hi, Krista hmangaihna a min thanlen tirtu leh ringtu puitling a min chhertu lo ni zel rawh se.

Similar Posts:

• Kristian Chi 2 Te {Sunday Pual}
• Kraws Thu
• Ringtute chunga Pathian beisei leh duhzawng{Sunday Pual}
• Thlarau Râlthuam {Sunday Pual}
• Lalpa thuin lèn i deng ang u!

Recent Posts:

• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH
• Bawihpuia kha

This entry was posted on Saturday, October 20th, 2007 at 11:04 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.