mi(sual).com

Zu hian Mizo Society ah engtiang chiahin nge chanvo a neih a, dinhmun a lo luah thin, tih chu sawi tam vak ngai lovin hmanlai pupute nun kan chhiar chuan kan hre mai thei ang. Zu tello chuan an nun a kim lo va, hmeichhia pawhin zu an in fo a, kut,chai leh thil tihkhawm nikhua reng rengah Zu a tel thin. Chuvangin Zu chu pipu nunah nghet takin a lo tel thin tih kan hre thei a ni. Mi huaisen leh mi tlawmngaite chu chawimawina atan lal leh upaten zu an do thin.

Mahse, Zu an rui buai ngai em? Zu ruih buai avanga an buai hluai thu kan hmu lem lo. Pasaltha Vana pa hun lai pawh khan an lal Vanhnuailiana inah zing atangin an nupuiten zu an in thin tak fo avangin, a tih tawp nan a thianpa hmangin a nupui puanfen a keu tir a, thin rim hle mah se, ‘chawng khum dan tlang huat loh’ a ti tlat mai si a, a pasal mi huaisen leh pasaltha vanapa hnenah zualko teh mah se, ‘chawng khum dan tlang huat loh’ a tih zauh avangin huat chi pawh a ni lo va, kha ta tang khan he tawngkam hi a lo chhuah phah bakah Hmeichhiaten a langin Zu an in loh phah ta deuh niin an sawi thin. Engpawhnise, mipaten Zu an rui a, an lam mup mup thin. Mahse, zuruih avanga harsatna leh buaina siam te erawh khaw danga pem vang vangna khawpa zahthlakah an ngai a, hremna pawh a na hle tih kan hmu. Chuvangin Zuruih avangin buaina an siam mawh hle tih kan hria. A tan Zu chu sual a ni lo va, Zu indan tawk leh a hnathawh chu an thunun ta zawk thin a lo ni.

Hun a lo inher zela, Zu kan rui thiam ta lo. Chhungkua then darhtu chu paber ruih vang a ni fo. Tualthahna tam zawk te chu Zu ruih vang a ni ta zel mai. Chuti a nih chuan Zu chu khap theih a nih laia khap mai chu buaina punlun zel loh nana, a kawng awmchhun a lo ni ta a ni ngei ang. Tun thlengin Zu chu khap a ni ta zel a..

Zu hi khap rem theih loh, khap loh avanga pung thur thur thei pawh a ni chuang awm lo ve. A intu an tam leh tlem a zira tam leh tlem thei chauh a ni a. Mumal taka a in thei chin leh lei thei chin bithliah a, dan mumal tak siam hi a tha zawk lovang maw?

Mahse, Zu chu ruihhlo dang ang bawka sawngbawl a lo ngaih tak siah chuan Zu in mi chu kan hmu khawlo zo ta.. Zu rui ve ngai lo zu in thiam tak pawh kan hmu tha chuang lo va, Zu chu sualah kan ngai ta ngawt mai a ni. Zu hi a sual reng em? khawvelah hian Zu sual tihna ram reng an awm em? Sakhuanaah pawh Zu chu sual a ni titu sakhua a awm reng em? Baibul chuan Zu sual a tihna a awm lo va, Zu ruih a phal lo mai a ni. Zu chu ruih kher tur a ni lo tihna a ni. A tawp ber atan:

Zu in kan thiam loh phah chhan leh kan ruih buai chhan hi kan missionary te vang kha em ni?

Zu hi khap ni ta lo se, kan rui reng peih ang em? kan in thiam phah zawk long maw?

Zu hi khap ai chuan a in dan thiam tura in zirtir chi zawk a ni lo maw?

State pawnah chuan Zu an lo khap ve tawh si lo va, Zu khapna rama awm te chuan Zu zalenna kan chen thiam lo va, kan rui chhe mualpho fo em?

Zu leiruk nana kan sum sen ral hi a uiawm tham viau lo maw? kan ramah zu hi siam ve ila, sum lakluhna tha tak leh state pawna chhuak tur sum kan hupbehna tha tak a ni thei ang em?

Kristian ramah Zu khap a ngai tlat mai hi a zialo deuh. Kristian ramah chuan Zu rui buai awm ve lo zawk tur kan ni si a.. Khap ngailo khawpa zu in dan thiam society kan nih hun a va nghahhlelh awm em.. kan ngaihdan sawiho thei ila..

Similar Posts:

• Kerh Kerh…
• TLANGAU (Krismas ka hman dan tur)
• Zû…..
• Zu hi a khawngaihthlak letling
• Zonunmawi virus Zu – MLTP Act-in delete rawh

Recent Posts:

• Health minister bàn turin CM ngen
• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan
• KOHHRAN PAWL HRANG HRANG LEH AN DINHMUN TLANGPUI

This entry was posted on Sunday, January 6th, 2008 at 2:50 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.