mi(sual).com

– Ramhluna Hnamte, Directorate of H&TE.

TECHNICAL ENTRANCE BOARD A PIANG TA:

Tun hma deuh kha chuan technical lam medical/engineering zir tur chuan PUSc/XXI(Sc) a mark hmu sang apiang kha sorkar in kan seat neih na institution ah a tir mai thin a. Khatiang khan hun engemaw chhung chu kan kal a nih kha. Khawsak te a in chen loh avangin mi tam zawk tan chuan lehkha zir tur a Zoram pawn a in tirh kha thil hautak zet mai a ni. Chutih lai in a awm thei ho chuan India ram a zirna hmun tha ber berah an fate an zir tir thei a, HSLC leh PU/Class XII ah te mark percent sang tak tak an rawn hmu thei thin a ni.

A chik mi ten an sawi dan in state thenkhatah hi chuan mark hi an pawk viau hlawm a, an institution a lut te pawh in mark percent sang tak tak an hmu thin a ni. Mizoram hi chik mite sawi dan in mark ren berna pawl a ni awm e. Chuti a nih avang chuan ram pawn a zir ve theilo zirlaite chuan mark percent sang an hmuh ve theih lemloh lai khan ram pawn school tha a lut ho khan PUSc/ XII(Sc) ah te chuan 90% vel te kha an rawn hmu ta thin a. Khang hun lai a Technical lam zir tur an thlan dan kha mark percent sang a piang lak an ni thin bawk si a, Zoram chhung a zir,ram pawn school tha a zir ve phaklo te tan kha chuan a ngaihna a awm hlawl lo a ni ber mai. Tichuan MZP te hma lakna ngai pawimawh in Sorkar in Technical lam zirna lam a tan liau liau Selection Board a din thar ta a. ‘Mizoram Selection for Higher Technical Studies Rules 1999’ siam in Technical Selection Board chu Higher & Technical Education hnuaiah a lo ding ta a,1999 atang khan kum tin Higher Technical Entrance Test an lo buatsaih ta a ni. Hetia Entrance test kal tlang a medical leh engineering (technical studies) lam zir tur thlan a lo nih tak hnu hi chuan PUSc emaw Class XII(Sc) a mark percent sang tak tak hmuh ngawt khan kori a tu ta lemlo a, a pawimawh ber zawk chu kha entrance test a an tih that leh that loh kha a lo ni ta a.

Tichuan PUSc/ClassXII(Sc) a mark percent sang tak hmute pawh kha percent sang lemlo te pawh khan an lo khum thei ta tlat mai a ni. Hei hi a chhan ber pakhat chu College/Plus 2 a an exam dan phung leh Entrance test a an exam dan in an loh vang a ni. Entrance test ah hi chuan Objective type deuh vek a zawhna siam a ni a, thai dik te leh short answer ang chi te a ni deuh ber. Thai ‘risk’ a dik pawh kha risk pawh ni se a dik miau chuan mark a hmu tlat, negative marking kan la hman loh miau avangin. Mi thenkhatin HSLC/Plus 2/PUSc exam na a anmahni tluk ngailo te Entrance test a an ai a an ti tha zawk tlat hre thiamlo deuh te pawh an awm thin. Mahse sawi tawh ang khan Entrance exam leh School/college a in exam dan kha a in ang lo a, khaikhin chi a ni lem lo.Tun hma khan XII(Sc) / PUSc results chhuah tlai deuh thin avang khan entrance exam results hi a chhuak hmasa thin a. Entrance exam a top 10 a lang pha hial te pawh kha an school/college results a lo chhuah a lo ‘fail’ leh tlat thin te kha an awm a, an khawngaihthlak thin hle.

Hei hian exam dan phung a in an lohna chu a ti fiah mai awm e. Tunhnuah hian XII(Sc) results an ti chhuak hma leh ta thung a, entrance exam kan buatsaih hma in results te a lo chhuak ta thin a, exam tum ve ran ran te kha an lo ‘fail’ leh ta thin si a, application form an lo lei tawh ‘refund’ min han dil leh ta thin a, a buaithlak hle. Pek loh ngawt dawn in in delhkilhna mumal kan lo nei rih silo a,kan han ‘refund’ leh ta thin a. A thuhrimah ‘risk’ la in application form an lei a,an fill-up a,an thehlut tawh a ni a,’refund’ leh han dil hi thil mak tak a ni, institution/office dangah an ti ve ngai em, ka hrelo. Kan dam ang a, entrance exam hi kan la buatsaih zel dawn anih chuan refund theih loh dan hi siam vat tum a ni.

ENTRANCE EXAM LEH A BEHBAWM:

Entrance exam hi May thla chawhma(second week) ah neih thin a ni. 1999 khan objective 50% leh descriptive 50% niin English, Physics, Chemistry, Maths leh Biology te hmangin written test neih a ni.2004 atangin English paih a ni ta a, PCB leh PCM atangin,descriptive awm tawh lovin objective hlang a zawhna siam tan a ni. 2006 ah MBSE syllabus thlak a nih avangin Entrance syllabus pawh old & new course tan rual khai zawk a syllabus siam rem a ni. 2008 hian MBSE syllabus new course chu hmangtu an tam tak avangin Entrance syllabus pawh thlak danglam a lo ni leh ta a ni. Tunhma deuh kha chuan Entrance exam hian ni 3 lai te a awh thin a, 2004 atang khan ni 1 a zawh vek a lo ni ta a ni. Entrance exam hi ‘strict’ theih tawp a conduct thin a ni a, police venna karah leh Observer te thlirna hnuaiah neih thin a ni.

Question kha answer paper a ni nghal a, submit leh nghal vek a ni. Candidate te question kha thuhmun vek ni mahse a number thlak danglam vek a ni a, thu dun in in entawn pawh tum se thil theih loh a ni. Tin, candidate te hi he tiang exam ah chuan an inentawn ngai lo khawp mai, a bul a mi khan a aiin a ti tha ang tih hlauhna kha a nasa bik em thin a. Roll number hi code pek vek a ni a,answer paper hi examiner ten an endik a, an scrutinize vek hnu ah an decode leh vek a, code thar an pek hnu ah tabulation tih a nih hnuah results puan theih tur a peih a ni chauh a ni. Heng hnate hi Examination cell a thawk ten fimkhur takin an thawk a ni.

Question hi College leh Plus 2 science zirtirtuten uluk tak a an set a ni a, a endiktute pawh College leh Plus 2 science zirtirtute hman an ni a, kum tin a theih hram chuan thlak kual an ni thin. Results hi up rei loh hram tum a ni thin a, cross checking, rechecking ngun tak a tih a nih hnu a, Board meeting koh a ni a, an nin an en vek hnuah Concerned Minister approval lak a nih hnuah results hi tar chhuah a ni chauh thin. Results a lungawilo te tan results chhuah atanga kar khat chhungin an paper en an dil thei bawk ang.

RESULTS:
Results atang hian a ti tha tha kha Board hmaah koh an ni a, hetah hian counseling neih a ni a,nu leh pa emaw chhungte nen a kal tur a beisei an ni. Hei hi interview a ni lo. A ti tha tha koh hmasak an nih angin institution tha/seat tha an chang thei a ni. Seat return emaw kal leh duh lo emaw an awm in a dawt a mi chiah kha offer phawt an ni a, chu chuan a duh loh chuan chumi dawt leh a mi chu offer leh thin a ni,chutiang zel in. Kar hla tak a mi offer an ni ngailo. Fair tak a exam hi conduct a nih ang bawkin fair tak bawkin paper check a ni a, fair tak a results hi buatsaih a ni. Candidate in a chanvo dik tak a chan hi Board duh dan a ni a,chutiang chuan tih thin a ni. Tumah duhsak bik a neih theih loh a, a thiam chu an lang mai a, thiamlo tan lan ve theih a ni lo.

A tlangpui thu in engineer lam aiin medical group hi an tam zawk fo. Kumin pawh hian engineer lamah exam 377 an awm laiin medical lamah chuan 657 zet an awm niin a lang. Heng 600 ai a tam mah te hian a tam zawk chuan an first choice chu MBBS a ni deuh vek, mahse MBBS seat chu kan sawi tawh angina 36 chiah a awm. Chuvangin medical group a exam beitu 600 chuang atang a a thiam, top 36 te khan MBBS chu an chang dawn tih na a ni. Chutiangin engineer lamah pawh a ti tha apiang khan engineering institution tha an thlang thei dawn tih na a ni. Gujarat state ah chuan BE zir tur ten XII(Sc) ah Biology subject an neih a ngai.

FORM FILL UP:
Form fill-up laiin an duh duh course 10 an thlang thei a, first choice bakah zir duh dang,zir duh dan in dawtin ziahna column siam a ni a, heng column ah hian kan zir duh ber kan lo zir theih loh pawh a alternative kha ziah tur a ni. Heng column a ziah lan te atang chauh hian zir duh ber hmuh loh palh pawh a zir tur alternative a thlan theih a,an ziah lan loh chu pek theih a nilo.

Kum 17 atangin Entrance hi a exam theih a, kum 23 an nih thleng pawhin a exam theih a,ST/SC tan upper limit 5 years relax theih a la ni fo. Tunhnai a a titha top 10 a lang ho te kha thenkhat chu an vawi 3 exam na a tlingte an ni hlawm. Entrance ti turte hi Mizoram mi leh sa ngei emaw Mizoram sorkar rawih fa te ngei an nih leh nih loh hriat na turin Epic card emaw Identity card rintlak tak kan phut kher thin, hei hi a chhan chu ram dang miin kan state quota min lo eiruk sak tur ven nan a ni.

Entrance exam tur hian Zoram pawn Plus 2 institution emaw college emaw a kal ai chuan Zoram chhung ngei a kal hi a tha mah zawk in a hriat, a chhan chu heng entrance zawhna te hi Mizoram zirna standard leh syllabus ang a set a nih thin avangin. Coaching pawh hi ram pawn ai chuan Aizawl ngei a kal hi kan state technical entrance ti turte tan chuan a tha mah zawk in a lang bawk. Hei hian kan ram sum state pawn a luang ral tur pawh tlem a zawng chu a veng ve ngei ang. Amaherawh chu a exam tur leh nu leh pate ngaihdan ni sela.

THIL HRIAT TUR PAWIMAWH TE:

Candidate te hi category 3 ah then an ni a. Category I hi ram leilung fate an ni a, Category II hi hnamdang, Mizoram state sorkar rawih(State government employees) fate, category III hi Central sorkar hnuai a Mizoram a thawk(Centra Govt.employees), Pushpak, Telecom, University etc a thawk fate an ni. Category I hi dah lal ber an ni a, an ni hi duhtlan tir hmasak an nih hnuah category II leh III te hi koh an ni ve chauh thin. Hriat tur pawimawh dang leh chu position in ang chung chang hi a ni. Position in ang an awm chuan Medical lam ah chuan Entrance exam a Biology a mark hmu tam zawk kha sang zawk a ngaih a ni a, Engineering ah pawh Maths a mark hmu tha zawk kha sang zawk a ngaih a ni bawk ang. Chuta an la in ang leh zel a nih chuan kum upa zawk kha duhsak an ni ang,a naupang zawk chuan chance a la nei zawk a ngaih a ni.

MAK DEUH CHU:

Thil mak deuh pakhat chu local TV leh news paper a notice leh advertisement kan en tha peih lo lutuk hi a ni.Admit card lak theih hun te, exam hun leh a kaihhnawih thil pawimawh hriat tur te kan bengkhawn peihlo lutuk hi a pawi thin. Tun tumah pawh kar khat chhung admit card lak chhuah hun kan hawng a, thingtlang chu thu hran nise,khawpui chhung a mi leh zel te pawhin lak hun pelh hnu a admit card lak chhuah tum a min tibuai an tam lutuk kha a mak a, hna chuangtlai min pe bawk. Mak leh zual chu exam dawn minute 5 vel la awm thleng a admit card la la lo an awm te kha a ni, min thamlo nge an at vang, ka hrelo. Mak dang leh chu admit card tibo ho kha a ni.Kha entrance exam na tur admit card kha rangkachak tola 50 buk ai pawh in khatih lai kha chuan an tan a hlu a, mahse an tibo thei tlat. Tun tumah khan candidate 900 chuang an awm a,admit card tibo 20 dawn an awm a ni awm e. Khang ho kha engineer emaw doctor emaw engemaw pawh lo ni se, an rawn tlak awm loh mang e tih hi ka ngaihtuah thin. Heng hian thil kan lak serious loh zia a ti lang a,kan vei tak tak lo a ni tih a ti chiang hle.Chuvangin kan in enfiah a tih tak tak a thil kan tih a tan kan lak hi a hun ta e. Technical lam thiamna zir tur a kan tirh chhuahte hi an tam ve tawh hle a,zo tawh leh zir mek leh zir tan chauhte an ni.Mak ve tak chu heng zirlai zozai zing atang hian ‘Feed back’ kan hmu ngailo hle a, zirlaiten Nodal department ah feed back pek na chang hria se, hma lak zel dan pawh hriat thiam a awl deuh ngei ang.

Han sawi tel hram ka duh chu Technical Education hnuaiah hian Technical Entrance exam bakah NERIST entrance exam te pawh a awm a, kumtin April thla ah neih a ni thin. Tin, Women Polytechnic Aizawl leh Mizoram Polytechnic Lunglei ah Polytechnic zir duhte tan May thla chawhnu lam hian entrance exam neih a ni dawn a, kan ram chhung a ni bawk a, hre chiang duh chuan Principal te emaw H&TE office ah emaw zawh fiah theih a ni bawk ang.

Similar Posts:

• Technical Entrance Exam Result hi
• Technical Entrance Exam-ah Answer Key diklo a awm
• Technical Entrance Examination 2011 result a chhuak
• Tech Entrance & Parking Fee ‘Quo vadis’
• MNF-in HW training tur lak dan leh Minister fate MBBS zir dan an helh

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, May 19th, 2008 at 2:10 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.