mi(sual).com

Tumkhat Gauhati kan kal dawn tum hian Kolasib dai leimin kumhlunna Rengte tlangsang laiah chuan zun ram thiar pahin mei zukna kan neia. Ka thianpa Lalda-a (David-a) chuan Zanlawn mitthi ina kan zai ho lai khan (mitthi inahte kan zai khawmuang reng lah taka) pawn, kawngkhar bul maiah mei a lo zu a ni awm e.

Chu chu tualchhung nula pakhatin a lo khap deuh ni ngei tur a ni. Ka bulah chuan chu nula a ngei thu chu a sawi mual muala.

Kei chuan, “A hmangaih vang che a nih chu. A ni khan rawn hau lo che se lang chuan val upate’n emaw, a nih lohleh tlangval hawklak hovin an rawn khap ang chenga, I chaklo zawk daih mai ang. Chung chu a hriat avangin a rawn hau ngam che a nih kha. Lawm zawk rawh. A hmangaih vang che a nih chu,” ka lo tia.

Ani chuan, “Min hmangaih chuan ka han let leh anga, ka han fawp mai dawn,” a tia. Kei chuan, “A nih leh I u (Hmeichhia) paw’n a hmangaih che a, I fawp chuang emni?” ka tia. A ni chuan, “Tunge mahni ute fawp ngawng ngawng ngai?” a ti ta a. Kei chuan, “A ni reng asin. Hmangaihna hi fawh chi a ni vek kher lem lo.

Pathian hmangaihnate, nu leh pa hmangaihnate, unau in hmangaih tawnnate, thian in hmangaihnate leh nula tlangval in hmangaihnate a awma, chuvangin hmangaihna awmzia hi hriat a tul reng asin,” tih pah chuan hmangaihna awmzia chi hrang hrang hetiang hian ka hrilh ta hrepa:

“Hmangaihna tello chuan khawvel hi engtihna mah a ni lo. Hmakhua inngaih tawn sakna hi hmangaihna tak tak chu a nia, chu chu a tha lam thilah chauh a innghat thin. Thil engpawh mai hian a tak leh suak a neia, Pathian tak tak pawh a awma, chu chu hmangaihna Pathian a ni. A suak a awm leha, chu chu a lem leh a der a nia, Setana kan tih hi a ni. Chu chu hmasialna atanga intanin a tawp chu chhiatna a lo ni ta thin a ni.”

“Hmangaihna dik tak chu thinlungah a rawn tualto thin.”

“Hmangaihna chu tihlan emaw sawi chhuah emaw a nih loh chuan phurrit a nia, thildang aia hlutna a nei chuang lo. Puan chhuaha a lo awm emaw a nihna tur ang taka hman a lo nih hnu erawh chuan mihring nun atan chaw tha leh tui ber a lo ni thung thin. Tin, a kal sual theiha, kawng dik lo a zawh pui thei bawka, hmangaihna kal sual leh kawng dik lo zawh nunah chuan mualphona leh thihna hialin thla a zar thung thin a ni. Chuvangin duat leh chawm thiam a ngai.”

“Hmangaihna diktak zawng a kawng a bumbohvin a chhengchhe lo thei thin lo. Chuti a nih loh chuan mi’n hmangaihna chu a phu vanga hlawh chhuakah a ngai mai dawn sia.”

“Hmangaihna leh indona hmunah zawng ramri a kham theih lohva, kham zo turin chakna leh theihna an nei bawk hek lo.”

“Hmangaihna hi zawng a ruka upbo theih a ni ngai lova, a tawn a nain thununna a lekkawh thiam em ema, a ruk te nia mi’n an ngaih laiin a lo tlangau ring tawh hle thin a ni. Hmangaihna diktak uphlum hlen thei khawvelah hian pakhatmah an awm lova, siamtu ngei pawhin thuhrukna a siam telloh avangin hmangaihna Pathian ngei pawh a hmangaihte tan chuan a puahin a puak darh tawp mai zawk a ni. Hmangaihna tluka zep harsa hi a awm ngai lovang.”

“Hmangaihna hnathawh dan mak tak mai leh dangdai tak maite chu tuma han sawifiah phak chi a ni lo.”

“Hmangaihna dik tak chuan buklung a nei lova, tehkhawng lah a nei bawk hek lo. ‘Hmangaihnaah chuan engkim a awm’ ti ila a dik ber awm e.”

“Hmangaihna chuan a hmangaihte hmangaih pawh a hmangaih tel thin,”

“Hmangaihna chuan a hmangaih atan leh a hmangaihtu atan a thawk ber a ni”.

“Hmangaihna chu Pathian hnen atanga lo piangchhuak ani”.

“Thisen zawmpui kan nihna atanga hmangaihna a awm a, tin, kan hmuh leh kan hriat atanga hmangaina lo piangchhuak a awm thei bawk, tin, kan mi ngaihsan leh an khawsakziate, an hmel te kan duh tlat te chungah hmangaihna a lo piang thei bawk”.

“Hmangaihna chuan hmangaihna a phut let a…. a phut letin a thilphut a tihhlawhtlin chuan mi vannei a ni a, a tih hlawhtlin duhloh erawhchuan Hmangaihna vanduai a ni leh mai a..Hmangaihna hi thinlung lairil atanga rawnchhuak a ni a… Pathian Hmangaihna phei chu a thuk em avangin thisen chhuak hial khawpin Kalvari tlangah keini misual ho hi min tlan a ni.”

“Hmangaihna chuan a nuam emaw a hrehawm emaw pawh ni se, engkim a huam a ni,”

“Hmangaihna dik tak chu thikna tello a ni.”

“Hmangaihna dik tak chu engti kawng zawng pawha lawm zel nun a nia, lungawilohnain hmun a chang lo.”

“Hmangaihna hian amah mai chuan hlutna a ngah lovin awmzia a nei tam lo hle maia, a hlutna leh a ropuina hrefiaha awmze nei tak tak tur chuan hmangaihna leh hmangaihna chu a inhmuhthiam a ngai ani.”

“Hmangaihna dik tak chu a hun a zirin a nuiin a tap thin.”

“Hmangaihna in a dawhthei a, ngil a nei bawk thin; hmangaihnain a itsik lova; hmangaihna in a infak lo va, a uang lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh hu a lawmpui thin a; engkim a tuar hram hram a, engkim a ring a, engkim a beisei a , engkim a tuar chhuak thin. “(I Korinth 13:4-7)!!

“A chang chuan hmangaihna pawh hian nunrawn chang a nei,” ka tia. Hei erawh hi chu kan kal a hun leh tak avangin ka sawi hman ta lo.

Sawi belh tur nei chuan han sawi ve the u’n.

Similar Posts:

• Hmangaihna hi enge a awm zia aw?
• Hmangaihna hi enge a awmzia?
• Tu hmangaihna nge thuk ber ang?
• Khawinge Hmangaihna zawk niang le?
• Hmangaihna Ka Ngen ani

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, October 17th, 2008 at 2:01 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.