By Laltlanzova Khiangte
US President atana thlan thar Barack Obama thupui ‘Change We Need’ hi America ai mahin Mizoram hian a mamawh zawkin ka hre thin. Mizoram inthlanpuiah pawh ‘Change’ tih a ri nasa a, rorel tura kan thlan thar pawh ‘Vote For Change’ tih thupui pakhata hmang an ni. Hetih lai hian ‘change’ kan duh erawh chu a inang lo mai thei.
Rorel lai ‘change’ ringawt duhtawk pawh awm theih a ni. Rorel lai ‘change’ ni lovin ram inrelbawl dan phung a tha zawnga thlak danglam hi mipui rilrua lian ber a ni a, ‘rorelna tha (good governance) kan nei ta’ kan tih theih thlenga kan tihdan tha lo lai paih zela a tha zawnga change zar zar hi kan mamawh chu niin a lang.
Enge kan change ang?
Kan ramah hian change tur a tam em em a; vawikhata sawisen rual a ni lo. Mipui chanai eirukna leh induhsakna hleihluak tihbo a tul thu mipui thinlunga ri ring tak te, eizawnna nei lo ‘unemployed’ te tana kawng hawn a tulzia an sawi te, ram inrelbawl danah thuneihna insemzai a tul thu mithiamte’n tunhnaia nasa taka an sawi te, thingtlang leh khawpuia mi retheite khaichhuah a tulzia an sawite tihhlawhtlin tuma beihpui thlaka kan tih thin dan thlakdanglam (change) hi kan mamawh ta takzet a ni.
Kan ram hruaitute’n a tha lo lai paiha a tha zawng zela Zoram kaihhruai duhna thinlung an put chuan change tha beisei ila, sorkar hnathawk leh thlantlinte’n mipui chunga roreltu ni lo, mipui rawngbawltu an ni tih an thinlung tak taka an pawma, mipui tana thawk tura an inpek phawt chuan sorkar tha kan nei ngei ang. |hangtharte’n hnam dang aia hniam bik lo, an level-puia an inngaih theihna turte pawhin ‘change’ hi kan mamawh takzet a ni.
Kan ramah chuan ei leh bar dinhmunte hi change ngai lian ber pawl a tling. Pu Barack-a chuan an rama eizawnna nei lote leh ei leh bara harsate chu ‘ramdangah eizawnna dap rawh u’ a ti ve lo va, eizawnna bul tante tan an chhiah pek thin sang tak awl a tiam a, khawvel economy tlahniam thut avanga hna chân tam takte pawh an ram economy khai chhuah leha an thawh awm tawk hna pek leh a tiam a, an rama eizawnna nei lote ram dangah hnawt ve ngat se zawng President atan an thlang malêkin ka ring.
Keini chu America-te aia kan dinhmun a chhiat zawk avangin eizawnna nei lo tupawh, lehkhathiam emaw, thiam lo emaw, khawi kawng nge zawh tur tih sorkarin a kawhhmuh a ngai a, mi tam takin bultanna tur an neih loh avangin bul tanna tur sum leh pai a ngaihtuahpui a ngai a, bul an tan hnuah an hlawhtlin theih na’n a tanpui zui a ngai bawk.
Chutiang khawpa khaichhuah ngai dinhmun hniam chu Zoram dungtluanah hian mi tam tak an awm a ni. Eizawnna nei ve si, eizawnna hlawk lo tak chelhtu, chhungkaw chawmna khawp pawh thawkchhuak thei lo tam tak an awm mek bawk.
Ei leh bara dinhmun hniam avang hian mi thenkhat chuan ram leh khawtlang thatna tur pawh an ngaihtuah thei lo va, hei hian khawtlang pawh a tha lo zawngin thui tak a nghawng niin a lang. Sorkar thar lo piang tur hian eizawnna nei lote leh eizawnna hlawk lo lutuk thawk mekte dinhmun ‘change’ a tum beisei ila. Bank tam taka pawisa puk a harsa kikawi lutuk ringawt te pawh hi han su kaw deuh se eizawnna tur hria, bul tanna tur nei lote tan pawh a awlsam deuh tur a nia.
Tualchhung sorkar hmanga thuneihna insemzai an sawi thin pawh hi kan MLA-te chhawk hahdamna tur a ni satliah lo va, khawtinin mahni khua theuh hmasawnna tura tha kan thawh theih dawn avangin hma kan sawn chak phahin a rinawm a, mipui aiawhte’n mahni khua theuhah ro an rel dawn avangin mipui rorelna (democracy) tak tak thlentu tur a ni bawk a, government servant-te pawhin mipui servant hna an thawh tak tak a rinawm;
Tunah chuan sorkar hi mipui a ni tih ngaihtuah lo, mipui servant nih in hre lo hi an tam awm asin! India ram sorkar laipuiin Panchayat System leh Municipal System tha deuh mai a duang a, Mizote milin tlem a zawng ‘change’ ngai a awm tih mai loh chu copy chhawn tlak deuh mai a ni nghe nghe a; sorkar tharah chuan kan kal thin dan thlakin ‘local self government’ kan neih beisei ang.
State dangah chuan local self government hian sorkar hnathawkte leh state sorkar pawh corruption lakah a veng nasa khawp mai an ti a, keini pawhin tualchhung sorkar nei ila chuan mipuite’n kan khua theuhah sorkar hmalakna kan hriatchian theih dawn avangin corruption kan sawi thin hi tam tak chu a tihbo a beiseiawm. Mobile phone nalh tak tak, lirthei tha pui pui, fashion chhuak tharte nen kan infam tawh a, Village Council inzawmkhawm khawpuia chente hi a tihchi tawh loh alawm ti r’u.
Khawpui leh khaw tam lutukte pawh hi ‘change’ a ngai khawp mai. Pu Loch-a’n kum za chuang liam taa Hill Station atana a chei, plan mumal awm lem loa khawpui lo ni chho ta Aizawl-te hi a lo tawt ta lutuk a, mi fate’n New Delhi, Dispur an tih ang deuh hian New Aizawl din pawh a hun ve tawh lawm ni? Khâm zawng zawngte thlengin kan luah khat zo ta a;
Mizoram a zau tehlul nen Aizawl kawngpui a chep lutuk avanga kea kalna tur takngial pawh a tawt ta lutuk te, lirthei kalna indaih ta lo lutuk te, tualzawl nei mumal thei pawh kan tlem lutuk te, lirthei manto tak tak zan lama kawng dunga kan hung thliah thluah mai te, ram awl a tlem tawh avanga in hmun a to lutuk tawh te, dawr a awm belh tlem tawh avanga dawr luah man to lutuk ta te, kham panga in lianpui pui inzawm pet puta a bet fer fur maite hi a zia lo lam a ni ta. Mihring chen khawmna atan chuan a chep lutuk ta a ni. Khaw thar zuan a hun e.
He rama khaw tam lutukte hi hmasawnna daltu pakhat a ni tih kan hre tlang a, mahni khaw kalsan hrehawm ti kan tam turzia erawh chu a ngaihtuah thiam theih mai; mahse hmasawn kan duh chuan heti lutuka khaw tam chu hmasawnna thawh a ti har em mai.
Corruption leh induhsak hleihluakna nepotism-te phei hi chu ‘change’ ni loin, ‘destroy’ a ngai a ni. A nih leh vek pawhin kan ram atang hian hnawtchhuak daih ang u, min tibuai em mai. Kan veng emaw, kan khua emaw atang chauha kan hnawhchhuah chuan khaw dangah veng dangah a pem tho ang! Kan ram atang hian hnawtchhuak daih ila, a thak thaknaah thak rawh se.
Similar Posts:
- Sairang ah Life Guard??
- Eizawnna
- Kan Sorkar Chaktak
- Mizoram ah hian zai hi eizawnna tlak a ni em?
- Tuna Mizoram Sorkar ka hmuh dan
December 11th, 2008 at 6:05 pm
A tha khop mai. “Change” …. Change in every possible way for betterment is needed by each individual. If there is no change from within ourself, changes can’t take place. Let the change begin in ourself………
Report this comment
December 11th, 2008 at 8:08 pm
Change duh na zawng hian CHANGE dan an thiam, hre kher lo
Report this comment
December 11th, 2008 at 8:27 pm
Change duh tak tak chuan a pawn atanga change tum hi chu a hahthlak!!! A chhunga luh ve a ngai. Obama pawn tunah hian change a duh, mahse thuneihna a la nei lo. Nakkum January thla atang chauhvin a change tum chu a thei chauh ang. Chutiang tak chuan Mizoram change tur chuan Sorkarna chan chuan a theih. A dang atang chuan a har khawp ang. Sorkarna chang te hian an change kher ang em tih erawh kan lo thlir dawn ta e……..
Report this comment
December 11th, 2008 at 9:04 pm
Change rau rau ah Nupui / pasal Change hi chu tih miah loh tur, an ti. lal-pu-RTPA ‘n
Report this comment
December 11th, 2008 at 9:12 pm
UDA kan han tran viauna chhan kha Change an thlen thei dawn niin kan ngai a, pu thena vision atangin. Amaherawh chu an tling zo ta si lo a, Pu hawlte-a te hian change thlen tir na chang hre tur ah ngai in beiseina nung nen i lo thlir leh pauh mai teh ang u!!!
Report this comment
December 11th, 2008 at 9:17 pm
Ni e tiraw lal-wonder, Pu Hawla pawh hi pa tha tak chu ani a. Change chu min rawn siam sak se ka ti khawp mai. NLUP ringawt piah lam ah hian.
inthlan result chhiar ni kha chuan, lal-pi-amanda, lal-spikey, lal-pu-zorunpuia te ankhawngaihthlakawm ngawt mai
Report this comment
December 11th, 2008 at 9:42 pm
pu thaiboy-a a lawm thung alawm!!! bhavan kawt a khuangpui vua a alam laite pawh t.v ah a lan kha
Report this comment
December 11th, 2008 at 9:42 pm
Ziak tha khawp mai Laltlanzova…ram veina rilru nen a thuziah hi chu chhiar a nuam bik a ni.
Report this comment
December 11th, 2008 at 10:25 pm
Ni zan khan Silchar Mizoram House ah ka riak a;a mak amak tam khumfa zu han awm a mawle !!!! Kan sawrkar thar hian khung khumfa ho khu ngai pawimawh hmasa se a tha; ruling kan ni tih kha khumfain an hre ve lo aniang min seh hrep…
@Wonder; kei ai mah chuan khawlai mipui te hi an lawm asin; change awm tir tur chuan thil sual chiang lutuk kan hmuhin ngawi mai mai tawh lo ila; mi diklo chu CM pawh ni raw sek sek vam hmiah hmiah ila kan ram chu a tha mai ang; eiruk hmangte mi zahawm ber ber ah an tran leh chuan change a awm chuang lovang.
Report this comment
December 11th, 2008 at 11:57 pm
Amen @ thianpa CHANGE turin thiehtawp i lo chhuah kan beisei
Report this comment
December 12th, 2008 at 12:06 am
@Thaiboy Cong an sorkar chhung hian kan nunphung/ Pu.Zova rawn ziak zing a mi a bikin Corruption/hleihluak tak a induhsakna/ chhungkhat laina,partypui,kohhranpui,Chipui etc khi destroy ngei2 chi, mi thiam leh phu te chauhin hna ruak poh hnawhkhat rawh se,mirethei ten an chanvo dik tak chang se,development fund reng2 a hmanna tur dik takah hman nise,Sorkar hnathawk inthlahdah tak2 te control turin CM leh a hoten entawn tlakin hna thawk se, check peih bawk se. Cong in an destroy theih loh chuan @Zorunpuia Cm ah kan thlang ang a, @Spikey, wonderboy,luliana,HV-a te nen kan la chhuchhe vek ang, a hun erawh a la rei deuh mai thei a ni.
Report this comment
December 12th, 2008 at 4:56 am
Change thlentir tur chuan Vision a awm hmasak a ngai a. Vision chu a taka a lo chan theih nan, thawh a ngai a, thawk tur chuan taimak a lo ngai a. Mi taima leh tumruh tan lo chuan Vision pawh nei se, awmze nei lo a ni. Congress pawhin a tlachawp tactic hmang bawka ram an hruai leh chuan change chu hruaitute nihna chauh a ni ang a, a rahchhuahah erawh hmuh tur a awm chuang kher lo ang. Chuvangin Change a lo awm theih nan vision an neih hmasak zet a, chu chu a taka an thawh a, taimakna nena an chawm len chuan he Zoram hian hma a sawn thei chauh dawn a ni. A theory a ram hmasawn tir hi a har lo va, tu pawh an thei vek ang. Mahse a taka chantir ber hi MNF pawhin an hlawhchhamna ber chu a ni a, sawrkar hmasa congress lal lai pawh chuti tho.
Kum 10 ve ve an sawrkar a, chuta an thawhrah lang sar zual zinga Lengpui Airport leh Mizoram University hi a ni ber mai awm e. A dang chu vision pawh ni lem lo. A tlachawpa thuam that ve nawk nawk, a chhe lai lai thawmphui ang vel lek a ni hlawm.
Congress sawrkarna hmasaah khan thil tihsual an nei ve nual a, chumi zingah Engineer te hlawh tihpun chungchang a ni a, a taka an chantir hmain MNF an rawn sawrkar a, an nin rem ti lo mah se, court lamah an zualko a, court chuan thiam chantirin Sawrkar chu an hlawh a tihpun luih tir a, chumi rah chu an level pui Group A te tih lungawih loh a ni a. Kan buai phah vak a nih kha.
Chutiang deuh bawk chuan MNF chuan an sawrkar tawp dawn tepah district pakhat mai pawh ni lo, pathum ngawt mai a rualin an han pe ngawt mai pek a. An thil hnutchhiah hi sawrkar lo awm tur tan chuan huphurh awm tak a ni a. District pakhat tan chauh pawha senso tam zia leh hautak zia hi State pachhe tak leh laiba nena in enkawl tan chuan thil tih awm loh tak a ni a. Mahse, an sweet mum sem mai mai te pawh a ang a. A nihna ang taka thuam a nih hmain party dang an sawrkar ta bawk si a, a luhai thlak ngawtin ka ring.
Congress an tlak hmasak khan Leiba tam tak an hnutchhiah a, Pu Hawla thupui ber pakhat pawh “Laiba ngah hi changkanna” tih tawngkam te pawh a lar viau reng a nih kha. MNF an han sawrkar a, Laiba tam lutuk chungchangah an lu a hai hle thu Zoramthanga pawhin a sawi fo a nih kha. Tunah hian MNF hian engzatnge Laiba an kalsan tih hi hriat a chakawm hle mai.
Report this comment
December 12th, 2008 at 10:12 am
Thil nuihzatthlak ve deuh mai chu, Tanhril Pitar pakhat hi Kum 7 vel kal tawh atang khan , ka nu hian a pui thin a, a sumdawnna tur te a buatsaih a, eng eng emo a tih sak a, an din chhuak thei miah lo a, chuta chhap ah afapa a thi leh nghal a, A tute sikul tha ve deuh a an kal theih nan thla tin Rs 1000/ hi ka nu hian ape thin a. Inthlan dawn khan. Result puan zawh ah khan a lo kal leh a, “Pi Rii hnenah kan han kal a, pawisa kan han dil a, kumtharah lo kal rawh u a ti a” a rawn tin a, Ka nu chuan, a engvang chuan pawisa in han dil ngot nge, a hria che u em ni?? a lo ti a, ee Cheng 2 tkt kha hei ka lei ve a, Congress ka vote ngei a, mintiam angin Cheng nuaikhat kan han dil, a ti a, a ticket chu a kawl tat a, tiin ka nuin min rawn hrilh a, ka khawngaih ang reng si a, ka nuih a tiza bawk si a. Khatiang vela bum theih kha kan la tam a, chuvang chuan awareness hi chu kan mamawmh khop mai. He sawrkhar hian tiam ang a, mirethei te chawikan leh, corruption tihbo hi an tih loh chuan, mipui hi zirtir nasat kan la ngai khop mai. Beidawn mai lo in la, in hrilh tam hrim hrim hi a ngai in ka hria.
Report this comment
December 12th, 2008 at 10:53 am
Airport leh Mizoram Univeristy hi chu MNF sorkar hma pawh khan an plan tawh tho in ka hria. District thar an siam teuh hi chu kan Sorkar sum dinhmun a ti chau leh zual in ka ring.
Report this comment
December 12th, 2008 at 12:59 pm
@hltau, i han sawi cheng 2 ticket hi ka thianpa pawhin min hrilh a, thil dik a nih ngat chuan Congress sawrkar dan hi a tenawm hlein ka ring. Malsawmna pawh an neih ka ring lo va. Lungngaihna ruamah min hnut luttu an nih vaih chuan a chhuah leh a har khawp ang.
Report this comment
December 12th, 2008 at 1:48 pm
lal-pu-zorunpuia hi sawi tha thei hluam hluam khawp mai
Kan ram vei hi chu a awl khawp mai a. kan ram tan vision tha deuh deuh hisap chhuah pawh a har lem lo. Kan ram politician ah pawh chutiang chu an awm mai thei, mahse, han luhchilh chiah hi chuan hisap ang ngawt hian thiltih hi ahar talh zel bawk sia 
Report this comment
December 12th, 2008 at 2:05 pm
mizo ten change kan mamawh em em chu, thil ngaihsamna hi ani.
ngaigsamna hi thil tih dik, dikna in i change ang u.
Report this comment
December 12th, 2008 at 2:12 pm
Sawrkar thar an din dawn leih leih chauh a ni a, lo thlir phawt mai ila huapzo sawrkar turah i beisei phawt ila …..Pathian ram an din dawn lo tih hi hre tel bawk ila. tin, mihring ve tho an ni a, thawklehkhatah ram hi an ching fel duak duak thei bik lo vang.
Mi thar an tam bawk si…..thla ruk tal an inzir ve ang chu.
Report this comment
December 12th, 2008 at 3:26 pm
@ htlau – Rs 2 Ticket chu scan emaw a thla lak nen rawn post la, a va tha awm ve….
Report this comment
December 12th, 2008 at 3:40 pm
ticket tih lemah membership fee pekna receipt ani ang. zopatriot enge post a thatna tur?
Report this comment
December 12th, 2008 at 4:06 pm
@ htlau: Pi Rii i tih khi Lal Thanhawla nupui hi ami? Ka va han awih hlei love aw…
engpawh nise, nia… i ticket sawi chu hmuh a chakawm hle mai..
Rs.2 ticket nuaih chuanga thleng theihna tur sema tling an nih chu ka ring lo deuh. Ticket nei an tam dawn eee mai, chutang a lo awm anih chuan khati zat Rs 2 ticket chu MPF, NGO, etc khan an hria in an haichhuak ngei² ang… kei misual rindan ve mai² chuan..
Report this comment
December 12th, 2008 at 4:40 pm
@ Eve – Ticket chu eng ang nge ka hriat chak vang a ni a. membership ticket te a nih chuan ngaihdan te poh a dang deuh ang.
Report this comment
December 12th, 2008 at 6:20 pm
=====
“Pi Rii hnenah kan han kal a, pawisa kan han dil a, kumtharah lo kal rawh u a ti a” a rawn tin a, Ka nu chuan, a engvang chuan pawisa in han dil ngot nge, a hria che u em ni?? a lo ti a, ee Cheng 2 tkt kha hei ka lei ve a, Congress ka vote ngei a, mintiam angin Cheng nuaikhat kan han dil, a ti a, a ticket chu a kawl tat a
=====
hetiang sawichawn, proofna awmlo, election, politic thuisawi hi sawi tam loh a tha khawp mai.
Report this comment
December 12th, 2008 at 6:39 pm
I thlan dawn a pawisa / thil in pek vel sawi tak ah chuan. Hmanlai thil a ni tawh bawk a kan sawi ve mai mai ange
Kan biala party pakhat MLA candidate chuan, Min vote ula football leh jersy ka pe ang che u a ti a. Min pe ta a. Party pakhat candidate in, chutiang bawk chuan a rawn ti leh a. Kan nei tawh kanti duh lova. Ani pawh chuan min pe leh a. Party dang pakhat candidate pawn chutiang bawk. Jesry leh football kan nei ta teuh a sin le
Kei phei chuan vote kan la nei lo lenghal 
Hetiang vel thil in pek vel hi chu politics dan eawm ka lo ti mai thin a 
Report this comment
December 13th, 2008 at 3:39 pm
Obama senate seat replace natur ah chuan vai ho an lo in rawlh nasa ve hle ani awm e. Khawvela ram corrupt ber pawl chhuak nge nge an zia an thlak thei meuh lo anih hmel. https://www.foxnews.com/politic.....ich-probe/
Report this comment
December 13th, 2008 at 4:23 pm
Illinois hi US a State corrupt ber a ni hrim hrim. Mahse, corrupt ber e tilo chuan Governor pawh an man mai. Mizoram ah chuan minister fa te pawh an man ngam lo. Governor phei chu an Pathian biak lo chauh ang chu mawle.
Report this comment
December 13th, 2008 at 6:19 pm
An state police ho nilovin FBI in a lawm man, India ram anglo takin koh luh chawp an ngai velo ni awm tak ani. Mizoramah chuan CBI koh luh kha an in sawi theih siak thin kha
Report this comment