1st. Monday: Zanin khan Aizawl South-III biala Falkawnah Police-ten PAMRA President, B. Zorampara leh PAMRA hruaitu dang 3 an man.
2nd. Tuesday:Seat 40 awmna, Mizoram Legislative Assembly Member tur thlanna atana tukin zing dar 7 atanga vote thlak chu tlai dar li khan boruak tha leh muanawm tak hnuaiah zawhfel a ni ta a, Mizoram khawi hmunah mah thil duhawm lo thleng a awm lo a, kum dang zawng aia vote a tla tha in 80.11% lai vote hi a tla a ni.
3rd. Wednesday: Zanin dar 6:40 vel khan Hunthar venga Forest Check Gate bulah scooter (MZ 01A-3043) leh Taxi (MZ 01B-5086) an insu a, scooter khalhtu Vanlallura (28) S/o Zaitawna, Dinthar II chu damdawi in thlenpui a nih hnuah a hliam tuar lovin zanin dar 7:45 vel khan a thi .
4th. Thursday: Mizoram Writers Association (MWA) Annual Meeting chu vawiin khan PIB Media Centre-ah neih a ni a, nikum chhunga Mizo tawnga lehkhabu lehlin tha bera an thlan, King Solomon’s Mines letlingtu, Pu Chhanmawia Royte hnenah lawmman an hlan.
5th.Friday: Mizoram Public Service Commission (MPSC)-in Mizoram Police Service (MPS) hna ruak 10 hnawh khah nana exam a buatsaih result, vawiina a puan takah chuan Lalthangpuii Pulamte, Mission Vengthlang-a Pu Lalkhawlien fanu chu pakhatna a ni a, amah hi MPS Officer atana hmeichhe tling hmasa ber a ni.
6th. Saturday: Chiahpuam pawisa chungchang chhuitu, Police te chuan Chiahpuam atanga a pung pek kir cheng 4,500 vawiin khan mi pakhat hnen atangin an dawn belh leh a, hemi nen hian tun thlenga Chiahpuam pawisa, Police kuta lut tawh zat chu cheng nuai 438, sing 5 sang 8 leh 480 a tling tawh a ni.
7th. Sunday: Vawiin kha Bible Sunday a ni a, thupui ‘Nun kawng dik kawhhmuhtu – BIBLE’ tih chu Kohhran hrang hrangah zir ho a ni.
8th. Monday: MLA inthlan result puan a ni taa, a pumpuiah Congress-in seat 32 lain an chak chiang hlea; MNF-in seat 3 lain an dawta; UDA thawhpui MPC leh ZNP-te’n seat 2 ve ve lain an dawt leha; MNF thawhpui MDF-in seat 1 an la ve bawk. Congress President Pu Lal Thanhawla chu a dinna bial hniha a tlin laiin CM nilai Pu Zoramthanga chu a dinna bial hniha a tlak veve avangin vawiin tlai dar 3:45 khan Governor hnenah banna thehlut nghalin Governor hian sorkar thar siam a nih hma chu sorkarna lo chelh rih turin a ti.
9th.Tuesday: Aizawl East District UPC, North East India, chuan vawiin atang khan Ramhlun South-a District Hqrs Biak In-ah District Board meeting an nei.
10th. Wednesday: Nula Ruth Klein, Israel ram atanga Mizoram Judaism-te thil zirtira hun engemaw chen chama rawn kal chuan vawiin khan Israel ram panin Mizoram a chhuahsan ta.
11th. Thursday: Congress Party President Pu Lal Thanhawla chu Mizoram Chief Minister atan vawiin chawhnu khan lak luh a ni. CM rual hian Cabinet Minister 2, Pu R. Lalzirliana leh Pu H. Liansailovate pawh lak luh an ni.
12th. Friday: Mizoram Tennis Association (MTA) buatsaih, 1st Mizoram Junior Tennis Championship 2008 chu vawiin khan Ramhlun Sports Complex-a Tennis Court-ah khelh zawh a ni a, kum 18 hnuai lam-ah Lalhruaitluanga, Ngopa Tennis Club chu a Champion a, kum 12 hnuai lam-ah Zothangliana, Thenzawl- a Champion a, kum 14 hnuailam-ah Vanlalruata, Ngopa Champion a, hmeichhe kum 18 hnuai lam-ah Lalengmawii, Thenzawl a Champion bawk.
13th. Saturday: Rural Development Minister hlui, tun tum inthlana tling zo ta lo, Pu H.Vanlalauva chuan kumin Assembly Inthlanpui-ah khan Pathianin MNF sorkar leh a remti lo niin vawiin khan a chenna inah thuthar lakhawm tute a hrilh.
14th. Sunday: Tukin zing dar 2 vel khan Mizoram Excise & Narcotics Deptt. hnuaia Anti Narcotic Squad chuan Sairang Road-ah Lalneihkimi kum 32, Remthanga fanu Dinthar Veng, Aizawl nia insawi hnen atangin proxyvon mum 423 an man.
15. Monday: Chief Minister Pu Lal Thanhawla’n ei rawngbawlna Gas-ah VIP Quota tihbo vek a nih tur thu vawiina Congress Thalaite’n MLA thlan tharte lawmna Congress Bhawan-a neihah a sawi.
16th. Tuesday: Vawiin khan Synod Multipurpose Training Centre (SMTC) chuan Vocational Trainees thlahna hun an hmang.
17th.Wednesday: Mizoram Synod Pa tia sawi ngam, Mizo tawnga Bible lehlinna leh Kristian sakhaw thil leh ram leh hnam hmasawnna atana Mizote tana mi tangkai leh kawng tam taka sulsutu, Rev. Dr. Zairema (92) chu tukin zing dar 6 khan Aizawl Zarkawta a chenna Inah lungna avangin a thi.
18th. Thursday: Vawiin chawhma dar 11:00 khan PSLC, MESLC leh MSLC result- te chu tihchhuah a nia; PSLC-ah 88.84% in an pass-a; MESLC-ah mi 86.81% in an pass bawka; MSLC-ah mi 78.86% in an pass bawk.
19th. Friday: Salem venga Pu Lalthakima-te chhungkaw feh tur kal chu tukin khan Chekbawk rama Power ban atanga current kalin a man a, chhungkaw pa ber, Pu Lalthakima (38) chu a hmunah a thi.
20th. Saturday: Mizo Zaimi Inzawmkhawm (MZI) chuan vawiin khan Tanhril Central Jail-a tangte tan Advance Krismas an buatsaih a, nilengin intihhlimna hun an hmang a ni. He hun hi MZI Vice President, Pu D.Lalthangvunga’n a kaihruai a ni.
21st. Sunday: Vawiin khan Mizoram Synod hnuaia Sunday School zirlaite chuan kumin chhunga an zirlaite exam-na an nei. Hetih lai hian Synod Comt.-in zirtirtute leh puitling dept. lam exam an titawp ta mai chu pawi an tih thu an sawi hlawm.
22nd. Monday: Congress MLA, Pu Zodintluanga chuan kumin MLA Inthlanpui-a Electronic Voting Machine hman chu MNF sorkar laia chah thlen, sorkar thuneitute’n a him tawk an tih vek hnu-a hman a nih thu vawiina a chenna ina thuthar lakhawmtute’n an kawmnaah a sawi.
23rd. Tuesday: Mizoram Amateur Taekwondo Association (MATA) chuan an kum 20 tlin lawmna tana Souvenir an buatsaih chu vawiin khan Environment & Forest Department Conference Hall-ah MATA President, Pu Rosiama Vanchhawng-in a tlangzarh.
24th Wednesday: Pu Lal Thanhawla kaihhruai, Congress Ministry chu vawiin khan Minister 9 lak luh belha tihlen a ni. An hna chanpual erawh remchang danga siamfel tura tih a ni.
25th. Thursday: Khawvel suala bo hnu tlanchhuak tura Lal Isua lo pianna lawmna ni atan khawvel ramtina Kristiante’n an hman angin Zoram hmun hrang hrangah pawh hman a ni. Hetih lai hian Lunglei Electric Veng Presbyterian Kohhranin Krismass ruai atana an tih bawng chu misualin an lo ser saka; an buai phah hle.
26th. Friday: Krismass lawman ruai chu Kohhran hrang hrangah theh a ni. Lunglei Electric Veng Presbyterian Kohhran, an Krismas lawmna tur bawng bo vanga nimina buaite chuan hmun dang atanga sa leiin vawiin khan ruai an buatsaih thei tho a ni.
27th. Saturday: Kohhran thenkhatin Krismass lawman ruai an nawn hnuin sumdawnna dawr thenkhat chu hawn lehnghal anni.
28th. Sunday: Vawiin tlai dar 4 khan Rangvamual atanga Aizawl pana tlan Karizma Bike (MZ 01C-6815) leh Sairang lam pan, Truck (AF 01T-5669) an inpelh sual avangin Bike hnunga chuang, Zosangliana, kum 26, Ramthar Sihpui Venga cheng chu a thi.
29th Monday: Tun thla ni 24-a Cabinet Minister 7 leh Minister of State 2 lak luhte hna chanpual chu vawiin khan siam fel a ni a, hemi rual hian Chief Minister leh Cabinet Minister 2-te hna chanpual hemi hma lama lo siam tawh pawh tih danglam a ni.
30th. Tuesday: Vawiin kha kumin, 2008 chhunga sorkar pisa hawn ni hnuhnung ber a ni ta a, December thla hlawh lak ni a nih avangin office kal an thahnem thawkhat a, hnathawktu, Krismas chawlh laa an khaw lama haw an tam avangin ni dang ang erawh chuan pisa kai an tam lo.
31st. Wednesday: Vawiin kha kumin chhunga ni tawp ber ni a nia; tlai nit la hnuhnung ber thlir liam turin mi thahnem tak mahni veng a tlangsang laiah an fuankhawm hlawm. Kumdangah kumtawp leh kumthar inkarah puaktheithil hal an tam thin tih hriain sorkar hruaitute’n hetiang thil hal hun hi an siama; chuvangchuan tar leh nauno pawmte dem an hlawh hle. Sorkar-in khapna thupek reng reng chak taka bawhzui a tum thu a sawi laia hetianga a thupek ngei a sut leh hi mahni thu-a din ngheh ngam lohna nia an hriat thuan sawi hlawm. Puaktheithil hal hun siam a nih avang hian bazaar-ah pawh ualau taka zawrhchhuah anni.
Similar Posts:
- July 2008 Mizoram Diary
- June 2008 Mizoram Diary
- August 2008 Mizoram Diary
- December 2009, Mizoram Diary
- September 2008 Mizoram Diary
January 1st, 2009 at 11:05 am
good diary, ka hming ka lo zawng ve ringawt a, a awm miah lo, ka lo la lar lo hle mai…tang deuh teh ang
Report this comment
January 1st, 2009 at 11:53 am
bengvarthlak hle mai
Report this comment
January 1st, 2009 at 1:29 pm
Mi tam tak hi chuan kum thar hlimah hian diary an ziak ve bawk a, an peih kumtluan leh lo thin. Chutiang zingah chuan ka tel ve
Report this comment
January 1st, 2009 at 6:28 pm
RV ah halpuah vangin Biakin a kang tih te, Dinthar ah tlangval halpuah hal inchhawng atrangin a tlahlum tihte hi a dik em le. Geletine hal tum kut bubg hmawks poh an awm an ti News deuh in awm lo maw oooooooo
Report this comment
January 1st, 2009 at 8:03 pm
Halpuah in biakin a tikang a maw ? A va pawi ve !
Report this comment
January 1st, 2009 at 9:39 pm
US angah hi chuan halpuah hi field zau takah… halpuah chungchang hre bik ten… awmze nei takin mipui tan an hal thin. Mizoram ah pawh lammual anga te hian ti ve thin se a hmuhnawm bak ah, mipui in hlimna kan share thei zawk tur ania…mahni hmasial taka hal tu nih kher tumna kan nei tlat leh sawrkar in mipui safety a ngaihthah ah ka ngai tlat.
Report this comment
January 2nd, 2009 at 12:46 am
Hemi ka rawn post dawn hian kumthar tih ka lo chhu hmaih.
KUMTHAR CHIBAI VEK U
Report this comment
January 2nd, 2009 at 2:15 am
Haha..halpuah vanga Biak In a kan chuan an biakin chu di/dap hmanga sak em mawni dawn le..?? nge an hal nasa leh lutuk zawk aw..!!
Report this comment
January 2nd, 2009 at 4:35 am
chhana: kumthar chibai le
Report this comment
January 2nd, 2009 at 9:19 pm
ZONET website https://zonet.in/?p=1617#more-1617 -ah Kum thar zana chhitna thlen dan chungchang chu a awm…
Report this comment
January 2nd, 2009 at 9:20 pm
*chhitna = chhiatna
Report this comment