Nulâ chu kum 20 a ni a, tlangvâl chu kum 26 a ni. May thla chawhnu boruak nuam takah lui kamah an intawng a. Nulâ chu khawpui atanga lo kal a ni a, tlangvâl chu khaw te tak têa chêng a ni. Nulâ chu khawpuia seilian, mi hlim thei tak, hmeichhe simple leh rilru hahna em em nei lo a ni. Tlangvâl erawh chu a ngaihzawng nen an inthen avangin lungngai takin a thu kun reng a, midangte bula awm ai chuan mahni chauha awm nuam ti zawk a ni a, Pathian thilsiam mawinate pawhin a tihlim zo lo. Chu mite pahnih chu mi inang lo hulhual an ni.
“Hi!” tiin nulâ chuan tlangvâl chu a bia a. Nulâ chu hmeichhe pian nalh tak, a kum aia a hmel lang naupang zawk a ni a, mahse a hmai chu a dâng dal thung a, a mitmengah erawh chuan hmeichhe hlim thei tak niin a lang. Savun lukhum uk mawi tak a khum a, a sam mawi tak chu lui kama thlifîm tleh chuan a chhêm lêng siau siau a. Tlangval chu lui kama theihai kûng hnuaiah a thu a, a nghakuai chiah bak chu engmah a ngaihtuah miah lo emaw tihturin lui luang chu a thlir ngawih ngawih mai a ni.
“Hi!” tih rî a hriat chuan lungawi loh hmel takin a han lehhawi a, phur loh hmel takin “Hello” a lo ti ve sup a.
Nulâ chu a bulah chuan a lo thu a, “Ka lo thu ve thei ang em?” a ti a.
Tlangvâl chuan a hmêl pawh en loin, “I thu der tawh alawm,” a lo ti bung nghut a.
Nulâ chu a han ngawi vang vang a. Reife inbe loa an thut vang vang hnu chuan, “Ka hming chu Gessana a nia. I hming min hrilh thei em?” tiin nula chuan a zawt a.
“Arthur.”
Chumi hnu chuan an ngawi leh ta vang vang a, minute engemawzat ngawi renga an thut dun hnu chuan nulâ chuan haw a tum thu a hrilh a. A unaute’n an lo zawn tawh a rin thu a sawi a, tlangvâl chuan pawmpui na’n a lû a lo bu satliah a.
Chumi tûkah chuan nulâ chuan tlangvâl chu a hma nî-a a hmuhna ngai bawkah khan a hmu leh a.
“Hi! I bulah khan ka lo thu leh thei ang em?” tiin hmel hlim takin a zawt leh a. Hemi nî hian nulâ chuan thawmhnaw eng a hâ a, a taksa chu a chak loh hmel hle a ni.
Tlangvâl lo thutna theihai zung lianpui bula lung lian taka a thut fel chuan tlangvâl chuan, “Khawiah nge i chen?” tiin a zawt a.
Nulâ chuan, “Helaia chêng Keanne-i hi ka cousin a nia, helaia nipui chawlh hmang tur hian min sawm a ni,” a ti a.
Tlangvâl chu a bu leh nghauh a.
Nulâ chu a maimitchhing a, theihai kûng chu nuam tih hmel takin a han ngheng ar ar a, “Helai ram hi nuam ka ti ngei mai. A hmun hrim hrim te, luite leh a reh duk maite hi ka duhzawng tak a ni,” a ti a.
Tlangvâl chuan nula chu a han en ve zawk a, lui lam chu a thlir leh a.
“Chu zawng chu maw?” tiin a zawt a.
Nulâ chu a lo meng a. “Chawlh hahdamna’n a nuam a, phaitualhnim hring dupte hi nuam ka ti a, theihai kung han nghente pawh hi a nuam ka ti. Tuna lungpui lum ther therte pawh hi a nuam a, engkim mai hi a nuam vek mai,” a ti a.
“Pathian thilsiamte i ngaina hrim hrim a nih chu, a dik em?”
“A ni mai ang chu, nang?” tiin tlangvâl chu a en hâ a.
Tlangvâl chuan a lû a thing a, “Engmah hi nuam ka ti lo,” a ti a.
Nulâ chuan a mitko a san det a, “Engmah nuam i ti lo maw?” tiin a zawt let a.
Tlangvâl chu a bu nghat a.
Nulâ chuan hlim leh lawm takin, “A va mak ve, ka thil hriat ngai miah loh a ni. Mahse, ngaihtuah teh, tupawh hian engemaw an nei vek a, mawina te, hlimna te, engemaw duhna te, khawharnate leh beidawnnate an nei vek asin,” a ti a.
Chu chu an bul tanna a ni. Thianah an insiam a, engemaw an sawi dun a, engmah sawi lo pawhin an awm bawk.
Tlangvâl chuan hun kal tawha hrehawm a lo tawrh tawh chu a nunpui a. Nula chu a khawvel tiêng tura ni êng lo chhuak ang mai a ni a, mahse chu nipui chawlh chu chawlhkar hnih hnuah a tawp dawn a, a khawvel chu a ngai bawkin a thim leh dawn a ni.
Nulâ leh tlangvâl chu luikama theihai kûng hnuaiah chuan kut invawnsakin an thu dun a, nulâ chuan, “Lungngaihna hian sala a siam chea, a man ngheh hma loh che chuan ngaihtuah buai duh suh. Engtikah emaw i rilru a nat leh i hlauh tlat chuan i nun a hlim thei ngai lo vang. I duhzawng tak an lo awm pawha hmangaihna pe lo tura i rilru i tihkhauh tlat chuan hmangaihna dik tak hi engtikah mah i hre dawn lo asin. Tuma hnena hmangaihna i pêk chhuah loh hian midangin an pêk phal bik che i ring em ni?
Mihring nunah hian harsatna a lo thleng vek a, kan titawp thei lo va, mihring zingah titawp thei reng an awm lo. Kan hmangaihte’n kan rilru an tinâin min tibeidawng a ni maithei a, natna tihdam theih lohin min tlakbuak pawh a ni maithei a, kan ngaih em emte’n min kalsan pawh a ni thei. Heng harsatnate hi mihring nuna thleng ve rêng a ni.
Naktûkah engnge lo thleng dawn tuma’n kan hre lo va, chuvangin harsatna kan tawh pawhin, thil thleng ve tur rengah ngai ila. Tun hun min pek avangin Pathian hnenah lawmthu kan sawi ang a, hlim takin kan hmang tur a ni ang. Harsatna kan tawh pawhin engnge min zirtir chhuah tih ngaihtuah a pawimawh zawk a ni,” a ti a.
“A dik maithei a ni.”
Tlangvâl tan chuan chumi tûk chu ni hrehawm tak a ni leh ta. A thawmhnaw dahna chhuar a han tifai chu a ngaihzawng hlui, a lo hmangaih em em thin thlalâk lo let bal chu a hmu a, a thlir vawng vawng a. Chu hmeichhia chu a rilru zawng zawng a lo pe a, theihtawpa hmangaihin a nun nan a her danglam vek a, ngaihlu takin keh thei dawm takin a lo dawm thin a, ani erawh chuan ngaihtuahna dang a neih avangin a kalsan a, tunah chuan pasal hial a lo nei dawn ta.
A thinlung chu chema vih ang maiin a na thar leh a, huatna leh lungngaihnain a rilru chu a kam a, tuifinriat fawn bulh bulh ang mai hian a rilruah chuan a so leh bulh bulh a, len chhuah zai a rêl leh thei lo.
Nulâ chuan theihai kûng bulah chuan darkar hnih lai a nghak tawh a, a hlim thla takngial pawh a lo lang lo. Mahse dawhthei takin a lo nghak ngat ngat a, khaw thim thlengin a nghâk a, tunah chuan haw a hun tawh a, beidawng takin a haw ta a ni.
Nipui chawlh a ral hma zawng chu nitin lui kama theihai kung hnuaiah chuan a nghak ziah a, mahse nghah chhuah nî a nei lo.
September thlaah chuan tlangvâl chu Keanne-i te sitting room-ah a thu a. “Khawiah nge a chen?” tiin Keanne-i hnenah chuan a zawt a, Keanne-i chuan rilru hrehawm hmel takin a en vawng vawng a.
“Khawngaih takin min hrilh rawh,” tiin a ngen leh a.
“Vanramah.”
Keanne-i thusawi chu awih lo takin a mitko a han san a, “Khawngaih takin min hrilh rawh. Pawi ka tihzia hrilh turin a bula ka kal ngei a ngai a ni,” tiin a ngen leh a.
Keanne-i chuan a lû a thing a, a biangah chuan mittui a lo luang ngiai ngiai a.
“Chawlhkar hnih kalta khan a thi tawh alawm. Bone marrow cancer a vei a, a hmel dawldâng tak kha i lo hmu ve em? Nangma harsatna chauh i ngaihtuah thin a, chuvang chuan a harsatna kha i hmu kher lo vang.” a ti ta a.
Luikama theihai kûng hnuaiah chuan ngawi rengin a thu a, tuma hriat lohin a bianga mittui luang zawih zawih chu a hru a, mahse a mittui chuan Gessana-i chu thlan atangin a ko chhuak zo tawh chuang lo. Lungngai taka a thut reng lai chuan Gessana-i thusawi kha a thinlungah chiang takin a lo lang a, a thusawi tal nunpui turin thu a tiam ta a ni.
“Tun hun min pek avangin Pathian hnenah lawmthu kan sawi ang a, hlim takin kan hmang tur a ni ang. Harsatna kan tawh pawhin engnge min zirtir chhuah tih ngaihtuah a pawimawh zawk a ni.”
(Courtesy: Thlifîm April issue)
Similar Posts:
- Relin min tlansan !!!
- Rilru a hah ve mai a ni e…
- Nui seih seih mai rawh le
- “Mahse”-lawm ang u!
- Ka Nun Chhungril
April 12th, 2009 at 3:12 pm
A ngaihnawm hle mai. Harsat,hrehawm,lungngaih hi ka tawk zing ta malh malh khawp mai,mahse eng lam ka thlir lui fo thrin,keima nunah ngei pawh hian harsatna kan tawh te hi min chher puitlingtu a ni tih zir chhuak vein ka inhria..Pathiana innghah a thra ber fo.
Report this comment
April 12th, 2009 at 3:44 pm
Harsatna sawi chhuah hi thil hrehawm ber te zing ami a ni na a, han sawi chhuah meuh chuan hah a dam huai thin. Harsatna te, lungngaihna hi sawi chhuah loha a awm si chuan mi tuin nge tanpui thei ang a, eng ang thu tha nge dawnsawn tur a neih theih ang? Midangte pawhin keini aia nasa zawk daih harsatna an tawk ve mek ani tih hi hriat nawn fo a tha.
Report this comment
April 12th, 2009 at 3:55 pm
Selwin Hughes lehkhabu ‘A Friend in Need’ tihah khan mi zawng zawng hi counsellor tha tak kan ni thei vek tih a ziak a. Counsellor tha kan nih vek theih dan chu ‘ngaithlatu tha’ (good listener) kan nih mai hian a ni, a ti. Tupawh hian ngaithlatu kan mamawh vek. Kan buai lutuk avang leh thil kan namnul lutuk avangin mi kan ngaithla tha hman lo fo. Ngaithlatu tha nih a va pawimawh em!
Report this comment
April 12th, 2009 at 5:08 pm
a sei eeeeeeeeem mai a! ka chhiar chhuak peih vel love! Harsatna kan tawh chuan tawngtai tur anti! Chuta harsatna kan tawh leh fo chuan….” e “…tih mai tur! Kei chu ka pa hming chu Engkim-mai-hi-alo-tha-vek-mai
Report this comment
April 13th, 2009 at 1:21 am
A ngaihnawm khawp mai. Hetiang harsat na kan tawh chang hi chuan kan thian kawmngaih te kan bula an awm chuan kan hlim ve thei khawp mai.
“Mahse tuna ka nunah hi chuan an awmsi lo a pawi khawp mai, thian han tih tur hi nei ve ila chuan khawvel hi a nuam tur ani a” tiin a in ngaihtuah buai khawp mai. A thut na bul vel ah chuan mi an zi nuaih2 a mahse chung zingah chuan tumah pawh a hre silo.
chuan in ah chuan hawng in kar khat chhung an hmuta lo reng2 a.miho te chuan a in chu hawn an tuma an hawng thei lo. tichuan police koin ain chu an kar chhe ta a. a in chhung ah chuan thiin an chhar ta a.
lehkha a hnutchhiah a tiang hian “khawvel ah hian thiantha ka nei thin, mahse ka thian te nen chuan kan in kar a hla ta. engmah ka nei talo” tiin. “ka hmangaih ber leh ka duh ber in khiang min awih san ta a tello chuan engmah kani talo.
A khum bulah chuan sleeping pills leh a thian te leh a bialnu thlak chu hmuh ani.
Report this comment