Lalpa thuin lèn i deng ang u!
Chàng thlan: Luka 5:4-7, Johana 21:4-8
by Denis Lalfela, Rome
Tholeh Krista zara sual hnehna nun changtu ten kraws en chunga ke an pen a tul ta! Isua zirtirte leh amah zuitute te pawh khan beidawnna ruam an dai ve tlat. Kan tan inhnemna leh huaisenna thlentu ni mawlh rawh se. Simon Petera nunram hi ngun takin i thlir teh ang. Eizawnna kawngah chhungkaw chàwm thei khawp a lèn den thiam, sangha mantu a ni(Mt 4:18). Chuti taka thiam si, zan khat chu len dengin a fehchhuak a, engmah a man tlat lo. Zing khawvarah tholeh Isuan len deng leh turin a ti tlat. Mihring chapona atang chuan a har ngawt ang chu! “Lalpa, zankhuain engmah kan man lova, mahse i thuin ka dèng leh ange” tiin a thawk chhuak leh a. Sangha tam tak a a man leh ta mai. Lalpa thu nghak lova ropuina um a lèn kan den avangin beidawnna leh chhungril khawharna kan tawk fo. Inhnemna zawngin humsual kan la dai zui. Nun tam nei turin Lal Isuan min sawm tak meuh a ni. Lalpa thua lèn kan den hunah engkimah a ropuina leh khawngaihna thukzia kan hmu ang.
Thlarau a rawngbawltu ten Petera experience hi nitin an nung tur a ni. Thusawi tha tak pawh hi tinungtu thlarau a tel loh chuan thu ve mai, tumah chawm lova thàmral mai tur a ni. Tirhkoh Paula chuan, “Pathianin khawvèl thil àte chu a thlang zawk a, mifingte chu a tihmualpho theihna tùrin; tin, Pathianin khawvèl thil chaklote chu a
thlang a, thil chakte chu a tihmualpho theihna turin” (1 Kor 1:27) a lo ti daih mai. Ringtute hnenah Pathian thu kan sawi hmain ringtute chu Pathian hnenah kan hlan hmasa tur a ni. Lalpa thua lèn kan den chuan ringtu ten kan nunah Krista an hmu ang a, kan thusawi pawhin an thlarau nun a chàwm ngei ang. Lalna leh hmingthanna ùm a rawngbawltute chu sawi tam ngai lovin a ni tèlin an beram ten an hlat tial tial ang. Inkhawm kan tlem zel nachhan hi thatchhiatna piahlamah, berampute thusawi leh nunram inpersan lutuk vang a ni ngei ang.
Missionary ten mihring ram paih thlain Lalpa thuin lèn an deng ngam tur a ni. A kotu chu Pathian a ni a; chunglam dah lal si lova pen chhuak ve mai an nih hlauh chuan an va kalna ram/ hmunah phurrit an nih bakah Chanchin Tha an puang kher lovang. Tin, nu leh pa ten fate an enkawlnaah Petera thinlung puin, “Lalpa i thuin kan fate hi kan
enkawl ange, min pui rawh” ti a Lalpa an belh a tul lehzual ta! Beidawn chang awm mahse, Lalpa nena fate enkawltu chuan zawi zawiin Pathian hnathawh a hmu ang. Ram hruaitute phei chuan mathei lovin Lalpa thuin lèn an deng tur a ni. Thlarau puihna nena rorel kan zir hunah Zoramah ngei pawh dikna a lal anga, ei leh bar a hmasawn kan
sawn rualin kan thlarau nun pawh a thang zel ang. Hawh u, Lalpa thuin lèn i deng theuh ang u.
Peteran vawi thum a Lalpa a phatsan a, vawi engzatnge i phatsan ve le? Kum thum lai lo kaihhruai tawh, a beramte chawm zel tura a lo bèlruat Petera chuan a phatsan daih mai. Phatsanna sual a dai hnua Petera rilru siam dan hi a entawn tlak leh hle thung. Tih tak zeta inchhirin, a tap hawm hawm a. A beramte chawm turin Isuan a nemnghet zui ta.
Peteran vawi thum a phatsan vang em ni dawn ni, Isua khan “Peter, min hmangaih em?” tih vawi thum a zawt ve kher nia. Setanan min sawp fo mahse, Kristaah hnehna leh nunthar kan nei thei tih hi chiang ila. Tidamthei hmangaihna chu pawmtu leh ataka temtu kan ni tur a ni. Kan sualna aiin Pathian hmangaihna a thuk zawk a. Halral thilhlan aia
zahngaihna duh zawktu kan Pathian hian thinlung taka inchhirte ngaidamin nunthar a pe thin. I ngaihtuah tawh ngai emaw, hringfate zalenna min pekna hi kan Pathian ropuina a ni. Tihluihnaa amah kan thlan a duh lova, zalenna famkim nena amah thlangte hi a lawm a, a kaihruaiin a tithianghlim thin. Petera kha engvangin nge Kristan a rin em em le? Petera chuan a chaklohna bak chhuan tur a neih lohzia a pawm a. Engkimah Lalpa auh nachang a hriat avang tak chuan beramte chawm tura a thlan a ni.
Petera rawngbawlna kha thlarau hna a nih avangin Kristaah a hausa tlat. Kan rawngbawltute hi Kristaah an hausa ve em? Krista mi hriat, tawngtai mi leh mahni beramte ngaihsak mi nise heti khawp hian kan sawisel phal lovang a, an sermon ngaihthlak chakin Biakin hla takah pawh kan tlan dawr dawr ta ve ang. Chutin thawhlawm thawh kan chakhliah hliah ang a, mahni phàk tàwk pe te pawh an làwm veng veng tawh ang. Chutah zet zawng Kohhran tinah thlarau mi an lal ang a; mitin an hausakna leh nihna in kan teh tawh lovang a, thlarau hnathawh leh thlarau nun dik tak kan hrethiam ve tawh ang. He hun lawmawm a lo thlen theih nan kohhran tinte nasa lehzualin kan tawngtai tur a ni. Minuna fello kha kan nunah a inphum ve reng tih hria a tan lak a hlawk ber! Rawngbawltu tlinlohna avangin Pathian ka rinna a nep tur a ni lo.Kohhran chu kan ta theuh a ni a, a dintu Krista chu kan hruaitu a ni. Eng dinhmunah pawh Lalpan min dah se taima leh thahnemngai taka thawh hi ringtu puitling awmdan a ni.
Isua lam pana tuichunga Petera a kal khan, a Lalpa a en chhung chu a kal a, a rin ngam chhung chu a pil hauh lo. Mahse tuipui, hlauhawmna leh thlemna chu a hmuh veleh pil dawn niin a inhria a, Lalpa a au ta ruai mai. Petera thil tawn hi nitin atakin kan nunah kan hmu. Lalpa ring a ke kan pén chhung chuan kan hlau lova, thlemna lian tak pawh kan hneh mai thin. Kan dam chhungin tuarna, manganna leh tahna kan tawk fo. Lal Isuan “Tin, kei, lei ata khaikànin ka awm chuan, mi zawng zawng keima hnenah ka hìp ang” (Johana 12:32) a tih ang hian, Krista kraws-ah chauh kan tuarnain awmzia a nei anga, harsatna kara retheite leh thlarau bo te tana kan inpekna pawh hian kraws ah chakna thar a thàl zel ang. Petera nun harsa tak her rem zeltu Isua hian amah kan thlan tlat chuan min veng zel ang. Aman
tlinga min puan avang zawkin kan awmna hmun theuhah a sipai huaisen kan ni ang. Chutah zet chuan pawl ram kan thiat ang a, mitin thinlungah Pathian a lalber tawh ang!
Kan tana tholeh Krista chuanmalsawm che rawh se.
Similar Posts:
- Greek Hmangaihna Chi hrang
- Pentecost pualin
- Ringtute chunga Pathian beisei leh duhzawng{Sunday Pual}
- Krista Kraws Thiltihtheihna !
- Tawngtai
April 26th, 2009 at 7:54 am
A ngaihnawm hle mai,Pathian thu thu a awm hi harsa thin mahse ahu kan awih a a duhzawng kan tih a,thahnemngaihna chang kan hriat chuan ka tan malsawm na a lo ni thin…Lawmtakin keiin ka zui ang Zion tlang thlengin an lo tih kha hre thar leh ang u.Fanau te bak Lalpa lak a rochan kan nei si lova,kanlo tisual tawh pawhnise Pathian hnenah kir lehin,Pathian in he lei a kan fa te hi min kawl hawh tir chauh a ni tih i hrethar leh ang u.
Report this comment
April 26th, 2009 at 8:02 am
Sunday tuk a tiang chhiar hi nitin eizawnna leh hna a buaite tan avang tangkai tak em! Lets give more to Jesus in our everyday life.
Report this comment
April 26th, 2009 at 11:25 pm
A tha khawp mai. Denis Lalfela ziah tho hi khawiah emaw chhiar tawh thanin ka inhria. He sermon thupui hi sawi hlawh ber pawl a ni awm e.
Report this comment
April 27th, 2009 at 2:06 am
Luka 5:4 Tin, thusawi a ban chuan Simona hnenah, “Li thuk lam pan la, sangha man turin in lente deng rawh,” a ti a. 5:5 Tin, Simona’n a hnenah, “Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e,” a ti a, a chhang a. 5:6 Tin, an han den chuan sangha tam tak an khuh a, an lente chu a chat pheuh pheuh va. 5:7 Tin, lawng danga an pawlpui awmte chu anmahni rawn pui turin kutin an hui a. Tin, an lo kal a, lawng pahnih chu pil lek lek khawpin an chhung khat ve ve a.
Luke 5:4 Now when he had left speaking, he said unto Simon, Launch out into the deep, and let down your nets for a draught. 5:5 And Simon answering said unto him, Master, we have toiled all the night, and have taken nothing: nevertheless at thy word I will let down the net. 5:6 And when they had this done, they inclosed a great multitude of fishes: and their net brake.
Johana 21:4 Tin, khawfingchahin Isua tiauphovah a ding a; nimahsela zirtirte chuan Isua a ni tih an hre si lo. 21:5 Tin, Isuan an hnenah, “Naute u, ei tur eng ilo in nei em?” a ti a. Anni chuan a hnenah, “Nei lo,” an ti a, an chhang a. 21:6 Tin, ani chuan an hnenah, “Lawng sir dinglamah khan len deng ulang in hmu ang,” a ti a. Tin, an deng a, sangha tam avangin an hnuk chhuak zo ta lo va. 21:7 Chutichuan, zirtir Isuan a hmangaiha khan, Petera hnenah, “Lalpa a nih saw,” a ti a. Chutichuan Lalpa a ni tih Simon Petera’n an hriat veleh a kawr a veng a, (saruaka awm a ni si a,) dilah a zuang thla ta a. 21:8 Nimahsela zirtir dangte chuan lawng te tak te chuan len, sangha chawpa hnuk chungin an rawn pan a, (khawmual atangin an hla si lo va, tawng zahnih emaw lek a ni a.) 21:9 Tin, khawmuala an chhuah veleh, chutah chuan meihawla mei chhem an hmu a, a chunga sangha leh chhangper rawh nen. 21:10 Tin, Isuan an hnenah, “Tunah in sangha man kha a then han la rawh u,” a ti a. 21:11 Chutichuan, Simon Petera a va chuang a, len chu sangha lian pui puia khatin khawmualah a hnuk chhuak a, za leh sawmnga leh pathum a ni; chuti zozai chu awm mah sela —len chu a tet si lo.
LEN TRET (broken net) LEH LEN TRET LO (unbroken net) chungchang hi kan Mizo Trawng Bible-ah a chiang mawh riau!
Luka ziakah LEN TRET kan hmu a; Johana ziakah LEN TRET HAUH LO kan hmu thung; hun hran ve vea sangha len dennaa thil thleng a ni. An len denna Dil erawh hi chu Galilee Dil tho kha niin a lang ve ve a. He lai hmun hi Isua thawhleh hnua an intawhkhawmna tura RENDEZVOUS-a an ruat a nih avangin, mi thenkhatin —an ni tin eizawnna lama kir leh ta dial vek anga an sawi ve zen hi chu a inhmeh lo deuh pawhin a lang.
Luka ziak hi Krista thih leh thawhleh hmaa len den chanchin a ni a; Johana ziak erawh hi chu Krista thih leh thawhleh hnua thil thleng a ni thung.
Len treh chhan leh len treh loh chhan hi zir chian ngai tak a ni. Denis Lalfela pawn HOMILETICS ang zawng chuan thu inluhthelh tak tak a rawn thlakmar thiam viau a; a lawmawm khawp mai —-mahse, fimkhur kan zir nan rawn thual ve lawk ila.
LET DOWN YOUR NETS …
Isua hian GRAMMAR a duhtui khawp mai; grammar dik tak pawh a hmang ni pawhin a lang e. NETS hi ‘LENTE’ tihna ni ngei tur a ni. Simona phial phual hian GRAMMAR chuti teh luain a ngaipawimawh hran lo a niang … “I thuin len ka deng ang e —at thy word I will let down the NET,” tiin King James Version-ah kan hmu a, NET hi singular number-a hman a ni tlat —kan Zotawng Bible-ah hi chuan Petera hian “I thuin LENTE ka deng leh ang e,” tiin min dahsak a. King James Version vekah hian, “and their net brake,” tiin a dah thlap a. Sangha chuti zozai man ta si kha —len pakhat ringawt tan kha chuan a rit tham a ni ngei ang. A tret pheuh pheuh ta hial a ni.
Petera khan “I thuin …” han ti tehchiam mah se, Isua khan “lente” deng tura a tih laiin “len pakhat” a deng ta kurh si. Isua thu ang diak chuan len a deng lo tih a hriat theih a ni.
An RV (rendezvous)-ah zing trhang trhangah Isuan a rawn panchilh a; hemi zan hian nghameidum zungte tiat em pawh an la man lo … beidawng ve tak zawng an ni. Mahse, Tholeh Isuan lawng sir dinglama len (net) deng turin a han ti ve leh thung a … len pakhat chiah deng turin a ti ve thung!
Johana hi thil hre chiang, fact and figure-ah pawh VEL (about) hmang mai mai lo, a ni zat chiah chhinchhiaha hre rei mi a ni. Sangha 153 lai an man. Len pakhatin —thler miah lovin a hnuk chhuak!
Hei hi i chhinchhiah chiang ang u … Isua thu ang chiah lo pawhin len deng an tam ang; man amual mual chu an nei tho; mahse, an hmanrua kha thawm trhat a ngai thin. Thler miau hek! Isua thu ang chiah chiah chuan sangha chuti zozai man a nih pawhin an hmanrua pawh a trhat ngai zelin a trha reng tih hi!
Tin, ringtu ka nih tawh hnu hi chuan KROSS (sualthawi thihna hmun) hi ka hrechhuak fo tawh zawk thin a; Hebrai 12-a kan hmuh ang zawkin ringtute intlansiaknaah Dan angin ka tlan ve zel tawh a —pan lam dik tak neiin, chutah chuan Tholeh Krista leh a lo kal lehna lam hi ka anticipate tawh zawk a; la ring ve lote erawh chu KROSS-a Isua tuarna ka kawhhmuh uluk thin.
Kristian Vanram Kawngzawh by John Bunyan kha ringtute tana allegory chhuanawm tak a ni; Bung 4-na velah KROSS a hmachhawn a —chuta tang chuan VAN LALRAM panin a kal ta ngar ngar a … Boralna Khua atanga Kross inkar ai khan Kross atanga Vanram Kawngkhar inkar thlen nan khan hun a duh rei ta fe zawk a nih kha!
Kross hian Biakbuk kawtkaia sualthawi ran talh BLOOD SHED a entir a; chuta tang chuan Hmun Thianghlim Bera Puthiam Lalberin thisen a THEH (sprinkled) kha min kawhhmuh tawh thung a ni. Pa Pathian hnen kan thlen ngei nan Fapa Isua Krista khan Kalvary atangin Pa pathian awmna thlengin kan pilgrimage-na tur a lo sial kuak vek tawh hi uluk taka kan intlansiaknaah hian kan thlir chiang fo tur a ni.
“Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avang chuan mualphona chu ngainepin kraws chu a tuar a, Pathian Lalthutphah dinglamah khian a han thu ta a.
Kross-a Nazareth Isua, Pathian Lalthutphah dinglama han thu ta thlir reng chung hian len den a ngaih hunah deng ila; lente den a ngaih hunah deng bawk ila!
Report this comment
April 27th, 2009 at 4:19 am
Johana 21:14 Chu chu Isua mitthi zinga ata a thawhleh hnua a zirtirte hnena a inlar a vawi thumna a ni. 21:15 Tin, tukthuan an ei zawhin, Isuan Simon Petera hnenah chuan, “Simon, Johana fapa, hengte ai hian nangin kei mi hmangaih zawk em?” a ti a. Ani chuan a hnenah,“Aw, Lalpa; ka ngaina che tih i hria e,” a ti a. Ani chuan a hnenah, “Ka beram note chawm rawh,” a ti a. 21:16 Tin, a vawi hnihnaah a hnenah, “Simon, Johana fapa, nangin kei mi hmangaih em?” a ti leh a. Ani chuan a hnenah, “Aw, Lalpa, ka ngaina che tih i hria e,” a ti leh a. Ani chuan a hnenah, “Ka beramte enkawl rawh,” a ti a. 21:17 Tin, a vawithumnaah chuan a hnenah, “Simon, Johana fapa, nangin kei mi ngaina em? a ti a. Tin, a vawi thumnaah, “Nangin mi ngaina em?” a hnena a tih avang chuan Petera a lungngai a, a hnenah, “Lalpa, engkim i hria a, ka ngaina che tih i hria e,” a ti a. Isuan a hnenah, “Ka beramte chawm rawh.
BERAM NOTE (lambs) CHAWM leh BERAMTE (sheep) ENKAWL hi thil thuhmuna lang thuak, danglam si a ni. Kohhran Hruaitu rawngbawlna hi hna hautak a tling. Isuan AGAPE (Pathian atanga chhuak hmangaihna) tawngkam a hmang a; Petera’n PHILEO (pianpui unau inngaina) a hmang thung. Vawi thum tlawng thu pangngai inzawh nawn hi thil SERIOUS a tling pha hle.
Zirtirte khan Isua thupek ang ngei khan sangha 153 an man zui ta kha a ni a; mahse, Isuan vaukamah khan chhangper leh sangha hem hmin a lo buatsaihsak thlap. Zankhuaa thawk rimte riltam hrai puar hun a hai lo; tichuan, thlarau lam thilah a ORDAIN zui tih pawh hriat a manhla viau.
Tisaa kan inhraipuar tawh hi chuan —a hnu lehzel tur thilah pawh kaihhruai kan awlsam phah tawh thin a ni.
Report this comment
April 27th, 2009 at 8:58 am
Lalpa thu-in mahni thu a len deng ngek ngek lovin A thu ngei ni zel sela. Beidawn tawh hnu-a beiseina thar min pe zel theitu A ni miau mai a
Report this comment
April 27th, 2009 at 12:23 pm
Chawnghilh, comment awmzia i hre lo nge i mawl ve hrim hrim. Article aia thui mah i rawn comment a. I comment atang lah chuan i chhiar tam hmel vak bawk si lova. Khi article khian a kip a kawi a a awmzia hrilhfiah aiin Isua thua len den a pawimawhzia a sawi mai a ni lo maw? i comment thuizia, pu denis ang khian article han ziak ve la…. Mizotawngin ha ha! comment tur hian i chhiar teuh awmzia…. i ti tha thove….misualcomers ten kan ngaisang ache!!!!!!!!!!!!!!!!!
Report this comment
April 27th, 2009 at 1:59 pm
Pi/Pu chawnghilh comment hi ngaihnawm ka ti. Theology lam hria pawh ka ni lova, mahse “ngaihdan” tal ka lo thawh ve teh ang..!
Bible contextualize chungchang hi sawi khi ka lo hmuh dan chuan, English atanga contextualize tum hi a fuh ber em aw. Entirnan, Latin tawng pawh la ni tal se a zia deuh tur..Bible tawngkam (hebrew/Aramaic) emaw atanga translation hi neih law law nise a zia zawk angem.A origin zawk bawkin ka ring. English cultural meaning atanga Mizo cultural meaning tura lakluh hian “chhungril lamah colonialism” (quate unquate) a thlen thei palh angem? tiin ka lo ngaituah ve mai mai.
Report this comment
April 27th, 2009 at 9:38 pm
PETERA hi an koh tamna ber chu SIMON tih a ni.. Hebrew ah (Symeon) hebrai hawrawp ziah theih loh mahse a lam dan Greek in SIMON a ni. Nihna a nei bawka ( CEPHAS) ” stone” or ( Rock) Peter ti ah koh ani.
Isuan he lungpui chunga ka kohhran ho ka din ang a tih khan, ECCLESIA Lungpui ah din a nih tur thu a sawi a. Ecclesia chu thuhlunghlui hunah Israel nen khaikhin a ni bawka, Congregation awm khawm pawlte a kawk.
C.taylor Juda puithiam sawidan chuan Mithianghlim in khawvel a tundin leh dawn khan, Enocha leh tuilet hun a liam tir phawta, chuan Abrahama a hmuh khan LUNGPUI ( Rock) ( Petra) ka chharta tih a ni. tiin a sawi.
Chutiang ang chiah chuan petera chu kohhran din Ecclesia din tur thuneihna (Key) a pe ani.
pu chawnghliha rawn sawitak, Vawithum ngawt mai a han zawh na chhan kha ( ENCYCLOPEDIA OF BRITANNICA phek 636 ah chuan ti hian a ziak..
Three time Jesus tests his love which three times he had denied, and three times entrusts to him the pastoral duty to ” feed my sheep.” the shheep ( or lambs v 15) are doubtless member of the early Church dependent upon Peter’s teaching for their Spiritual food.
Caesarea ah CORNELIUS chhungte hi gentile zingah chuan a Baptis hmasa bera, Isua a thih hnuah Jentile piangthar hmasa ber pawh an ni bawk ani.
Report this comment
April 27th, 2009 at 10:17 pm
@Ilyag : Ka comment i chhiar a; ka lawm tho ve. I rilrem ber kher ka rawn dap lo a ni e; tin, Latin leh English hi chu a ler tawh khawp zawk a; duhthusamah chuan Grik a pawimawh; chu nen chuan inzul thovin ka hmu a.
Commentary Bu chi tam a awm a; sei pui pui leh tawi deuh te pawh. Comment length berkher tur hi ka hre lo a ni. Min rawn hrilh chiang lehzual maw le! Nangni angin fing ve ila —ka rawn ziak ngam na’ng!
Nui pah huk huka rawn chhawnchhaih che u hi (awm awl leh ei tui ringawt ai chuan) a nuam ve hranpa a … NOI
Report this comment
April 27th, 2009 at 10:49 pm
Pu chawngnghilhlova….. good post. ziak zel rawh khai, bengvarthlak e. Greek leh Latin kan zir luai luai mai dawn em ni…amik amak kan hre ve mang si lova!
Report this comment
April 27th, 2009 at 10:59 pm
@ilyag : Matthaia 12:36 Tin, ka hrilh a che u, mitten thulawilo an sawi apiang, chu thu chu Rorel niah chuan an sawi fiah a la tul ang. 12:37 I thu chuan thiam a chantir ang chia, i thu vek chuan thiam loh a chantir bawk dawn che asin,” a ti a.
Literature hi a mak teh asin!
Report this comment
April 28th, 2009 at 1:11 am
From the author: Misual.com ka hmelhriat tan tirh atangin ka article ka hmu ve ta zeuh zeuh a. Website enkawltute ka thawn chang awm mahse, mithahnemngai ten min lo post sak a ni fova. An za achungah thinlung takin lawmthu ka sawi e. Nangni chhiartu ten sawibelh tur, sawifiahna tha zawk leh hmasawnna tur in rawn chhawp chhuak zel hi ka lawm takzet bawk a. Article ngun takin in chhiar tih a chiang reng mai a. Heta in rawn comment bakah hian mimal taka hriatbelh duh leh article dang zelah pawh hmasawnna ka neih theih nana min pui turin readers te ka sawm che u a. denissdb@yahoo.com ah min rawn thawn theih chuan ka lawm ngawt ang. chawngnghilh leh mkima leh midangte pawh in ti lawmawm takzet mai. Remchangah he article a bible thu vel khi exegesis rawn tarlan ka tum ang. Tunah hian Salesian Pontifical University, Rome ah Master of Theology ka zir a. Articles ka contribute ve te hi tawngtaina a ka dil thin a, Mizo mipui tana ka ziah avang leh Newspaper hrang hranga an chhuah thin avangin exegesis lam ka ngaihthah deuh bawk a ni e. Ka ziak teuh mai. Ka lawm e – in rawngbawlpui, Denis Lalfela, SDB, Rome, Italy.
Report this comment