Kum 30 chuang zet chu kan lo inhmelduh in, kan karah itsikna leh thleibikna reng awm lovin suihlung kan lo rual tlang ve tawh a. A ni tak a, a tlang leh mual pawh dang chuang lo leh lai-khum zal tlanna te pawh dang chuang hek suh!! In tel lo chuan nau ang ka tlei zo lo tih pawh inhriat reng kha. In tawnah dawl zawrin ka zawr a, hringnun kalh a kim lo riau zel thin a nih kha!!
Chuvangin khawikipah kal dawn ila, ka hruai ve zel che u a, lunglen hnemah ka fawp leh vawng vawng thin che u a nih kha. In hmel hmu pha lova hun reilote ka awm pawhin ka zawng ruai ruai zel che u a, in tel lova talhrang thei lo val ka nihzia pawh ka hai lo, kan intawn lai hunte ka chhui kir a, naupan tet lai, Primary sikul luh lai daih tawh atanga nu leh pa, zirtirtu leh aia u zawkte hriat hlau reng rengin kan lo inkawp a nih kha. Chuti teh thuta mangtha…. tia thenna biahthu hlana han vailiam mai tur che u chuan thil awlai tak chu a ni bik tawp lo mai le!!
Mahse, naupan lungmawl laia hmangaih ka lo tawn te in nih avangin ka lakah hian inchhuang thei tur in ni bikin ka ring lova, min dem ngawt thei bik hek lovang. Ka thinlung lairil berah hmun lo luah thin mah ula, ngaiin thla-hlel che u in, in tan lo khatliam thin mah ila SD, KN, KV Oh!! nang pawh MZ min dem lul suh ang che u.
Ngai chung zelin mangtha tia thenna biahthu hlan lo thei che u ka ni ta love, in duh leh, ‘Hringnun hmangaihna hi zawng doral an chang leh thin’ tih hla kha in lo sa ve tawh mai dawn nia, in mi hmangaihna dawrawm tak avanga ka tawrhna zozaite, sum leh pai leh hun bakah ka hriselna ten a tlakchhiat phah ziate ka chhut seng ta love.
In mi hmangaihna aia let sang, sing, nuai, chhiarsen rual loh leh chhui zawh sen rual loha hma-ngaihna nasa leh tawp chin nei lova min hmangaihtu tan ka taksa, rilru leh thlarau hi hlan thianghlim ka duh ve tak vang a nia. Ani chuan bawlhhlawh turin min ko lova, thianghlim turin min ko zawk a ni
Tin, ka lo duh thinna che u leh ka thlakhlelh thinna che u kha doral an lo chang zo ta a, huatna leh thinrimnain a lo inthlak ta e. In lo nunrawn zia leh min lo bum rei tawh ziate ka ngaihtuah hian duh tlak loh ka lo duh che u leh hma-ngaih tlak loh ka lo hmangaih che u tih ka hria a, ka lo tisual hle tih ka hria e. Chuvangin ka thin a rim tak zet a, in hming pawh ka phuah uluk ta lo khawp mai. Nang, Sahdah leh Khaini te u, Kuhva leh Meizial te u, ‘Setana Kid’ tiin ka ko ta che u a, in laka talchhuak thei lo tur anga ka lo indah thinna te kha in pu Setana bumna mai a lo ni e.
He ka taksa, rilru leh thlarau zawng leh nunna te hi nangni anga a der maia min hmangaihtu ni lo, tih duhdah leh hmuhsit endawng leh nuihzat te bakah thih thlenga tuara ka tana nunna hlantu tan ka hlan ta e. Sual langsar zual zu leh hmeichhiat mipat nawmchennate, Lal Isua fak hla sak aia khawvel lam hla sak ka sim tak ang khan nangni pawi Awmtawha leh Awmmeka, Lolaawmzel tur ka Pathian thlarau thianghlim chuan keima theihna ni lovin ama theihnain thenna biahthu ka hlan che u hi a phal mai ni lovin a duh tih ka hria a, ka Pathian chu kuta sak inah cheng lovin ama siam, a anpui ngeia siam ka thinlung sual bawlhhlawh hnuah hian a cheng duh a, a Temple atan min duh a ni.
Hei hi thinlung chhungril atanga lo chhuak Lalpa lawmzawng a ni tih chiang taka ka hriat takah chuan nang Sahdah, mutnaah pawh ka hmuam che a, chawei lai chauhin ka heha awm lo thin i nih kha!! Tunah chuan ka then ta che. Nang pawh Khaini, i rim na tak leh Kuhva, ha tibaltu ka mamawh tawh lo che u a, ka tan thil tenawm leh hnawk mai in lo ni ta e.
Nang pawh Meizial, Sikret i ni emaw zozial i ni emaw ka taksa tan tangkaina leh mamawhna che ka nei ta love. Tenawm leh luak tichhuak mai in nih tak avangin min hmangaihtu Lal Isua Krista hmingin in mekna thu leh nangmahni hnehna thu ka puang e. Mangtha vek ule.
Similar Posts:
- Di thiang chhailai ka bang tang e
- Ka D
- Mipa leh Hmeichhia
- T Melody – Thinlung Thawnthu
- I kalsan hi engtin nge a awm tak le
May 28th, 2009 at 12:34 pm
I ti tha e.Zuk leh hmuam hian Mizo society ah chuan bu a khuar hneh bawk a, a tha lo tih hre reng chunga sim thei lo kan ni deuh vek. Pathian zarah hetiang lam ah chuan ka insum kim thei hi ka lawm khawp mai. Nangpawh in i nghei/sim hlen ka duhsak a che.
I ziah sei deuh vang nge,la sim lo vek kan nih vang zawk comment tu an va tlem ve?
Report this comment
May 28th, 2009 at 2:04 pm
E khai…va thui thra kher ve.. Pu mam..:-)
Report this comment
May 28th, 2009 at 3:06 pm
Lal Isua Krista hminga “In mekna” thu puan te chu a…Sawrkar phal loh thil a lar hluai a nge (no offece intended):P
Report this comment
May 28th, 2009 at 3:42 pm
I ti thra hle mai, hetia mi zinga puan hian nghei hlen a awl deuh bik an tia lawm.
Report this comment
May 28th, 2009 at 3:44 pm
Pi Irre zu kha i nghei ta em?
Report this comment
May 28th, 2009 at 3:47 pm
Report this comment
May 28th, 2009 at 4:02 pm
Aw,nghei ta e, nangpawn i nghei thuai theih nan chunglam ka lo dawr ang auh
OT lo hian ka misual thiam thlawis lo,min lo hrethiam hram teh u…
Report this comment
May 28th, 2009 at 4:05 pm
Ava lawmawm ve, ka dilna chhan in a awm a nih chu.
Report this comment
May 28th, 2009 at 4:59 pm
zuk leh hmuam tih miah loh hi changkanna chi khat a ni< chutih laiin tih mai avanga setana thil blah blah tih vel hi chu a tha ka ti lo
Report this comment
May 28th, 2009 at 6:46 pm
Ngawi renga nghei hmak mai tur…. ngehi hlen theih loh palhin, zahthlak dawn em mai hairehai.
Report this comment
May 28th, 2009 at 7:14 pm
Kei pawh ka ngaihdan chuan zuk leh hmuam tih ang thuartham Setana sateek-e-bale tih kher hi a trul lo ka ti..cancer a thlen theih vangte,hriselna atan a pawi theih vangin nghei ila a tawk fu..thil reng reng hi Pathian thuah kan la lut zel a,a thra ber kherin ka ring lo..nghei ka duh a,Pathian ka dawr a nih erawh chuan thv dang daih a ni.
Report this comment
May 28th, 2009 at 7:37 pm
Ka nghei zing tawh mai! NGHEI tih thumal hi … Chaw NGHEI chuan ei tik ni a awm leh nge nge —Mei NGHEI, Zu NGHEI … Khaini NGHEI, Sahdah NGHEI, Surti NGHEI, Tobacco NGHEI … ek samaan vek. American Native-hoten meizuk an lo ching thin kha Sap lawng-miten an lo copy chhawng ta a … chumi hma daih hun zozai tawhah khan tuman mei an zu lo. Mei zuk loh lai hun liam tawh zozaiah te khan Setana chuan hna a thawk fe tawh … hrethiam mai em?
Jarda Paan rimte hi a tui reuh asin! Zanriah ei khama pankhawr long-par nena han chilh bap bapte hi Mizo pudding ka ti mai! Kwai ngei mai ei a manhla ti tawk pawh an awm ang; kan naupan laia Assamese subject min petu BC Das-a chuan, “Vawiinah tamul 80 ka ei,” tih kha insawi bora nan tak a hmang ve thin —tamul uih dan hi a vik tlat!
Sim hi a tha ber; NGHEI hi chu a ho, kalsan hmak tur … ha a mawi lo. Tunlai Mizo singers-te zai lai hmuh a nuam viau tawh, an ha chhung lam chenin a fai reuh tawh hi! JB-a hun lai kha chuan croon nasat poh leh ha bal dum tlek tluk a lang kim ting a ni thin mai!
Kei pawh ka ba kar leh chhunglam hi a dum hneh lutuk thin a; bawngpuite pawhin min nuihzat raaaps mai! “Kan ha chhung lam chiah kan tihdum nachhan chu toothbrush leh a paste hmang ve hek lo i …” tiin thiam an inchantir.
Bairabi putar pakhat chuan ha hmai pakhat chiah a nei tawh a; a nghin laak laak bakah —a la tawk rimchhe ve raaaps …. AN TI. Hmeichhe zuk leh hmuam ti chu ngaihzawng atan pawh ka duh lo!
Report this comment
May 29th, 2009 at 4:31 pm
Nula inla chhelo tawkin khaini bur an han ak puar trah a, arte vawm hlumna tur khawp vela lianin na han sawk chhuak a, an hahni karah an han zep trat mai hi chuh….tenawm lamah a kal tlat. Ngaihzawng atan chuan No te…
Mizote kan changkan theih miah lohna pakhat chu kan zuk leh hmuam ti nasa ltk hi niin ka hria, kan hnam tlem tehlul nen cancer vei kan tam zia hi.
Tin, Pathian thu zawnga kan la dawn anih chuan tih loh a him berin ka hria. Mahni inthiam chawp kan tum chhung chu keimahni hi kan dik tawk lo alo ni fo thin. Anih leh zuk leh hmuam avanga cancer vei, thi tate hi Vanram an kai angem? A thalo tih hre reng chunga ti lui te hi? Mahni inthat nen eng nge a danglamna? Tualthat/mahni inthat te chu Vanram an kai hmel silo a… engpawhnise decision siamtu tur chu Pathian a ni a. Zuk leh hmuam tih loh avanga thiamloh changa kan awm chu ka la ring chuang lo hrim2
Report this comment
May 30th, 2009 at 2:35 am
Mi thenkhatin tuibur an han hmuam a, fiah mang lovin an han trawng trawlh trlawh a. A va biaka te kha an zah lo hleah ka ngai. Pitar chilthli tlingkhawm lo hmuam ve luau luau hi a tenawm pawh ka ti. Varak e puat ang maiin, an hawina lam lam direction-ah —thil dang pawi a awm ang tih care map lovin —an han chhak pik puat mai hi chu … a CHK lo ve hrim hrim, an kianga trhut pawh hrehawm khawpin an tuibur rim hi a na bawk si.
Kawr teah tuibur thlawrna khawl buntute pawh hian lui dunga cheng thin lui-sa an tichereu vek hian ka hre bawk. Kawr a rimchhe vek bawk a, thil trha zawk zawk chu a ni lo hle.
Ui chung chung leh ngai ngawih ngawih chunga tobacco lam thil reng reng hi kalsan chi a ni lo; kawngkasula-mak, mak-chhiat thlap tur ni zawkin ka hria. Kei misual ber mai hian!
Report this comment