mi(sual).com

1^st.Friday: Vawiin kha hnathawktute ni ‘May Day’ a ni a,  National Trade Union of Mizoram (NTUM) chuan  a lawmna leh anmahni infuihna ni nghal inkhawm, Khatla-a an Pisa-ah an hmang a, hetah hian an NTUM President, Pu Lalkohchhuaha chuan an pawl member-te chu hna dik tak leh tha taka thawka, an chanvo dik tak humhalh thiam turin a fuih.

2^nd. Saturday: Aizawl South Zone Football Association buatsaiha Zorammuana Memmorial Football Running Tournament 2009 neih chu vawiin tlai khan zawh fel a ni a, hetah hian Republic Vengthlang Football Club chuan Melthum Football Club goal 2 goal 1-a hnehin champion lawmman tangkai cheng sing 1, Trophy leh Certificate an dawng.

3^rd. Sunday: Aizawl Bishop, Most. Rev. Stephen Rotluanga chuan vawiin khan Vairengte-ah Auxilium Convent thar, sister-te awmna tur a hawng a, mal a sawm nghal. He Convent thar hi cheng nuai 22 senga sak a ni. Hawnna inkhawmah hian Shillong atanga lo kal, Sister engemaw zat pawh an tel a ni.

4^th. Monday: MNF Party Office Bearers Meeting, vawiina Hnam Runa neih chuan Congress sorkar, Pu Lal Thanhawla kaihhruaiin MNF sorkar kih hnawk thenfai tur a tam avanga hna thawk chak thei lova an insawi chu, hna thawh ngaihna an hriat loh vang-ah a puh.

5^th. Tuesday: Sorkar hnathawk ni lote, an damloh-a an inenkawlna senso tumsakna, Mizoram State Health Care Scheme kalpui zel dan tur chungchang, Health Minister hovin ngaihtuahin vawiin khan Mizoram State Health Care Society Governing Body an thukhawm.

6^th. Wednesday: India ram hmun hrang hrang atanga Munnar (Karela) hmuna seminar naa kalte chuan vawiin khan Munnar hmuna tourist site hrang hrangte an tlawh. A kalte’n an hlimpui hle.

7^th. Thursday: HIV/AIDS avanga fahrahte ni, World Aids Orphan Day chu vawiin khan khawvel pumah hman a ni a, Mizoramah pawh heng naupangte hian Larsap, Lt.Gen MM Lakhera hovin Raj Bhavan tualah hun an hmang a ni.

8^th. Friday: Rabbi Gurion Sela, Jerusalem, Israel rama awm mek chu vawiin khan Mizorama Judaism-te zirtirna pe turin Aizawl a lo thleng. A ni hi Zofate zinga Rabbi hmasa ber leh a awmchhun a niin 10^th. February khan Jerusalem-ah nemngheh a ni  A ni hi Mizorama seilian a niin Bilkhawthlir khuaa piang a ni nghe nghe.

9^th. Saturday: Lunglei bul, Zobawk leh Dawn inkar Hrawva rama huan nei, Pu L. Dolianate pafa chu an Dil hmun tur halin thlai puitling dang a kang kai tur an thelhna lamah na takin an kang..

10^th. Sunday: Vawiin khan khawvel pumah Chhandamna Sipai Pawlin Nute Ni an hmang a, Mizoramah pawh Corps tinah Nute chawimawina leh hmangaihna lantir nan an faten pangpar leh duhsakna thilpek an hlan.

11^th. Monday: Nizan zanlai pelh hnu, dar 12:30 leh dar 1 inkar vel khan Zuangtui Industrial Estate-a Assam type In pathum a kang ral vek a. He kangmei hi Pu Thanghuta te In atanga chhuak nia hriat a ni a, kangmei chhuah chhan hi hriat a ni lo.

12^th. Tuesday: Vawiin khan Chief Secretary Conference Hall-ah Mizoram State Health Society Executive Committee an thu khawm a, Chief Secretary, Pu Vanhela Pachuau-in a kaihruai a ni. Hetah hian an thutkhawm hmasa-a thurelte anthlir ho neih bakah hma thar lak dan turte an rel ho a, member atan PWD, PHE leh P&E Engineer-in-Chief theuh leh Health Principal Director ruat thar an ni.

13^th. Wednesday: Munnar hmuna seminar-a kalte chuan an seminar-te tluang taka an zawh hnuin vawiin khan Mizoram leh Manipur lam atanga kalte nen rel-in Gauhati panin an rawn chhuak.

14^th. Thursday: Mizoram Presbyterian Kohhran hnuaia Synod Music Institute leh Art & Culture Department tangkawp buatsaihin vawiin khan Khatla-a Mystique Music School-ah Mizo Rimawi Zirhona, Workshop on Mizo Music neih a ni a, Mizo hla thluk, solfa-a thliar fel dan tur leh Mizo rimawi hmanraw hrang hrang hman dan dik an zirho a ni.

15^th. Friday: Kolasib leh Vairengte Station-a Excise and Narcotics Enforcement Squad-te chuan zanin khan sap zu tawlh ruk, um puitling 240 an man. Hemi rual hian a neitu nia hriat, Sarul Islam Laskar, Guwahati mi leh Kalam Uddin, Lailapur mite bakah zu phurhna motor 407 Truck leh Truck lian pakhat dang an man tel bawk.

16^th. Saturday: Mizoram-a Lok Sabha seat awm chhun luah turin Indian National Congress Candidate Pu CL Ruala chu hneh taka thlan tlin a ni a, South Tuipui biala Assembly by-election ah pawh Congress Candidate Pu John Siamkunga chu hneh taka thlan tlin a nih bawk thu vawiina vote chhiar atangin hriat a ni..

17^th. Sunday: Vawiin atang khan Lalchhanhima Varte chuan Israel Army a zawm.

18^th. Monday: AH & Veterinary Minister, Pu Nihar Kanti Chakma chuan vawiin khan Lungleia Poultry Farm leh Nghasih kawnga Sericulture Mulbary Seed Farm-te a tlawh.

19^th. Tuesday: South Tuipui Bial Assembly By-Election atanga thlan tlin, Congress candidate, Pu John Siamkunga chu vawiin khan Assembly Speaker, Pu R.Romawia’n rinawmna thu tiamtirin MLA-ah a la lut.

20^th. Wednesday: ZONET buatsaih, Mizo Idol thlanna chu zanin dar 8:00 atang khan ZONET Studio-ah tan a ni ta. Zanin khan mi 51 zai tura tih zingah mi 47 an zai thei a ni. An zinga 16-te hi round hnihna-a zai leh thei tura thlan an ni.

21^st. Thursday:  Khawvela tlang sang ber, Mount Everest chu Capt. Samuel Lalrintluanga kaihhruai, Uttarkashi-a Nehru Institute of Mountaineering leh Indian Mountaineering Foundation tangkawp-ten vawiin khan chuan an lawn chhuak a, Capt. Samuel Lalrintluanga hi Mizo zinga Mount Everest lawn chhuak hmasa ber leh a awm chhun a la ni.

22^nd. Friday: Mizoram Volleyball Association (MVA) chuan vawiin khan Babutlanga Engineers’ Club-ah General Body Meeting an nei a, hetah hian MVA Calendar leh State pawna Tournament chungchang an rel a ni. He hun hi MVA Vice President, Pu VL Zamlova’n a kaihruai a, MVA session thar calendar an siam a, State pawna Tournament awma tel dan turte, District hrang hrang atanga thu lutte an rel a, hei bakah hian an hnuaia Club hrang hrang tihchak dan turte an rel a ni.

23^rd. Saturday: Vawiin khan Hunthar Veng Branch YMA-in an veng chhung atanga mitthi awm tawhte pualin an veng thlanmualah Khawhar Chhungte Ni an hmang. He hunah hian Hunthar veng thlanmuala phum tawh mitthi chhungte pakhat theuh an tel a, an veng thlanmuala phum, an chhungte hmun danga awm tawhte pawh an tel bawk. Khawhar Chhungte Ni puala thlanmuala inkhawm buatsaih hi an Branch YMA President, Pu K. Lalrinmawia’n a kaihruai a, thlanmual enkawl dan report ngaihthlak a ni bawk. Hun serh hman zawh hian kal khawmte hian mahni chhungte thlan theuh an thian fai nghal a, chhungte awm ve lo thlante pawh an thian fai vek bawk a ni.

24^th. Sunday: Vawiin chawhnu khan Synod Mission Board buatsaihin Bawngkawn Kohhran Biak Inah Missionary tirh chhuah inkhawm neih a ni a, Synod Executive Secretary, Rev. Zosangliana Colney-in inkhawm a kaihruai a, Synod Mission Board Co-ordinator, Upa R.Lalmalsawma’n tirh chhuah turte a hmelhriattir a, Synod Mission Board Secy, Rev. Vanlalbela’n rawngbawla chhuak turte, Pathian hnenah a hlan bawk a ni.

25^th. Monday: CM, Pu Lal Thanhawla’n Mizoramin buhfaia harsatna a tawh mek chungchang, sorkar laipuia a thlen chu a sut kian dan tur, vawiin khan sorkar mi pawimawhten an sawiho.

26^th. Tuesday: Vawiin tlai dar 4 leh a chanve vel khan Aizawl Dinthar Vengah Pu Lalvunga ban khur a chim avangin hnathawktu pakhat Matab-ud-din, kum 21 mi, Mustaq Ali fapa, Assam, Karimganj Dist-a Beirangam khuaa chu a thi.

27^th. Wednesday: Mizoram Board of School Education (MBSE) chuan kumin HSLC leh HSSLC Compartment Exam Result a tichhuak. He Exam result chhuakah hian HSLC-ah exam zawng zawng za-a 64.79 an pass a, HSSLC Arts-ah za-a 55.08-in an pass a, Science-ah za-a 69.57, Commerce-ah za-a 60-in an pass a, Computer Technique-ah za-a 37.50, Vocational Course Software-ah za-a 80, Hardware-ah pass an awm lova, Vocational Course tho, Garments-ah za-a za an pass a, Automobile-ah za-a 50 an pass a ni.

28^th. Thursday: Chalfilh Group YMA Conference chu zanin atanga atang khan Ratuah tan a ni. He Cofn. hian naktuk zan thleng a awh ang.

29^th. Friday: Mizoram Cultivator and Labour Union, MICLUN chuan Agriculture Minister, Pu H. Liansailova chu vawiin khan Teachers Inn, Mc Donald Hill-ah an chawimawi.

30^th. Saturday: Zokhawthara Myanmar nena ramria insumdawn tawnna chu vawiin atang  khan hawn leh ta.

31^st. Sunday: Vawiin kha Lal Isua van lawn atanga ni sawmngana ‘Pentikost Ni’ a nia; Kohhran hrang hrangte’n he ni pual hian inkhawmna an nei hlawm.

Similar Posts:

• June 2008 Mizoram Diary
• August 2008 Mizoram Diary
• July 2008 Mizoram Diary
• October 2008 Mizoram Diary
• December 2008, Mizoram Diary

Recent Posts:

• RIP lushai_er
• Kolasib tuilut an lut
• JANUARY 2016, MIZO(RAM) DIARY
• KAN EK IN
• PATHIAN THU ZIR HI I UAR TEH ANG U

This entry was posted on Saturday, June 13th, 2009 at 8:36 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.