July ni 20 zan dar 7:00pm khan Dawrpui Vengthar KTP ten Kan Kohhran Upa, Upa V.Thangzama pualin hun kan hmang a. He hunah hian kohhran mipui leh vengpawn lam atangin. He hun minlo hmanpui leh hlutpuitu mi thahnem tak an tel a ni.
He hunah hian Upa V.Thangzama hlaphuah leh lehlin te,a chanchin ngaihthlak na hun leh chawimawina Thuziak hlan te leh Upa V.Thangzama hla te sa in hun hman a ni a, a hlaphuah 6(paruk) leh a lehlin 1(pakhat) Zaithiam ten sa in Live Music hmanga rem a ni. A hla sa tu te:
1) Solo :Nl Baby Malsawmtluangi – Ka Zaichhan Isua (1975 a a lehlin)
2)Solo :Nl Lalhmangaihi(sini) – Siamtu zai ngai mai rawh (Chord rem mawi tak 1977 a phuah)
3)Solo :Tv Lalfakawma (Faktea) – Naktuk thu ka hrelo
4)Duet :Nl Zohmangaihi(tete-i)&Tv C.Lalmuankima – Khawngaih Chhandam (VTZ Master piece tih mai chi)
5)Trio :Nl.Lalhmangaihi(sini)Tv Lalfakawma(Fakte-a)Tv Lalmuanpuia Hnamte (buddy) – Engkim thawthei zai se (VTZ 1977)
6)Kohhran Zaipawl : Zanriah Hnuhnung (Sakrament hla mawi lutuk a phuah)
Heng bakah te hian Kristian Hlabu a a hla lehlin leh a phuahte hmangin mipui zaihona kan nei bawk a ni a, Van Aw Mawi Ri Chu Ngai Ru tih a hla phuauh sa in hun hi khar a ni.
V. THANGZAMA CHANCHIN
Pian leh Murna : Zanina a puala hun kan hman tak Vanchhawng Thangzama, Upa V. Thangzama tia hriat lar hi kum 1935, March ni 23 khan Ngopa, Lalzidinga Sailo Lal khuaah a lo piang a. Ngopa khua hi a hmaa Khawdungseia awm leh a kiang Chiahpui khua lo ni tawh Sailo Lal Hrangchhuana khaw mite vek an ni.
Ngopa lal hi chu a fapa Lalzidinga a ni a, lalte zinga matric pass hmasa ber a ni. Shillong-a zir chhuak leh Assam milian hmelhriat pha a niin sawrkar duhsakin Middle School pawh a hawng nghe nghe a ni. Upa V. Thangzama pa hi Upa Vanthuama 
a niin a nu chu Laichhungi(L) a ni. An unau hi sawm niin mipa 4 leh hmeichhia 6 an ni.
Kum 1960-ah Pi Vanlalengi d/o Rangkunga, Dawrpui Veng nen inneiin fa panga-mipa 4 leh hmeichhia 1 an nei a. Kum 1972 khan kan veng, Dawrpui Vengtharah hian rawn pem lutin, tunah hian a fa leh tute nen Compound khatah an khawsa mek a, kan vengah hian a nu leh pa pawh vuiliam an ni lo tawh nghe nghe a.
Zirna/Thiamna Lam : Primary School hi Ngopaah a kal a, a thiam thei pawl niin pakhatna a ni thin. Middle School pawh Ngopaah tho a kal a, High School erawh Mizo High School, Mc Donald Hill, Aizawlah a kal thung a. Hemi hnu hian I.Com. (Intermediate of Commerce, tuna 10+2 kan tih hi) Imphal-a college hawn thar, D.M. College-ah a kal a. B.Com erawh City College, Calcutta-ah zirin kum 1958 khan a zir chhuak a.
Hnathawh (Sawrkar Hna) Lam : Kum 1959, October ni 20-ah Govt. Higher Secondary School, Aizawlah Commerce zirtirtuin a thawk tan a, he hna hi 1961 thleng a thawk a. Hemi hnu kum 1962 khan Assam Civil Service-ah a lut a.
BDO-in Mamit, Saitual leh Nowgong & Garo Hills-ah te a thawk a. Sub-Divisional Planning Officer, Tura District (Assam) a ni tawh bawk a. Hemi hnu, Mizoram U.T. a lo nih khan Assam Civil Service atangin Mizoram Civil Service-ah inletin Under Secretary leh Deputy Secretary-in department hrang hrang kum eng emaw zah a enkawl a.
Extra Additonal Commissioner leh Addl. District Commissioner hnate a chelh tawh a. Tin, Lunglei D.C. pawh a lo ni tawh a. Department hrang hrang (LAD, Sericulture, Administrative Training Institute leh Relief & Rebabilitation)-ah te Director-in a awm tawh bawk. Mizoram Publice Service Commission din a nih khan Secretary hmasa ber a ni bawk. Hmun hrang hrang – Mizoram chhung leh pawna sawrkar hna a thawh hnuin kum 1994, January ni 1 khan a pension ta a ni. A pension hian sawkara kaisawina tawp (Super Time Scale) a thleng hman a ni.
Khawtlanga Rawngbawlna : Lehkha a zir laiin zirlai pawl hrang hrangah hruaitu a ni tawh a. CYMA lamah pawh Tum hnih lai Vice President a lo ni tawh a, Lunglei Sub-Headquarters YMA-ah President a ni tawh bawk. Hmun hrang hranga sawrkar hnathawka a awmna apiangah theihtawpa khawtlang tana thawk mi a ni. Tin, kan veng YMA-ah te pawh O/B hna a lo chelh nual tawh a. Heng bakah hian zirnain a kaihhnawih hrang hrang board/organisation-ah member a ni tawh a.
Rawngbawlna Lam : A pianna khua Ngopa atangin lehkha zir leh hnathawka a awmna khaw hrang hrangah kohhran rawngbawlna lam a ngaipawimawh thei hle a, a bikin zaipawl rawngbawlna lamah a thawh hlawk hle. January ni 29, 1978 khan Upa atan thlantlin a niin October ni 8, 1979 khan Chhimthlang Presbytery Inkhawmpui West Phaileng Kohhran Biak Ina neihah Moderator Upa Lalrammawia’n Dawrpui Vengthar Kohhran Upa (Sawmna) atan a nemnghet a.
Lungleia sawrkar hna thawka a awm, kum 1984-85 bawrah Baptist Kohhran lam Assembly Lunglawn a nghah chuan kohhran ramri an thiat thut mai a, hetih hun laia Presbyterian ‘Upa Ordained’ awmchhun a nih avangin Presbyterian Kohhran ding tir leh Bial siam thara Chairman hmasa ber atan ruat a ni a. Zoram pawna hna a thawh laiin Zoram Pawn Mizo Kohhran Upa a ni tawh bawk.
Kohhrana chanvo pawimawh a chelh hrang hrangte :- 1) Tualchhung Kohhran : Tualchhung kohhrana chanvo a chelh hrang hrangte chu sawi vek sen a ni lova,kan kohhran upa min ber a ni tih chu kan hre tlang awm e. 2) Bial Level : i) Chairman hna tum khat a chelh tawh. ii) Nomination Committee Member. iii) Standing Committee Member tum thum. 3) Presbytery Level : Standing Committee tum hnih. 4) Synod Level : i) Music Committee Member tum thum. ii) Social Front Committee Member kum hnih. iii) Kristian Hla Bu Ennawn Sub-Committee kum thum.
Hla Lama A Sulhnu : Thu leh hlaa mirila sawi a ni naa tawngkam erawh a thiam vak bik lo, thu leh hlaa a thiamna chu hla thu hmangin a puang mai thin. Sawi aia ziak leh phuah lama talent nei tha a ni. Hla phuah mai bakah a thluk siam, lehlin leh Intihsiaknaa endik lamah a thawh hlawk hle a. A hla phuahte hi Zoram dung chhuak khawpa lar pawh a awm nual a. A hla phuah leh a phuah dan chu kan sawi vek seng lo a.
Hla hi Pathian Hla – 30 vel a phuah tawh a; Ramngaih Hla – 5 vel leh English – in 3 a phuah tawh bawk. Heng bakah hian a sulhnu – A thluk siam, lehlin a nei nual bawk a, a hla phuah thenkhat hi Kristian Hla Bua seng luh leh puipun nia sak chite a ni hlawm. Zoram huapa Thu leh Hlaa a larna hi zanin hian kan lawma kan chawi sang a ni lo, hetianga Zoram-in mirila a neih zinga kan Kohhran Upa a tel pha hi kan chhuanga, zanin hian a pualin kan theih ang tawkin hun kan buatsaihsak mai zawk a ni.
Zanin hian a hla phuahte hi kan theih ang/thiam ang tawkin kan sa a, a hla thute hi hla thu ngun lo a nih laiin Hla Thu ‘Poetic Word’ a hmang thiam hle a,ing euh deuha a rem laiin hriatthiam a awl hle a ni.
mzvision : Dawrpui Vengthar KTP in damlai ngeia an Upa chawimawina hun an hmang hi hmangchang an hria-in tihdan trha zawk tintuah-a ruahman-a chawimawi phu te chawimawi zel nachang min tihhmuhtu lo nise tih duhna rilru neiin ka han post a ni e. Ka lawme.
Upa V.Thangzama hla thluk siam Rebecca Saimawii’n a phuahtu Upa Lalthankima hriatrengna atana a sak hi ngaihthla ila, V.Thangzama class a hriat theih ang.
Similar Posts:
- V. Thangzama Nite Videos
- Upa LH Rohmingliana Nite
- Rev. Dr. Lalchungnunga chanchin pawimawh zual.
- VANGPUI KUT (Khuangleng khua kum 125 na lawm turin a inbuatsaih mek)
- Prayer for Burma
July 21st, 2009 at 10:00 am
Pu V. Thangzama hi ka mi ngaihsan tlemte te zinga pakhat a ni. A hlaphuahte hi a thu leh thluk a that bakah a rhyme tha thin. “Rualtinkhum YMA” tih hlate hian belhchian a dawl ngang mai. A fateho hi thu leh hla lamah hian tui ve hlawm maw?
Makurhi zai video-a remtu lo lang ve hi C. Luri a ni maw?
Report this comment
July 21st, 2009 at 10:19 am
He tiang a an upa chawimawina chang an hria hi an veng KTP te chu an fak awm hle mai.Mi dang pawh siam sak ve chu a tih chi em em in ka ring; ho te ah inthik a hlauhawm thin…
Report this comment
July 21st, 2009 at 10:32 am
Tel ve phak a va chakawm ve le. Tum khat chu Upa V. Thangzama in hi Office-a kan luah laiin office-ah zaipawl hla rem tur hi ka lo chhu a. Ka hla chhut lai chu a rawn bih vung vung a, “Mizo traditional bawk maw?” a rawn ti a. Slur kuai thla chi hi Mizo hlaah hian a lo tam hle a lo ni awm a. Hla thluk siam te hi a thiam khawp mai a. Technically in a thiam a ni. Lal ka thlang tih hla thluk te hi a mawi dangdai khawp mai a. Mizo irawm chhuak ni lova mawi a ni. He hla a phuah dan hi tumkhat chu Upa Lalthankima hian a sawi ka hre tawh a. Zanah lehkhabu a chhiar a, hmeichhe naupang pakhat hian a retheihna avanga hrehawm a tih thu leh hausa ve deuh se chuan engkim Pathian tan a pek tur thu ziahna lehkhabu a ni a. Ngaihtuah vak lem lo hian lehkha phek tla hlangah hian chumi thu chu a thai mai mai a. Zingah Upa V. Thangzama hi a zuk leng a. Dawhkana chu thu ziak lo let reng chu a hmu a. A han chhiar a. “A.. hei hla a nih hi” a ti a. Upa Lalthankima chuan, “I duh leh a thluk siam ta che” a ti a. He hla hi a lo piang ta a ni, ti ang deuh hian a sawi ni ta in ka hria. D. Vengthar KTP ten chawimawi tlak chawimawi nachang in hria hi in fakawm ka ti. YMA lamin han nawn leh sak sela, Ramngaih hla a phuah te hi a hlu hlawm hle bawk a nia.
Report this comment
July 21st, 2009 at 10:39 am
Kei pawh ka tel ve chak khawp mai.
Report this comment
July 21st, 2009 at 12:20 pm
@kanidar
Vanneih thlak takin ka tel ve hlauh maia, Dawrpui Vengthar hi zaithiam an ngah hrim hrima, an inthlah chhawng ti mai ila, a sual tam puiin ka ring lo.
Tunhma zaipawl kan tel ve lai chuan C.Vulluaia hi kan conductor a ni trhin mawle, zirtir thiam tak a ni.
Upa VTZ hian a insawi dan chuan “kei chu pianpui hla phuah thiam ka ni lova, music te kan lo thiam ve avangin a chord khrihkhan te leh rhyme tur te zo trawng hausa lo tak si ah hian zawng zelin technical deuhin ka pum ve trhin. Chuvangin song writer ka ni zawk mah a ti”.
Hemi function zai hi a video mp4 ah kan convert anga admin ho in an phal chuan ka han share ang cheu misual trhiante
Report this comment
July 21st, 2009 at 12:58 pm
Han share rawh khai. No objection certificate ka pe nghal a che
Report this comment
July 21st, 2009 at 1:24 pm
@mzvision, i van awhawm bik ve… Pu @xaia a rawn in awrh hnawk viau lo maw?
Report this comment
July 21st, 2009 at 1:38 pm
Lungngaihna hual velin’ tih hla kha tinge an sak loh lke?? nalh tehreng nen,,
Report this comment
July 21st, 2009 at 1:39 pm
@mzvision rawn share vat vat la,,DPVT KTP ten thiltha leh tih awm tak an ti ani,,ropui hle mai..
Report this comment
July 21st, 2009 at 3:06 pm
@kanidar
XaiA lang lo aniang
@felcrez
KTP hovin an thiam chiangkuan chauh an sa nge ka hre bik lo tlats
@Kungawrhi
DPVT KTP hi an CK riau asin, share hrim hrim neih phots chuan
Report this comment
July 21st, 2009 at 5:08 pm
D Vengthar Zaipawla kan hla rem tawh zawng zawng a, ka theihnghilh theih loh chu Pro Pastor Benny Lalmawia induction tuma, ‘khawvel hrutchhuak ila’ tih leh ‘Lalpa in krosspua lo pen chhuak hi’ (Pu PB Lianzama conduct na hnuaia) kan sak zawm kha a mawi lutuk a, zaipawla tel ve te pawh kan mur ur ur, ka theihnghilh thei lo.
Report this comment
July 21st, 2009 at 6:23 pm
@felcrez ‘Lungngaihna hual velin tih kha chu’sak omtak chu a ni..mahse hun a chep lutuk a ni om e..tin,Dpvt Ktp te hla rawn sak ho kha..sak tura chhawpchhuah sak te an ni hlom bawk.
Upa V.Thangzama hla reng2 hi a rhyme a dahdik em em mai a,Mizo kutchhuak hla Hetiang khop a chord dah nalh thiam hi a ropui hle in ka hria.Tonic Solfa ah pawh tunlai thangthar te hian kan lo va la tluklo nasa em !!
Dawrpui Vengthar Ktp te hetiang ang Kohhran upa an nei leh,chawimawina hun hmangthei a an om hi ka lawmpuia an vannei ka ti em em bawk a ni.He hunah hian Zaithiam hranghlui Pi Vanlalruati hmel te poh ka hmu ve a.. a thut hmunah a lo zai ve nasa mai a, hun remchang awmin,theih chu nise,kan musician te nen khan inbe remin ‘Siamtu zai ngai mai rawh’ tih hla kha han saktir a chakom khop mai.
Upa V.Thangzama leh Dawrpui Vengthar Ktp te an Rawngbawl Zelna turah Duhsakna sangber ka hlan nghal bawk e.
Report this comment
July 21st, 2009 at 7:48 pm
Chawimawi phu te hi chu an damlai ngeia chawimawi hi a hlu a, chuvang chuan kan mi hmingtha leh chawimawi phu te hi chu chawimawi hmiah hmiah mai tur. An thih hnua mi ropui bera kian chhuah leh tho dawn ai chuan an damlai ngei hian an hlut zia leh ropui zia hi anmahniin hre rawh se. Pu V. Thangzama hian chawimawi a phu a, chawimawi a ni hi ka lawmpui e.
Report this comment
July 21st, 2009 at 7:53 pm
Tunhma atang tawhin Zoram khawvelah rimawi sawi tawh chuan Dawrpui Vengthar hi sawi hmaih theih an ni lo a. A kungpui zingah Upa V. Thangzama hi a sawi tel loh theih loh a. Hetianga KTP in chawimawina hun an buatsaih hi a ropui a, chawimawina hun ropui tak buatsaihna chang an hria hi an fakawm tak zet a. Branch dangte tan pawh an entawntlak hle mai.
Mihringte hian mahni tawkah hlutna kan nei theuh a, hetianga kan hlutna neih te hi a lian emaw, a te emaw, midangte hian inhriatsak tawn thei zel ila, kan that lohna lai chauh inhmuhsak kan ching hi kalsan thei vek ila Zoram nuam kan siam a ni mai.
Report this comment
July 21st, 2009 at 8:44 pm
DPVT KTP chu blog te pawh an lo nei changtlung khawp mai a, hemi story pix pawh en tur a awm nual mai.
https://dawrpuivengtharktp.blogspot.com/
Report this comment
July 21st, 2009 at 9:08 pm
tel ve a va chakawm tak ve. Zaiho dup dup hi a lo nuam ber mai.
Report this comment
July 21st, 2009 at 9:47 pm
Ekhai, Ngopa lam chhuak a lo ni reng mai a. Ngoppa leh Khawdungsei lam chhuak hi chu kan nel nghal em em zel mai a, han insawi takah chuan an ni pawhin min ngai hrang lo nghal thei mai zel a.. Khaw khat chhuak ro roah pawh Ngopa hi chu an la in eng emaw bik viau zel mai nia. Ka Pu Lalzidinga hi Vanhnuailiana tupa Hrangchhuana fapa upa ber a ni a, a nu chu chhim lam lal Vandula leh Ropuiliani te tunu Lalbiaki a ni. Mizo lalte zingah matrick pass hmasa ber a ni a. Kum 1920 vel khan a pass a ni.
Report this comment
July 21st, 2009 at 10:07 pm
Rebecca hla sak hi a musician tunge le? an va rem mawi rem2 ve le.. Sicily ah ka awm emaw ka ti dawn alom le.. drums mawi hleeee mai
Report this comment
July 22nd, 2009 at 3:06 am
DVKTP blogah chuan “Upa V Thangzama (L)” an tih pek khi mawle. “(L)” hi chu an la damlai chuan dah loh tur ni awm tak ani a !!!
Report this comment
July 22nd, 2009 at 3:12 am
Damlai ngei a hetianga an chawimawi hi an ti thra hle mai. Entawntlak tak an nih khi DVT ho chu. A fapa Mamuana EE (SE?) PWD te nen khan kan inkawm ve thrin kha mawle Zawlwood a kan awmve lai kha chuan.
Report this comment
July 22nd, 2009 at 1:11 pm
“Upa V. Thangzawma (L)” tih sawi takah chuan, a mah hi Aizawl Museum ah a kal a, a mah cc an lo tar kha ahmu a, aphu zawk an ti. Tin a fanu Mami hi Aizawl West College ah a thawk a, “Tho la ding ta che” tih hla kha Language ah an zir emo ni, naupang hoin examnaah an han ziak chu a then chuan Upa V. Thangzamin hi an sawi thi tawh char char a, a nuih zatthlak duh khop mai a ti. A nungchang hi a nuihzatthlak ve hrim hrim a, frank ropui si, a Pathian thu soi phei chu muthluk theih loh, kan then tho reng mai a ni.
Report this comment
July 22nd, 2009 at 9:02 pm
Hla phuahthiam miril V.Thangzama Mizo ten kan nei hi kan vannei thlawt e.
Report this comment