mi(sual).com

Hmangaihna Mak
By Bill Bright

Korea ram tual chhung indona a inmun mek lai hun kum 1952 Krismas dawn ni tlai lamah chuan hmeichhe rai puar pakhat la naupan hmel tak hi kawtthlerah chuan na tuar tih hriat tak hian a rawn kal pai chawn chawn a. Kawtthlera a mi tawh apiangte hnenah chuan, “Min tanpui teh u! Khawngaih takin…ka nau hi..” tiin a ngen tawk tawk a. Tumah lah chuan an ngaihsak der si lo.

Nupa upa lam deuh tawh hian an rawn kal pel a, an nu chuan hmusit zet hian chu hmeichhe nau vei chu a han nam her sawk a, “Khawiahnge a pa? Khawiahnge I American bialpa chu?” tiin diriam fe hian a han nuihsawh zui a. Amah nuihzat chunga an kal liam mek lai te chuan a nau vei na ti lutuk chu a kun tlawk tlawk a, “Khawngaihtakin….”tia a au zui lawm lawm thawm te chu hria awm pawhin an lang tawh lo.

Chu lai atanga khaw hla vak lovah chuan Missionary pakhat a awm tih mi tawngka atanga a lo hriat tawh chu pan ta se la a lo tanpui thei mahna. Chu mi khaw lam chu hmanhmawh rilru tak chung chuan a pan leh ta a. Min lo pui thei hlauh mai se la aw a ti rilru vawng vawng a. Nau vei na leh khaw vawt nen, chu khaw dai vur khuh var vo mai chungah chuan zawi te tein a kal zel a.

Khua chu a thim ruai tawh a, a vawt em em mai a, vur a rawn tla zui leh ta nghal a. A pum nat dan atang chuan naute chu rei lo teah a lo piang mai dawn a ni tih hriain chu lai hmuna leihlawn hnuai thli up lamah chuan a lut ta a. Chu hmun khawhar takah chuan a naute chu tuma hriatpui lohvin Krismas dawn ni tlaiah chuan a lo piang ta a ni.

A fapa piang hlim chuan vawt a ti dawn tih hriain ama kawr hak lai chu a hlip a, a fapa tuam nana hmangin ama pangti lum ngheng tur chuan nghet takin a kuah ta a. A tukah chuan Missionary chu vur sur sung sung karah chuan Krismas thilpek sem turin a chhuak a. Chutia a kal lai chuan nausen tap ri a hre ta a. Chu nausen tap ri chu a chhui zel a, leihlawn hnuaiah chuan a chhui lut ta a. A han en nak chuan nu la naupan hmel tak, khawvawtin a hmeh hlum khawng der tawh chuan a fapa nausen piang hlim, tap ngawih ngawih chu nghet takin a lo la kuah fan a. Missionary chuan chu nausen chu dim tein a nu kut ata chu a lak sak ta a.

Chu nausen chu kum 10 a lo tlin chuan fa anga amah lo enkawltu Missionary chuan tun hma kum 10 kal taa Krismas dawn ni tlaia a nuin a hrin dan chu a hrilh ta a. A nuin atana a tuar nasatzia a han hriat chuan chu mipa naupang te chu a tap ta zawih zawih a.

A tuk zing taka Missionary han tho chuan mipa naupang khum ruak chu a hmu ta a. Pawna vur zingah chuan mipa naupang hniak chu a va hmu a, thawmhnaw lum a inbel sawk sawk a, mipa naupang hniak chu chhui zelin a nu thihna hmun leihlawnah chuan a va chhui thleng ta a.

Chu leihlawn bul a va thlen chuan Missionary chu mak tiin a ding chawt a. Vur chungah chuan mipa naupang chu saruakin a lo thingthi a, vawt tiin a lo khur hlawk hlawk a. A thawmhnaw chu a kiang maiah chuan a lo dahkhawm a. Tlema a han hnaih deuh chuan naupang, vawt tih avanga khabe inkhawng hlak hlak chunga a tawng ri chu a hre ta a:
“Ka nu, ka tan khan hetianga vawt hi em ni i lo tuar?”

He thawnthu hian nu pakhat leh a Fapa, hrehawm tuar nasa em emte min hriat chhuahtir fo thin. Tum khat thlasik khaw vawh em em zan khan Isua chuan a chenna in, van ropuina leh nawmna kalsanin ranthlengah amah lo lawmtu awm lohna khawvelah a lo piang a. A pian hma lawk khan a nu, Mari ngei pawh chuan Bethlehem khualbuk inchhung lum nuam chu a chang zo ta lo va, zan thim hnuaiah ranthleng vawt tak chungah a nau hrin chu zalh a lo ngai ta a nih kha. Lei leh van Siamtu, Roreltu Famkim, a tawngkam khat leka khawvel tiboral theitu kha, nang leh kei avangin tlawm takin bul a rawn tan ta a ni. Chu chu a ni tawp nei lo hmangaihna chu!

Chu Pathian hmangaihna tem tawhtute chu midangte hmangaih let ve tura thu pek kan ni. Johana chuan, “Duh takte u, Pathianin chuti kauva min hmangaih chuan keini pawh kan inhmangaih tawn theuh tur a ni” a ti. (I John 4:11)

“Chutianga midangte hmangaih theihna engmah ka nei lo” kan ti a ni mai thei. Pathian hmangaihna tem tak tak tur chuan rinna hmanga kan dawn a ngai. Chutianga kan tih chuan mi tupawh Pathianin kan hmaa a rawn hruai apiang kan hmangaih thei thin. Ka Kristian nuna ka thil zir chhuah pawimawh ber pakhat chu ‘rinnaa midangte hmangaih’ hi a ni. Pathian hmangaihna tawp chin nei lo keimahni kal tlanga luan chhuahtir tura rinnaa kan tawngtai chuan, chu hmangaihna chu keimahni nunah tihalh thar leh tihnunin a lo awm thin a ni.

Khakna thinlung leh ngaihdamna nei lo thinlung sak tikehsawm tur chuan kan chetzia leh tawngkaa hmangaihna dik tak lantir tluka hmanraw tha a awm lo. A chang chuan nang leh kei hian mite nena kan inrem na turin rinna hmanga hma kan lak hmasak hi a ngai fo thin. A tirah kan hlawhtling nghal mai lo a nih pawhin, hmangaih zel la, umzui zel rawh. Khawvelah hian Pathian hmangaihna ropui tluka thiltihtheihna chak zawk reng reng a awm si lo va.

Source:
https://www.thoughts-about-god.com/christmas/marv_love.htm

Similar Posts:

• Tu hmangaihna nge thuk ber ang?
• Nang i ni
• Hmangaihna hi enge a awmzia?
• Love Theory!
• NU 163

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, December 8th, 2009 at 12:08 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.