mi(sual).com

1^st. Sunday: Kumin September ni 28-a Rih dil kawnga Bus chetsualna thlengah leh October ni 24-a Rihdila hmeichhe naupang tla hlum ruang zawn kawngah Champhai DC, Pu TV Fambawl chuan Khawmawi leh Rihkawdar mipuite, Myanmar Police leh sipaite chungah lawmthu a sawi. Hemi rual hian Champhai DC chuan Rihkhawdar thalai pawl tan Rs 10000/- bakah Petromax leh Silpaulin 5 a pe bawk a ni. Champhai DC hi Officer dang leh Champhai YMA Sub-Hqrs hruaitute, chanchinbu miten an tawiawm a ni.

2^nd.Monday: Vawiin chhun khan Champhai zawla Tuipui hnar khuahah Zomuansanga, (12) s/o K. Thanghnuna leh Lalramnghaka, (12) s/o Khuangnghilhlovi Zotlang veng ve vete chu an tlahlum. Police-te chuan vawiin tlai khan an ruang hi endik hna an thawk nghal a ni.

3^rd. Tuesday: Panchayat Yuva Krida Aur Khel Abhiyan (PYKKA) hnuaia Mizoram pum huap inelna, State Level Competition 2009-2010 chu vawiin khan Sports Minister, Pu Zodintluanga’n 3rd MAP Khelmual-ah a hawng.

4^th. Wednesday: DEO neilo Lunglei Dist. mipuite chuan DEO neih ngiatin vawiin khan Lungleia School zawng zawnga zirlai, Primary School atanga College thleng-te chuan class an kal lova, School thenkhat class kalte pawh chawhnu lamah chuan an haw leh vek.   Zirtirtute erawh chu School tinah leh College-ah a pangngaiin an kal thung a ni.

5^th. Thursday: Serlui, tura hrai a nih avanga Tuikhuahtlanga tuizem lian leh Zonal Tank hrang hranga tui dah khawl, litre nuai tam tak paih a nih avanga hun engemawchen tui sem mumal loh chu vawiin atang khan a pangngaia sem tan a ni leh ta.

6^th. Friday: Tunlai hian Mizoram-in phai lam atanga kawlphetha, Megawatt 54 vel a hmuh theih tak avangin Mizorama eng dinhmun chu a tha chho hret hret hret zel.

7^th. Saturday: Planning Commission mi tirh, Central Multi-Diciplinary High Power Team, Aizawla cham mekte chuan vawiin khan Aizawl leh a chhehvela NLUP hnuaia hnathawhna tur hmun pawimawhte an tlawh.

8^th. Sunday: Ram chhunga damdawi in tha berte zinga inchhal, Apollo Gleneagles Hospitals, Kolkata chuan Mizoram mipuiin awlsam zawka an rawn theih nan Aizawl-ah Information Centre hawn thuai an tum.

9^th. Monday: Vawiin khan Presbyterian Hospital, Durtlang chuan kumina General Nursing & Midwifery (GNM) zir thar turte lukhum khumtirna leh khawnvar hala thutiam tirna, Capping & Lamp Lighting Ceremony vawi 36-na chu Presbyterian Hospital Nursing School Auditorium-ah an hmang a, Hospital Medical Superintendent , Dr. C.Lalhmingliana’n a kaihruai a, Synod Moderator, Rev. H.Lalchhanhima chu khuallian a ni.

10^th. Tuesday: Synod Executive Committee vawi 224-na, ni 3 chhung awh tur chu vawiin atang khan Pi Zaii Hall, Synod Conference Centre-ah an thukhawm tan.

11^th. Wednesday: Aizawl-a Private English Medium School-a Primary zirtirtute chuan vawiin khan Babutlanga Cooperative Hall-ah workshop neiin drama hmanga naupang zirtir dan an zir. He workshop hi Mizoram English Medium School Teachers Association leh Kolkata-a Training Through Theatre Madhuban Education Forum tangdunte buatsaih a ni a, hetah hian Mizoram English Medium School Teachers Association President, Pu K. Chhawnthuama leh Vice President, Pi Chaitali Moitra-te bakah Madhuban Education Forum, Kolkata-te pawh an tel a ni.

12^th. Thursday: Farkawn atanga Champhai lam pan, Aizawl Night Bus, LD Travels MZ 04 -0849 Sapliana Vaphai ta chu vawiin chawhnu dar 3:30 vel khan Dilkawn khua atanga hnai te, Buang khaw peng bulah sterring fail avangin a chesual a, a hmunah mi 6 an thi nghala, damdawi in panpui an nih laiin pakhat a boral ve leh a ni. Hliam engemawzat an awm bawk.

13^th. Friday: Mamit District-a Bungthuam khaw tlangval, Zarzokima,(17) s/o Lalngilneia chu Tuikuk hel pawl nia rinten tukin  9:45 vel khan  vawkchaw tur dawl a lak laiin an kap hlum. A ruang bulah hian lehkha dahin an thil phut chungchangah an hlawhtlin hma chuan hma lak zel an tum thu an ziak a, a tawpah an hming atan Bru Revolutionary Union tih an tarlang bawk. Zarzokima ruang hi Zawlnuam-ah endik tura lak a ni a, Bungthuam hi Kanhmun Police Station hnuaia awm a nih avangin he inthahna chungchangah hian Kanhmun Police Station-ah tualthah thubuai ziah luh a ni a, a thattute hi Police-te chuan an zawng  zui mek a ni. He inthahna thleng avang hian Zawlnuam leh Kanhmun velah chuan boruak a sosang hle.

14^th. Saturday: Chhun dar 1:00pm khan Pine Mount Hr. Sec. School Aizawl, Geography Department Pawl 12 zirlai Field Trip-a Rihdil kal hawlam chuanna City Ride Bus MZ 01 4487, Pu Hrangdailova, Armed Veng South Bus chu Khawzawl atanga 9 Km vela a hla Khuailui bulah a chesual a, zirlai 1, Soni Biakhmingsangi (18) D/o. Zorambuaia Cheural, Lawngtlai Dist ami, tuna Aizawl Tuikual Venga khawsa mek chu Khawzawl damdawi in panpui a nih laiin a thi. Hliam engemaw zat an awm bawk.

15^th. Sunday: Rolawma (32) s/o Dailova Hnahlan chu tukin dar 3:00 vel khan, a unaupa Darchhungthanga (27) chuan tuboh hmangin a chhu hlum. Tualthattu Darchhungthanga hi a taksa himna turin Champhai Police Station-ah a inpe nghal a ni. He tualthahna hi chhungkaw ro chungchanga an inhnial buai vang nia hriat a ni.

16^th. Monday: National Press Day a nia; Press Council of India duh dan angin ram pum huapin hman a ni a, Mizoramah pawh Information Department Auditorium-ah Chief Secretary, Pu Vanhela Pachuau hova hman a ni.   Press Day thupui atan hian ‘India rama media hmel danglam dan’ tih hman a ni a, he thupui hi chanchinbu mite chuan an sawiho a ni.

17^th. Tuesday: Synod Finance Committee vawi 89-na, ni 3 chhung awh tur chu vawiin chawhma dar 10:00 atang khan Pi Zaii Hall,  Synod Conference Centre-ah tan a ni. He comt. hi Synod Moderator Rev. H. Lalchhanhima’n a kaihruai a ni.

18^th. Wednesday: Zanin dar 7:30 vel khan 207 truck MZ 08 4691, Lalhmingliani, Saipum ta chu Vairengte atanga Saipum lam pana Bagha road-a a tlan laiin Bagha pelh hnu Cachar ramchhung Kalohar leh AP Camp inkar, Saiphai lam hnaihah mi tutih hriat loh, hmaituam leh tiang keng Hindi hmangte’n an suama; pawisa fai Rs 578340/- leh an thil hlu engemawzat an laksak a ni. He thil titute hi anmahni hrechiang hle tu annih rin ani.

19^th. Thursday: Khawvel hmun dangte ang bawkin kawng hrang hranga naupang tihchhiat dona Ni ‘World Day for Prevention of Child Abuse’ chu vawiin khan Mizoram-ah pawh hman a ni. Aizawl bakah Lunglei, Saiha, Lawngtlai leh Ngopa-ah te pawh he Ni hi tlawmngai pawl hrang hrangte huaihawta hman a ni. A hmanna pui ber Aizawl-ah chuan Centre for Peace & Development (CPD) chuan Millennium Centre kawt atanga Chanmari YMA Hall thleng, naupang khuaikhem leh tihchhiat duh loh entir nan kawng an zawh a,  MHIP leh Human Rights & Law Network, Social Welfare Dept aiawhte leh sikul naupangte thahnem tak an tel a ni.

20^th. Friday: Aizawl Theological College Day a nia; prog. hi hun hniha thenin hun hlimawm takin an hmang.  He hun hi Rev. Dr. Theodore Ahrens, Professor Emeritus, University of Hamburg, Germany chuan hmanpuiin College Day chu Address a pe a, “En teh u, buhte chu seng turin a eng ta” (See, the fields are white for harvest) tih thupui hmangin thuchah ngaihnawm tak a sawi nghal bawk. Synod Secretary Rev. C. Laltanlianan malsawmna sawiin College Day lawmna hun hi a khar a ni.

21^st. Saturday: Chhun dar 12:30 khan Mizo Students’ Association, Bangalore chuan   UTC, Benson Town-ah  MSA Day an hmang. He hunah hian hian thalaite’n kan mamawh em em, nula leh tlangval inngaihzawn lai nun atanga nupaa insiam thlenga nun dan leh inkaihhruaina lam hawi thu tha tak Pu Josiah L. Ralte leh Pu Rev. R.L. Thanmawiate hnen atangin ngaihthlak a ni. Tlaiah vawksa rep nen hlim takin chawhlui an kilho nghal a ni.

22^nd. Sunday: Aizawla Roman Catholic Kohhran chuan Kulikawna Christ the King Cathedral-ah Isua Krista chawimawina hun an hmang. He inkhawmah hian Biak-In kut lawm nghal a ni a, Aizawl Bishop, Most Rev. Stephen Rotluanga chuan Kohhran mite chu Mass Thianghlim neihpuiin, mi engemaw zat nemnghehna Sakrament a neihpui bawk a ni.

23^rd. Monday Mizote zinga mi pawimawh leh kawng tam taka hmahruaitu Pu L.N Tluanga Ex MLA chu  zing dar 2:45 khan Aizawl Civil hospital-ah lungna avangin boral a, vawiin vek  khan a chenna Electric veng-ah Rev Dr C.Chawnghmingliana’n a vui a, vuina hun ah hian vantlang tana a lo thawhpui tawh tlawmngai pawl hrang hrang aiawhte leh Sawrkar mi pawimawh tak takte tel tha hle a ni.

24^th. Tuesday: Sorkar laipuia Youth Services Ministry hnuaia Nehru Yuvah Kendra, Mizoram Zone-in Youth Hostel, Luangmual-a tun thla ni 18 atanga a buatsaih, National Integration Camp chu vawiin khan khar a ni a, Sports and Youth Minister Pu Zodintluangan a hmanpui. Vawiina khar tak National Integration Camp ah hian state  dang  pali atangin lokal an awm bawka;  tichuan an zavaiin 101 an tel a ni.

25^th. Wednesday: Kolasib Exise duty-te’n police motor anga chei gypsy pakhat atangin sap zu engemawzat an man. A neitu Laltanpuii d/o Lalthankhuma Khatla veng nia insawi chu man nghal a ni.

26^th. Thursday: Zing dar 2:20 vel khan Gauhati atanga Aizawl pana tlan MST bus, MZ 01 D 9098 chu Silchar bul Masimpur bulah misualin suam tumin an lo beia; mahse heta bus conductor Lalrimawia (45) Tuikual South in theihtawp chhuaha a lo beihlet ve avangin pawi liantham a thleng lo hlauh. Conductor hian hliam tenau deuh a tuar a ni.

27^th. Friday: Social Welfare Dept. chuan an cofn. Hall-ah Aganwadi worker thawkthate lawman an hlan. He hun hi Pu PL Liandianga’n a kaihruai a ni. Aganwadi worker-te chawimawina hi 1996 atanga neih a niin 2000 kum atang khan kumtina neih thin a ni ta a ni.

28^th. Saturday: Kum 2007-a ZONET Cable TV-in Mizo Idol contest a buatsaiha top 20 zinga mi, Issac Lalmalsawma (24) s/o Sapzuala, Kanghmun chu tukin dar 1:40 vel khan AR canteen bulah a bike khalh MZ 01 E 4828 leh taxi MZ 01 C 9283 an insut avangin  dar 2:20-ah Civil hospital-ah a thi.

29^th. Sunday: Kumin September ni 6 zing dar thum vela an leipui thlama pawngsual tawk, Rothangi (60) Kawlkulh chu a hliam tuar lovin tukin khawvar hma deuh khan a borala; vawiin vek khan Kawlkulh Hmarveng thlanmualah vuiliam nghal a ni.

30^th. Monday: Mizoram University chuan MZU campus-a Multipurpose hall-ah convocation vawingana an hmanga; Governor, MZU Chief Rector ni bawk MM Lakhera chuan a hmanpui a ni.

KRISMAS CHIBAI VEK U LE!

Similar Posts:

• September 2008 Mizoram Diary
• October 2008 Mizoram Diary
• November 2008, Mizoram Diary
• Enjoyed Sunday School?
• June 2008 Mizoram Diary

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, December 23rd, 2009 at 2:30 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.