THUHMA:
India ramin zalenna a hmuh tirha Assam state hnuaia Lushai Hills District ni ve che che thin kha, tunah chuan Mizoram state puitling kan nihna pawh kum 20 chuang zet a ni ve ta der mai. Hetih chhung hian keini Mizote pawhin Politics leh political party boruak te lo tem chho vein, kan ram zimteah pawh political parties engemaw zat lo piangin, he ram hian politician pawh thahnem tawk tak a lo hring chhuak ve ta.
Amaherawhchu, tun kum 60 zet kal ta chhunga kan politics khelh dan kha kan zir chhuahna sikulin a zir loh vang nge , politics leh ‘corruption’ te chu inkawp nghet tlata ngaiin, mi pangngai tan phei chuan politics khelh chu a tuma tum chi pawh ni lovah kan ngai thin a nih kha. Tunah erawh chuan kohhran te, tlawmngai pawl te leh mi thahnemngaite zarah politics kan thlir dan pawh zawi zawiin a lo fim chho ve zel a, hei hian beiseina sang tak min neihtirin, India ram tieng tura Lalpan Mizote min kohnaa a hmanraw pawimawh ber pakhat atana a thlan chu ‘Politics’ hi niin a lang ta tlat mai! I han sawi zau dawn teh ang:
1.Kan zirna ‘sikul’ a dik lo: Politics kan hmelhriat tan dan leh political party boruak kan hip tan dan kha a fuh tawk loh avangin kum zabi chanve chuang zet chhung chu kan ram politics tui nu hi kan lo hak ta a nih hi. Kan Mizo politician hlunten politics A AW B an lo zir chhuahna chu kan unau Hindu Vai ho hnen atangin a ni ti ila kan sawi sual tam lo vang. Hindu ho an sual e tihna ni lovin, a tira politics min zirtirtute kha Pathian tih mi, Kristian dik takte lo ni ta se chu kan dan a dang deuh ang em aw tiin ka ngaihtuah thin.
Mizote hi thil zir thiam hma mi kan nih ang ngeiin, Vai ho politics khelh dan leh an party ruih chilhna boruak te, an ‘corruption’ zawng zawngte nen lam chuan ‘distinction’-a pass khawpin kan zir chhuak ta a. Chutiang boruak inthlah chhawng zel chuan kan ram hi hei leh chen hi heti tak hian min lo sawp rethei ta reng a ni!
2. Politics sikul thar i kai ang u hmiang!: Kum sawm emaw lek liam ta atanga kohhran leh mi thahnemngaite thawhrimna a zarah kan Politics thlir dan zawi zawiin a lo inthlak a, politics hi mi pamhamte leh hlemhlete chanpual tur emaw kan lo tih thin chu mi dik leh mi pangngaite tan pawh luh chilh a tulzia kan lo hre tan ta a. ‘Leilung leh a chhunga thil awm zawng zawng (Politics tiamin) hi LALPA ta a ni’ tih hre tharin, ram rorelna leh inrelbawlna hi Pathianin a dah pawimawhzia te kan lo hre chho ve ta mek zel a nih hi.
Tun hma lama politics, duhamna leh hlemhletna tinreng hmanga kan lo khelh thin khan mimal, chhungkua leh ram a tihchhiat nasat tawhzia hi hriain, Politics hi sikul thar, Nazareth Tlangval sikulah hian i zir thar ang u hmiang! Leilung leh a chhunga thil awm zawng zawng, khawvel leh a chhunga chengte nen hian LALPA ta a ni a (Sam. 21:1), ram hi a ta a ni bawk si a(1 Chro. 29:11). Thuthlung Hlui huna Israel ram roreltute chu Pathianin hriak thih meuhvin a thlang thin ang khan, tuna kan ram roreltute pawh hi mipuite hmangin Pathianin a thlang tih hi an inhriatchhuah hun hunah kan ram chu a kal dik dawn a ni. Pastor te, kohhran upa te leh missionary te ang bawkin Politician te hi ram enkawl tur leh hmasawnna kawnga mipuite kaihruai tura Pathianin a kohte an ni. An dinhmun a sang ang bawkin an mawhphurhna pawh a sang bawk.
He kohna hi haidera duhamna leh hlemhletna kawng an zawh luih chuan, Rorelna niah thlaphang taka khup inkhawng hlawk hlawk chungin an la insawifiah a tul dawn a ni! Ram hi LALPA ta a ni a, enkawl tura a ruatten an enkawl that loh chuan an chan tur chu a awhawm lo khawp ang. Chuvangin, politics hi sum siamna leh intih milenna lam thil a ni lo va, LALPA RAWNGBAWLNA pawimawh berte zinga mi a ni. India rama kan thenawm state dangte khelh angin politics hi khel thei kan ni tawh lo. Tun hmaa Politics, thil tenawm leh bawlhhlawh nia kan ngaih thin kha tunah chuan Pathian rawngbawlna tura hmanraw tangkai, LALPA tana bungbel serh thianghlim a ni tih hi Zoram mipuite hian i hre mawlh teh ang u!
3.Beiseina kawl a eng! Kan ramah hian sualna leh chhiatna lam hi a thawm na thin hle mah se, thawm nei lian lem lo mi tha leh mi rinawm, LALPA tih mi, Baal hmaa thingthi ngai lo mi sang tam tak an awm tih erawh hi chu a chiang a ni! Mi tam zawk hi thil tha leh dikna duh, hruaitu tha leh rintlak chu zui peih reng kan ni. Hei hi a chianna em em chu tun tum kan MLA thlan hnuhnung ber, kan thenawm Vai hote mak tih khawpa ralmuang leh fel fai te, Krismas & Kumthar vuakveta halpuah leh halzit ri hriat tur awm miah lo te kha! Ram hruaitute, kohhran hruaitute, YMA leh tlawmngai pawl dang te, Media lam mi te, Dan kengkawh tute leh ram mipuite kan tanrual phawt chuan kum rei lo teah India ram chu sawi loh khawvel huap pawhin Mizo hnam hi chawisanin kan awm thei tih hi a chiang.
4.Chanchin Tha hril nan Politics: Kan Politician ten Pathian tih chunga Politics an khelh a, mipuiten Party aiah dikna, duhamna aiah rinawmna kan chawi san phawt chuan kan ram hian LALPA malsawm ram rim a nam ngei ngei dawn! Ram rethei leh hmuhsitawm kha ram hausa leh awhawm kan ni thei a sin!
Inthlannaah eng Party mi pawh ‘mi dik’ apiang kan thlang ang a, Development sumin kawng a bo tawh lo ang a, hmuh theih khawpin kan ram chu a thang zawt zawt mai ang a, thingtlang kilkhawr ber thlengin an chanvo an hmu kim thap thap tawh ang a, mi tin thinlung chu a lawm ang a, initsikna aiah induhsak tawnna chu Mizo zia a ni tih kan hmu chhuak thar leh ang a, khawtlang nun a zalen ang a, Mizoram chu Thlarau Thlianghlim tlangnel taka a lenna ram a nih dawn avangin a nuam em em mai dawn a ni! Chutih hunah chuan kan thenawm state mai pawh ni lovin Central sawrkar hruaitute thlengin kan ram chu mak tiin an rawn thlir ang a, kan Politician te hnenah chuan, “Mizoram hi engtinnge in hruai bik a? Engtinnge in lo hmuingil tak em em?” tia an rawn zawh hunah chuan, “ISUA KRISTA vang a ni e” tiin an lo chhang tawh ang.
Chutih hunah chuan India ram Tribal berh te te kan Evangelist ten an mal beih keuh keuh ang kha a ni tawh lo ang a, Delhi tlanga hruaitu lawk ber berte thlengin chawplehchilhin Chanchin Tha chuan a tuam tawh dawn a ni. An hmai chhana hrilh pawh ngai lovin, kan Politics khelh dan leh kan Politician te nun chuan Chanchin Tha chu a hril tawh mai dawn a ni. Heihi thil theih mai pawh ni lovin, India ram kan tihen theihna tura Chanchin Tha hril dan kawng hlawk ber pakhat a ni ngei ang. Chuvangin, kan politician te hi ram hruai tura kohna hmu mai an ni lo va, Politics dik hmanga India ram tieng tura Missionary atana kohte an ni! MISSIONARY POLITICIAN Lalpa’n a mamawh e!
Source:https://keimah777.blogspot.com/2010/01/missionary-politicians.html
Similar Posts:
- Party Politics tel lo Politics meeting boruak sang hle
- chuan…
- Ka nuih a za thin
- Zoram politics ah I ram lo thleng rawh se!
- Politics khel phawt ang u!
January 22nd, 2010 at 7:08 pm
Ist e. Tha khawp mai.
Report this comment
January 22nd, 2010 at 7:15 pm
grady chu, admin ten an delete i hlauva, run dalah “Tha khawp mai” tih i telh hram animaw
nia heihi sawi zau a chakawm khawpmai..
Report this comment
January 22nd, 2010 at 7:22 pm
keimah “I have a dream” ve dan chuan chil a va ti put ve mawle
3rd tih chi ve tho.
Report this comment
January 22nd, 2010 at 7:32 pm
Pu keimah, Chhiar a nuam dap dap hle mai, a thu atha mm bawk si. Ni e, kan zirna skul/ kan entawnte hi an dik lo ema, kan heti ta a nih hi… Vai politician, an tlin/ chak theihna anih phawt chuan thil dik lo engmah tih hreh lote, thil tiam zut2a tih hlawhtlin tak2 tum chuang si lote, thil ho te tea inrawlha thuneihna(power) hman tum tlatte, an vua&vang/ thlahte zawng2 uchuak taka duhsaka hausak tir vek tum tak phette hi “Vai” politician-te hnen atanga kan zir chhuah niin alang. Mahse, i sawi ang khian KAWL a èng sawt viau e. Midik, mirinawm, ram&hnam hmangaihna tak2 thinlung, hnam chawisan duh tak2na thinlung pu miten zoram politic-ah ring an rawn rawlh ve tan ta niin alang.
Report this comment
January 22nd, 2010 at 7:45 pm
@kawlhawk, a thuhrimin tunlai chu enginngemaw min mawlh ni, kan Zoram tan hian beiseina thar, sawi thiam si loh hi ka rilruah hian a awm tlat nia maw le! Zoram_Genesis te anga sawi thiam a chakawm khawp mai.
Report this comment
January 22nd, 2010 at 7:59 pm
Pathian thu tak2 au chhuah pui tur hi chuan kan ram in rel bawl dan hi a dik a pawi mawh tak zet. Missionary nuaikhat pawh tir chhuak ila kan ram in rel bawl dan a dik miau loh chuan mi nuihzat kan hlawh mai mai ang
Report this comment
January 22nd, 2010 at 8:00 pm
pu keimah, next election chu….ve tawh mai la? I tlangautu-ah ka tang anga, mite angin kan infak ve duah lo anga, thudik leh rintlak, kan tih ngei2 tur chin chiah kan sawi bawk anga…kan tling mm ang….em aw?
Report this comment
January 22nd, 2010 at 8:03 pm
Missionary position tih emaw kan tih chule.he he.porno tih vel kan khel nasa lutuk a..
Report this comment
January 22nd, 2010 at 8:09 pm
kan venga pa tawngtlem deuh pakhatin YMA in nu leh pa a kokhawm a, khawtlang thatna tur an sawi honaah han sawi ve teh an ti teh sek a. A tawpa a rawn sawi chu hetiang hi a ni. “Kan khawthlang thatna tur chuan tumah hi sual lo ila a ni mai”. he a thusawi hi tunthleng hian ka la hre reng tlat. Awmzia a nei viauin ka hria.
Politics ah Lalpa duhdanin kan ti dup dup a. Kei ka hrethiam lo. Eng ber hi nge Lalpa duhdan ni ber chu? Parliament ah Hindu pachal rual ho ten an rel thluk lo siam Pathian thu dan hi eng ber nge? Democracy hian kalphung a nei ve a, hemi hriatchian a, a kaldan tur taka kal tir hi a pawimawh zawk a ni. (Pathian thu a pawimawh lo ka tihna a ni lo).
Pathian thu hi politics ah hian ethics takin kan follow zawk mai tur niin ka hria. Heihi kan hman fuh lovin ka hre thin.
Tin, Mizoramah Pathian a tam em mai (Presbytarian Pathian, Baptist pathian, UPC Pathian) Pathian nung pakhat vek kan bia tiin kan pretend a, mahse reality tak takah chuan kan ngaihdan a thuhmun ngai lo. Politics kan hmuh dan pawh inang ngai lo. Chuvangin, Pathian thu leh politics kan ngaihdan phung hi kan insiam rem a hun fu mai..
Report this comment
January 22nd, 2010 at 8:33 pm
mipui hi politics kalfuhlo siamtha tur hian kan pawimawh ka ti tlat. Mizo zinga midik leh tha ni a mipuiin kan ngaih pawh hi Independent in MLA han dintir chiah teh a tlin chuan ka thlakhat hlawh zatve ka chawi ngam. Party behchhan loh chuan mitha pawh kan vote duh chuanglo, pawi deuh ani. Mitha hi vote tling tlat zel ila, Party hian mitha lo deuh chu an dintir ngam lovang.
Report this comment
January 22nd, 2010 at 8:44 pm
A van tha dap dap ve le. Hetiang article hi chhiar a nuam ka ti. Zoram chhiat zia thu leh, corruption nasat zia, kan nungchang corrupt zia hlir mai in rawn ziah hi chuan, kei ni ang pamawl deuh hi chu, kan beidawngin kan hawihai mai thin a.
“Dikna” hi a pawimawh ber lo maw? Ram hruaitu te pawh mipui te pawh hian “Dikna” hi kan tlachham em? Kan Bible pawh hian “Justice” hi min zirtir nasa mai a. Dik tak hian ram hruaituten rorel se la, mipui te chuan lungsi tak in kan zui dual dual mai dawn lawm ni…..
Report this comment
January 22nd, 2010 at 8:48 pm
Hei zet chu! THU a va tling em!
Kan Politicians te kha, he site-a in lo lut ve thin a nih mial chuan ngun takin chhiar teh u. Nunpui ngei tum bawk ula. In thinlung phekah ziakin ram rorelna in kenkawh dan zawng zawngah khing thu hi vawng reng ang che u. Chutin, kan ram hi a va nuam dawn em!
Report this comment
January 22nd, 2010 at 9:19 pm
Ka lo thlir ve dan:
1)kum fe liam tawhah khan kohhran Lian hotu Lu pakhat chuan Election a in candidate ve a,mahse a tling lo hlauh a,kohna dawng lovin a ti nge ni ang?.Kohhran upa pakhat Aizawl veng hlun tak a mi pawh Pathian kohna ngei dawng nia insawiin kohhranah pawh sawi chhuak meuhvin inthlan a hmachhaawn a,mahse dahkham a chawi ta mai si!.A kohna dawn kha a dik lo em niang?;nge koh lohin a ei?.
A berampu te thlarau lam hruaitute a tana a serhhran te leh tisa mamawh ram politics rawngbawlna tur a kohna hi dawn kawp chi nge? dawn kawp loh chi ?mi pakhat tan thawh kawp chi ang em??
2)Lei lalram din leh hemi hmang tangkai a van Lal Pathian ram din a,huang zauh hi kan zui Lal Isua tum ber a ni ang em?.A tisa put lai nite leh a tawngkam tamtak a tang khan roreltu te pathian ruat an nih thute,hotute thu zawm tur,chhiah pek tur tih vel angaih pawimawh em em lai khan Lei Lalram din lam hawiin zirtirna a kal pui lo hrim hrim mai a.Lal a siam tum pawl pawh an hlawhchham a nih kha!
3)Thinlung lama Pathian ram chang tawh te tan chuan an awmna a piang leh Pathianin a dahna hmun a piang maicham thianghlimah chantirin ram an la zel thei ngei ang.Pathian tan hnathawk tura penchhuah kan sawi rual hian hlatak a va thawh ngai ni lovin ;kan banphak theuhah kan tihtur chhawpsakin kan awm tih kan hriat tikah ‘khua a var tawh ang’.
4)Isarel ten Lal an dila,pekin an awm a.An mahni thlan chhuah Lal Sawla chu a fuh lem lo.Pathian in anmahni thlan nilo a peka a pek tak Davida erawh a fuh hle.Pathianin kan dil chuan hruaitu ropui mih la pe ngei ang.
5)Kohhran hian Ram hruai tlak mipui leh mifel tamtak chher chhuak zawngin hma la chur chur se la.mipui fel,sorkarhnathawk fel,politician fel,kristian piangthar tha hlir kan neih chuan Eng sorkar pawh nise,kan ram chu malsawmin a awm tho vang a,rah pawh kan chhuah ngei ang.
Report this comment
January 22nd, 2010 at 9:19 pm
Kan politician ho hi an hmu thui pinsak ila an kut leh ke in hna thawk ve tawh se a tha ang, mipui aiawh a thlantlin anni bawk a.
Report this comment
January 22nd, 2010 at 10:20 pm
Hlain siam zawk ta la, Zoram thalaite leh nu nau, tar ten kutbengin kan ram hi i awi dup dup thar leh teh ang u, hlain thil a ti thei zawk, thuziak chhiar peih lo kan tam!
Report this comment
January 23rd, 2010 at 12:52 am
A point a fel thlep thlawp khawp mai. Sawihawng tha si, sawizau fiah bawk, a tawpah sawmna-in…
Politics kan zirna a fuh tawk loh avang leh kan hman dan a dik loh fo bawk avangin kan sakhua leh politics hi a in-ep zawngin kan chhawng tlat mai a, kan hnam tan hian a pawi teh zawng a nih hi. Amaherawhchu thalaite kan harh tan, kan phiarkawp thiam tan, a fuh chho telh telh mai ang.
Mizo thalai zingah hian Baal hmaa thingthi ngai lo mi engemaw zat kan la awm e, hruaitu tha leh dik erawh kan mamawh.
Report this comment
January 23rd, 2010 at 1:05 am
Pu Chawnghilha hi ka’n support teh ang. Nia, hla-in siam teh. Thu ai chuan thluk nei nge nge hian Mizote rilru-ah thu a sawi thui zawk thin.
Report this comment
January 23rd, 2010 at 1:13 am
Mizoram Thar Political Campaign Hla thar a ni mai dawn a ni, an inchuh vek mai ang. Ramhlui zia kan paih phah ngamna tur HLAPUI a ni dawn asin!
Report this comment
January 23rd, 2010 at 4:45 am
@Kawnga & chawnghilh, Hlaa siam in rawtna chu a tih chi hmel khawp mai tak e. Remchangah kan han bei chhin dawn em ni tak le??
Report this comment
January 23rd, 2010 at 4:56 am
@keimah : A genre lah i hai map lo, hla leh a thluk lungkuai —thalaite leh upa lam ngeng chhun (impale) phakin, kan ram siam tha tak tak tur hian i hla siam chu Pathian hian mal a sawm duh ka ring hrim hrim! Bless the Ode!
Ngam tak tak lo chunga “Pho ro” an tih lam aiin —evergreen hla, kan ram insiamthatna lam kawng hi kan mamawh ngawih ngawih ta hle. Zarkawt tlangval leh Samthang tlangvalte hi han vel hmasa phawt mai la; tin, Gandhi Memorial atanga inzir chhuakte hnuk han tiulh phawt mai teh — “Pipu kan suih, ram tinah kan suih, a sat chattu mi u duai ngai lo, (vandalism chu kan Mizo pianpui)” tih takngial pawh Missionary-te um phak loh khawpin prairie fire dungthulin a kang chak duai duai thin a nih kha le!
LPS an à lutuk lo vang a, Zonet an mawl bawk hek lo vang a …khawchhak lamah Samuela ten tan an lo la ngawrh hle bawk ang a, hla thiltithei kan bass leh tenor hem hem mai ang a, “mi pawisawi” a ni tawh lo vang a … mi pamhamte pawi kan SA a ni tawh zawk bawk ang a.
Ka va nghakhlel —i talent ang hi chu nei ve ila chu, Mautam liam ta mai pawh khan sazu an puang zak ngawt ang le!
Shailendra pawh sazu vehin a kat duan duan lo ngawt ang! Kha daih kha asin! Music leh hla phuah hi thiam ve ni ila chu —ram siamtha duhtute hi chuan an sa uar khawp ang!
France ram kha Dan khi O te (Don Quixote) thawnthu nuihzatthlak mei nei hmanga siam that a nih kha, kan ram pawh hi Manipur atangin Laisaizawk khan a bei nasa, mahse fiamthu mai mai emaw tiin Mizoram chhunga chengten kan lo ngaichang thin! Hleizuama te, Sudden em em Muang ruih mai te khan kan ram kalphung a tichiangkuang riau!
Thil awmze nei, chingala pem nei inbual ang chi kan mamawh ta! Siam ngei chi a ni e.
Kan ram hi Anticipatory bail lak lawka fel thei a ni mai tawh lo, a fel dawn tak tak chuan a kai ruala Chunglam a chet a ngai ta! HAITI THLIRIN i khur lawk chiam teh ang u.
Warm up for destruction kan cho zek zek cheu em? Ka hnuk a ulh lawk asin! Mi chhumchhiate VIP kan nih tak takna tur thil a la thleng lo, Zarkawt leh MacDonald Hill atangin retheite VIP-na tur hi a takin a awm tak tak lo va, mahni chanvo a thatna mai mai tura tawngkam thiamna mai hi chu a ninawm tawh teh e.
Report this comment
January 23rd, 2010 at 5:27 am
E khai, Pu chawnghilh, i han sawi tak tak chuan lei min battir deuh ta run mai aa! Homework-ah lo neih ka han tum ang e. Kan puitlin ang e maw le….tum chhin phawt ila.
Report this comment
January 23rd, 2010 at 7:48 am
misual dot com a trang hla a chhuak ngei dawn e.a van nghah hlelh awm ve.
Lalpa hming a sak dup dup hun tur lo nghak ang aw nang.
Report this comment
January 23rd, 2010 at 9:08 am
sak hun ka va nghakhlel em ve le… keimah, han in sang mar hram teh
Report this comment
January 23rd, 2010 at 11:26 am
A va han thra tehlul em, mi(zo) zawng zawng chhiar theihin awm se duhthusam.
Kan politics thianghlim se, kan ram leh hnam nun hi thianghlimin rinawm se, kan sakhua chu miin an ngaisang ang, Chanchin Tha hi kan hril loh pawhin an rawn ngaihven tawh mai dawn a ni.
Sawi ang khian MLA election hnunung ber chanchin national news paper rawn lang te kha chhiar a va nuam tak.
Report this comment
January 23rd, 2010 at 2:09 pm
Hm hm hm … s.,l : t.d/…
Pu Keimah, a thluk pawh ka hre pha ruai ruai tanin ka hria. Ka va phur em!
Report this comment
January 23rd, 2010 at 6:26 pm
@Kawnga, han siam zawm law law la maw le…!
Report this comment
February 11th, 2010 at 12:43 pm
[…] Missionary Politicians | mi(sual).com […]
Report this comment