mi(sual).com

1^st. Friday: Pu Thanhlira Lamchhip in (Assam Type) chu zanin khan bungrua engmah chuh hman lohvin a kangral vek.

2^nd. Saturday: Mizoram Police leh BSF ‘G’ Branch tangkawp chuan vawiin chawhma dar 11:40 khan Vairengte daiah India pawisa note lem, (Indian fake currency note) Rs 1000/- note hlir Rs 164000/- an man a, a neitu mi pathum heng- Salim Uddin Choudhury s/o Abbdul Affur, Rajghat Part-I, Dholai Police Station, Cachar Dist., Vanlalruata (41) s/o Laltlansanga, Edenthar leh Vanlaltluangi (25) w/o Lalthanmawia Armed Veng South-te manin thubuai siamsak nghal an ni.

3^rd. Sunday: India lei lam sipai hotu lu ber, Chief of Army Staff ni mai tur, Lt. Gen. VK Singh, PVSM, AVSM, YSM, General Officer Commanding in Chief, (GOC in C) Eastern Command chu ni hnih cham turin Mizoramah a rawn zin.

4^th. Monday: Malsawmdawngzuala (2) s/o Jimmy Lalsangzuala, Chaltlang Dingdi Veng chu tukin dar 8:45 vel khan an tukverh, feet 20 vela sang atangin a tla a; a hnu deuh dar 9:30 velah Aizawl Civil Hospital-ah a boral. 

5^th. Tuesday: Chawhma dar 11 khan CM Pu Lal Thanhawla hovin Congress Legislature Party an thukhawma, kumthara sorkar hmalak dan tur leh Krismas vuakvet boruak an thlirlet a, muanawm hle a an hriat thu an sawi.

6^th. Wednesday: Chief Minister Pu Lal Thanhawla chu New West Phaileng YMA-te’n chawimawina pangpar thi thahnem tawk tak awrhtirin an zawn a, nasa takin an chawimawi.

7^th. Thursday: Mizoram football goalkeeper hmingthang tak ni thin, Zoliana Pachuau (47) Electric Veng chu lungphu chawlin a boral.

8^th. Friday: MJA chuan Aijal Press Club-ah MJA Member-te leh media lama thawkte tan kum 2010 lawmna thingpui inhona leh infuihtharna hun an hmang. He hun hi MJA General Secrectary Pu Zonunsanga Khiangte in a kaihruai a ni.

9^th. Saturday: Central jail Aizawla tangte chuan tui an dawn tlem avanga harsatna an tawh nasat thu chanchinbu mite an hrilh.

10^th. Sunday: 10^th. Assam Riffle leh Mizoram Police tangkawpte chuan Paulhangtung s/o Hranglian, Kawlbem hnen atangin nitrozepum capsule 890 leh spasmo proxyvon capsule 4320 an man a, Paulthangtung hi Bawngkawn Police Station-ah an hlan nghal a ni.

11^th. Monday: Chief Minister Pu Lal Thanhawla leh UPA Chairperson Pi Sonia Gandhi chu Bangladesh Prime Minister Sheik Hasina puala Prime Minister Manmohan Singh-a’n zanriah a buatsaihah an inkawma; Pi Sonia Gandhi chuan, Aizawla Rajiv Gandhi Stadium lungphum phum tura February thla chhunga a lo kal tur thu a sawi.

12^th. Tuesday: Nikum 8^th. December zan atanga a taxi khalh lai nena chin hriatlohva bo Chawnghmingliana (35) s/o Runkhawia, Bungkawn chu tukin khan Sihhmui leh Lengpui inkar kawngpui thlangah thia hmuh a ni.

13^th. Wednesday: India ram pumah zeng hri dona beihpui thlak a nia; Mizoramah pawh naupang kum nga hnuai lamte hnenah a thlawnin zenghri danna damdawi pek an ni.

14^th. Thursday: Pu HV Lalhranglianate nupa Sihphir chuan an pa Hrangliana 1989 kuma boralta hriatrengna lung an phuna; thenrual thate sawmin Pathian an faka; tlaiah chawhlui an kilho nghal.

15^th. Friday: Awkin ni a lema; Mizoramah chuan chhun 12:18-13:32 thlengin a hmuh theih a ni. Thlirtu mipui an thahnem hle. Tuntuma ni awklem hi 4^th. January 1992 hnua a lem zawh vek rei ber tum a ni. Hei hi tun kum sangbi chhunga awkin ni a lem zawh vek rei ber tur a ni nghe nghe. Tuntum aia reia awkin ni a lem rei zawng awm leh na hmasa ber tur chu 23^rd. December 3043-ah a ni chauh tawh dawn a ni.

16^th. Saturday: Mizoram Tennis Association chuan an din champhaphak vawi 38-na Aizawl Tennis Club-ah ruai nen an lawm.

17^th. Sunday: Pi Chawngthanmawii (83) w/o Thangzuala, Sihphir chu Presbyterian Hospital Durtlangah zan dar 10:00 vel khan Asthma natna avangin a boral.

18^th. Monday: Vawiin atang khan Brig. Suresh Kumar Verma chuan Brig. AP Rai thlakin Mizoram Range, 23 Sector, Assam Riffles-ah Deputy Inspector General hna a chelh tan. Brig. Verma hi 13^th. March 1982 khan commissioned a nia; J&K, Manipur, Punjab leh Rajasthan-ahte a lo thawk tawh a ni.

19^th. Tuesday: Mi khawngaihna dila vak kual thin ‘Chengkhata’ tia hriatlar Lalrinzuala (58) Chaltlang Lily Veng chu vawiin tlai khan Chanmari-ah Pick-Up ML-05-SF-4151 F.Zorammuana Dawrpui Vengthara mi khalh chuan a sua; damdawi in panpui a nih hnuin a boral. A ruang hi Police-te chuan a unau pa R.Vanlalmawia Chaltlang Lily Veng hnenah an hlan a ni. Lalrinzuala hi a thih hnu hian police-te chuan a ipte dap sakin Rs 44664/- lai a lo ak a ni. 

20^th. Wednesday: Nubuangi (77) West Phaileng Dinthar Veng chu zing dar li vel khan an inhnuaiah a luma; Aizawl lama enkawl tura rawn phurh chhoh a nih mek laiin Lengpui daiah chawhma dar 10:05 khan a hliam tuar lovin a thi.

21^st. Thursday: 23 Sector Assam Riffles, Mizoram chuan Mizo zirlaite tan National Integration Tour an buatsaih leh a, he hunah hian India ram chhim lam an fang dawn a ni. Heta kal tur district hrang hrang atanga zirlai titha zual thlankhawm mi 30-te chu Lammual atangin Governor MM Lakhera-in a vailiam.

22^nd. Friday: Presbyterian kohhran thalai pawl, Kristian Thalai Pawl (KTP) Mizoram chhung leh pawna pastor bial hrang hranga mite chuan zanin atang khan bial conference an hmang tan. He inkhawmpui hian 24^th. Pathian ni thleng a awh ang.

23^rd. Saturday: Bethlehem Vengthlang Corps SAY-te chuan Aizawl Civil Hospital-ah a mamawh apiangte hman atan thisen unit 20 an pe. Thisen petute hi mipa 17 leh hmeichhia 3 an ni.

24^th. Sunday: Aizawl Bishop, most Rev. Stephen Rotluanga chuan Vaivakawna Roman Catholic Biak In thar, Holy Family Church a hawng. Holy Family Church hi April 1991 a din a ni.

25^th. Monday: Congress Legislature Party (CLP) chu an President, Chief Minister Pu Lal Thanhawla hovin an thukhawma, an party manifesto pui ber New Land Use Policy (NLUP) chu mumal zawka kalpui a nih theih nan an trade thlan tawhte tuna sem mai lovin mumal zawka enfiah leh phawt tha an tih thu an sawi.

26^th. Tuesday: India ram pum rualin Mizoram hmun hrang hrangah India Republic Day vawi 61-na hman a ni. A hmanna pui ber AR Ground-a zing dar kua atanga neihah chuan Governor MM Lakhera chuan puanzar pawtpharhin parade chibai a chhang let.

27^th. Wednesday: Mizorama Football Tournament lian ber, team 212 zet telna Red Ribbon Football chu Aizawl khelmual hrang hrang hmun liah khelh tan a ni. A tanni inkhelah hian goal 91 lai a lut a ni.

28^th. Thursday: Trade&Commerce ruahmanna angin New Market khawlaia inpho thin hawker-te chu New Market building sak thar block-1-ah an insuan lutta. Hawker insuante hi an vaiin mi 139 anni.

29^th. Friday: Parliamentary Secrectary (Home) Pu Lalrinmawia Ralte leh a nupui Pi Lalthanzamite chuan an inneih kum 25-na (Silver Jubilee) an lawma; an chenna New Capital Complex-ah thenrual thate sawmin chawhlui an kilho nghal.

30^th. Saturday: Selinga Samaritan Riangvai Run din champha kum 18-na chu vawiin khan lawm a ni a, Synod Executive Secretary Rev. Lalzuithanga’n a hmanpui.

31^st. Sunday: Kaikimi (68) w/o Thawmvunga Bethlehem Vengthlang chu zing dar 8:15 vel khan College Veng nena an inrina tuikhura a tuichawi tur a luma; a hmunah hian a boral nghal a ni.

Similar Posts:

• September 2008 Mizoram Diary
• March 2009, Mizoram Diary
• August 2008 Mizoram Diary
• June 2009, Mizoram Diary
• January 2009, Mizoram Diary

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, February 18th, 2010 at 1:51 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.