Mizo online Forum-ah te hian “Hnam dang Nupui/Pasal neih chungchang” hi a awm deuh ngei ngei a. Inhnialna nasa tak thlentu a ni deuh ngei ngei ziah bawk a ni. Hemi chungchang hi ka mimal ngaihdan ka han tarlang ve chhin teh ang. Thu tlukna bur ka siam dawn lova, ngaihtuah chhunzawm atan sir kil khat atangin i han bih ve chhin ang le.
Mizo leh hnam dang emaw thlahpawlhte chu Mizo chiang chiah lo, thangthar ho phei chuan Mizo-two ti hialin an sawi thin a. Hnam dang neih hi enge kan duh loh chhan ni ta ber le? Kan hnam tlemte hi chim rala awm kan hlau a ni.
A dik khawp mai. Kan inzirtir mai bakah khawtlang pawl anga in dan ngial tumin tan kan khawh a. Dik tak chuan, hnamdang nupui/pasala nei hi an tam tual tual zawk a ni. Kan inzirtir dan hi a fuh tawk lo a ni mai lo maw? Tuna kan inzirtirnaah chuan keimahni Mizo hnam indin that lam ai mah hian hnam dang huat theihna tur lam hi kan inzirtir tel deuh a ni mai lo maw? Entirnan, vawikhat chu MZP hotu pakhatin vantlang hmaa a thusawi ka la hriat reng chu, “Vaite chu an ramah an sual em mai”. Vai million engemaw zah zingah hian a then, sual fe fe zawng an awm ngei ang. Mahse, Vai tlawmngai fe fe hi nuai tel an awm ve leh tho bawk tih te hi chu theihnghilh bik ta lo ila.
Hnam dang nupui/pasala neite chu theihtawpin kan diriam a, tawngkam chhe tinreng nen kan hauh rawn ta thin a ni. Mahni nawmmaka hnam dang um ta lawng lawng leh hnam dang ngaihsan vang hrim hrim a hnam dang um an awm anih chuan a dik hauh lo vang. Mahse, Mizo zinga hnam dang nei zawng zawngte hian “khawnge Mizo hnam phatsan vang vang nan hnamdang i nei ang aw” an ti kher bik lo mai thei. Hnamdang kawppui nei (a bikin hmeichhia)te chu hnama chiang lo a dah an ni chawk.
Hetih lai hian Mizo hmeichhia hnam dang pasal a neite hian an fate hi Mizo tawng an thiam tir thei deuh zel zu nia. Hetih lai hian, Mizo mipa hnam dang nei, ramdanga khawsate fate hian Mizo tawng an thiam mang der thin lo. Mizo thenkhatte kan han chhuah vah nikhua pawh hian heng hnam dang nupui pasal neite bawk hi kan va pur ve leh chawk nia. (Hetih lai hian Mizo nih tlan bo san thak te pawh an awm tho bawk) Hnam dang nupui/pasala nei mi thenkhatte hi chu chhungril nunah chuan an lo Mizo viau thei tho a lo ni.
Hetih lai hian, Mizo chhungkua ngawih ngawih phaia Pastor/Missionary fate leh Officer lian tak tak fate zingah Mizo tawng thiam lo an tam fu mai zu nia. Heng ho fate hian hnam dang nupui/pasalah an nei chawk bawk. Chuvangin, kan pastor-te leh Officer hote pawh hi mahni fate enkawl kawngah chuan, an lo Mizo tehchiam hauh lo mai.
Phai ram hmun tamtakah Mizo nula hnam dang kawp thenkhatte sakawrbakcheh nena vau haw tak lawng lawng chang a awm tawh thin. Hnam an ti mualpho a nih chuan, keia lo sawi phak a awm lo. Mahse, thil pakhat ka han tarlang ve teh ang.
Vawikhat chu, phai ram hmun khatah hian Mizo Nula senior lam hi hnam dang tlangval nen an ingaizawng a. Mizo khawtlang pawlte mit a mim ta vat a. An zilh ta a. An zilh ni chuan mittui tla zawih zawihin ti hian a chhang let ve ta a ni. ‘Ka nu leh pa atangin, mahni hnam ngei nei tur rilru siam ve thin ka ni. Tunah hian nula senior lam ka ni ve tawh, kawppui tur pasal hi ka melh ru ve thin. Mahse, Mizo tlangval min han duh viau tur hi ka van tlat mai a. Ka han chhai ve deuhte pawhin min uksak tha duh hauh lova. Mahse, he hnam dang tlangval hian min hmangaih em em mai a. Kei pawhin chuti taka min hmangaih chu ka lo duh chho ve ta a.
Tunah hian inneih hial kan tum mek a ni. Thianghlim lo leh zahpuiawmin kan awm ngai bik lo, hei hi chu Pathian pawhin min hriatpui e. Mizo hnam tan a him lo intih hi ka hre lo a ni hlei nem. A nih leh tunah hian Mizo hnam dam nan chuan, nangmahni zing a mi hian min nei rawh u le. Min nei duh em? tiin a han cho let takah chuan, a zilhtute hian chhan ngaihna an hre bik hauh lo. Kei chuan he nu hi ka dem ve thei hauh lo mai.
Mihring hian choice kan nei vek. He choice hi a zau em em mai a. Ram leh hnam kaltlang thei khawpa huam zau a ni. Ram leh hnam kaltlang thei a apiang erawh a him ber phei zawng a ni lo. Hmangaihna pawh hi a huam chin a zau a ni. Chhungkua/khawtlang/ram tawntlang thei khawp a huam zau thei a ni. Hmangaihna hrim hrim hi a zahawm ka ti thin. Hmangaihna hi tawngtawpaw siam ngawt theih a ni hauh lo mai.
Tute pawh hian hmangaih leh duhtak chauh neih duh vek kan ni. Ka duh vang ngawtin mi tu emaw hi ka hmangaih ngawt thei hauh lo mai. He hmangaihna hi khawtlang pawl thenkhat ten huang chhunga an lo hnawhkhawm vek theih lah a ni hek lo. Mi tu emaw in hmangaihna liau liau va hnam dang a nei a nih chuan kei chuan zahawm ka la ti tho tho. Hnam dang neih ka sawi mawi a ni lo. Mahse, a zawng-a-za a hnam dang nei kan thinhrik em em dan hi chu dik ka ti bik lo a ni e.
Tunah hian Mizo hnam dam nan tiin ka hnam pui, Mizo nula ngei, mahse ka ten ruk zet mai hi nupuiah i neih a ngai ti ta se. Mizo hnam damna tur pawh nise, “aw” kan ti chiah ang em? Mizo zingah mahni chhungkaw leh mahni hlawkna mausam ngam khawpa hnam hmangaihtu kan awm tawh chiah loh hi maw.
Hnam dang nei kan han cheibawl dan vel pawh hi, inthlirna chi khat a ni mai lo maw? Phai ramah hnam dang lo kawpte hian zilh an tawk fo. An awm duhdah lutukte chu lo zilh nawk nawk pawh ni ila, a hriatthiam awm e. Mahse, phai rama tlema vantlang chung lam deuh, officer leh hna lian deuh nei, hnam dang kawp te hi zilh an ni ngai meuh em?
Khawtlang pawlte hian an zilh ngam awm hi ka hre ngai hauh lo mai. Hman deuh khan phai rama kan officer pakhat fanu chuan hnam dang pasal a nei dawn a. A thlahna inkhawmah chuan, hnam dang ngaihzawng nei hlek pawh zilh peih thin tak tak khawtlang pawl hruaitute kha an kim thap a. Lawmpui nan chibai hlan hmasa ber ber tu an ni leh tho nia. Hnam dang neih kha lawmpui loh law law mai awm ka lo ti deuh.
A nih leh Mizo leh Mizo inkara inthliarna te hi nuai bo ta phawt ila, Kohhran hran avang ringawt pawhin, Mizo leh Mizo ngei kan inneih pawlh chuang lo a nih hi. Mizoram-ah hausa leh rethei inthliarna a nasa tial tial a, hetih lai karah hian thenkhat tan chuan rethei bakberh a nunkhaw hman kumkhua aia, mahni leh chhungkaw leikan theih beiseia, hnam dang nei te pawh hi engchen nge kan dem dawn?
Phairam hmun tam takah hian Mizo hmeichhia zirna lamah leh hnathawh sang tak tak hi kan awm ta nual a. An dinhmun san deuh avang hian Mizo mipa ber ber hian kan tih duk mai nia. Heng hote pawh hi Mizo mipa/hmeichhia chu an hnam pui an nih vang ngawtin, an choice ni lem hauh lo pawh an nei ngei ngei tur a ni tiin kan nawr ngawt thei em ni? Mi thenkhat tan mahni hnam pui ngei kawppui mai tur an vang mek tih hi pawm a harsa ta viau em ni?
Mizo mipa emaw hmeichhia emaw Mizoram chhuahsana hnam danga va lawilutte phei hi chu i va diriam zui chiam kher tawh lo teh ang u. Mizoram chhung ngeia hlawkna rawn um tum ho zawk hi harsatna siam tu an ni. ILP duh vang ringawta Mizo nupui/pasala an lo nei anih chuan tha ka ti hauh lo.
Mahse, veng thenkhatah khawtlang pawl tlawn ber chu vai Mizo nupui nei an ni ve chawk. Therhlo engemaw kan hmuh theih dawn chuan, thenawm khawvengte pawhin pawi kan tih chiah lo hi maw. Kan ramah ngei, kan fanu man ei turin Singh-a tih te thlengin an awm tho a ni. Khawtlang pawlte pawh hnamdangin suma min vur dawn phawt chuan pawi kan tih vak chuan loh hi maw.
Heng ai chuan, mumal zawkin hnam dang/nupui/pasal neih hi him tawk lohna hi inzirtir ngun ta ila. Mizo thalai ten kan hnam pui ngeite neih pawimawh zia infuih thar leh ila. Hetih lai hian hnam dang kawppui nei tawh te, thil sawt tawh lem lo dem nghek nghek hi bansan ila.
Heng hnam dang neia khawvel ramdanga cheng tawhte pawh hian Mizote tan tangkaina kawng an nei mial ve thei tih te pawh hre bawk ila. Mizo leh Mizo inkara inneih pawlh theih lohna tura Kohhran in dan kan siam te thleng hian nuai bo ta ila, mahni hnam pui ngei neih theihna tur kawng kan hawng zau hmasa tur a ni. Heti a nih loh chuan, kan inchhuih palh leh nge nge thin ang.
Similar Posts:
- Hnam Dang Pasal Nei Chhui Dawn
- Hnamdang ka neih chuan ka hnam ka phatsan
- Eng nge in ngaihdan?
- Nupui/Pasal neih leh fa neih chungchang!
- Mipa ve thung
April 20th, 2010 at 5:38 am
1. “Hnam dang nupui/pasala neite chu theihtawpin kan diriam a, tawngkam chhe tinreng nen kan hauh rawn ta thin a ni.” Ka awih loh zawng tak a ni mai. Vai milian, Vunngo nei an nih emaw chuan biak tlawn huam an ni thin zawk in ka hria. NOI
2. “Hetih lai hian Mizo hmeichhia hnam dang pasal a neite hian an fate hi Mizo tawng an thiam tir thei deuh zel zu nia.” An fa te khan Mizo tawng an thiam chuan a lawmawm e mahse, ka tawng tun lo haw lo sela, hmeichhe hnamdang nei fa a nih chuan a fa kha Mizo a ni tawh lo. Hei hi Mizo ah choh a ni kher lo ang.
3. “Phairam hmun tam takah hian Mizo hmeichhia zirna lamah leh hnathawh sang tak tak hi kan awm ta nual a. An dinhmun san deuh avang hian Mizo mipa ber ber hian kan tih duk mai nia.” Ka hmuh dan chuan Mizo hmeichhe hnasang thawk hi a tlangpuiin an in ti champion thei khawp mai, biak nuam tak tak awm thin mahse.
4. “ILP duh vang ringawta Mizo nupui/pasala an lo nei anih chuan tha ka ti hauh lo.” hei hi ngaihbel theih ka hre nual mai!
5. “Heng ai chuan, mumal zawkin hnam dang/nupui/pasal neih hi him tawk lohna hi inzirtir ngun ta ila. Mizo thalai ten kan hnam pui ngeite neih pawimawh zia infuih thar leh ila.” i tih hi tha ka ti khawp mai, keipawn ka sawi fo thin a ni.
Report this comment
April 20th, 2010 at 5:55 am
Nia Vangchhia point 1 khi a dik. Vai dumka leh karimganj mosolman ho nei hi chu an hmusit thei lutuk, mahse Vai chhe pasal nei tho entirnan Johnson Estate in ti a mawni TATA sumo zuar teng te khi an ngaisangin an tlawn leh em em lawi si.
Mi an in hmangaih a an in nei anih chuan Vai/Sap/Tuikuk pawh ni se YMA leh MZP emaw hnam anga va phili chuk a inrawlh phet tum hi a tullo ber.
Report this comment
April 20th, 2010 at 6:18 am
Hmangaihna hi a hlu ber. A nei duh ten eng hnam pawh nei rawh se. Pa ber buhfai no khat ei theuh theuh duhdan a in ang lo angin kan nula duhdante pawh a in ang vek nang! An zalenna khapbeh tum ang hiala sawi leh ramri kham ngawt tum hi a tha lo.
HV-a sawi point 5-na khi a tha khawp mai. Hei hi kan hmasawnna tur kawng zawk a ni.
Report this comment
April 20th, 2010 at 6:24 am
Kei leh ka chhungte chuan hnamdang kan la nei lo chu a ni phawt a, tuna ka awmna hmunah hian ka cheng hlen dawn niin a langa, mahse kei chuan hnamdang neih ka tum bau lo. Pasalte hmua fanau ka nei ve te anih ngai chuan ka fate theihtawpa zirtirna pek ka tuma, mahse an zalenna erawh ka zahsak ka ring.
Report this comment
April 20th, 2010 at 6:37 am
Mizo hnahthlak ngei ka ti fan ang. Mahse an dinhmunah ka ding lova, sawisel thei ka ni lo.
Report this comment
April 20th, 2010 at 6:40 am
Nie Sap nupui/pasal han nei thei chin hi chu khawtlang hian tlukloh enah hian an en top thin,vai te leh a dang deuhte nei eroh kan diriam fu si….
Inchimral hlauh hi a dawizepthlak deuh roh ka ti…. :lol:
Report this comment
April 20th, 2010 at 7:39 am
@Epis, ziak tha hle mai! I thir dan pawh a neutral khawpin ka hria.
I thusawi:
“Hman deuh khan phai rama kan officer pakhat fanu chuan hnam dang pasal a nei dawn a. A thlahna inkhawmah chuan, hnam dang ngaihzawng nei hlek pawh zilh peih thin tak tak khawtlang pawl hruaitute kha an kim thap a. Lawmpui nan chibai hlan hmasa ber ber tu an ni leh tho nia. Hnam dang neih kha lawmpui loh law law mai awm ka lo ti deuh.”
Hei hian ‘hypocrites’ kan nihzia a tarlang! Vai rama kan Mizo officer lian, an pa Mizo, an nu Mizo, an fate Mizo tawng thiam lo hi ka hre ve nual ta mai kei pawh! Heng ho hian hnam an phatsan kan ti ve em?
Hnam dang nei rau rauah @Aryan sawi ang hian DUMKA nei leh ENGLISH mi nei kan en dan chu a inthlauh dan chu lei leh van ang a ni. Hetih kawngah hi chuan keini inti “Mizo” em em te hi ‘Pharisai te Pharisai’ tih hming pu tlak chauh kan niin ka hria!
Report this comment
April 20th, 2010 at 7:52 am
Misual in kut palh an tuar a, “a Kristian tih chi loh,” kan ti a. Keini aia mawl anga kan ngaih emaw, te kan han hmuhsit em em dan te leh sap kan pawngpaw ngaihsan dan hi a Kristian lo viau in ka hre fo.
Mizo tawng thiam loh vangin hnam phatsan an ni kher lo mahse, nu leh pa Mizo tawng thiam si in an fa te Mizo tawng an thiam tir lo hi chu ka dem thlawt a ni. Mahni hnam tawng theihnghilh tluk a zahthlak hi hnam thil ah a vang viau tur ania. Mizo tawng thiam tir lo ka tih hian Zohnahthlak tawng zawng2 ka huam tir…
Zohnahthlak tawng pakhat mah thiam tir lo a, kan thisen zawm pui ni miahlo te tawng a an tawng zet zet mai hi chu a zahthlak ka ti ve tawk a ni. Mizo tawng thiam reng pawh hian Mizo tho biak nan hian English te hi zuk hmang talh thin a mawle.
Report this comment
April 20th, 2010 at 8:27 am
Puipunna hmunah te mizo leh mizo sap tawnga an inbe kher hi chu inchaltauh tir vak mai ka chak
Report this comment
April 20th, 2010 at 8:46 am
“Kan inchhuih palh leh nge nge thin ang” kangaih ve dan mai mai ah chuan kan inchhuih lui zawk ni in kahria…
I rawn sawi ang hian Hnamdang pasal/nupui nei anih avangin kan sawisel ngawt kha adikber lovang.A laneilo te leh thangthar te kan hnam humhalh leh kan hnama chiangturin zirtirna mumal tak nei ila inpawngpaw khap ngawt aichuan a hlawk zawk ngei ang le.
Report this comment
April 20th, 2010 at 8:57 am
He topic chu in khel rei tawh hle mai
Report this comment
April 20th, 2010 at 9:20 am
Miin a duh a,a hmangaih chuan hnam dang chu nei mai rawh se,kei chuan hnam phatsanah ka ngai lem lo ve.
Mahse hriat reng tur chu a innei te khan Problem nei lem lo mahse an fa te chuan harsatna neuh neuh chu an ngah ngei ngei dawn tih hriat a tha.Pi leh Pu te pawh khan dawisa kil ho thei kha an duhthusam a ni fo.
Ka duh dan chuan “Enga” tih pui theih ngei ni se,mahse duhdan ang hian kan awm vek thei kher si lo a :!:
Report this comment
April 20th, 2010 at 10:20 am
Pathian rawnbawla ramdanga awm kan Mizo Pastor te leh hna tulna avanga awm kan Mizo Officer te an fate mizo tawng pawh thiam tawhlo hi ka va hre ve teuh kherlo a chu ka hriatve chhunte chu hmai chhan ah ka hrilh fawk fawk mai ani..hma ansawnphah leh phahloh lam kava hre hranlo a..
In hriat teuhte chu in Mizo na atangkhan an hmaichhan kherlo ah pawh vawikhat tal theuh han hrilh ve teh u…mipa leh mipa chu innuai miah miah mai tur..
Report this comment
April 20th, 2010 at 10:36 am
Zo tawng hmang awm ve lohna ah chuan naupang te leh ram pawn a piang te tan chuan Mizo tawng thiam hi a lo harsa dawn hle mai.In lam ah tih tak zet a kan in zirtir leh Zo tawng hman luih hram 2 loh chuan tawng hi an thiam mawh in an hmang thei lo duh dawn khawp mai.Tawng an zir atang in naupang enkawl tu ten tawng hran in an be nghal mai si a.
HV a fate te pawh hian harsa chu anla ti ve ngei ang .An nupa a an tan hle a ngai ngei ang.Kei in chhungah chuan Zo tawng bak ka khap chung pawh in an hman than kha hman nuam an ti tlat si a.
Hnam dang neih thu ah chuan an neih a te a zirin kan en mai zawng anih hi.Aizawl ah khian hnam dang mi hausa leh officer lian nei an fa te YMA leh khawtlang a in hmang an veng mipui ten an chungen an tlawn an awm ve nual in ka hria.
Report this comment
April 20th, 2010 at 12:07 pm
Bible kan Quote ve teh ang I Korinth 13 khan Hmangaihna chungchang chu a rawn tarlang a
13:13 “Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni.”
Nupui Pasal inneih dawn a foundation pawimawhber leh ropui ber chu Hmangaihna hi a ni. Mi an in hmangaih chuan lo in hmangaih tawh suh u a tih ngawt chi em ni?
Mahse thatchhiat vanga Sap/Vai/Midum (labourer)an han nei hi chu thin an tirim chiang a lawm. Rei a daih pawh ka ring lo!
Report this comment
April 20th, 2010 at 12:18 pm
Fanu chu nei ilang chuan Australian mihausa Sydney of Aryan hi makpa atan ka duh ngawt ang , Hnamdang mah nise :lol:
Report this comment
April 20th, 2010 at 12:31 pm
Thlasik lai hian kehi a aikhirh anga nupuite hrilh abuaithlak awm,hahaha
Report this comment
April 20th, 2010 at 12:34 pm
Thlasik lai hian kehi a aikhirh anga nupuite hrilh abuaithlak awm,haha
Report this comment
April 20th, 2010 at 12:37 pm
# 16 : :lol:
Report this comment
April 20th, 2010 at 12:42 pm
Sap hichu kanlo ngaisang aniang ,mizo zaithiam pakhat pawh thingtlang khaw pakhata azinna ah naupang pakhatin “aaa saw sap “atia cheng 5 ape anti …lol.
Report this comment
April 20th, 2010 at 1:10 pm
keichu tupawh tu paw’n a duhber a neih chuan ka LAWMPUI vek…
HMANGAIHNA hi a hlu ka tia chuan INNEIH phei hi chu decision ropui ber ah ka ngai.
Report this comment
April 20th, 2010 at 1:47 pm
“Mizo hmeichhia hnam dang pasal a neite hian an fate hi Mizo tawng an thiam tir thei deuh zel zu nia” tih hi a dik lo tih ka hmuh leh hriat ve tawh atang pawhin ka sawi ngam. A ziaktu hian a hre tlem deuh a ni thei ang em?
Mizorama an awm chuan thiam te pawh an thiam mahna. Mahse vairam leh ram danga awm te hi chuan an thiam lo nasa.
Report this comment
April 20th, 2010 at 2:35 pm
Kei chu ka letling tlat! Nawmsakna um vanga hnamdang neite hi ka hrethiam zaw mah. Mahni tanghma hai theuh, damchhung tawité nuam taka hman duh vek kan ni. “Hmangaihna ani” ti ho mawlh hi… engvang nge an hnampui, mizo ngei an hmangaih ve mai loh? Mizo zingah hmangaih an tawnglo anih pawhin hnamdang neih ai ngawt chuan, neih tlak deuh nia an hriat kha nei tawp rawh se, hmangaih tum tlat chuan hmangaihna chu alo piang ve mai. Mizo awm lohnaa hnathawka awmte zingah pawh “Mizo ngei” titu chuan, Mizo ngei a nei mai.
Mahse, Dumka nei pawh nise, ka deusawhin ka sawisel ve chiam ngailo. Hnamdang nei ho hi ka dem rual2in, an duhthlanna erawh ka zah sak hle thung. Hmangaihna ani emaw, Nawmsakna um vang ani emaw, (a hir-ha leh hnam ti mualpho zawnga an khawsa anih em loh chuan) tawngpawng sawisel chiam hi tha ka ti lo. Nupui/ Pasal neih hi Risk tak meuh2 ani a, “Mizo ngei…” titu te zingah pawh thlang fuh lo fe2 an awm laiin, hnamdang neite zingah thlang fuh fe2 an awm ve tho. An duhthlanna-in risk an la ani mai a, va beih chiam zel hi tul ka ti lo.
Mizo ngei i nei tur ani… intih leh ngawt thin ai chuan, nakina harsatna awm thei hrang2te inhrilhhre tam ila, chhungkaw boruak a fuh loh chuan hmangaihna ringawtin hlimna tluantling min pek loh ziate, tu leh fate thlenga harsatna awmthei te hi sawipui tam ila, a sawt phian ka ring.
Report this comment
April 20th, 2010 at 2:56 pm
Sawi tur chu k ngah khawp mai mase k sawi vek dawn lova, k thu neihna leh k theihna ah chuan Hnamdang nupui pasal a neih leh mizo hmeichhia in hnamdag an gaizawng hi cu k DO zel dawn.
MizoPa k ni in ti a,Mizo kristian chhungkaw thra tak, chhungkaw in thunun na fel fai tak atrag chuan hetiag hnamdag nupui pasal nei hi an awm k ring lo…Chhungkua a in zirtir na tra nei, Nu leh Pa te zirtirna fel fai tak nei cuan hnamdag nupui pasal a an neih k ring lo..Hetiang chhungkua a traga hnamdag nupui pasal nei an awm anih gat chuan khawgaih takin k misual thriante hian mn han siat tir teh u, an chhungkua cu k lo zir chiag aga, a chhanna thra tak k pek gei theih ceu k ring.
@Epis: Mizo nula i sawi hi k va se chhiang chak ve aw. Mizo nu leh pa nei, mizo kristian thra tak chhungkaw inzirtirna a trag chuan hetiag mi hi an awm k ring lo.
SAWI TUR CHU K GAH Amase k sawi vek hman lo tlat..hetiag lam thu hi k vei zawng tak a ni
Report this comment
April 20th, 2010 at 4:40 pm
Sakeibaknei nu (a pa nilo) pakhat hian a fate a mah in a hmeithai pui a, a pa kha eng vanga awmlo nge anih ka hre talo, tichuan sakeibaknei pa dang pakhat chuan a nu ramvah hlan in a fate chu a lo seh hlum sak vek….a nu hian naute hnute an pek laiin a pa dang an pawl (mate) theilo. Tichuan chu sakeibaknei pa chu sual ka lo tih viau laiin an chanchin sawitu chuan sakeibaknei pa thil tih chu Suvival Behaviour ani e ati ta daih. A pa tel lova naute enkawl puitlin a harsa si a, a fate awm chhung chuan kha sakeibaknei khan mating a nei dawn si lova, a fate thah sak a, a nu mating neih pui a, an pahnih a fa an enkawl khan Sakeibaknei spieces vawn nun chhoh nan chance a san zawk vang ani.
Mihring (individual) pawh hian keimahni theuh survive nan hian automatic response leh reflex te kan nei nual. Hlauh kan neih a kan hmai a dang (pale) a, kan thinphu lo rang te hi chung reflex zinga mi chu ani…chu chuan kan taksa danga thisen a lakhawm a, lung lam ah thawn thla in chu kan hlauh lak ata tlansawn emaw sual (Fight or flight response) turin kan taksa a buatsaih ani.
Tichuan kan thupui ah lo lut dawn ta ila
Tunlai khawvel ah hian hnam khawi ram ah pawh hnam hrang2 hi an inneih pawlh nasa ta khawp mai a, heng inneih pawlh lo hmuh danglam deuh entirnan lo ngaihsan/ngaihnep/hnam phatsan a ngaih etc vel hi hnam tlem leh ral hlau te Surviving technique chikhat, kan subconscious lam atanga zawite a min rawn hrilhru se se tu ani thei em aw tih hi ka hriat chak em em pakhat ani.
A chunga entirna ka rawn pek ang chi deuh khian.
A chhan chu tunlai khawvel ah hetiang anga hnamdang neih avanga an ram leh hnam ina an buaipui a an sawi tak luai2 hi sawi tur a vang ang reng si a.
He ka rindan (theory) rawn sawi hi social psychologist lam te kan awm anih phei chuan hriat chian ka chak khawp mai…a lo diklo tawp thei tho bawk a
Tin, khi ka theory khi a diklo anih rau rau chuan thil nithei tur awm dang leh a ka ngaih chu….Mizo te hian kan hnam hi hnam tha bik a kan ngaihvang a awm thei a ni bawk in ka hria. Hnamdang min ngaihdan lam chu ka hre lo na a, keimahni kan in ngaihdan ah hnam tha leh bik riauva inhriatna kan neih chuan chu chuan hnamdang nei te kan hmuhdan min thlak tir thei bawk.
History lam ah pawh hetiang ngaihdan nei an awm chuan a consequence a pawi em mai….chuvangin he ngaihdan hi chu nilo tur ah ngai phawt ang.
Report this comment
April 20th, 2010 at 5:41 pm
Thingtlanga rethei tak tak hi chu an lo va rethei em ve aw. Hmana ka zinna ah chhungkaw rethei em em maia an fanu hian Dumka labour a nei a. ‘labour han neih chu a hahdamthlak hle mai’ a ti a. Ka dem ve thei lo, an va lo retheiin an va khawngaihthlak em ka ti. Tin, mizo leh mizo saptawnga an inbia anih pawn a pawina reng reng ka hrelo. Saptawng kan hmang hreh lutuk te hi a thalo. Mizorama kumkhat te zinchhuak miah lova ka awm hi chuan phaia thil pawimawha han kal te hian ka saptawng ka bahlah tlat hi ka buai thin. Mizo kan awmkhawmna a kan thiante hnamdang an tel phei chuan saptawnga inbiak tlan hram hi kan zir a tul ka ti.
Report this comment
April 20th, 2010 at 7:53 pm
He thupui hi khel fe tham ani. Thlir dan pakhat erawh ka nei. A dik vek ka tilo mahse a tlangpui chuan ani e.
1.Hnamdang ngaithei ta viau te hi an chhungkuaah emaw an laina hnaiah hnamdang nupui/pasal nei an awm duh tlangpui.
2.Chhungkaw inzirtirna nei mumallo atanga chhuak reng reng hian hetianga hnama chianlohna hi an nei nasa bik.
3.Hnamdang neih la awlsam ta viau va, anmahni thu ani, sawi tur ka neiloe ti thin te hian an HNAM aiin anmahni an indahpawimawh hmasak em avangin hnam damna ai chuan anmahni damna an dah pawimawh hmasa ani.
Report this comment
April 20th, 2010 at 8:28 pm
Ka pa chuan mi taimatak reithei an awm k hre gai lo a ti tlat..
@awmawmpuia: Thingtlag reithei tak hi cu an reithei gei mai, mase mithei tak chhungkua hi cu taima tak leh kristian thra tak hi an awm lo reg2, i sawi dumka nei poh hian nawm a duh avag a nei mai2 anh tih a siat, mitaima tak cu nise a neilo top ag…
Report this comment
April 20th, 2010 at 8:39 pm
@chimchem, nawmsak duh vang chu anih hmel. Mahse nawmsak hi chu kan thlahlel theuh alawm. Taima taka hna kan thawh nachhan pawh hi nawmsak kan duh vang ni in ka lo hre mai asin. :lol:
Report this comment
April 21st, 2010 at 12:11 am
In comment zawng zawngah lawmthu ka sawi a, zawhna angreng deuh
Hlatekhua: “Mizo hmeichhia hnam dang pasal a neite hian an fate hi Mizo tawng an thiam tir thei deuh zel zu nia” tih hi a dik lo tih ka hmuh leh hriat ve tawh atang pawhin ka sawi ngam. A ziaktu hian a hre tlem deuh a ni thei ang em?”
= A ziaktu hian ka hre tlem khawp mai. Nangmah anga Mizo zinga hawiher zau nih ka lo zir ve ang. Ka mihring mihriat, hnamdang pasal fa nei kan hriat ho chuan- Mizo tawng an thiam viau tlat. Chumi atanga observation siam mai ka ni. 100% fact erawh a ni kher lovang.
Chimchema: Mizo nula i sawi hi k va se chhiang chak ve aw. Mizo nu leh pa nei, mizo kristian thra tak chhungkaw inzirtirna a trag chuan hetiag mi hi an awm k ring lo.
= A hming chu sawi lo mai ang, Shillonga Baptist pastor ka hriatte fanu ho chu, Mizo tawng pawh an thiam mumal lo. Hnamdang pasal a nei nghe nghe ta a ni. Kristian tha tak chhungkua chu an nih tho hmel viau.
Report this comment
April 21st, 2010 at 7:36 am
@ Chimchem # 24, ‘Mizo Kristian chhungkaw tha tak’ tih khi enge a awmzia. Mizo Kristian chuan Vai a neih chuan Mizo Kristian tha a ni tawh don lo tih na a va ang ve? Bible ah i hnampui chauh nei rawh tih ziak a awm lah ka hre lo.
Ringtu in ringlo mi nei sela, ringlo mi chuan a rin ang a tawmpui theih chuan..tih te poh kha a awm in ka hria..a bung leh chang ka chiang lo tlats :).
Mizo nula Kristian in Vaipa Hindu kha Kristian maiah ni lo, Kan Pathian rin Isua Krista chanchin ngei a hmuhtir ( pasal a a neih vangin )chuan chu bak2 a ropui chu Pathian poh in a phut don em maw ni le..kawng danga missionary na a ni ve mai lom ni?
Kan thlahte ah hnamdang nupui pasal nei kan awm lo a chu..hnamdang nei ho ka dem chuang lo, vai/mingo poh ni se.
Report this comment
April 21st, 2010 at 7:44 am
non-mizo nge non-christian?
Report this comment
April 21st, 2010 at 7:51 am
Nikum hmasa khan kha thiannu hi sap hian neih ah a sawm tawp mai a, in ngaihzawn em2 na hun poh nei lem loin, mahse ka thiannu chu Mizoram lamah a nu MHIP hruiatu te zing a mi te a lo nih ve vang in a thawhpui te laka a in thlahrung ve deuh chuan khawtlanga a rawngbawlpui te chu a han rawn ve a, Mizo hmeichhe hnam ven him na lam thawk e ti lo chuan chu hnam dang pa chu SAP a nih avang in an lo AWKHE khop mai a.
Ti hian ka ngaihtuah mai2 a..kha hnam dang pa kha Vai chu lo ni ta zawk se la chu ka thiannu nu hi a khawtlanga rawngbawlpui te ho hian hnung lam atangin a rel zui hrep mai lo maw te ka lo ti mai2 a..Vai nei kan hua, Sap nei chu kan sawisel em2 lo. Mizo ho hi ka lo racist ber zawk lo maw!!
Report this comment