Lo hal zawh hlim a ni a, thingtlang mai ni lo Aizawl khawpui pawh chu lo hal khuin a bawh paw chuk a. Khua a duaiin ruah nasa tak rawn sur tur ang maiin a dur khup a. “Zan mut atui leh dawn mang e” tiin kei chuan khawdur leh ruah sur tur chu ‘Nuam singkhaw’ ka ti mai a. Lungkham em em nei lovin mut zai ka rel a. Mahse, tum angin thil a kal tawp lo mai, zan dar 10 velah chuan telephone a rawn ria “I pa a chau riauva naktuk zingah in unauin in rawn haw dawn a mi niang? ” tiin kan khaw zirtirtu pakhat chuan min rawn hrilh a.
Ka pa hi Asthma vei a nih avangin lo hal lai leh khua a duai deuh chuan a heti fo reng a, a tha chhuak ve leh mai thin. Tun tum pawh hi ‘A tha chhuak ve leh mai ang’ tiin ngaihthat lohna em em poh ka nei hran lo va. Amaherawhchu, muthilh bawrh bawrh chu a har ka ti hle.
A tukzingah chuan hmanhmawh takin zarkawt lam panin kan uanau chuan kan in ak chhuak hnak hnak a. Sumo ticket la chawpin kan khawlam pan chuan kan tlan ta vang vang a. Aizawl atanga kan khua ban tlang a awm loh avangin Lunglei lam atanga sumo rawn kal nghah chawp a ngai thin a. Kan Sumo chuanna Driver chuan kawtchhuahah tawngtaina a nei thlapa, ka thla a ti muang em em mai a, hetianga driver ber an tawngtai hi chuan lirthei chuan hi a hahdamthlak reng a ni.
Kan chuanpui zingah chuan nula pakhat ngo lam deuh, hmaifang tha tak, te fel et hi a tel ve a. Driver nen inhmelhriat sa an niha vangin a tawng duh barh barh hle reuhva. A ti ti-ah chuan phaia lehkha zir rawn chhuak hlim lam a pawl deuhvin ka hria a, zirna lamah pawha vantlang chung lam deuh a nih ka han ring thlarawk a.
Tukthuan kan ei kham hnu chuan motora chuang te pawh khawia kal tur nge kan nih te kan inhre ta hlawm a, ti ti pawh a rual tlang ta viau mai. Kan nula chuanpui chu Medical Doctor niin a post lam pan turin a kal hi a lo ni reuhva. Ka pa dam loh vanga haw tur kan nih thu leh a chauh ang reng viau thu te, Asthma natna nei a nih thu te ka hrilh a. A ni chuan, fel takin tun ang lo hal lai leh khawdur lai hi chuan asthma ho chu an dan ve reng a lawm, khua a tha anga a dam ve leh mai tiin min thlamuana, a hmaa ka ngaihdan chiah a nih ve bawk avangin ka thaw deuh huai a.
A tir khan a chezia kha ka ei vak lova, mahse ka rin aiin a lo fel ta phian a. Kan ti ti laia ka ngawi leh vung vung thin chu a chhan a hrethiam a nih ka ringa, thil dang sports leh ka zirna chung chang te min zawt ve a. Ui leh Zawhte a ngainat thu te pawh min hrilh tak luam kha. Ka pa chu ka ngaihtuahna atangin lak pen a tum hle a ni tih ka hai lo. Ni e, ka ngaina tan riauva ka haw chhan ber pawh chu ka theihnghilh hman thelh a ni.
Tluangtakin kan tlan zel a, kan Doctor-i pawh chuan min chhuk san ta a. A chhuk hmain ka pa damdawi tur min chawh a, a chiu chi leh a tui in chi te a ni a. A hip chi pawh tel ta in ka hria. A dawl dangin thisen a mamawh dawn ema ka hriat avangin Iron lam te pawh ka lei tel a. He damdawi ka lei hun hi chawhnu dar 1:00pm vel a ni. Kan unau chuan beiseina sang tak kan nei a, hmangaihna leh lainatna nen ka chiu anga a dam chhuak ve leh mai tiin kawng tluanin ka inhnem a. Kan khaw thlen hlan mawlh chu ka nghakhlel a. Mahse, thian te u, damdawi ka lei lai khan ka pa chu a boral tawh a, eng damdawi mahin a tidam zo tawh lo a ni tih ka hre hauh si lo.
Tlai dar 3:00pm vel a ni a, Peng-ah chuan lunglei sumo lo kal kan nghak a, tawt angreng tak hi a rawn tlana, kan phar dinga, tah chuan ka nutei (ka patea nupui) pawh a lo chuang ve a. Karei! Kan inhmu chiah chu ka khawvel hi a danglam ta!. Mittui nen min rawn kuah chungin “I pa chu tukin dar 9:00am khan a kal ta a ni”. Sawi leh tur ka nei lova, ngaihtuah tur dang reng ka nei tawh lo. Khawvel hi a thim mup mai a ni.
Thangkhat lian zet chu kan khua ka chhuahsan tawha, chawlh ka neih chuan ka haw ve leh zauh thin. Hlimtakin chhungkua kan inhmu khawm a, nui riin kan inchhung a khat thin. Mahse, tun tum ka haw zet zawng hlim hmel hmuh tur an awm lova, nui ri hriat tur reng a awm hek lo. Lawmna aw rawl ri ni lovin lungngaihna awrawlin kan in chu a khat a. Chutah le, “Khawnge ka pa chu?” “Tun maiah khan thlanmualah vui liam a ni tawh”. Aw! Ka tan khawvel hi a tawpa, sawi tur ka hre lova, thenrual tha rawn leng te pawh biak nachang ka hre hek lo, ka mualpho der mai a ni. Ka bag atang chuan a damdawi tur ka lei chu ka phawrh chhuak a, kan chhungkua bakah inleng te pawhin an thlir thap a.. “ He damdawi hi chawhnu dar 1 vel khan ka lei a, mahse ka lei lai hian ka pa chuan min kal san tawh a, hre miah lovin beiseina sang tak nen kan rawn hawn a ni” ka han ti chu insum thei reng an awm lo. Kei paw’n ka sawi chhuak thei hram a ni.
A ni, Asthma natna hi ka hua a, lo hal khawdur hian ka thin a tirima, Asthma damdawi ka hmuh a piang hian ka pa min hriat chhuah tir thin a, tahna min thlen tir fo thin. Mahse, tunah chuan ka pa chu natna leh lo hal khu vanga khawdur reng awm tawh lohna ramah thlamuang takin a chawl ta a ni.
Similar Posts:
- Doctor chianglo leh damdawi phuahchawp!
- Sumo chesual-ah mi 3 thi
- Aizawl-Lunglei Sumo Accident ah 2 thi
- Ka thiannu kha…!!
- Serchhip leh Keitum inkarah Maxi Cab a Accident Hliam na tak tak an awm
April 20th, 2010 at 2:13 pm
Pakhatnaah chuan, rilruah lo hal lo thei lo dinhmuna kan din rihzia hi rilruah a lo lang nghal.
Report this comment
April 20th, 2010 at 2:39 pm
may his soul rest in peace. Ka hnuk i ti ulh deuh tlat mai.
Report this comment
April 20th, 2010 at 2:44 pm
ziak tha khawpmai.
Report this comment
April 20th, 2010 at 2:44 pm
Ka lainat khawp mai che. Tunah chuan i tawrh a nem deuh tawh ang chu maw. May Your Father Rest In Peace. No more tears in Heaven! Even the death died there, Buddy!!
Report this comment
April 20th, 2010 at 2:53 pm
Ka pa pawh kha Asthma natna vanga boral a nia, i awmdan chu ka hriatthiam pui khawp mai che. Kan thenawm ten bawlhhlawh, hnah ro, thing zaina nawi etc an han hal hi chuan kan chhung buai tawp zel. Thlasik lai pawn fan kan on vut vut loh chuan a chauh phah nasa thei lutuk. Mi thil hal lo hauh vak chi thrin si loh…hrehawm thei a sin aw.
May your dad rest in peace.
Report this comment
April 20th, 2010 at 3:04 pm
i thil tawn dan chu ava han hrehawm ve le. Mobile phone lo nung sela chu damdawi lei buai a ngai awm si lo a :roll:
Report this comment
April 20th, 2010 at 3:05 pm
Tun thleng thleng lo hal la ngai hi kan agriculture policy rural development programme hlawchham zia entirna a ang riau.
Report this comment
April 20th, 2010 at 3:17 pm
in lainat awm dun hle mai in unau chu! A hrilhhai thlak dawn bawk si a… Lalpan thlamuanin awmpuiin tichak zel che u rawh se.
Report this comment
April 20th, 2010 at 4:28 pm
Hetiang hun hi kala tawngve lo na in,ka hrethiam khawp mai..a theih phawt chuan tah hawm hawm tur kati mai..natak tur ani..
Lo halte andem awmloh e..Mipui enkawltu mawhphurhna lam ani..
A khualzinna ram chu Mihringte ngaiha hunlo taka alo chhuahsanta mai hi ka tawrhpui takzet che..
Pathian thlarau thianghlim thlamuanna leh awmpuinna changa dawngsawng thei turin nangmah kha inbuatsaih la..chu chu Ka Tawngtaina ani e.
Report this comment
April 20th, 2010 at 4:56 pm
I lainatawm ka van ti ve Thlarau chawlh na ram ah thlamuang tak in i pa chu chawl mawlh rawh se.
Kei chu ka pa ruang hi ka hmu lo va .Athih thu ka hriat chuan tihtheih ka neih lo zia ka in hre chhuak a kan in ka phone nghal var a .An vui hun tur te ka zawt a ka tih ve thei tawk.
Tuipui ral a tangin in ka pa ruang chungah live phone in thu ka sawi a an vui chhung zawng ka ngaithla bawk a hla te ka thlang a .Chu bak chu a thlan tak ngial pawh a hmun ah ka la tlawh ve lo ve.Video ah erawh ka hmu ve hram kum li dawn a ral ta.
Report this comment
April 20th, 2010 at 5:35 pm
Kan sawrkar hian lo hal ngai tawh lo a lo neitu te eizawn dan dang a dap sak hi a va hun tawh tak em, kan Zoram boruak kan ti chhe mek zel si….Lo hal tu te lah dem theih an ni bik si lo..an eizawnna ni ve miau si a, chu vang in kan sawrkar hian alternative solution hi a zawng sak vat a hun tak zet!
Kan boruak mai ni lo in, mihring te taksa hriselna pawh in a tuar ve zel bawk si…….!
Report this comment
April 20th, 2010 at 6:08 pm
Hahchawlhna famkim a changta a ni e.Thawkhah asthma awm ngai tawh lohna khawpuiah tlantu fakin an zai ang.
An mit ata mittui zawng zawng a hrufai ang a;
Thihna a awm leh thei tawh lo vang a,
Lungngaih te, tah te, nat te pawh
A awm leh tawh hek lo vang;
An riltam leh tawh lo vang a,
an tuihal leh tawh hek lo vang;
niin a em hek lo vang a,
lum reng reng pawhin a tihrehawm hek lo vang.
Beram No, lalthutphah laia
awm chu an vengtu a ni ang a,
nunna tuikhurahte a hruai ang;
Pathianin an mit ata mittui zawng zawng a hru fai tawh ang
Report this comment
April 20th, 2010 at 6:13 pm
Ka tawrhpui hle che. Thuziak pawh i thiam e.
MAHSE, paragraph ‘sarihna tawp lama
“Mahse, thian te u, damdawi ka lei lai khan ka pa chu a boral tawh a, eng damdawi mahin a tidam zo tawh lo a ni tih ka hre hauh si lo.”
tih sentence khi ka duh aiin i hung chhuak hmanhmawh! Chhiartute thil i hrilh chiang hma lutuk a … i sawi tum chu a ni khawp tho nain, i thil tawn chu a luhgchhiatthlak hle mai!
Report this comment
April 20th, 2010 at 6:32 pm
Avan lungchhiat thlakin hrilh ava hai duh dawn em? Lalpan thlamuan che u rawh se.
Report this comment
April 20th, 2010 at 11:25 pm
Chu hmunah chuan thihna te,lungngaihna te, tahna te a awm leh tawh ngai lovang, Tin, LO HAL KHU pawh.
Report this comment
April 21st, 2010 at 9:13 am
Ka mittui a tla tak tak mawle…
Report this comment
April 21st, 2010 at 9:33 am
In mi lainatna leh tawrhpuina zawng zawngah lawmthu ka sawi e. Kum 5liam ta vela thil thleng a ni a, ” I pa chu thlamuang takin chawl tawh rawh se”in han tih tak sap sapah chuan rilru in ti thar leh hle mai. In mi hnemna tawngkam ka lawm tak zet a ni.
Thihna kan sawinain khi article a ka tarlan duh chu @Sonyrawn sawi ang deuh khian Agriculture lama kan la pachhiat zia leh Rural development lama kan la hnufum zia hi a ni.
Lohal tu te hi ka dem lova, lo hal lo thei lova kan la awm hi a lungchhhiatthlak lai chu a ni.
Tin,Thingtlang inkalpawhna tha chu awm se ka Pa Ruang kha nang hman tur kan ni.
A tawpna atan,Inbiakpawhna lamah changkang deuh ila chuan Pu Shailendra sawi ang deuh khian Damdawi pawh kha lei a ngai lo tur…
Report this comment
April 21st, 2010 at 9:38 am
@chawnghilh, nang nge nge ka tih dikloh lai i rawn hmu fuh leh tlat mai. Khi mi Sentence ka ziah lai pawh khian ka tim /ip deuh reng a ni.Tluang taka ka ti ti lai a,THIAN TE U ka han ti thut te pawh khi a ulh deuh chu ka ti.
Nia, ka rawn hung chhuak hma hle bawk, ka sawi fiah zo lo ang tih ka hlauh luat vang a ni . Ka lo inzir zel ang. thank u
Report this comment
April 21st, 2010 at 9:43 am
Ka tawrhpui a che. Thihna te hi kan la tawk theuh dawn si a, Lal Isua zara thihna ngam nun thuruk neitute hi mi awhawm an ni. Thihna piaha nunna hi thlir phak tum ila, taksa thihna hi ringtute tan chuan a tawpna ni lovin nun bul intanna chauh a ni tih hi kan inthlamuanna lo ni rawh se.
Report this comment
April 21st, 2010 at 10:06 am
evergreen: Nang nge nge, thu i thiam thin e. A lungchhiatthlak rualin a ngaihnawm viau lawi si. May his soul rest in peace.
Doctor-i chu a hnuah i hmu leh em?
Report this comment
April 21st, 2010 at 3:07 pm
@Irreplaceable: Doctor-i nen pawh chuan in hmu zui zel e..Damdawi min chawh ka tih khan Mobile no ka dil nghal kha ka sawi lang ta lo mai..
Ka tarlan chuan alet thawka sei ziah a ngai dawna,article pakhat chen zet a daih dawn tlat,sawi zel lo mai ang.
Report this comment
April 21st, 2010 at 4:10 pm
I thiltawn hi a hrehawm ngawt ang le, ka hriatthiampui phak lo zawk che..
Doctor-i nena in thawnthu ve thung chu hriat a va chakawm tawh ve! Lungngaihna karah hian hlimna kawl a eng ve fo asin! Heti lam hawi hi a ni mial em? Han ziak leh hram teh a…
Report this comment
August 25th, 2010 at 6:16 pm
Evergreen, i thu post zawng zawng ka chhiar chhuak vek adang i post zawng zawngte poh, i thu ziak chhiar hi a nuam ka ti, ho deuhin aril tlat, post zel roh a dang poh ka lo chang reng nia
Report this comment
February 12th, 2011 at 12:00 pm
ri toh deuh mahse kan comment ve teh ang ooo.. hnuk a ti ulh a,mittui a cho chhuak mai dawn alawm maw leee…. thihna hi zawng a van rawng tak emmmm…!!!!! miringte mn lem zo duak duak mai zawng a nih hiii…..
Report this comment
February 12th, 2011 at 12:01 pm
rei toh deuh mahse kan comment ve teh ang ooo.. hnuk a ti ulh a,mittui a cho chhuak mai dawn alawm maw leee…. thihna hi zawng a van rawng tak emmmm…!!!!! miringte mn lem zo duak duak mai zawng a nih hiii…..
Report this comment