– Saikhûma, Electric vêng, Lunglei
Ziak/Ziah chungchâng thu hi Chanchinbu/Magazine hrang hrangah chhuah a lo ni tawh ṭhînin kan mithiamte inkârah pawh inhnialna nasa tak thlentu a lo ni tawh ṭhîn a. JF Laldailova (RIP)-in a “Bible Thlîrna’-a a sawi dân khân kan pi leh pute, biak te pawh lo ti biah, (hniak te pawh lo ti hniah, liak – liah, ziat – ziah, thliak – thliah, hiat – hiah, ṭhiat – ṭhiah, thiat – thiah, phiat – phiah, riak – riah, ṭiak – ṭiah) tute khân ziak pawh hi an lo ti ziah ve a ni tih kha a sawi tel a. Hei hi kei pawhin a dik chiah-a ka hriat ve dân a ni a, kan mithiamte rilru chawhthawhna a nih beisei pahfâwmin a dik ni-a ka hriat ve dân chu tlêm-a-zâwng han sawi ve ka duh a ni.
Bible hi Mizo ṭawnga lehlin chhuah/tlângzarh a nih hma 1926 vêla Rev Liangkhaia (RIP) -in a ‘Essay inziaksiakna’ a lo tih pawh khati taka (kan Mizo zînga) ṭawng lama mi duhtui/mithiamte ‘Inziahsiakna tih zâwk tûr alâwm’ ti-a chhuahchhâltu an lo tam si chuan, engatinge kan Bible, vawi-te-khat mah ziak hi an tih ziah lohna, an tih ziak vekna, mi tam berin-a kan chhiar tam ber leh hriat tam ber a lo tlânglâwn tâk hnu-a “Ziah chu Zâwngṭah alâwm” kan tih tâk? A chhan chu kan Bible-a an lo hman dik loh vek ‘vâng hi a ni mai lo maw?
Engatinge Pu Sandy sâp (Frederick J.Sandy) “Bial a harh chui chui”, Thing kâkah hauhûk a zep keh kuh” (a inzep pawh a ti lo a nia) “I va hah hiam huam mang e”, “I va tawi kêr kûr êm” titu-in, “Mizo hian in ṭawngah hian Verb tihdanglam loh (modify loh/exception) tlêm-a-zâwng in nei a, chu’ng zînga pakhat chu ‘ZIAK’ hi a ni” a lo tih ‘vâng mai-a kan pi-pute, ṭawng mawi leh dik tak hmangte pawhin-a a huna an lo tih ziah ṭhin ziak hi kan tih ziak tâk vek mai aw? “Mizo ṭawng a thiam êm alâwm” han ti dâwn ila a sûlhnu lah chu khiti ve mai bawk khi a ni si.
Kan Mizo mithiam tak takte leh literature lama mi duhtui âwm fu fu-a ka lo ngaih ṭhinte pawhin ‘Chanchin Ṭha Matthaia ziah’ ti lova ‘Matthaia ziak’ an han ti leh piap mai ṭhîn te hi zawngin keini anga duang ngêng pawh hi a chhun na ta lû deuh ve a! “Bedroom hi tu phiat nge?” “Mâmi phiat”, “Kan pangpâr hi tu thliak nge?” “Lala thliak”, “Zâwngṭah hi tu ziat nge?” “Keima ziat”, “Chanchinṭha hi tu ziak nge?” “Matthaia ziak”, a dik thei lo; kan pi-pute hman dân dik tak ang khân Chanchinṭha-te pawh hi Matthaia ziah/Marka ziah/Luka ziah/Johana ziah ni ngei tûr a ni.
“Kutziak” tihte, “ziak leh chhiar” tihte, “Ziaklohbu” tihte hi Mizo ṭawng dik/Mizo dik ṭawng a ni thei dâwn em ni? “Tih ziak a ni” tihte hi “Hmun phiat a ni” tihte nên a lêm/dang chuang lo. Ziaklohbu tihte pawh hi Thliakloh pâr tihte nên a in-ang reng. Kutziak tihte pawh Kut-sât tihte nên a thuhmun reng; Thingsûlthiah nge Thingsûlthliak?
“Ziah chu Zawngṭah alâwm” kan ti maw? Zah te pawh Pûm alâwm. Heta zah hi verb pakhat zâp-in a ze chi khat atâna a lo hman tawh mai avângin zak hian a ze chi khat atân a ṭâwm thei lo a ni chuang lo. “Engatinge i zaktheihloh viau?” kan ti chuang lo. Mizo ṭawnga verb-te hian Modified form/ze chi dang an nei deuh vek a, a spelling a nih loh pawhin a thlûkah tal a danglam deuh vek a ni. A spelling leh a thlûka pawha danglam chuang lo chu chhiar tham chauh an ni ta ve ang.
Chutiang chuan verb hi a modified form in-ang kan ngah lutuk. Verb pakhat modified form kha verb dangin a ze chi khat atân a ṭâwm thei lo a nih chuan Mizo ṭawng hian awmzia a nei thei lovang. Buh pawh a ah theih, Ipte pawh a ah theih; Thlêng pawh a thlawh theih, Hlo pawh a thlawh theih; Lo pawh a vah theih, khawlai-ah pawh a vah theih; Zu pawh a sak theih, Hla pawh a sak theih, Thlâm pawh a sak theih; Lei(lâwn) pawh a zawh theih, lo pawh a zawh theih, zawhna pawh a zawh theih. Entîrna pêk sên pawh a ni lo. Hetiang chiah hian Zâwngṭah pawh a ziah theih a, lehkha pawh a ziah theih a ni mai a ni.
“Assembly ṭhiat chungchâng/VC ṭhiat chungchâng” tihte, “VC ṭhiat a ni” tihte Chanchinbu-a kan hmu kûr ngiai nguai ta mai te hi eng ka ti zo ta nge? Nu-ho secondhand zawng ṭhînte hian engatinge ṭhiah chi zawng lova ṭhiat chi an zawn tâk deuh vek zâwk? Hetiang a nih zêl dâwn chuan “Ziah chu Zâwngṭah alâwm” kan tih ang chiah hian nakin deuh-ah chuan “ṭhiah chu Buhfai alâwm” kan va la ti leh mai âwm ve?
Heti a nih avâng hian kan mithiamte hian ṭan han la sela, kan Bible-a (a dik lo dang tam lutuk chu sawi loh) diklo taka ‘ziak’ tih chuang del dul mai hi Jeremia 49:19-a “Tuinnge hunbi min thliaksak ang?” tihte nên lam hian paihbo veka a dika thlâk hlân a va nghahhlelhawm êm!
“Hmun phiat ka duh” ti chuan a duh leh Sweeper ruai mai rawh se. “Hnathawk ka duh” ti chuan a duh leh Labour ruai mai rawh se. Chutiang chiah chuan “Lehkhaziak ka duh” titu chuan a duh a nih hrim chuan Clerk ruai mai rawh se.
Similar Posts:
- Mizoṭawng tlema zäwng
- ROPUI NGE ROPUINA?
- Mizo ṭawnga ziah zawm leh zawm loh tur te-III
- Kapthak!
- Kan zain i bei ang u
June 20th, 2010 at 1:05 am
@funny, Roreltute 3:21 leh Ezekiela 16:40 ah khan khandaiha chiu thu chu a inziak kha
Report this comment
June 20th, 2010 at 1:21 am
hahaha: “Pulit” anti vela maw, kalo la chhiar fuhlo anih chu, bible lehlin thar hi kanla nei miahlo a, keini chhung chuan lehlin hlui kanla hmang tun thlengin, thiante ina len changa ka chhiar anih ngwt loh chuan ka hre thuilo khawpmai lehlin thar chungchang hi chu, ka chhiar ngun ber thuthlungthar pawh hi a bung leh chang hi engmah ka quote theilo (kan sawi kai zuai anga, ka sawi thrin pakhat chu “mi threnkhat inti rilru chak, (lehkha zir peihlo si thiamthei si ti a an sawi ho zingah hian, “ka vawikhat chhiar ka theihnghilhlo.” ti tu hi ka tawng zeuh zeuha, bible hi chhiar chhuak vek ta se an theihnghilh loh ka ringlo re re. lol )
Bible hi rinna kawngah dik viau mahse mizotrawng ziah dan kawngah hi chuan a dik khera rinloh tur ania, lehlin hmasa kha mipuiin kanlo pawm tlan viau lai khan, mizotrawng thiam kan tih ho zingah khan pawmlo an awm tho mai, (Entirnan, the one and only.. Pu J.F. Laldailova) keimahni trawng ziah dan mumal tak leh grammar fun kim tak kan neih hi chu a hun tawh viau in ka hria..
Hman atanga tun thlengin kan mizotrawng thiam tihte pawh hi an thu a in hmu hleitheilova, an duhdan leh ngaihdan inannloh ang ang hian an duhdan in an ziak a, chu chu mipuiin anlo chhiar chuan a thren an convince a, a thren an convince lova, chuvang chuan tun thleng hian mipui zingah pawh ngaihdan leh duhdan in anglo tak tak lo pian chhuah phahin ka hria,. sawi tur a tam mai, ka sawi duh ber chu, 21st century kan chuangkai tawh chung pawhin mahni trawng ziahdan felfai tak chungchangah kanla buai hi chu a zahthlak kati ngei mai..
Report this comment
June 20th, 2010 at 7:52 am
A lawmawm hle mai, ka lawm takzet.
mi(sual) ho hian Mizo tawng hi kan lo thiam hlawm ngawt mai
ka thla a muang thin. Hetiang post han thehluh dawn hian tîm a awl a, thil tha thlen lem lo zawnga inhnial vakna a thlen palh mai ang tih te a hlauhthawnawm duh khawp.
Tunlai hip-hop genaration-a Korean filmstar entawnho kan fate leh kan naute, Mizo tawng dik thiam tum chu sawi loh thiam loh pawh zak miah lova an thiam loh thu chhuang zawk ni awm taka sawilang pâng pâng thin, Sap tawng pawh thiam chuang hek lote ka hmuh hian hmabak kan la ngahzia ka hre si thin.
Tleirawlho Mizo tawng sms-a ‘y’ tam ta lutuk leh vowel tlem ta lutuk te hi…
Report this comment
June 20th, 2010 at 8:24 am
@ Funny in kaihhruaina tha hi siam lo tum ta ila, kan mithiam te tho tho hi ania in hnial nasa tur. A then mahni thu duh tak tak an awm anga, a thenin dik an inti anga, a thenin thiam an inti ang. Chuan, a then an titau kual vel anga atawpah tlemte chiah an bang toh mai ang. . . :lol:
Report this comment
June 20th, 2010 at 10:28 am
Ziah thiam a va har ta ve le; ziak ziak phawt mai ang aw!
Report this comment
June 20th, 2010 at 10:48 am
Pu JF-a thukhawchang “Hawrawp hi tawngri chhinchhiahna ‘Symbol’ mai a nih avangin tawnga ri tel tawh phawt chu kan ziak tel zel mai tur a ni lo vem ni?”
@Ku Muanga : Post tha tak a ni. Kan kohhran Upa-ho hi chuan change an harsat ve khawp ang. A vei deuh ho khan ti tang tang teh u. Thang leh thar hian kan mausam nasa tawh em mai!
Report this comment
June 20th, 2010 at 11:15 am
Mizo tawng hi chu dik deuh a ziak te ziah hi chhiar a nuam
Report this comment
June 20th, 2010 at 5:38 pm
Han ngaihtuah mai pawh hian mizo tawng thiam pangai tan chuan ‘Ziak” leh ‘ZIAH’han hmanna tur chu a chiang viau a ni.
Muantea te ngaihdan a ‘ZIAH’ hmanna turah pawh “ZIAK; han hman tlah hi chuan dik hmel viau mahsengaihthak leh chhiar chian deuhin a PAI deuh tlat a lawm.Entinan Kawlhawk thu rawn Ziah(Ziak tih chuan a pai deuh hu em?)”ka ZIAH (ziak tih chu a ni deuh hu)dik lo a awm chuan min lo ngai dam ula ka ziah (Ziak a ni lo) thiam deuh2 theihnan thurawn min pe zel ang che u.Ziak tih hi dik ve hmel riau mahse a hmanna tura “ziah”han hman chuan a chhiar a nuamin a dik deuh ziah a sin.Chuvangin Muante “ZIAH” hi hmang ve thin tawh rawh.
Report this comment
June 20th, 2010 at 5:52 pm
Muantea said”Mizo tawnga verb modified form ho hi han en ila :- ziat/ziah, phiat/phiah, liak/liah,zap/zah etc. Chi tam tak kan nei a ni.” Thliak chuan modified form THLIAH a nei a, Thiah pawh THIAT modified tho a ni. ZIAK erawh chuan modified form a nei ve lo. ZIAH hi ZIAT modified form a nih avang ngawt hian ZIAK hi kan lakluh ve kher a dik lovang.”
Ziah chu ZIAT modified Form a ni bik ngawt thei chuang nang ZIAK Mf pawh a ni ve tho a lawm .chutiang chiah chuan Modified Form intawm a awm nual VAT (lo vat)leh VAK modified form pawh VAH (kan Lo vah chu/ka Vah velna)a ni ve ve tho.VAT modified form hi VAH a ni vangin VAK MF a ni ve thei lo tihna a ni chuang lo.Chutiangin AK leh AT pawh AH ve ve.Thlo leh thlawk pawh Thlawh ve ve.
Tin,Zo sapte thu ziahte kha thuziak kan hmu hlui theihte ni mahse a dik vek kher lo.Hla pawh an letling pakhat phei chu’ Isua vanah a um a,khawvel a zuk rawn kal a”tih a awm nghe nghe kha.He hla hi a hlui tawh in mizo thuziaka dahah chuan a rei pawl tak a ni ngei ang.Mahse a thu pai dan leh dik loh dan chu kan hre vek awm e.
Report this comment
June 20th, 2010 at 5:53 pm
Ka chhiar ka chhiar (chhiah a ni thei em?) a, han sawi zui tur leh han sawi belh tur ka thiam lo tak zet a ni e. Verb leh modified form kan lo tam hle mai mi(sual) zingah hian!
Mizo tawng/ mizotawng/ Mizo Tawng/ Mizotrawng (?) thiam leh vei tak tak hmel hmuh hi a nuam e. Kan lo inzir ve zel a nia.
Report this comment
June 21st, 2010 at 12:28 am
In lo sawi-zau tawh hle mai. Sawi ve reng reng teh ang!
Modified form ti a kan sawi ho reng reng hi ( eg. -liak – liah, ziat – ziah, thliak – thliah, hiat – hiah, ṭhiat – ṭhiah, thiat – thiah, phiat – phiah, riak – riah… etc) a hmalam thu leh kan thiltih in a hril/sawifiah loh chuan kan hmang ngai lo ni-in a lang! “ZIAH” kan hmang dawn a nih chuan a hmalam thu emaw, kan thiltih hian hril(h)fiah chiang se. Ti-in ka lo mi(sual) ve a nih chu!
Report this comment
June 21st, 2010 at 3:57 pm
misual.com a rawn comment tu te hi kum 60 hnuai lehkha thiam thehthawh in nih hmela, upa zawk ten eng tin ngai ve ang maw ‘ziak/ziah’.
Report this comment
September 20th, 2010 at 2:01 am
:lol:
Report this comment
March 17th, 2011 at 3:07 pm
Hehe
Report this comment