Tlawmngaihna tih hi Mizotawng thumal-ah chuan a hlu ber niin ka hria. Tawng hausa zawk leh upa zawkten a tluk pui tawngkam an nei ve em aw? An lo nei ve a nih pawhin lehlin dawna hrilhfiah ngai tel kher te zinga mi kan tawng ti hausa tu niin ka hria. Engtik hunah emaw chuan Mizote zingah ngei pawh hian hrilhfiah chawp a la ngai ngei ang tih ka ring tlat.
Kan hun hman mekah erawh hi chuan hrilhfiah kan la ngai lem lo nachungin inzirtir erawhchu kan ngai hle tawh thung. Thuhlaril lama miril zawkten a tawngkam hlutna leh a awmzia te, a bulthum atanga chhuiin an hrilhfiah thin a, kan thiam ve kher lovang. A hlutna te, a awm ze ril zawk leh a nihna tak te sawi chhuak thiam lo mahila, kan huntawng mila hman nghal theih mai tur nia ka hriat angin ka han lepse ve teh ang.
Mizo nunhlui kan thlir chuan lal hran theuh neia an inrelbawl dan te, an khawsak phung (society)-ah te, ei leh bar an zawnna (economy)-ah te, an sahimna (defence) ngaihtuahna kawngah te ‘Tlawmngaihna’ leh ‘Huaisenna’ hi inkawp tlat leh lak hran hleih theihloh niin a lang a. Amaherawhchu, huaisenna atthlak tak tak sawi tur a awm laiin a hunlai ang zelin tlawmngaihna an lanchhuahtir thin erawh kha chu atthlak kan ti thei lovin a rinawm.
Kan pi leh pute nunhona hrim hrim khan tlawmngaihna kha a keng tel tlat a. Sakhuana a lo inthlak thleng a, kan hnam pumah kristianna a lo luh tak hnuah pawh kan pi leh pute nun tlawmngaihna chu kan Kristianna nen a inzawm nghet lehzual sauh va, kan pi leh pute tlawmngaihnain a huap tel theih hauhloh leh an thinhrik thin te chu kan sakhuana thara tlawmngaihna lo bei zel chuan a ngaihthah thei ta hauh lo bawk a. A chhan chu Lal Isua zirtirna leh mizo tlawmngaihna hi a lo inrem em avang leh Kristian sakhua zirtirna chuan tlawmngaihna zau zawk leh nghet zawk a ken tel tlat vang a ni ngei ang.
Kan huntawng mek thlirin kan ram inrelbawlna kawngah te, kan khawsak phung (society) lo danglam zelah te, ei leh bar kan zawnna (economy) lo inthlak danglamah zel te kan hnam nuna bet tlat tura duhthusam ber ‘Tlawmngaihna’ hi eng ang chiahin nge kan hriat a, engtia hman zel tur nge ni ta ang le? “Mizote’n tlawmngaihna kan tih hi mahni inphat chunga midangte tana inpekna a taka lanchhuahtir” hi niin ka hria a.
Tlawmngaihna chuan mahni a infak lo va, midang a phut lova, a chapo lova, fak leh chawimawi a beisei lova, mahni hma a sial lo niin ka hria. “Tlawmngaihna chu midangte hmangaihna avanga tawpchin neilova mahni inhlanna nun” hi niin ka hre bawk. He nun hi kan Lal Isua Krista nundan leh a zirtirna laipui ber a ni a. Chu nun chu kan mizo pipute tlawmngaihna kan chhawm nun zel nen hian tehkhin phak ni hauh lo mahsela a inzul tlat a. Chuvangin mizo hnam nunmawi tlawmngaihna chhawmnun zel leh Lal Isua Krista rawng kan bawlna leh a hnung kan zuina hi kan hmeh rem thiam a pawimawhin ka hria.
Kan ram inrelbawlnaah te, kan khawsak phungahte leh ei leh bar kan zawnna kawngah midangte tana inpekna leh midangte hmangaihna nun mizo tlawmngaihna hi kan phatsan (kalsan/theihnghilh) hlauh chuan kan Kristianna hian dal lam a pan ve nghal maiin ka ring. Khawtlanga chhiatni thatni kan intawiawmna te, harsa zawk leh pachhe zawkte kan dawm kan thinna te hi tlawmngaihna kan lanchhuahtinna hlawm lian tak a ni a; heng bakah hian midangte thatna tur ngaihtuah a, mahni indah tha a mi dangte tana nun pek hi tlawmngaihna lairil chu niin ka hria, chu chu Lal Isua hnungzui tute rawngbawlna tur tak chu a ni.
A tawp berah chuan sa leh ral lakah midangte tana nun hlanin kan pipute chuan thian chhan thih an ngam an thin a, huaisenna leh tlawmngaihna tawp a ni; kan huntawng mekah kan mihring puite ruihhlo sualin a tih buai mek leh suala tlu a boral mek kan unaute tan hian thian chhan thih ngam khawpin tlawmngaihna leh huaisenna kan nei em? Anih loh leh chhiatni thatni intawiawmna te, retheite leh pachhiate dawmkante, kan mihring puite nena kan chen hona khawtlang nuam siam tura tlawmngaihnate nei turin Lal Isua hnung kan zui em ? “Miin i chunga tia i duh tur ang bawkin mi chungah pawh ti ve rawh” tih te, “I vengte hmangaih rawh” ti tea Lal Isuan a zirtirna te hian ‘Mizo Tlawmngaihna’ a phawk chhuakin ka hre tlat.
Similar Posts:
- Tlawmngaihna, kan chhuang ‘over’ em?
- Tlawmngaihna hi a tlahniam em?
- TLAWMNGAIHNA vs NIHNA
- Tute Nge Kan Nih!? Part 5
- Tlawmngaihna
July 27th, 2010 at 7:20 pm
Nia
Report this comment
July 27th, 2010 at 7:24 pm
Midang tanpuina kawngah hi chuan a Kristian ka ti kei pawh.
Mahse ei leh in chungchanga kan tlawmngaih dan, kan duh leh mamawh reng pawh sawi duh loh tlat te hi chu a Kristianna em em pawh ka hre lem lo. Dawt sawi rawng te pawh a kai lek lek zawk bawk si.
Report this comment
July 27th, 2010 at 7:25 pm
Tlawmngaihna hi chu a hlu a,kan ram leh hnam ti ropuitu pawh a ni a,vul zel rawh se
Report this comment
July 27th, 2010 at 7:34 pm
Tlawmngaihna, a thlit fim chin tawh, tunlaia kan hman chin na na na hi chu a lang Kristian khawp chuan a hriat e. Mahse, azawng aza kha chu a kristian bikin a lang lo. Atthlak mah maha lang kha a tam thei fu. Tin, tlawm makah dawt-var a pung khan a hriat bawk.
Thlitfim chin tawh hi chu hloh phal chi a ni lul lo. Ram dang mite pawh hian tlawmngaihna hi chu an nei ropui ve hle, a hnam thil ang chuan a kal lem lo.
Gorkha, ka thian thenkhatte chuan min cho thiam ve hle, “Mizo-ten Mizo tlawmngaihna in chhawm nung peih lo a nih chuan, keini Zoram chhunga Gorkha-ho tal hi chuan kan chhawm nung zui zel ang,” an ti hmiah! Chhawm ta tak tak se, a kristian hle kan ti zui dawn nge, a Hindu hle kan ti thung ang, a chhanna chu nangma ngaihdanah a innghat e.
Report this comment
July 27th, 2010 at 7:42 pm
Mizo tlawmngaihna hi a Kristian ka ti a, khawi ramah pawh a chhawr theih a, a tangkai em em a ni. Kei ngei pawn ka tangkai pui zia chu chawnghilh hian a hriat ka ring.
Report this comment
July 27th, 2010 at 7:46 pm
Mi tlawmngaithei zawng zawng kristian an ni lo ang bawkin, Kristian zawng zawng pawh an tlawmngai kher lo …. “an tlawmngai kher e” ____ iti ka tihna pawh ani chuang la-w… !!!!!!
Report this comment
July 27th, 2010 at 7:46 pm
Sandes Sikul kai peih loh vanga Thlan lai ho hi a Kristian ka ti thei mawlh lo. (Inkawm chak ngawih2, thlanmuala lama liam tate erawh ka sawi tel lo) Tin, a chhe lam nilo, a tha lama tlawmngaihna reng2, mizo nih vang lam niloin, a Kristian ka ti vek mai kei chu.
Report this comment
July 27th, 2010 at 7:49 pm
#5 HV, Tha lutuk! I awmnaah lo mizo zel mawlh teh khai. Ka chhuang a che.
Report this comment
July 27th, 2010 at 7:53 pm
Kei ka ngaih ve dan chuan kan kristianna hian a tidal zawkin ka hria..hmanlai kan kristian hma nena an nunphung thlirdunin a dal tawh hlein ka hre zawk!
Report this comment
July 27th, 2010 at 7:54 pm
Pu Kawlhawka kawmen hnua kawmen hi chu sawi tur a vang thin… Tawi fel kim deuh dik deuh hian a sawi ta thlap thin a.. Kawnfi a har riau
Report this comment
July 27th, 2010 at 7:56 pm
Kei ka ngaih ve dan chuan kan kristianna hian a tidal zawkin ka hria..hmanlai kan kristian hma nena an nunphung thlirdunin a dal tawh hlein ka hre zawk! Inngaihdan chu a ni ve kher lo ang..
Report this comment
July 27th, 2010 at 7:57 pm
“Miin i chunga tia i duh tur ang bawkin mi chungah pawh ti ve rawh” tih te, “I vengte hmangaih rawh” tih te hian Mizo tlawmngaihna a phawkchhuak zo lo deuh,, a phawk chhuak pha tep zawkin ka hre ve tlat.. Bible sawi nep na lam ni lo se.
Mizo tlawmngaina hi a ropui thlawt.. chutih laichuan tuna kan ram dinhmun hi chuan, Mizo tlawmngaihna hi a nihna dik tak ang chuan a pho chhuak pha lo deuh in ka hria..
Report this comment
July 27th, 2010 at 7:58 pm
Mizo tlawmngaihna kan tih hi achang chuan Mizopuite lakah chauh kan lantir deuh thin em aw ka ti. Ram dangah, abikin vairamah te, kan Mizopuite laka kan tlawmngaih ang hian hnamdang lakah kan tlawmngai thei thin em?
Vairamah, accident emaw, thil dang vang emawa tanpui ngai hmu ta la, Mizoram chhunga i Mizopui laka tlawmngaihna i lantir thin ang chiah khan i lantir thin em? Keimah bikah chuan ka lantir thei lo deuh a ni lo maw ka inti fo thin.
Tlawmngaihna taktak leh Kristianna taktak chuan hnam emaw hmun emaw a thliar hrang tur a ni dawn em ni? In experience han sawi ve teh u.
Report this comment
July 27th, 2010 at 8:01 pm
midang hriat loh a tlawmngai hi engzat nge awm ang le… midangin ‘i va han tlawmngai em’ tih vel beisei lo a tlawmngai hi kei chuan tlawmngai ka ti… Taitesena khan eng atinge kawtchhuahah, valupa lungtat kha a hlan kher? Mi mut rehah, a leikapuiah, ngawi reng in, midang hriat loh in va dah mai awm…
Report this comment
July 27th, 2010 at 8:07 pm
Tlawmngaihna hi kan chhuang viau a, Mizote ta bil deuhah te kan ngai deuh roh emaw chu aw te ka tih chang a tam mai. Tlawmngaihna hi mihring mize pakhat, khawvel ti nuamtu chu a ni hrim hrim mai a. Anih phung hi mihring mizia a innghat anih avang leh a hmun leh hun a innghat anih avangin inzirtir emaw chawm nun emaw chi niin a lang lo. Tlawmngaihna thiltih a kan puh tam zawk hi nundan mawi pangngai nunphung zawk niin ka hria.
Thlirna dang atang chuan tlawmngaihna hian a let leh a phut nasa khawp mai. Tlawmngaihna a vangin chuti teh ual in Mizote hi kan bul vel a mite lakah engkawng ahmah kan sang filawr lem lo (kan chhuan ang em hi chu nise chuan khitah kan awm ngei ang).
Tlawmngaihna hi inzirtir lo ila, chhuang vak lo ila, nun mawi, nun rinawm, nun nghet in zirtir ila hma kan sawn zawk ang tih ka ring.
Report this comment
July 27th, 2010 at 8:12 pm
Thian chhan thih ngam… kan tih fò te hi, kan ta bil ani hauh lo ania aw! Hnamdang zingah hlei2 hian hriat tur a tam teh a nia… Chutih rualin, Mizote hi Hnam tlawmngai tak erawh kan ni chiang e!
Report this comment
July 27th, 2010 at 8:13 pm
#14 ka tawmpui e
Report this comment
July 27th, 2010 at 8:15 pm
A nuam hle mai (misual) hi… han sawi zel teh u. A bengvarthlak… seminar/discussion platform tha tak a ni
Report this comment
July 27th, 2010 at 8:27 pm
lzboikhar, Ual Kham, Ual Kham! A nuam lutuk hi kan hak thuak thuak thin… :evil:
Report this comment
July 27th, 2010 at 8:34 pm
‘thian chhan thihngam’ hi a awm. Kumtin, republic day ah nge, india president in new delhiah chawimawina a hlan thin hi. Mizoram atang pawh in thahnem takin an dawng tawh. Heng ho tlawmngaihna hi a ‘genuine’ ka ti…
Report this comment
July 27th, 2010 at 8:35 pm
Kristianna hi chu thlarau lam thhil daih ania, thil dang hi chu Kristian nun in a ken tel mai zawk ani.Chuvang in Tlawmngaihna chu a Kristian kan tih chuan thil tih that ringawt hi chhandamna te nen kang ngaih fin ang tih a hlauh awm in ka hria. Chhu vang in kan Zo zia ‘tlawmngaihna’ chu hnam zia rang tha tak ah ngaih mai tur ani zawk ang.Kan ti ve tlat teh ang.
Report this comment
July 27th, 2010 at 9:11 pm
21@dr.,feelgood chu…. a rawng a kai teuh ve.. hihi..
Report this comment
July 27th, 2010 at 10:59 pm
A dik reng
Report this comment
July 27th, 2010 at 11:03 pm
#14 YESH amen
Report this comment
July 27th, 2010 at 11:09 pm
A dik viau zel mai a! Tlawmngaihna chungchang sawi chuan 1Korinth 13:4-7 ka hrechhuak thin ‘Hmangaihnain a dawhtheia, ngil a nei bawk thin….’ tih kha Tlawmngaihna nen hian a inzul duh hmel ka ti. #14 shailendra sawi ang deuhva ‘Tlawmngaihna – sir dang atangin’ pawh hi sawi fe tham chu a awm ngei ang.
Report this comment
July 27th, 2010 at 11:14 pm
#5 HV ka hriatpui che. I tlawmngaihna, hnamdangte hriatthiam phak rual loh avanga in hotuten chawimawina an pek che kha ka lo lawm teh mai asin. Vawng nung zel rawh thang leh thar zel tan.
Report this comment
July 27th, 2010 at 11:24 pm
muante, a hmun leh hma hmutu kan phut deuh mai pawh a ni e, Mizo ka nih hi ka hai ngai lovang. I tawngkam fuihna thaah ka ngai e.
Report this comment
July 28th, 2010 at 1:26 am
Kristian sakhua Zoram a a rawn luh chin a tang tlawmngaihna hi tlem tulh2 bawksi a…
Report this comment
July 28th, 2010 at 2:18 am
Tlawmngaihna avang liau2 in mi mut reh ah ka rawn comment ve anih hi.
Tlawmngaihna hi Kristian nuna bet tel tlat turah ka dah. Kan Bible ah hian hmun tam tak ah indirect takin ‘tlawmngai’ tura min fuihna a tam hle.
Tin, Mizo nih chuan tlawmngaihna hi kan tih makmawh ani tih hi haider chi anilo ka ti bawk. Mizoramah NGO pawimawh zia leh ram hnuk a nih zia kan hrechiang. Tin, kan society inrelbawl dan chhiatni thatni, mitthi lumen, inneihna, pui punna reng2 te hi ‘tlawmngaihna’ tel lo chuan kan chhunzawm rei thei lovang. (eg. pakhat chiah- Vaiho chuan ruaithehnaa fatu tur pawisa tam tak sengin an ruai thin.)
Sawi thui lo mai ila, ka sawi tum chu in hriatchian tho ka ring.
Report this comment
July 28th, 2010 at 6:43 am
“Tlawmngai” tih thumal an define dan hi ka tan chuan a tantalizing lutuk a, ka phak loh chin zelin an define thin a. “Tlawmngai” tih aiah hian, thupuia ka neih tak zawk thin chu, “Dutiful is beautiful” ka ti ve hmiah thin!
Report this comment
July 28th, 2010 at 1:18 pm
Ka lehkhazirna tur panin relah ka chuang a, ka bul a thu chuan ka kal thin tawh em a tih chuan ka vawikhat kalna tiin ka chhang a. Min khawngaih a niang chu, hotel thlengin min thlah a, a phone number min pe bawk a……….Kha pa kha tun thleng hian ka theihnghilh thei lo. Morality/humanity,tlawmngaihna kan tih te hi MIZO chauh lo hian an nei ve teh meuh mai. Hnamtin hian huaisen leh tlawmngaih hi kan in zirtir vek in ka hria.
Report this comment
July 28th, 2010 at 1:41 pm
Kristian kan nih hma daihin Tlawngaihna hi a awm tawh!
Kristian kan nih hnu hian tlawmngaihna hi chuai ta a ni lo maw ! Mitlawmngai aiin lehkhathiam kan ngaisang zawk lo maw? Thihngam, lu chhum, ban chhum huamte hi mi a kan ti tawh zawk anih hi!
Ai a upa zahna chang pawh kan hre tawh lo anih hi…misualah pawh hian an teuh ta ve ang.
Report this comment
July 28th, 2010 at 2:46 pm
K thlir dan pakhatah chuan,Tlawmngaihna hi duhtawka kan sawifiah mawi chawp ani mai em o ?Hmanlai an tlawmngaih dan lah han hman zui theih loh leh hmantlak loh ani tawh bawk si.Kan sawi dan han thlir hian HMANGAIHNA(Agape) nen a thuhmun reng ni mai in k hria. Kan sawi rawtui chawp mai2 ani thei mai lo?Khawvel mi zawng2 in an neih ve tho thatna ani mai in ka hria.Fak mawi chawp,ka neih theih tak tak loh(ideal) ani mai lo maw?Han sawi christian viau chu a fuhlo deuh ang a.
Report this comment