mi(sual).com

Chapter III
Hun a liam a, nipui Thereng hrâm an reh a, thing hnah an tla kawlh zo a, Durtláng leh Laipuitláng khàmah Bawngpupár an lo vul a, an pár a chuai leh a. April-i nena kan inngaihna leh kan inkawmdân zawng zawng chu ‘thian’ tia sawifiah zawh rual a ni ta lo. Engkim inpe tawn tura Siamtu duan hran liau liau ni ber hian ka inhre ta hial! Hun a liam zêl ang a, kan nunphung leh kan khawsak phungte hi danglam zêl mah se, kei chuan danglam tawh ngai lo tur Hmangaihna ka chhar tawh a, chu chu ka nunpui a, ka thihpui thei hial ang ka ti!

April thla a rawn inher leh a, to thli a thaw tan vûk vûk a. Tlai khat chu school bàn dawn hnaihah thlipui leh ruahpui a rawn thawk tehrêng mai a. Káwl a phe zuai zuai a, têk a de zawr zawr a, khawpui a ri dur dur bawk a. Hmeichheho ho chu hlauin an khûr a, dawhkànah an bawk thap hlawm a. Mipaho chu an phusa nasa hle a. Ka tho a, April-i bulah chuan ka va thu phei a, ka kuah a, ani chu a kûn tlat a, a kut veilam chu lâksak ka’n tum a, lehkhathem hi a lo hûm thlan dup mai a, ka lâksak a. He thu hi a hmêl tluka mawi a kutziakin a lo ziak reuh a—
‘April pár chu May-ah an vul a. April thla chu thlipui leh ruahpui thawh nasat hun lai a ni a; ka mawina chu ka May pár hi i ni…” Ka chhiar zawh chuan min lo nuih var var a; keipawn ka nuih ve sak a.

Dárkar chanve vêl hnu chuan thli leh ruah chu an reh mai a. School pawh chu kan báng zui bawk a. Thiante chu an haw sap sap a, keini chu school tualah kan thu ràn a, school huan lama lènpuiah min sáwm leh a.

Reiêk tláng chungah chuan ni chu a ding a, school huana thlai hnah leh pangpárte chu a rawn chhun tle sur hlawm a; thli erawh a la thaw ri vûk vûk reng tho a. Kan samte chu a chhêm thur seng sung a, kan mitte pawh chu a chhém ro zo dawn mai. Kan ke pênte pawh chu a timumal lo nuai bawk a. A pawnfènte chu a chhém léng vawk vawk a; a pawnfèn a’n chhèm chhoh ruala a mal var no mawi tak lo lang leh zawk thinte chu a hmuhnawm tehreng nen a pawnfèn chu a’n hup leh chawih chawih thin a. Keini pahnih chu, chu thli thaw vûk vûk leh tlai ni nêm duai hnuaiah chuan kut kan inkai tlat a, hunah chuan kan lêng vêl a ni. Khawvêlin mihringte hnêna hlimna a pêk theih zawng zawng hi kan ta neih vek mai a ni.

School huan tuizêm hnungah chuan kan thu a, kan ngawi reng a, kan inen leh thin a, kan nui leh ringawt thin. Khatih hun lai khan thu kan va’n sawi hnem tak aw…!

Ka dâra bei April-i chuan min rawn en chho há a, kan inngaizáwng tih a nu hriat a hlauh thu a sawi mawlh mawlh a. Chutih lai chuan tlai ni tla tur pawh chu a nêm tial tial a, a no kher mai bawk a. Ka dàrah a la bei ta reng a, a hriat phâk tâwk lekin “Ka hmangaih che, ka hmangaih che, ka hmangaih che…” ka ti mawlh mawlh mai a. Ni tlâk hma chuan ka hmangaihzia vawi tam tak ka hrilh hman a ni.

Chapter IV

Tum khat chu Inrinni a ni a, ka nu dàwr nghahpui lo chuan In lamah ka awm a. April-i chu a rawn léng a, ka computer-ah project kan siam dûn a. Kan zawh dawn hnaihah ruah a rawn sûr chiam a. April-i chuan a nu leh pate hmun danga chaw an eitur thu a sawi rual chuan léngah min sáwm nghal a. Taxi a phar a, an In panin kan inzui chhuak a.

An In chu páwn lama en ang ngawt a lo ni hauh lo mai, a chhúng chu a lo ropui nangiang teh e! A pa hi sawrkar hnathawk, officer, motor pawh dawng pha chin a ni tih ka hria a, a nu chuan hna thawh a nei hran lêm lo; a ú mipa pahnihte chu phaiah lehkha zirin an awm tih zawng an chhúngkaw chanchin ka hriat chhun a ni. Heti êm êma an hausakna chhan hi ka hre lo; an vênga mi tuma’n an hre lo, an ti.

An Inah chuan In nghâk an lo awm lo va, a room-ah kan lût tlang nghal a. A computer fel lo a sawi chu ka ensak a; ani chuan bathroom-ah insil turin min luhsan a.

A CPU hnung lam en ka tumna lamah a computer table hnungah chuan zu changkâng chi hlîr Chivas Regal, Black Dog te leh 100 Pipers ûm ruakte chu a lo intlar dal mai a; mak ka ti viau a; mahse, ka ûksak zui lêm lo. A monitor cable chu a lo nghet lo hi a ni a. A khâwl chu ka’n on a. A desktop wallpaper-ah chuan Victoria Silvstedt-i thlalâk sexy fahran mai a lo tár kuau a. A desktop-ah vêk chuan notepad-a ‘My ID’ tia a file dah chu ka hawnsak a. Orkut-a a User name leh a password chi hrang hrang pathum chu ka zuk hmu a. A hard drive ka’n ensak thuak thuak a, a E:t drive chhûngah chuan Downloaded files tih folder a lo awm a, ka luh hmain hidden files ka show tir phawt a. Chu folder chu ka’n hawng a, thumbnail-in ka view bawk a. E khai! Porn star ho an lo ding thuau mai!

3gp tih folder a siam hrang leh a, chumi chhûngah chuan folder hrang hrang—Mizo, Mizo thar, FTV, sap… tihte an lo lang suau mai. Ka hawn kual hmain ka hnung lam bathroom kawngkhàr socket ball chu a ri rak a, ka hawi lêt a. Khawvêla hmeichhe duhawm leh hmeltha ber chu saruak titihin a lo chhuak mêk a ni!

Towel a rawn veng chhuak a, chung lamah chuan a brazier bâk thuam dang engmah a inbel tawh lo. Min rawn pan hnai a, min fâwp nghal nawk nawk mai… A towel ven lai chu a paih thla a, a tihpalh thilthu a ni hauh lo. Zei tak mai hian zaizirin a khum lam panpuiah min sáwm zui zat a. Ka harh zawk a—thil ni theiin ka hre lo.

Chhuata towel a paihthlâk chu ka chharsak a, ka ven thattir a. Tûn dinhmuna sex hmang thei kan la nih loh thu ka hrilh mawlh mawlh a. Kan inneih hmá zawng ka tana rinawma invawng thianghlim turin ka ngèn a, a ngawi ngal ringawt a.

Chumi zân chuan thil tam tak ka ngaihtuah a, khawvêla ka hmeichhe ît ber, ka hmaa inphelh chu ka tlânsan a maw? Mâwl ka inti a ni. Mahse, ka hmangaihzia ka fiahna hun niin ka hre tlat a. Ka thiltihah tisual êm êm-in ka inhre lêm lo.

(to be continued…)

Similar Posts:

• Mangtha April – Chapter V & VI
• Funny te veng mawi piah lamah
• Mangtha April – Chapter I & II
• Mizo thli chi hrang hrang te
• Difference United in Aizawl

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, July 30th, 2010 at 9:00 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.