mi(sual).com

Khua a tha theilo a, kan thlawhna pawh ni thum hnuah chauh a thlawk chhuak thei a, a ninawm duh kher mai. Office ka phone a, ka Team Leader chuan min hrethiam khawp mai a, a zia angreng phian. Kar hnih chawlh ka neih chu reilote chhungin a zo chu a ni der mai. Kolkatta ka thlen thlak veleh kan office ka phone a, ka thawhpuite chuan thawk thar panga an awm tih min lo hrilh nghal a. “Mizo mipa pakhat pawh a awm a, a hming chu Reema”, an ti a, mak ka ti khawp mai. Mizo mipa, a hming Reema chu ka hriat vawikhatna ani.

A hming chu Hrima a lo nia, vai ho lam thiam lo khan Reema an lo ti ni in. Ka nuih a za tawp thei lo, vawikhat phei chu a thinrim deuh nghe nghe a. Mizo pahnih awmchhun tih takah kan inkawmngeih ta phian mai a, Hrima lah thian ngah em em chi a lo ni lo bawk nen, kan inzui kan inzui ta mai.

Kolkatta Mizo tam tak zingah chuan keimah chauh chu thian a nei ni berin ka hria. Office ah nitin kan inkawm a, weekend ah lah kan inah a rawn leng a, a chang leh kan chhuak dun a. Ka chenpui te ho lah chuan mi chhaih hi nuam an ti khawp lehnghal a, an thusawi apiangin “A hrim hrim in..” tih hi an telh deuh reng a. “A hrim hrim in vawiin chu ka sam ka colour teh ang”, “A hrim hrim thu ah ka mut pawh a va chhuak ve”. Ka thiante pathum nena kan inluah tereuhte ah chuan Hrima hming chu a ri zing em em  mai a ni.

A hmel leh chezia han en chuan Hrima chu ka ngaihzawn em em chi pawh a ni lo. Hmui pan deuh, sam sei lek lek, sang lutuk lo, cher lek lek a ni a. Mahse “Hmeichhia leh uite chu a chul nel peih peih” an tih ang deuh kha ni berin ka inhria, reilote ah chuan mipa dang reng reng ka melh zui ta lo.

Teleworks India Services ah hian a thawk hmasa pawl ka ni ve a. Kan office pui ber chu Delhi ah a awm a, 2004 a Kolkatta a office an rawn hawn thar khan a batch hmasa ber zingah ka tel ve a. Call Centre a ni a, kan thil tih ber chu telephone a mi va call leh call lo dawn hi a ni deuh ber a. USA a telephone company lian ve angreng tak mai hi kan client lian ber chu an ni a. Customer awm sa te kan phone chang a awm a, mi thar te kan phone bawk a, a chang leh  survey te kan nei a. Kan buai thei khawp mai. Mahni infakna pawh lo ni se, a thawk tha ber te pawl chu ka ni ve in ka hria. Kum khat ka thawh hnu chuan Trainer ah min ruat a, rawn lut thar te hna kalhmang lo zirtir chu ka hna ber a ni.

Kan office pawh chu a thang ve zel a, a hmaa floor khat chauh luah thin kha kum hnih a lo vei chuan building tharah kan insawn a, a vaiin floor thum lai kan luah ve ta. Hrima a rawn thawh tirh khan kum hnih ka lo thawk tawh a, kum khat chhung trainer angin. Hrima te batch pawh chu ka train a, a hnu ah lah chuan ka thiante bulah mi kah nan tak a la hmang zui. Trainer anga kum hnih ka awm hnu chuan hna ngai reng thawh chu ka ning ta khawp mai a, ka boss te bulah chuan kaisan ka duh thu ka sawi lang zeuh zeuh ta a. Reilote ah chuan Team Leader hna a ruak ta thuai a, mi sawmpakhat in kan dil a, ka tling chiang kher mai.

Team Leader nih chu thil awlai a lo ni hauhlo mai. Mihring inang lo tak tak 20 vel ka team ah chuan an awm a, a then te chu kei aia upa te an ni a, strict deuh chunga nelawm deuh nih a ngai a, damloh deuh pawhin office kal hram hram te a ngai a, ka rin ang a lo ni hauhlo. Ka team te chuan an hna hneh takin an thawk em tih chu ka ngaihtuah reng a ngai a, ka boss hnenah nitin ka in report a ngai bawk a. A hmaa darkar 9 thawk thin kha darkar 12 te office ah hun ka hman a lo ngai ta thin a. Ka vanduai ka ti dawn nge ka vannei zawk, Hrima chu thla hnih hnu ah ka team ah an rawn sawn a. A hmaa kan inzui nasat zia te pawh an hre vek a, ka team a an rawn dah chu mak ka ti angreng khawp mai. Mahse ka la junior em avangin engmah pawh ka sawilang lo, ka tum ber chu tha taka thawha hun remchang hmasa bera kaisan leh vat chu a ni rih a.

Mihring hi chu inthlak danglam thei kan ni a, keipawh chu ka kaisan hnu chuan ka lo inthlak deuh a ni. Hrima chu ka bialpa ni mahse midang aiin ka en danglam a thiang lo, ka duhsak bik pawh a thiang lo. Hnathawh chungchangah hian ka strict em em mai a, diklo deuh awm ka hmuh chuan a ti diklo tu chu ka ko mai thin, mahse midang hmaah ka hau ngai lo. Hrima pawh chu ka koh a ka hauh a ngai fo ta mai. A nuam chu ka ti chiah lo, mahse ka hna in a ken tel a ni a ka tih a ngai miau si le.

Office pawn lamah erawh chuan a hmaa kan awmdan ang chiaha awm zel kha ka tum a, a chang erawh chuan thu te hi ka lo duh leh hret thin. Hrima pawh chuan a hre ve reng a,a hmaa inhau ngai hauh lo kha thinrim takin kan inthen ta zeuh zeuh mai. Mahse hrehawm a tih ka hlauh em avangin keimah bawk hian ngaihdam ka va dil leh thin.Kan chhuahdun chang te hian amah vek hian pawisa pek a tum ta thin a, a hma kha chuan a chanve ve ve hi kan intum sem mai thin kha ani a. Ka kaisan hnu chuan pawisa ka phawrh reng reng a remti ta lo. Kan inah pawh a hma ang em em kha chuan a rawn lang tam ta lo, kei lah a chang leh Inrinni ah te hian office ka kal te a ngai thin bawk sia. Chawlhni kha chuan kan inah khan kan awm mai mai thin kha a nia, Hrima chu inkhawm a taima ta em em mai bawk a. Ngaihzawng dang a nei emawni le te ka tia, ka thiante ka enthlak tir thul, mahse midang chu an awm si lo.

2008 Krismas a lo her chhuak a, keipawh ni sawm chhung chawlh ka nei thei dawn a ka lawm hle mai. Hrima pawh chu chawlh la ve ngei turin ka sawm a, Mizorama han haw dun kha ka chak em em a, mahse a chawlh neih zawng zawng kha a lo hmang zo vek tawh chu ni in. Keimah chauh chuan ka haw chho ta a, ka khua a har hle mai. Krismas pawh ka hmang nuam lem lo, inah ka tawm deuh reng a, nitin Hrima chu ka phone a, office lam chanchin te ka zawt a, engkim a tha vek tiin min chhang thin a.

Kumthar a lo ni a, ka chawlh a tawp a,Kolkatta lam pan chuan ka chhuak leh ta a. Engmah a lo danglam lo,a khua chu a buai ngaiin a lo la buai reng a. Ka thlen veleh Hrima ka phone nghal a, a phone chu a lo in off ta daih mai. A ngaihna ka hre lo khawp. Ka thiante chuan an hmuh ngailoh thu an sawi a, “Krismas inkhawmnaah pawh a rawn kal lo”, an ti. A tuk chu chawlhni a ni a, ka va inkhawm a; Hrima hmel reng ka hmu lo, a thiante lah ka hmu hek lo. An inluahnaah ka va kal tawp mai dawn emawni le aw, te ka ti rum rum, mahse ka hreh deuh si, rilru nuamlo tak chuan ka haw ta rak rak a.

A tukah office ka va kal a, attendance log ka en chuan Hrima chu kar khat lai mai a lo kal tawh lo. Tumah pawh ka zawh hmain ka team member pakhat chuan “Hrima’n hmanni khan a banna a thehlut a, chumi hnu chuan a rawn kal tawh lo,” tiin min lo hrilh nghal var a. Ka hawihai kher mai. Khawvel atang hian a bo hmiah a ni ber.

A phone theih tawh bawk si loh a, a thiante ka phone hreh bawk si. Email ka thawn a, min rawn biak hun chu ka nghak ta tawp a, mahse thawm engmah a nei lo. Ka thiante chuan min khawngaih khawp mai a,an theih ang angin an lo chhui zui ve a. Thla thum hnu ah chuan Delhi ah hna a thawk tih kan hre ta a, mahse contact pawh ka tum zui bik ta lo.

Kum khat leh a chanve a liam tawh, ka rilru na pawh a dam tawh khawp mai. Mahse a chang hi chuan ka hrechhuak leh thin. A lehkhabu kan ina a dah ka hmuh chang te, a movie duhzawng TV-a a lo chhuah chang te, a kamis ang ha ka hmuh chang te hian “A hrim hrim thu in khawnge maw i awm le?” ka ti rilru leh thin.

Similar Posts:

• Ka hmangaih hrim hrim che
• Ka lawmpui che
• Mobile Phone Handset Bo engtin nge ka zawn ang?
• Peih ta hrim hrim chu
• Father Sphinx-a naupan lai?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, August 1st, 2010 at 5:30 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.